Edena Dala ai Witnes Lasi Adavadia Ita Durua Diba?
1 Iehova ena hesiai taudia momo edia adavadia be tadikaka idia diba namonamo bona kongregesen taudia idia laloa bada, to idia ura lasi Dirava ena hesiai taudia ai idia lao. Iseda taihu ta ena Witnes lasi adavana ia gwau: “Ruma-ta-ruma-ta haroro gaukara do lau karaia lalohadaina ese lau ia koua.” Ma haida be Baibel ia gwauraia dika gaudia idia rakatania be namo, eiava idia laloa edia adavana ese idia karaia tiokratik gaukara idauidau be do idia karaia diba lasi. Edena bamona idia ita durua diba?
2 Idia Ita Laloa Bada: Ma haida ita laloa bada bona idia lalo-hekwarahilaia gaudia ita dibaia karana ese reana dala do ia kehoa, idia ese Baibel ena hereva momokani idia abia dae totona. (Fili. 2:4) Nega momo, guna edia adavadia edia tomadiho idia abia dae lasi taudia be Witnes taudia ma haida edia lalokau heduruna idia herevalaia. Paragraf ginigunana ai ia noho taihu ena adavana, ia gwau: “Kongregesen ena elda ta ladana José, ese lau ia durua bada. Lau laloa ia ese lau ia hagoadaia dainai, stadi lau matamaia.” Taihu ma ta ena adavana ia gwau, ia idia vadivadi henia tadikaka idia ura bada ia laloa bada gaudia idia herevalaia hebou. Ia gwau: “[Egu adavana] ena abidadama be dala idauna amo lau laloa matama. Ena turana be diba momo taudia, gau idauidau idia herevalaidia diba taudia.”—1 Kor. 9:20-23.
3 Heduru Namona Henia: Witnes lasi adavadia be reana idia abia heduru namona danu ese edia lalona ia veria. (Aon. 3:27; Gal. 6:10) Taihu ta ena Witnes lasi adavana ena motuka ia dika neganai, Witnes tau matamata ta ese ia durua. Ia gwau: “Unai lau laloa bada.” Tadikaka ma ta be dina ibounai lalonai taihu ta ena Witnes lasi adavana ia durua, ena gabu ena magu idia haginia totona. Idia gaukara hebou bona herevahereva karana ese hetura karana ia havaraia. Pura rua murinai, unai tau be tadikaka dekenai ia lao bona ia gwau: “Hari be nega namona egu mauri lalonai gau haida lau haidaua totona. Bema namo Baibel amo lau oi stadi henia.” Lauma dalanai ia goada ia lao haraga bona hari ia be bapatiso Witnes tauna ta.
4 Iseda teritori ai kamonai taudia ita tahua noho lalonai, namona be eda abidadama tamona taudia edia Witnes lasi adavadia ita durudia noho.—1 Tim. 2:1-4.