Ita Hamomokania Eda Abidadama Ia Goada!
1 Iesu be ena mai bona nega dokona ia herevalaia neganai, aposetolo taudia be ena hereva idia kamonai namonamo. Taunimanima dekenai gau dikadia momo do idia vara hegeregere, tuari, hitolo, tano mareremarere bona gorere idauidau. Bena, Iesu ia gwau haida ese iena hahediba taudia do idia inai henia, do idia dagedage henia, bona do idia hamasea. Peroveta koikoi taudia momo do idia toreisi, vadaeni taunimanima momo do idia hakaua kerere. Taunimanima momo edia lalokau be do ia keru.
2 Iesu be unai gaudia ia herevalaia murinai, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” Reana aposetolo taudia be unai hereva dainai idia hoa. (Mat. 24:3-14) Hari inai negai, unai peroveta herevana ia guguru noho be ita itaia. Inai nega dikadia lalonai, Iehova ena Witnes taudia be sivarai namona idia harorolaia goadagoada. Ena be taunimanima edia lalokau be ia keru, to ita ese ma haida ita lalokau henia karana be ia ore lasi. Ena be tanobada taudia ibounai ese ita idia inai henia, to ita ese Basileia ena Sivarai Namona be tanobada ibounai dekenai ita harorolaia.
3 Rau 3 ia lao rau 6 ai, Iehova ena Witnes taudia edia hesiai laganina gunana ena ripoti ita itaia neganai, unai ese ita ia hagoadaia bada! Lagani 16 lalonai, ita ese hora bilioni ta mai kahana be haroro bona hahediba taudia halaoa gaukarana ai ita halusia. Unai ese ia hamomokania Iehova ena Witnes taudia edia abidadama ia goada! Painia taudia edia namba be 5.8 pesen amo ia bada daekau, pablisa taudia edia namba be 3.1 pesen amo ia bada daekau, bona Baibel stadi ena namba be 4.4 pesen amo ia bada daekau. Hesiai laganina gunana ai, bapatiso taudia edia namba be 20.1 pesen amo ia bada daekau. Ita moale badina taunimanima ibounai kahirakahira 7 milioni be mai abidadama ida Iehova idia hesiai henia—unai be lagani gunana ena namba ia hanaia momokani! Rau 3 ia lao rau 6 ai ia noho ripoti oi itaia neganai, dahaka ese oi ia hagoadaia bada?
4 Ena be rau 3 ia lao rau 6 ai ia noho ripoti ena namba idia bada, to ita laloaboio lasi, unai namba be abidadama tadikaka taihu ia laulaulaia. Haheitalai ta mani ita laloa. Guillermo be Bolivia ai ia bada daekau. Ia be lagani 1935 ai ia vara, bona ena mauri lagani be 9 neganai, koka plenteisini dekenai ia gaukara. Ia maragi neganai, ia be koka raudia ia ania momo, gaukara metaudia amo ia davaria hisihisi ia hamaragia totona. Gabeai, ia inuinu momo bona kuku ia ania danu. Ia ese Iehova ena ura ia dibaia neganai, kuku ania karana bona inuinu momo karana ia hadokoa. To, koka ania karana ia hadokoa be auka. Nega iboudiai ia guriguri goadagoada unai kara ia hanaia totona. Ena kara gunadia ia rakatania bena bapatiso ia abia. Ia gwau, “Hari lau mamia lauegu tauanina be ia goeva bona lau moale.”
5 Iehova be taunimanima ia laloa bada. Ia ura bada taunimanima be edia kara kereredia amo idia helalo-kerehai. (2 Pet. 3:9) Ita danu, namona be unai bamona ita laloa. Namona be mai eda kudouna ibounai ida kudou-maoro taudia ita durua, unai amo ita karaia bamona, Iehova do idia diba bona idia lalokau henia.
[Study Questions]
1. Iesu be dahaka ia perovetalaia?
2. Dahaka dainai Iehova ena Witnes taudia ese sivarai namona be tanobada hegegemadai idia harorolaia be hoa gauna?
3. Tanobada hegegemadai ena ripoti ese edena bamona oi ia hagoadaia?
4. Tadikaka ta be bapatiso ia abia totona, dahaka hekwakwanai ia hanaia?
5. Oi ura dahaka oi karaia?