Iehova ena Taunimanima Edia Abidadama Ia Goada Ia Lao

“Ekalesia taudia edia abidadama ena goada ia bada daekau, bona dina ibounai edia hutuma be ia momo daekau.”​—KARA 16:5.

1. Dirava ese aposetolo Paulo be edena bamona ia gaukaralaia?

IEHOVA DIRAVA ese Taso tauna, Saulo ia “abia hidi” dainai, ia gaukaralaia. Paulo be aposetolo dagina ia abia neganai, “hisihisi momo” ia abia. To, ia bona ma haida edia gaukara dainai, Iehova ena orea dekenai lalo-tamona ia noho bona orea ia bada ia lao.​—Kara 9:​15, 16.

2. Dahaka dainai Kara 13:​1–16:5 ena sivarai ita tahua be namo?

² Idau Bese taudia momo herea be Keristen ena tomadiho idia abia dae, bona unai nega ena hakaua oreana idia hebou dainai, Dirava ena taunimanima idia durudia bada idia lalo-tamona totona, bona edia abidadama ia goada ia lao totona. Heduru bada ita abia diba bema unai sivarai ma haida Kara 13:​1–16:5 dekenai ita tahua, badina idia hegeregeredia, hari inai negai danu, Iehova ena Witness taudia edia orea ia bada ia lao bona lauma dalanai hahenamo idia abia. (Isaia 60:22) (Inai sivarai Kara bukana amo oi sibona oi stadilaia neganai, namona be leta idauna dekenai idia torea siridia ibounai oi duahidia.)

Misinari Taudia Idia Gaukara

3. Antioka dekenai “peroveta bona hadibaia taudia” edia gaukara be dahaka?

³ Antioka, Suria ena kongregesen dekena amo, tatau idia siaia kamonai taudia idia durudia bona edia abidadama idia hagoadaia totona. (13:​1-5) Antioka dekenai, “peroveta bona hadibaia taudia” edia ladana be Banaba, Simeon (Nigera), Lukio, Kurene tauna, Manaen, bona Saulo, Taso tauna. Peroveta taudia ese Dirava ena Hereva ena anina idia gwauraia bona do idia vara gaudia idia perovetalaidia, bona hadibaia taudia ese taunimanima idia durudia Dirava ena Hereva idia diba totona bona Dirava ia henia mauri taravatu idia badinaia totona. (1 Korinto 13:8; 14:4) Banaba bona Saulo be mai anina bada gaukarana ta idia abia. Banaba ena tadina Mareko danu idia lao Kupro dekenai. (Kolose 4:10) Salamis kone ena dina daekau kahana hanua ena dubu haida dekenai idia haroro, to ita diba momokani lasi Iuda taudia idia kamonai henidia eiava lasi, badina sivarai ese ia gwauraia lasi. Unai hanua taudia edia kohu be momo dainai, reana Mesia idia tahua lasi ia durudia totona, ani?

4. Misinari taudia be Kupro dekenai idia haroro noho neganai, dahaka ia vara?

⁴ Dirava ese Kupro dekenai edia haroro gaukara ia hanamoa. (13:​6-12) Pafo hanua dekenai, unai misinari taudia ese meamea tauna ta idia davaria, ia be Iuda edia peroveta koikoi tauna ta, iena ladana be Bariesu (Eluma). Ia ese Gavana tauna, Seregio Paulo ia koua toho Dirava ena Hereva ia ura kamonai henia neganai, lauma helaga ese Saulo ia hahonua bona ia gwau: “Oi be Diabolo ena natuna, kara maoromaoro ibounai oi ura koua. Oi be koikoi bona dika ibounai dekenai oi honu. [Iehova] ena maoro daladia hagagevaia kara edena negai do oi hadokoa, a?” Unai neganai, Dirava ese Eluma ia panisia, ena matana idia kepulu ela bona nega ta, bona Seregio Paulo be “Keriso ia abidadama henia. Badina be [Iehova] ena hadibaia hereva dekenai ia hoa bada herea.”

5, 6. (a) Paulo be Antioka, Pisidia dekenai, dubu lalonai ia haroro neganai, Iesu be edena bamona ia sivarailaia? (b) Paulo ena haroro dainai, dahaka ia vara?

⁵ Kupro idia rakatania bona bouti amo idia lao Perega, Asia Minor dekenai. Paulo bona Banaba be ororo kahana ena dala dekenai idia lao Antioka, Pisidia dekenai, bona reana sinavai bona henaoa taudia dainai ‘dika idia davaria diba.’ (2 Korinto 11:​25, 26) Unuseniai, Paulo be dubu dekenai ia haroro. (13:​13-41) Ia ese Dirava ena kara Israel besena dekenai ia riviulaia bona ia hahedinaraia David ena tubuna, Iesu, be Hahemauri Tauna. Ena be Iuda tau badadia edia hereva dainai Iesu idia hamasea, to Dirava ese Iesu ia hatorea isi lou neganai, ena gwauhamata edia tubuna tamana taudia dekenai ia hagugurua. (Salamo 2:7; 16:10; Isaia 55:3) Paulo be kamonai taudia ia hamaorodia, Dirava ese Keriso dekena amo hahemauri dalana ia kehoa bona namo lasi unai harihari gauna idia dadaraia.​—Habakuku 1:5.

⁶ Paulo ena haroro herevana bona hari inai negai Iehova ena Witness taudia idia henia pablik tok be idia hegeregere, taunimanima edia lalona idia veria toho. (13:​42-52) Murina Sabati dinana dekenai, kahirakahira hanua taudia iboudiai idia hebou Iehova ena hereva idia kamonai henia totona, unai dainai Iuda taudia idia mama. Badina, wiki tamona lalonai, unai misinari taudia ese Idau Bese taudia momo idia veridia hereva momokani idia abia dae totona, to unai Iuda taudia edia mauri ibounai lalonai, idia be taunimanima momo idia veridia lasi! Iuda taudia be mai edia hereva dika bona Dirava ena Hereva idia dadaraia dainai Paulo ena hereva idia ura koua, unai dainai hari, nega ia ginidae lauma diarina be ma gabu ta dekenai idia hahedinaraia totona, bona idia dekenai ia gwau: ‘Dirava ena hereva umui ura lasi, bona umui sibona umui gwauraia mauri hanaihanai do umui abia lasi. Unai dainai, Idau Bese taudia dekenai do ai lao.’​—Isaia 49:6.

7. Paulo bona Banaba ese dagedage idia davaria neganai, dahaka idia karaia?

⁷ Idau Bese taudia be hereva momokani idia kamonai neganai idia moale bada, bona mauri hanaihanai idia ura henia taudia ese Dirava idia abia dae bona abidadama taudia ai idia lao. Iehova ena hereva ia lao unai tano ena kahana ibounai dekenai. To, Iuda taudia ese Dirava idia gari henia hahine idia hasiahudia, (reana edia adavana idia doria totona) bona danu hanua tau badadia dekenai idia hereva, Paulo bona Banaba idia dagedage henia bona edia tano amo idia luludia totona. To, unai ese misinari taudia edia gaukara ia koua lasi. Idia be “edia aena kahu idia negea oho, edia kara dika hedinaraia totona,” bona Ikonio (hari ena ladana be Konya) dekenai idia lao, unai be Roma ena provinsi ena hanua badana, Galatia dekenai. (Luka 9:5; 10:11) To, Pisidia Antioka dekenai idia rakatania hahediba taudia be edena bamona? Edia abidadama ia goada dainai, idia “moale bada, bona Lauma Helaga dekenai idia honu.” Unai sivarai ese ita ia hadibaia ena be dagedage ita abia, to unai ese ita ia koua lasi lauma dalanai ita goada ita lao totona.

Dagedage Idia Abia to Edia Abidadama Ia Goada Noho

8. Ikonio dekenai haroro gaukara ia namo dainai, dahaka ia vara?

⁸ Paulo bona Banaba idia dagedage henidia, to edia abidadama ia goada noho. (14:​1-7) Ikonio ena dubu dekenai, Paulo bona Banaba idia haroro dainai, Iuda bona Helene taudia momo be abidadama taudia ai idia lao. Abidadama lasi Iuda taudia ese Idau Bese taudia edia lalona idia ania abidadama matamata taudia idia dagedage henia totona, unai neganai, gaukara taudia rua be gari lasi dekenai Dirava ena siahu amo idia hereva, bona Ia hahedinaraia Ia moale idia dekenai badina siahu ia henidia hoa karadia idia karaia totona. Unai ese badu taudia ia hapararadia, haida be Iuda kahanai bona haida be aposetolo (siaia taudia unai) edia kahanai, idia gini. Aposetolo taudia be gari taudia lasi, to idia kamonai haida ese nadi amo do idia hamasedia, unai dainai, idia laloa namona be idia aonega bona Lukaonia idia rakatania, unai gabu be Galatia ena dina diho kahanai, Asia Minor dekenai. Ita danu bema ita aonega neganai, ena be dagedage ita abia, to hesiai gaukara ita karaia noho diba.​—Mataio 10:23.

9, 10. (a) Aena dika tauna idia hanamoa neganai, Lustera taudia be dahaka idia karaia? (b) Lustera dekenai Paulo bona Banaba be dahaka idia karaia?

⁹ Lukaonia ena hanua ma ta Lustera dekenai idia lao bona idia haroro. (14:​8-18) Unuseniai, Paulo be ia vara dinana amo aena dika tauna ta ia hanamoa. Idia lalo-parara lasi Iehova ese unai hoa karana ia karaia, unai dainai idia boiboi, idia gwau: “Dirava be taunimanima ena toana dekenai idia diho mai ita dekenai.” To, Lukaonia gado dekenai idia hereva dainai, Paulo bona Banaba idia diba lasi dahaka idia hereva. Paulo ese hereva ia gunalaia dainai, unai taudia idia laloa ia be Hereme (unai be hereva dalana diba momo diravana), bona idia laloa Banaba be Dio, unai be edia Greek dirava badana.

¹⁰ Dio ena dubu helaga tauna ese boromakau tau bona herahera gaudia ia mailaia bona boubou ia karaia Paulo bona Banaba totona. Reana Greek gado dekenai idia hereva, eiava ta ese edia hereva be gado dekenai ia hahanaia karana amo unai vadivadi taudia be kara haraga idia hadibaia idia be taunimanima sibona, idia hegeregerena, bona idia danu be mai edia manoka, to idia mai sivarai namona idia harorolaia totona badina idia ura taunimanima be “anina lasi gaudia” (mase diravadia, eiava kaivakukudia) do idia rakatania bona mauri Diravana dekenai do idia lao. (1 Hanua Pavapavadia 16:13; Salamo 115:​3-9; 146:6) Oibe, gunaguna neganai, Dirava ese bese idauidau (Heberu taudia lasi), edia ura kara dalana ia koua lasi, to gau tamona, ia sibona ena kara ia hunia lasi taunimanima dekenai. Ia be kara namodia ia karaia, ‘medu ia siaia diho guba amo, bona aniani haboua nega namodia ia henia. Boga kunu ia henia idia dekenai, bona edia kudouna dekenai moale ia havaraia.’ (Salamo 147:8) Ena be Paulo bona Banaba ese hanua taudia idia hadibaia namonamo, to idia do ura dikadika boubou karana idia karaia idia totona, unai dainai, Paulo bona Banaba idia hekwarahi bada idia koudia totona. Unai misinari taudia idia gwauraidia dirava bona idia hanamodia toho neganai, misinari taudia ese idia koudia, unai kara idia gaukaralaia lasi unai tano dekenai Keristen ena tomadiho idia haginia totona. Unai be haheitalai namona ita dekenai. Bema Iehova ese ita ia henia hesiai gaukara ita karaia namonamo, namo lasi taunimanima edia hanamoa herevana ita ura tahua!

11. “Hisihisi momo lalonai Dirava ena Basileia do ita raka vareai.” Unai hereva amo dahaka ita diba?

¹¹ Kara haraga dagedage ia vara. (14:​19-28) Edena bamona? Iuda taudia, Pisidia Antioka bona Ikonio amo, idia mai bona hanua taudia edia lalona idia ania, vadaeni nadi dekenai Paulo idia hodoa, bona hanua ena murimuri kahana dekenai idia veria badina idia laloa ia mase vadaeni. (2 Korinto 11:​24, 25) To, hahediba taudia ia dekenai idia gini hagegea neganai, ia toreisi bona hehuni dekenai, reana hanuaboi kahanai, Lustera hanua dekenai ia vareai lou. Murina dina dekenai, ia bona Banaba be Derebe dekenai idia lao, bona unuseniai, taunimanima momo be hahediba taudia ai idia lao. Unai misinari taudia be Lustera, Ikonio, bona Antioka dekenai idia giroa lou neganai, Iesu ena hahediba taudia idia durudia, bona idia hagoadaia edia abidadama ia goada noho totona, idia gwau: “Hisihisi momo lalonai Dirava ena Basileia do ita raka vareai.” Ita be Keristen taudia dainai, ita diba dagedage do ita davaria, bona namo lasi iseda abidadama ita hadikaia, unai hisihisi ita mamia lasi totona. (2 Timoteo 3:12) Gunaguna Paulo ese ena revareva ia torea Galatia taudia dekenai, bona elda taudia be dagi idia abia unai Galatia kongregesen iboudiai dekenai.

12. Paulo ena laolao ginigunana ia ore neganai, unai misinari taudia ruaosi be dahaka idia karaia?

¹² Paulo bona Banaba ese Pisidia tano idia raka hanaia bona hereva idia harorolaia Perega dekenai, unai be Pamfulia tano ena hanua badana ta. Gabeai, idia giroa lou Antioka, Suria dekenai. Unai neganai, Paulo ena laolao ginigunana ia ore, bona unai misinari taudia ruaosi ese kongregesen taudia dekenai “Dirava danu idia karaia hebou gaudia ibounai ena sivarai idia gwauraia. Idia gwau, ‘Dirava ese abidadama ena iduara idau bese taudia dekenai ia kehoa vadaeni.’ ” Antioka dekenai, nega sisina bada hahediba taudia danu idia noho, bona unai ese ia durudia edia abidadama idia hagoadaia totona. Unai hegeregerena, hari inai negai loaloa elda taudia ese ita idia vadivadi henia bona lauma dalanai ita idia hagoadaia danu.

Henanadai Badana Idia Haerelaia

13. Keristen ena tomadiho lalonai Heberu bona Iuda lasi taudia idia parara garina, dahaka do idia karaia be gau badana?

¹³ Edia abidadama ia goada totona gau badana be idia lalo-tamona. (1 Korinto 1:10) Keristen ena tomadiho lalonai Heberu bona Iuda lasi taudia idia parara garina, gau badana be hakaua oreana idia hebou, badina Idau Bese taudia momo be Dirava ena orea dekenai idia vareai; unai dainai, Mose ena Taravatu idia badinaia bona kopina utua kara idia karaia be maoro eiava lasi herevana idia hamaoromaoroa be gau badana. (15:​1-5) Tatau haida Iudea amo idia lao Suria Antioka dekenai, bona Idau Bese taudia idia hadibaia bema kopina utua karana idia abia lasi, mauri do idia abia lasi. (Esodo 12:48) Unai dainai, Paulo, Banaba, bona ma haida idia siaia Ierusalem dekenai aposetolo bona elda taudia idia itaia totona. Unuseniai danu, Iesu idia abidadama henia taudia haida, Farisea orea amo idia mai taudia unai, idia gwau Idau Bese taudia be kopina utua kara idia abia bona Mose ena Taravatu idia badinaia be gau badana.

14. (a) Ena be Ierusalem dekenai idia hebou neganai hepapahuahu ia vara, to edia haheitalai namona be dahaka? (b) Unai neganai, Petero ena hereva badana be dahaka?

¹⁴ Hebou badana ta idia abia Dirava ena ura kopina utua karana dekenai idia diba maoromaoro totona. (15:​6-11) Oibe, ena be hepapahuahu ia vara, to kerere badana ta ia vara lasi​—unai be haheitalai namona hari elda taudia dekenai! Petero ia gwau: ‘Dirava ese lau ia abia hidi, lauegu uduna amo Idau Bese taudia [Korenelio hegeregerena] Sivarai Namona ena hereva do idia kamonai bona idia abidadama henia totona. Ia ese lauma helaga idia ia henia ita dekenai ia henia hegeregerena. Iseda helaro be Lohiabada Iesu ena hariharibada dainai mauri do ita abia. Idia danu be unai bamona. [Kara 10:​44-47] Vadaeni, badina be dahaka Dirava umui ura koia, metau gauna [Taravatu badinaia karana] be diba tahua taudia edia aiona dekenai umui kwatua, badina iseda sene taudia bona ita danu ita huaia be hegeregere lasi. Ita [Iuda taudia] iseda kamonai gauna be ita abidadama noho, Lohiabada Iesu ena hariharibada dainai mauri do ita abia. Idia danu unai bamona.’ Dirava ese kopina idia utua lasi Idau Bese taudia ia abia dae neganai, ia hahedinaraia kopina utua karana bona Taravatu badinaia karana amo, hahemauri do idia abia lasi.​—Galatia 5:1.

15. Iakobo ia gwauraia hereva badadia be dahaka, bona ia gwau Idau Bese taudia dekenai dahaka hereva do idia torea be namo?

¹⁵ Petero ena hereva ia hadokoa neganai, kongregesen taudia ibounai be regerege idia karaia lasi, to hereva ma haida idia do noho. (15:​12-21) Banaba bona Paulo be idia dekena amo Dirava ese toa bona hoa karadia Idau Bese taudia huanai ia karaia karadia idia gwauraia. Bena murinai, Iesu ena tadina Iakobo, ia gwau: “Simeona [Petero ena Heberu ladana] ese ita ia hamaoroa vadaeni Dirava ese gunaguna idau bese taudia ia laloa, bona idia dekena amo bese ta ia abia hidi, iena ladana idia abia.” Iakobo ia hahedinaraia “Davida ena dabua rumana” (Davida ena iduhu lalonai, pavapava dagina ia haginia lou karana), ese peroveta herevana ia hagugurua Iesu ena hahediba taudia (Basileia abia taudia) be Iuda bona Idau Bese taudia dekena amo idia gogodia neganai. (Amos 9:​11, 12; Roma 8:17) Unai be Dirava ena ura dainai, hahediba taudia idia abia dae be namo. Iakobo ia gwau namona be revareva Idau Bese Keristen taudia dekenai idia torea, bona idia hamaoroa (1) kaivakuku dekenai kara mirodia, (2) heudahanai, bona (3) rara bona aiona idia gigia gaudia edia hidio do idia rakatania. Unai taravatu be Mose ena toretore dekenai idia noho, bona edia dubu lalonai idia duahia Sabati dina iboudiai.​—Genese 9:​3, 4; 12:​15-17; 35:​2, 4.

16. Gunaguna hakaua oreana idia gwauraia heduru hereva toi be dahaka, bona edena bamona ita idia do durua noho?

¹⁶ Vadaeni, hakaua oreana be revareva Antioka, Suria, bona Kilikia dekenai idia noho Idau Bese taudia dekenai idia siaia. (15:​22-35) Lauma helaga bona unai revareva idia torea taudia idia gwau namona be inai gaudia idia dadaraia: Kaivakuku dekenai idia bouboulaia gaudia, rara (taunimanima haida be hanaihanai idia ania); aiona idia gigia gaudia to edia rara ia diho lasi (Dirava idia diba lasi taudia momo ese unai bamona vamuna idia ura bada); bona heudahanai (Greek, por·neiʹ a, anina be Bible ena hereva headava dekenai idia badinaia lasi, to ma ta idia sihari henia). Bema unai bamona kara ibounai idia dadaraia, lauma dalanai do idia goada. Hari inai negai, Iehova ena Witness taudia idia goada, badina “taravatu mai badina gaudia” idia badinaia dainai. Inai hereva “dohore umui be namo” be idia gwauraia taunimanima idia bamahuta henia totona, tauanina dekenai gorere do ia noho lasi karana idia gwauraia lasi. Unai revareva be Antioka dekenai idia duahia neganai, kongregesen taudia idia moale bada badina unai hereva ese idia ia hagoadaia. Unai nega lalonai, Paulo, Sila, Banaba, bona ma haida edia hagoadaia herevadia dainai, Dirava ena taunimanima Antioka dekenai edia abidadama ia goada ia lao. Namona be ita danu dala ita tahua ita bamoa kamonai taudia ita hagoadaia bona ita durudia totona.

Misinari Laolao Iharuana Ia Matamaia

17. (a) Misinari laolao iharuana idia karaia gwauraia neganai, dahaka hekwakwanai ia vara? (b) Paulo bona Banaba idia hepapahuahu neganai, dahaka idia karaia lasi?

¹⁷ Aposetolo Paulo ena misinari laolao iharuana ia karaia gwauraia neganai, hekwakwanai ia vara. (15:​36-41) Paulo ia gwau namona be ia bona Banaba be idia giroa lao Kupro, Asia Minor dekenai, kongregesen idia vadivadi henidia totona. Banaba be ia ura, to ia ura ena varavara, Mareko, danu idia lao. Paulo ia ura lasi, badina guna Mareko ese idia ia rakatania Pamfulia dekenai. Idia ruaosi be unai hereva dainai “idia hepapahuahu bona idia parara.” To, Paulo bona Banaba be ia vara gauna be ma elda taudia haida eiava hakaua oreana dekenai idia maumauraia lasi idia sibodia edia maoro idia hahedinaraia totona, badina unai be sibodia edia hepapahuahu karana. Idia maumauraia lasi be haheitalai namona!

18. Paulo bona Banaba idia parara dainai, dahaka ia vara, bona unai sivarai ese ita edena bamona ia durua diba?

¹⁸ Idia hepapahuahu dainai idia parara. To Banaba be Mareko danu idia lao Kupro dekenai. Paulo be Sila danu “Suria bona Kilikia tano” dekenai idia lao, bona kongregesen taudia idia hagoadaia. Reana Banaba be unai bamona ia karaia badina ena ruma bese taudia ia laloa dainai, to Paulo be aposetolo dagi ia abia bona ia be “abia hidi” tauna dainai, Banaba ese iena hereva ia badinaia be namo. (Kara 9:15) Ita be edena bamona? Namona be tiokratik dala ita abia dae bona “hesiai tauna mai ena kamonai bona mai ena kara maoromaoro” oreana ena hereva ita badinaia!​—Mataio 24:​45-47.

Maino Ia Bada Ia Lao

19. Hari inai negai, Timoteo be edena bamona haheitalai namona ia hahedinaraia Keristen memero bona kekeni dekenai?

¹⁹ Unai hepapahuahu ese kongregesen ena maino ia hadikaia lasi. Dirava ena taunimanima edia abidadama ia goada ia lao noho. (16:​1-5) Paulo bona Sila idia lao Derebe bona Lustera dekenai. Timoteo be unuseniai ia noho, ena sinana be kamonai Iuda hahine, Eunike, bona ena tamana be kamonai lasi Helene tauna. Timoteo ena lagani be bada lasi badina murina lagani 12 ia lao 15 bamona, idia hamaoroa “do idia itaia oi be tau matamata, to . . . toana namona bamona do oi lao.” (1 Timoteo 4:12) “Varavara ibounai Lustera bona [unai gabu amo kilomita 29] Ikonio dekenai, idia gwau Timoteo be tau namona.” Idia diba iena hesiai gaukara ia namo bona ia be Dirava ena kara ia karaia tauna ta. Namona be hari inai negai memero bona kekeni be Iehova ena heduru idia tahua unai bamona ladana namona idia abia totona. Aposetolo Paulo ese Timoteo ena kopina ia utua badina ia ura lasi gau ta ese Iuda tatau bona hahine edia dala ia koua, badina ia diba Mesia ena sivarai idia diba be gau badana. Ia diba do idia lao Iuda taudia edia ruma bona dubu dekenai, bona unai taudia idia diba Timoteo ena tamana be Helene tauna. Bible ena taravatu idia utua lasi dalanai, Iehova ena Witness taudia be dala iboudiai amo taunimanima idauidau dekenai sivarai namona idia harorolaia do idia abia dae totona.​—1 Korinto 9:​19-23.

20. Gunaguna hakaua oreana ena revareva idia badinaia dainai, dahaka ia vara, bona oi laloa ena anina ita dekenai be dahaka?

²⁰ Timoteo be Paulo bona Sila ia bamodia bena idia ese hahediba taudia dekenai hakaua oreana ena sisiba idia gwauraia do idia badinaia totona. Dahaka ia vara? Reana Suria, Kilikia, bona Galatia taudia ia gwauraidia neganai, Luka ia gwau: “Ekalesia taudia edia abidadama ena goada ia bada daekau, bona dina ibounai edia hutuma be ia momo daekau.” Oibe, hakaua oreana ena revareva idia badinaia neganai, lalo-tamona idia abia bona lauma dalana dekenai idia namo idia lao. Unai be haheitalai namona iseda nega dikana totona, Iehova ena taunimanima be abidadama dekenai idia lalo-tamona bona idia gini auka be namo!

Edena Bamona Do Oi Haere?

◻ Dagedage idia davaria neganai, Paulo bona Banaba be dahaka idia karaia?

◻ “Hisihisi momo lalonai Dirava ena Basileia do ita raka vareai.” Unai hereva amo dahaka ita diba?

◻ Keristen taudia ginigunadia edia hakaua oreana idia siaia revarevana ena hereva toi amo dahaka sisiba ita abia?

◻ Keristen taudia ginigunadia edia abidadama ia hagoadaia gaudia be edena bamona ita idia durua hari inai negai?