Iehova Ena Hoa Karadia Gwauraia Noho

¹ Tau ta be iseda Dirava badana, Iehova, ida ita hahegeregerea diba lasi! Davida ia gwau: “Lohiabada e, lauegu Dirava, oiemu durua karadia ai dekenai be momo herea. Tau ta be oiemu kara bamona ia karaia diba lasi.” (Sal. 40:5) Iehova ena hoa karadia haida be inai: tanobada bona guba ia karaia, Mesia Basileiana, ena hebogahisi mai lalokau karadia ena taunimanima dekenai, bona tanobada hegegemadai haroro gaukarana. (Sal. 17:​7, 8; 139:14; Dan. 2:44; Mat. 24:14) Iehova ita lalokau henia bona ia karaia gaudia iboudiai ita laloa bada karana ese ita ia doria ma haida dekenai ia ita herevalaia totona. (Sal. 145:​5-7) March, April bona May lalonai, dala ia noho unai bamona ita karaia badabada totona.

² Heduru Painia Gaukara Amo: Oiemu sediual oi haidaua diba March, April bona May eiava unai hua ta ena gaukara badana dekenai hora 50 oi haroro totona, a? Emu sediual oi haidaua be namo. (Efe. 5:16) Momo idia davaria, heduru painia gaukara ese idia ia durua edia haroro gaukara idia hanamoa totona. Haroro gaukara lalonai idia gari lasi bona Baibel idia gaukaralaia momo. Haroro gaukara dekenai nega bada idia henia dainai kamonai taudia idia durua noho diba, bona Baibel stadi ta idia do hamatamaia lasi taudia haida ese heduru painia gaukara lalonai Baibel stadi ta idia hamatamaia vadaeni. Heduru painia gaukarana lalonai ita hekwarahi ma haida ita durua totona dainai, ia be moale bada gaukarana.​—Kara 20:35.

³ Namo lasi karaharaga oi gwau, emu noho dalana be hegeregere lasi heduru painia gaukara oi karaia totona. Lagani gunanai, heduru painia gaukara ia karaia elda ta be mai ena natuna rua bona ful-taim moni gaukara ia karaia. To unai tadikaka ese edena dala ai heduru painia gaukara ia karaia diba? Pura lalonai moni gaukara ia karaia dainai, palani ia karaia Saturday bona Sunday edia dina ibounai lalonai ia haroro totona, unai ia hamatamaia totona Saturday ibounai ena daba 7 o’klok ai dala haroro gaukara ia karaia. Kongregesen dekenai, unai bamona tadikaka ma haida danu be heduru painia gaukara idia karaia, bona idia ta ta idia durua bona hagoadaia heheni. Kongregesen ma ta ai, taihu burukana ta ena mauri lagani 99 be ena tubuna kekeni ese ia noia murinai, ena lalona ia hadaia May lalonai painia gaukara ia karaia totona. Kongregesen taudia ma haida ese unai taihu burukana ena uilisea idia doria amo ia idia durua, ruma-ta-ruma-ta ai ia haroro bona Baibel stadi ia karaia totona. Danu, ia ese telefon haroro, dala haroro, bona revareva torea amo ia haroro. Ia diba momokani unai be iena goada amo lasi to Iehova ena heduru dainai ia karaia.​—Isa. 40:​29-31.

⁴ Oiemu noho dalana hegeregerena sediual namona ta oi karaia toho. Inai kahana ena rau 5 dekenai idia atoa sediual ese oi do ia durua. Oi be ful-taim moni gaukara oi karaia eiava oi sikuli noho? Reana Saturday bona Sunday ena sediual ta oi karaia be namo herea oi totona. Bema oi gorere eiava emu goada ia hegeregere lasi dina ta ibounai lalonai oi haroro totona, reana dina ta ta ai miniti haida sibona oi haroro diba ena sediual oi karaia be namo. Bema oi ura heduru painia gaukara oi karaia, namona be ma haida dekenai unai oi herevalaia. Reana unai be edia tahua gauna ai do idia halaoa danu.

⁵ Matamata Taudia Idia Haroro Diba Daladia: Natuna maragidia ese Iehova ena hoa karadia idia herevalaia neganai, Iehova ia moale. (Sal. 71:17; Mat. 21:16) Bema oi be matamata bona oi bapatiso vadaeni, reana sikuli holide negana ta ai heduru painia gaukara oi karaia diba. Bema heduru painia gaukara oi karaia diba lasi, to unai hua toi lalonai emu haroro gaukara oi habadaia bona hanamoa totona be tahua gauna ai oi halaoa diba, a? Bema haroro gaukara dekenai emu tama sina oi bamoa to bapatiso lasi pablisa ta ai oi do lao lasi, hari be nega namona unai bamona oi karaia totona. Namo lasi oi laloa Baibel ena henanadai edia haere ibounai oi diba namonamo eiava ia bapatiso tauna eiava hahine badana ena diba oi abia. Baibel ena hahediba badadia oi diba, a? Baibel ena kara maoromaoro taravatudia oi badinaia, a? Oi ura Iehova ena Witnes ta ai oi lao, a? Vadaeni, emu tama sina ida unai gauna umui herevalaia hebou. Idia ese dala idia karaia diba oi ida elda taudia umui hereva henia totona, unai amo idia itaia bema oi hegeregere bapatiso lasi pablisa ai oi lao totona.​​—Hesiai Gaukara bukana, rau 98-9 itaia.

⁶ Ma Haida Durua Idia Haroro Totona: March, April, bona May lalonai gaukara badana do ita karaia ena nega ia kahirakahira lalonai, idia goada idia lao Baibel stiuden taudia be pablisa ai idia lao, ita ida idia haroro totona. Bema emu Baibel stiuden ta ia goada noho, emu buka stadi naria tauna eiava haroro naria tauna edia heduru oi tahua haraga be namo. Reana idia ta be unai stadi ai ia helai diba, stiuden ena goada ia itaia totona. Bema stiuden ia hegeregere bona ia ura pablisa ai ia lao, hakaua naria tauna ese dala ia karaia diba elda rua, oi bona stiuden umui herevahereva totona. (Gima Kohorona, May 1, 1989, rau 18 itaia.) Bema idia abia dae stiuden ia hegeregere ia haroro totona, vadaeni haroro gaukara ai ia oi hadibaia matamaia be namo.

⁷ Namona be buka stadi naria taudia ese edia grup lalonai idia noho haroro lasi pablisa eiava idia haroro diba lasi pablisa taudia idia durua be namo. Idia oi noia haroro gaukara lalonai umui gaukara hebou totona. Bema ta be nega daudau lalonai ia haroro lasi, namona be elda taudia rua ida ia herevahereva guna, unai amo idia itaia bema ia hegeregere ia haroro lou totona. (November 2000 ena Iseda Basileia Gaukara ai ia noho Henanadai Mauana itaia.) Unai hua toi edia hesiai gaukara badana lalonai, kongregesen ena ura bada karana ese idia ia hagoadaia edia mauri lalonai haroro gaukara idia karaia hanaihanai lou totona.

⁸ Hari Hegaegae Haroro Gaukara Habadaia Totona: Elda taudia e, hari kongregesen dekenai heduru painia gaukara urana umui hagoadaia matamaia. Emui hagoadaia herevadia bona haheitalai namodia amo unai umui karaia diba. (1 Pet. 5:3) Lagani gunanai, kongregesen dekenai heduru painia idia karaia taudia be hida? Inai lagani lalonai, unai namba umui hanaia diba, a? Namona be buka stadi naria taudia bona edia durua taudia ese dala idia tahua grup ai idia noho taudia ibounai idia hagoadaia, edia haroro gaukara idia habadaia totona. Haroro naria taudia ese dala do idia karaia haroro hebou ma haida idia karaia totona. Idia hegaegaelaia daladia be kongregesen dekenai idia hadibaia haraga be namo. Namona be idia manada pablisa taudia ese grup idia hakaua bona haroro heboudia be nega korikorina ai idia hamatamaia bona hadokoa. (October 2001 ena Iseda Basileia Gaukara ai ia noho Henanadai Mauana itaia.) Namona be haroro naria tauna ese danu dala ia karaia teritori, magasin bona buka idia hegeregere totona.

⁹ Vanegai laganina lalonai, tano ta ai kongregesen ta ena elda taudia be mai edia ura bada ida March, April bona May do lasi lalonai heduru painia gaukara idia hagoadaia totona, idia haida be heduru painia ena aplikeisen fom idia atoa. Idia ese haroro heboudia ma haida idia hegaegaelaia​—ta be dala haroro totona, iharuana be sikuli amo idia raka-lasi taudia totona, bona ihatoina be moni gaukara amo idia raka-lasi taudia totona. Ma danu, Saturday totona haroro heboudia toi idia hegaegaelaia. Bona April lalonai kongregesen taudia 66 be heduru painia gaukara idia karaia!

¹⁰ Emui ruma bese stadi gabena ai nega oi atoa March, April bona May totona tahua gaudia namodia umui herevalaia be namo, ani? Ruma bese taudia edia gaukara hebou bona palani namonamo karana dainai, haida eiava ibounai be heduru painia gaukara idia karaia diba. Bema unai idia karaia diba lasi, emui haroro gaukara negana umui habadaia eiava haroro heboudia ma haida umui lao karana be tahua gauna ai umui halaoa. Ruma bese ida unai gauna umui gurigurilaia be namo. Oi abia dae diba Iehova ese emui hekwarahi do ia hanamoa.​—1 Ioa. 3:22.

¹¹ Iehova Ena Hoa Karana Badana: Iehova ena lalokau ia hahedinaraia dalana hereadaena be, iena Natuna be harihari gauna bamona ia henia, iseda mauri davana ia karaia totona. (1 Ioa. 4:​9, 10) Keriso ena mauri davalaia boubouna dainai, taunimanima be kara dika bona mase amo ia hamauridia. (Roma 3:​23, 24) Iesu ia bubua rarana ese gwauhamata matamatana ia hamomokania, unai amo goevadae lasi taudia be Dirava ena ubua natudia ai idia lao bona guba Basileia ai idia lohia diba totona. (Ier. 31:​31-34; Mar. 14:24) Gau badana be, Iesu ese Dirava ia kamonai henia goevagoeva dainai Iehova ena ladana ia hahelagaia. (Deu. 32:4; Aon. 27:11) Sunday, April 4, dina ia diho murinai, Keriso ena mase ena Memorial hebouna be tanobada hegegemadai do idia karaia.

¹² Lohiabada Ena Anibou ese Iehova ena hoa karadia ia hahedinaraia. Memorial dekenai idia henia herevana ese ita ia durua, Iehova ese mauri davana ia henia amo ia karaia gauna ita lalo-pararalaia bona laloa bada totona. Hebou lalonai idia noho kamonai taudia ese Dirava ena hoa karadia ma haida do idia laloa bada. Iehova ese ena taunimanima dekenai ia hadibaia lalo-tamona bona lalokau karana be do idia itaia. (Efe. 4:​16, 22-24; Iam. 3:​17, 18) Taunimanima momo ese unai hebou badana idia lao henia karana ese ta ena lalona ia veria momokani diba, unai dainai ita ura momo herea idia mai.​—2 Kor. 5:​14, 15.

¹³ Ma Haida Boiria Idia Mai Totona: Namona be do oi boiria taudia edia lista ta oi karaia hegaegae matamaia haraga. Namona be emu lista ai, Witnes lasi ruma bese taudia, dekena taudia, emui gaukara eiava sikuli turadia, Baibel stiuden gunadia bona matamatadia, bona emu lou henia taudia ibounai edia ladana oi torea. Buka stadi naria taudia be edia lista dekenai, idia haroro lasi pablisa edia ladana idia torea be namo.

¹⁴ Idia printaia Memorial boiboi pepadia dekenai Memorial negana bona gabuna oi taipia eiava torea namonamo, bona unai boiboi pepadia oi gaukaralaia. Eiava reana oi ura March 15, 2004, Watchtower eiava March 22, 2004, Awake! magasin edia rau dokona kahanai ia noho boiboi herevana oi hahedinaraia. April 4 ia kahirakahira lalonai, namona be emu lista ai idia noho taudia be oi vadivadi henidia eiava telefon amo oi hadibadia lou.

¹⁵ Memorial Dekenai: Memorial hanuaboina ai oi ginidae haraga be namo. Kamonai taudia matamatadia ita hedavari henia neganai heabidae karana ita hahedinaraia. (Roma 12:13) Bema haida oi boiria mai, oi be mai emu maduna badana. Idia oi welkam henia, bona idia oi hakaua lao kongregesen taudia ma haida idia hedavari henia totona. Reana idia oi durua diba oi badinai idia helai totona. Bema idia haida be Baibel eiava ane bukana ta idia dogoatao lasi, dala oi karaia oi ida eiava ma haida ida Baibel eiava ane bukana idia itaia hebou totona. Memorial hebouna murinai, bema idia be mai edia henanadai, umui hegaegae umui haerelaia totona. Bema haida be edia nega ginigunana hebou dekenai idia mai, idia oi nanadaia bema idia ura Dirava ena Hereva bona ura dekenai gau ma haida idia dibaia. Oi nanadaia bema idia ura Baibel stadi idia abia.

¹⁶ Hebou Idia Mai Kamonai Taudia Durua Noho: Memorial purana ia ore murinai, idia hebou taudia ita durua noho be namo. Anina be guna idia hebou hanaihanai to hari nega ta ta sibona kongregesen idia bamoa taudia danu ita durua be namo. Elda taudia idia hegaegae unai bamona taudia idia durua totona, idia tahua dahaka dainai unai taudia be lauma dalanai idia manoka idia lao. Idia hadibadia hari be karaharaga negana. (1 Pet. 4:7) Ibounai umui durua Baibel ena hagoadaia herevana, namona be Dirava ena taunimanima idia hebou hanaihanai ena namo idia itaia totona.​—Heb. 10:​24, 25.

¹⁷ Iehova ena hoa karadia be hereadae momokani dainai, herevana bema ita noho ela bona hanaihanai, to unai ibounai ita lalo-pararalaia diba lasi. (Iobu 42:​2, 3; Had. 3:11) Unai dainai, ia ita hanamoa gaudia be momo. Inai Memorial negana ai, ita hekwarahi eda haroro gaukara ita habadaia karana amo ita hahedinaraia diba, Iehova ena hoa karadia ita moalelaia.

[Study Questions]

1. Iehova ena hoa karadia amo oi laloa bada gaudia haida be dahaka?

2. Heduru painia gaukara amo dahaka namo ita abia diba?

3. Ena be haida edia noho dalana be hegeregere lasi, to edena bamona idia ese heduru painia gaukara idia karaia diba?

4. Heduru painia gaukara ita karaia totona sediual ta ita karaia neganai, ita laloa bada gaudia haida be dahaka?

5. Matamata taudia ese dahaka tahua gaudia idia atoa diba March, April, bona May totona?

6. Edena dala ai Baibel stiuden taudia ita durua diba sivarai namona harorolaia taudia ai idia lao totona?

7. Idia haroro diba lasi pablisa bona idia haroro lasi pablisa taudia be edena bamona ita durudia diba?

8, 9. Elda taudia ese dahaka idia karaia diba, gaukara badana urana idia habadaia totona?

10. Edena dala ai ruma bese taudia idia hegaegae diba edia haroro gaukara idia habadaia totona?

11. (a) Keriso ena boubou gauna ese ia havaraia hoa gaudia be dahaka? (b) Oiemu kongregesen ese Memorial be edena nega bona gabu ai do idia karaia?

12. Edena dala ai Lohiabada Ena Anibou lao henia karana ese kamonai taudia dekenai namo ia havaraia diba?

13, 14. Daidia ita boiria Memorial dekenai idia mai totona be namo, bona edena dala ai?

15. Edena dala ai Memorial hanuaboina ai heabidae karana ita hahedinaraia diba?

16. Hebou idia mai kamonai taudia be lauma dalanai idia goada idia lao noho totona, dahaka ita karaia diba be namo?

17. Dahaka dainai Iehova ena hoa karadia ita gwauraia hedinarai noho be namo?

[Chart on page 5]

Inai Sediual ta Oi Gaukaralaia Diba Oi Heduru Painia Totona, A?

March Su M* Tu* W* Th F Sa Hua Ibounai

Dina Ta Ta 2 1 1 1 1 1 5 51

Dina Rua 0 5 0 5 0 0 0 50

April Su M Tu W Th* F* Sa Hua Ibounai

Dina Ta Ta 2 1 1 1 1 1 5 50

Dina Rua 0 0 0 0 5 5 0 50

May Su* M* Tu W Th F Sa* Hua Ibounai

Dina Ta Ta 2 1 1 1 1 1 4 51

Dina Rua 0 5 0 0 0 0 5 50

* Hua lalonai, dina ibounai be 5