‘Do Oi Giroa Mai Ena Toana be Dahaka?’
“Oiemu hereva gauna edena negai do idia vara? Do oi giroa mai, bona tanobada dokona danu, ena toana be dahaka?”—MATAIO 24:3.
1, 2. Dahaka ese ia hahedinaraia taunimanima ese nega vaira idia laloa?
TAUNIMANIMA momo idia ura do idia diba dahaka be nega vairai do ia vara. Oi danu, a? Iena buka ladana Future Shock lalonai, Profesa Alvin Toffler ia gwau: ‘Ita itaia, nega vaira gaudia lalohadailaidia oreadia idia haginidia, bona nega vaira gwauraia bukadia be England, France, Italy, Germany, bona United States ai idia hedinarai.’ Toffler be ma ia gwau: “Momokani, ta ese nega vaira do ia ‘diba’ momokani dalana be lasi.”
2 Buka ta ladana Signs of Things to Come ese babalau karadia idauidau ia gwauraidia, unai kara amo dala idia tahua, ta ta edia vaira dinadia ai do idia vara gaudia do idia diba sisina totona. To unai diba be unai dala amo do ita tahua be dika, Iehova Dirava, diba momokani ena badina, ena amo do ita tahua be namo.
3. Dahaka dainai diba be Dirava ena amo ita tahua be namo, nega vaira do ita diba totona?
3 Dirava korikori ia gwau: “Lau laloa hegeregerena, unai bamona do ia vara; bona lau lalohadailaia hegeregerena, unai bamona do ia momokani.” (Isaia 14:24, 27; 42:9) Oibe, Iehova ese taunimanima na gabeai do idia vara gaudia ia hadibalaidia guna diba; nega momo peroveta taudia edia amo ia hereva. Idia ta ia gwau: “Iehova ese kara ta do ia karaia lasi ela bona ena hereva hehunidia be ena hesiai taudia, peroveta taudia, do ia hadibalaidia guna.”—Amos 3:7, 8; 2 Petero 1:20, 21.
4, 5. (a) Dahaka dainai Iesu ese ita ia durua diba nega vaira do ita diba totona? (b) Ena aposetolo ese dahaka idia nanadailaia?
4 Iesu Keriso be Dirava ena peroveta tauna badana. (Heberu 1:1, 2) Iena peroveta herevadia badadia ta mani ita laloa; unai hereva amo ia ese hari inai negai idia vara noho gaudia ia gwauraidia. Unai hereva dainai ita diba dahaka be nega daudau lasi murinai do ia vara, inai nega dikana do ia ore bena Dirava ese tanobada paradaisona do ia karaia neganai.
5 Iesu ese ia hahedinaraia vadaeni ia be peroveta momokani tauna. (Mareko 6:4; Luka 13:33; 24:19; Ioane 4:19; 6:14; 9:17) Unai dainai, Olive Ororona ai ia helai neganai ena aposetolo taudia ese idia nanadaia, idia gwau: “Mani oi hamaoroa ai dekenai, oiemu hereva gauna edena negai do idia vara? Do oi giroa mai, bona tanobada dokona danu, ena toana be dahaka?”—Mataio 24:3; Mareko 13:4.
6. Mataio 24, Mareko 13, bona Luke 21 ese dahaka idia herevalaia; bona dahaka henanadai ita laloa be namo?
6 Edia henanadai bona Iesu ena haere be Mataio karoa 24, Mareko 13, bona Luka 21 ai do oi davaridia.a Unai buka edia hereva momo be hegeregere, to idia hegeregere vaitani lasi. Luka sibona ia gwau, “Ta ta dekenai do ia hanaia gorerena do idia vara.” (Luka 21:10, 11; Mataio 24:7; Mareko 13:8) Vadaeni, iseda henanadai be inai: Iesu ese ena hereva idia kamonai taudia edia mauri negana lalonai do idia vara gaudia mo ia perovetalaidia a, eiava ia ese danu iseda nega bona nega gabena danu ia herevalaidia, a?
Aposetolo Idia Ura Diba
7 Ena mase be kahirakahira neganai, Iesu ia gwau Dirava ese Iuda taudia edia hanua badana Ierusalem ia dadaraia vadaeni. Edia inai taudia ese unai hanua bona ena dubu badana do idia hadikadia ore. Unai dainai aposetolo haida ese Iesu ‘do ia giroa mai (pa·rou·siʹa), bona tanobada dokona danu, edia toana’ idia nanadailaia. (Mataio 23:37–24:3) Idia ese Iuda besena bona Ierusalem idia lalodia, badina be nega vairai do idia vara gaudia edia bada idia lalo-pararalaia lasi. Iesu ese ia haere henidia neganai, lagani 70 C.E. vairanai do idia vara gaudia bona unai lagani ai Roma taudia ese Ierusalem do idia hadikaia ore karana mo sibodia ia lalodia lasi, to nega gabena danu ia laloa.—Luka 19:11; Kara 1:6, 7.
8. Iesu ese dahaka gau ia perovetalaidia?
8 Evanelia toi edia hereva hegeregeredia, Iesu ia gwau bese ta do ia toreisi, bese ta do ia tuari henia, hitolo bada do ia vara, tano do ia mareremarere, hahegari gaudia bona guba toadia do idia hedinarai. Unai toa ia gwauraia negana (33 C.E.) amo ela bona Ierusalem idia hadikaia ore negana (66-70 C.E.), peroveta taudia koikoidia bona Keriso koikoidia do idia toreisi. Iuda taudia ese Keristen taudia, Iesu ena hereva idia harorolaia taudia, do idia dagedage henidia.
9. Aposetolo edia negai, Iesu ena peroveta herevana ena anina be edena dala ai ia vara?
9 Flavius Josephus ese ia hamomokania unai gau idia vara. Ia gwau, Roma taudia idia do tuari lasi neganai, Mesia koikoidia ese gwau-edeede idia havaraia. Tano mareremarere badadia be Iuda ai bona gabu idaudia ai idia vara. Roma Basileiana ena kahana idauidau ai tuari idia vara. Hitolo badadia danu idia vara a? Oibe. (Kara 11:27-30 itaia.) Basileia harorolaia gaukarana be edena bamona? Lagani 60 o 61 C.E. ai, Paulo ese Kolose taudia ia tore henidia neganai, Dirava ena Basileia ena “Sivarai Namona” be gabu momo ai idia kamonai vadaeni—Africa, Asia, bona Europe ai.b—Kolose 1:23.
“UNAI MURINAI” be Dokona
10 Ena hereva haida ai Iesu ia gwau gau haida do idia vara guna bena gau haida be gabeai do idia vara. Ia gwau: “Basileia ena Sivarai Namona be . . . do idia harorolaia. Vadaeni unai murinai dokona be do ia ginidae.” (Mataio 24:14) Inai hereva “unai murinai” be Greek gado herevana toʹtec ida idia hahegeregerea. Greek gado idia diba momo taudia idia gwau, bema ta ese gau ta ia herevalaia bena ia dainai do ia vara gauna ma ta ia gwauraia eiava unai ia vara murinai do ia vara gauna ma ta ia gwauraia, inai hereva toʹte be unai hereva iharuana ena matamanai do ia gwauraia. Unai hegeregerena, Iesu ia gwau Basileia do idia harorolaia bena (“unai murinai”) “dokona” do ia ginidae. Edena dokona?
11. Ierusalem do idia hadikaia ore negana ai do idia vara gaudia be Iesu ese edena bamona ia gwauraidia?
11 Inai peroveta herevana ia momokani dalana ta be Iuda besena ena dokona idia gunalaidia gaudia lalodiai ita davaria diba. Tuari, tano mareremarere, hitolo, bona Iesu ese ia perovetalaidia gaudia ma haida be lagani 30 bamona lalodiai idia vara. To Mataio 24:15, Mareko 13:14, bona Luka 21:20 ai gau idaudia herevadia ita duahidia matamaia, hadikaia ore negana be ia kahirakahira momokani neganai do idia vara gaudia unai.—Rau 14 ai laini toutouna oi itaia.
12. Roma tuari taudia ese Mataio 24:15 ena hereva edena bamona idia hamomokania?
12 Iuda taudia idia laloa Ierusalem be hanua helagana, to lagani 66 C.E. ai idia gwau ede-ede dainai, Roma taudia Cestius Gallus henunai ese Ierusalem idia gegea ahu. (Mataio 5:35) Ena be Iuda taudia ese idia tuari henidia, to hanua lalonai idia vareai. Unai dala amo idia be ‘gabu helagana ai’ idia gini matamaia, Iesu be Mataio 24:15 bona Mareko 13:14 ai ia peroveta hegeregerena. Bena hoa gauna ia vara—Roma taudia idia raka oho. Keristen taudia idia diba unai ese Iesu ena peroveta herevana ia hamomokania; vadaeni, Iudea idia heautania bona ororo idia heau henidia, Ioridane unai kahanai.
13. Dahaka dainai Keristen taudia be Iesu ena hereva hegeregerena idia heau mauri diba?
13 To, Roma taudia ese Ierusalem idia rakatania vadaeni murinai, ta ese ia heautania badina be dahaka? Badina be Iesu ena hereva ese idia hahedinaraia goevagoeva, ia vara gauna ese ia hamomokania ‘Ierusalem hadikaia ore negana be ia kahirakahira.’ (Luka 21:20) Hisihisi bada hereana ia perovetalaia, ‘matamana negana amo hisihisi unai bamona idia vara lasi ela bona unai nega, gabeai danu unai bamona ta do ia vara lou lasi.’ Bona lagani toi mai kahana bamona murinai, lagani 70 C.E. ai, Roma tuari oreadia Tito henunai ese “hisihisi bada herea” Ierusalem ai idia havaraia. (Mataio 24:21; Mareko 13:19) To dahaka dainai Iesu ia gwau hisihisi iboudiai, idia vara guna gaudia bona gabeai do idia vara gaudia, be unai hisihisi ese do ia hereadia?
14. Dahaka dainai inai bamona ita hereva be maoro: Lagani 70 C.E. ai Ierusalem ai ia vara gauna be “hisihisi bada herea,” hisihisi gunadia bona gabedia ia hanaidia gauna?
14 Guna, lagani 607 B.C.E. ai, Babulono taudia ese Ierusalem idia hadikaia ore, bona iseda nega ai tuari dika rohorohodia be unai hanua ai idia vara. To lagani 70 C.E. ai ia vara gauna be hisihisi bada hereana bona idau hereana. Hua ima bamona lalodiai, Roma tuari taudia ese Iuda taudia idia hadareredia, 1,100,000 bamona idia aladia mase, bona 100,000 bamona idia abidia mauri. Inai danu, Ierusalem idia hadikaia ore. Unai hisihisi ese Iuda tomadiho dalana ia hadokoa, edia dubu badana ai idia badinaia bona Dirava ese guna ia abia dae dalana unai. (Heberu 1:2) Unai dainai Iesu ena hereva be maoro; lagani 70 C.E. ai idia vara gaudia be ia ese ia gwauraidia “hisihisi bada herea [unai hanua bona bese bona tomadiho dalana latadiai] . . . Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi.”—Mataio 24:21.d
Peroveta Herevana Hegeregerena, Gau Ma Haida Idia Vara
15 To, Iesu ia perovetalaidia gaudia be unai neganai ia vara hisihisina mo sibona lasi. Baibel ese ia hahedinaraia unai hisihisi murinai gau momo do idia vara, badina be Mataio 24:23 bona Mareko 13:21 ai inai hereva toʹte idia torea, anina be “unai murinai.” Lagani 70 C.E. murinai, unai hisihisi be Iuda besena ai do ia vara murinai, Keriso koikoidia ma haida bona peroveta taudia koikoidia ma haida do idia hedinarai. (Mareko 13:6 be 13:21-23 ida oi hahegeregerea.) Sivarai gunadia ese idia hamomokania, 70 C.E. murinai nega daudau herea lalonai idia momo idia toreisi, to lauma dalanai idia roharoha goevagoeva bona Keriso ena “giroa mai” idia tahua taudia idia koidia diba lasi. (Mataio 24:27, 28) To unai gau, lagani 70 C.E. ena hisihisi murinai idia vara gaudia, ese idia hahedinaraia Iesu ese unai hisihisi murinai do idia vara gaudia ia lalodia. Unai be peroveta herevana hamomokania negana ginigunana mo.
16. Luke 21:24 ai Iesu be ma dahaka ia perovetalaia, bona ena anina be dahaka?
16 Bema Mataio 24:15-28 bona Mareko 13:14-23 be Luka 21:20-24 ida ita hahegeregeredia, unai ia hamomokania gauna iharuana do ita davaria. Mani oi laloatao, Luka mo sibona ese dai-hanai goreredia ia gwauraidia. Unai hegeregerena, ia mo sibona ese inai peroveta herevana ena dokona ai Iesu ena hereva ia torea: “Idau bese taudia ese Ierusalema do idia moia diho, ia lao bona unai idau bese edia nega do ia ore.”e (Luka 21:24) Lagani 607 B.C.E. ai Babulono taudia ese Iuda pavapavana ginigabena idia kokia, bena unai murinai, Ierusalem, Dirava ena Basileia gauna, be idia moia. (2 Hanua Pavapavadia 25:1-26; 1 Sisiga 29:23; Esekiel 21:25-27) Luka 21:24 ai, Iesu ese ia hahedinaraia haida do idia moia ela bona Dirava ese Basileia ta do ia haginia lou negana do ia ginidae.
17. Dahaka gau ihatoina ese ia hahedinaraia Iesu ese nega daudau murina amo do idia vara gaudia ia perovetalaidia?
17 Gau ihatoina be inai, ia hahedinaraia Iesu ese nega daudau murinai do idia vara gaudia ia gwauraidia: Baibel ia gwau Mesia do ia mase bena do ia toreisi lou bena Dirava ena idiba kahanai do ia helai ela bona Tamana ese do ia siaia lao, haida do ia halusidia totona. (Salamo 110:1, 2) Iesu ese ena Tamana ena idiba kahanai do ia helai karana ia gwauraia. (Mareko 14:62) Aposetolo Paulo ese ia hamomokania ia toreisi lou tauna Iesu be Iehova ena idiba kahanai ia naria noho, ela bona Pavapava ai do ia lao bena Dirava ena ladanai do ia ala-ala.—Roma 8:34; Kolose 3:1; Heberu 10:12, 13.
18, 19. Apokalupo 6:2-8 bona unai bamona peroveta herevadia Evanelia bukadia ai be edena bamona idia hegeregere?
18 Gau ma ta, namba 4, ese ia hamomokania vaitani Iesu ena peroveta herevana, tanobada ena dokona herevana, ena anina be aposetolo edia nega murinai do ia vara. Gauna be Apokalupo karoa 6. Ierusalem idia hadikaia ore bena lagani 26 idia ore murinai, aposetolo Ioane ese hosi-gui taudia ia herevalaidia. (Apokalupo 6:2-8) Inai peroveta herevana ese ia hahedinaraia “Lohiabada ena dina” ai—ia giroa mai vadaeni neganai—tuari badadia (Apo 6 siri 4), hitolo (Apo 6 siri 5 bona 6), bona dai-hanai goreredia (Apo 6 siri 8) do idia vara. Momokani, inai be Iesu ese Evanelia bukadia ai ia perovetalaia gaudia hegeregeredia, bona ia hamomokania Iesu ena peroveta herevana be dala badana ai ia momokani, hari inai “Lohiabada ena dina” ai.—Apokalupo 1:10.
19 Diba taudia idia abia dae Mataio 24:7-14 bona Apokalupo 6:2-8 ai idia perovetalaia toana mai ena kahana idauidau be ia hedinarai, tanobada ibounai tuarina ginigunana be lagani 1914 ai ia matamaia negana amo ema bona hari. Iehova ena Witness taudia be tanobada ibounai lalonai idia haroro, idia gwau tuari, tano mareremarere, hitolo, bona dai-hanai goreredia ese idia hahedinaraia, hari inai negai Iesu ena peroveta herevana ena anina be dala iharuana bona badana ai ia vara. Dai-hanai gorerena ta be U.S.News & World Report (July 27, 1992) ese ia gwauraia, ia gwau: “AIDS gorerena . . . ese taunimanima milion milion ia hamasedia, bona nega daudau lasi dai-hanai goreredia gunadia iboudiai do ia hereadia. Lagani 600 idia lao vadaeni, dai-hanai gorerena ta ladana The Black Death ese taunimanima 25 milion bamona ia hamasedia. Hari inai negai taunimanima 12 milion bamona be HIV idia abia, AIDS ia havaraia gauna unai, to lagani 2000 be do lasi neganai taunimanima 30 milion ela bona 110 milion ese do idia abia. Bema hanamolaidia muramurana do idia davaria lasi, iboudiai do idia mase.”
20. Mataio 24:4-22 do ia momokani negana ginigunana ai dahaka do ia vara, to dahaka dala ma ta amo do ia momokani?
20 Vadaeni, Iesu ena haere, iena aposetolo edia henanadai ia haerelaia herevana, be edena bamona do ita laloa be namo? Gau haida ia perovetalaidia, haida do idia vara guna, bena Ierusalem hadikaia ore negana ai ma haida do idia vara; bona ia ese danu lagani 70 C.E. murinai do idia vara gaudia haida ia gwauraidia. To iena hereva momo edia anina be nega daudau murina amo dala badana ai do ia vara; dokona ai hisihisi badana do ia vara, inai nega dikana do ia haorea. Anina be, Iesu ena peroveta herevadia Mataio 24:4-22 ai, bona unai bamona herevadia Mareko bona Luka ai, edia anina be ia vara, lagani 33 C.E. amo ela bona lagani 70 C.E. ena hisihisi negana. To unai siri edia anina be nega iharuana ai dala badana ai do ia vara; Ierusalem do idia hadikaia ore murinai nega daudau do ia ore, bena hisihisi bada hereana, unai hisihisi gunana ia hereaia gauna, be do ia vara. Vadaeni, edia anina be hari inai negai ia vara noho! Dina dina iboudiai ita itaia!f
Unai Murinai Dahaka Do Ia Vara?
21 Iesu ese peroveta koikoi taudia ia perovetalaidia, toa koikoidia do idia hahedinaraidia ela bona “idau bese edia nega do ia ore.” (Luka 21:24; Mataio 24:23-26; Mareko 13:21-23) To ena hereva be unuseniai ia hadokoa lasi. Ma ia gwau hoa gaudia ma haida do idia vara, tanobada ibounai lalonai do idia itadia gaudia unai. Taunimanima ena Natuna be mai siahuna bona mai hairaina ida do ia mai neganai do idia vara. Mareko 13:24-27 ai ia gwau:
21, 22. Edena Baibel siridia ese idia hahedinaraia gau ma haida do idia vara?
22 “Unai neganai, nega dikana ia ore murinai, dina do ia dibura, hua danu ia diari lasi. Hisiu guba dekena amo do idia moru, bona lauma siahudia gubai do idia mareremarere. Unai neganai Taunimanima ena Natuna do idia itaia, ori latanai do ia mai, mai siahu bada, mai hairai bada danu. Ia ese aneru do ia siaia, lai 4 gabudia dekena amo, iena abia hidi taudia do idia haboua, tanobada gabudia ibounai bona guba gabudia ibounai dekena amo.”
23. Dahaka dainai nega daudau herea aposetolo edia nega murinai Mataio 24:29-31 ena hereva ena anina do ia vara negana be ita naria?
23 Iuda besena edia noho dalana be lagani 70 C.E. ai idia hadikaia ore murinai, taunimanima ena Natuna, ia toreisi lou tauna Iesu Keriso unai, be unai hoa dalanai ia mai lasi. Bona, momokani, Mataio 24:30 ia hereva bamona, tanobada besedia iboudiai ese idia itaia lasi, bona unai neganai guba anerudia ese horoa Keristen taudia be tanobada ibounai amo idia gogodia lasi. Vadaeni, inai hereva ena anina be edena negai do ia vara? Ena anina be hari inai negai ia vara noho a, eiava inai hereva amo Dirava ese nega sisina murinai do idia vara gaudia ita ia hadibalaia, a? Namona be ita ura unai do ita diba, badina be Iesu ia gwau: “Inai gaudia do idia vara hamatamaia neganai be emui kwarana do umui abia isi. Badina be umui emui hahemauri be ia kahirakahira vadaeni.”—Luka 21:28.
[Footnotes]
a Inai karoa edia siri haida be rau 14 bona 15 ai; edia anidia hegeregere siridia be laini toutoudia amo ai koudia.
b Idia vara gaudia sivaraidia haida be February 1, 1971 ena Gima Kohorona lalonai, rau 29-31 ai.
c Mataio ese inai hereva toʹte be nega 80 ia torea (Mt karoa 24 ai nega 9) bona Luka ese nega 15 ia torea. Mareko ese nega 6 sibona ia torea, idia 4 be ‘toa’ ia gwauraia neganai.
d Britain ena toretore tauna Matthew Henry ia gwau: “Kaldea taudia ese Ierusalem idia hadikaia ore karana be dika rohoroho, to inai ese unai ia hereaia. Ia amo . . . Iuda taudia iboudiai idia hamasedia ore gwauraia.”
e Momo idia gwau Luka 21:24 murinai Luka ena sivarai ia idau. Dr. Leon Morris ia gwau: “Unai murinai Iesu ese idau bese edia nega ia gwauraia. . . . Baibel tahua taudia momo idia laloa taunimanima ena Natuna ena mai negana ia herevalaia unai.” Profesa R. Ginns ia gwau: “Taunimanima Ena Natuna Ena Mai Negana—(Mat 24:29-31; Mar 13:24-27). ‘Idau bese edia nega’ herevana ese unai hereva ia hamatamaia; [Luka ese] Ierusalem ia dika negana murina amo do ia vara gauna ia gwauraia.”
f Profesa Walter L. Liefeld ia gwau: “Ita abia dae diba Iesu ena peroveta herevadia edia anina ta be ia vara guna bena ma ta be gabeamo ia vara; edia anina ruaosi be inai: (1) lagani 70 A.D. lalonai dubu ai do idia vara gaudia, bona (2) nega daudau unai nega murina amo do idia vara gaudia; hisihisi bada hereadia bamona ia gwauraidia.” J. R. Dummelow ia gwau: “Bema ta ia diba unai hereva lalonai iseda Lohiabada ese gau tamona lasi, to gau rua ia herevalaidia, bona gau ginigunana ese gau iharuana ia laulaulaia, unai hereva badana dainai idia vara daradaradia badadia momo do idia ore. . . . [Luka] 21:24, ‘idau bese edia nega’ ia gwauraia sirina, . . . ese Ierusalem ena moru negana bona tanobada ena dokona negana edia padadia ena daudau ia gwauraia lasi.”
Oi Laloatao A?
◻ Iesu ena haere, aposetolo edia henanadai Mataio 24:3 ai ia haerelaia herevana, ena anina be edena bamona ia vara, lagani 70 C.E. vairanai?
◻ Inai hereva toʹte gwauraia dalana ese ita edena bamona ia durua, Iesu ena peroveta herevana do ita lalo-pararalaia totona?
◻ “Hisihisi bada herea,” aposetolo edia negai ia vara gauna, ese edena dala ai hisihisi gunadia ia hereadia?
◻ Edena gau idaudia rua Iesu ena peroveta herevana ai, mai anina ita dekenai gaudia, be Luka ese ia herevalaidia?
◻ Dahaka ese ia hahedinaraia Mataio 24:4-22 ena anina be nega iharuana ai dala badana ai do ia vara?
7. Aposetolo idia henanadai neganai dahaka idia laloa bada, to Iesu ia haere neganai dahaka ia herevalaia?
10. Dahaka dainai Greek gado herevana toʹte ita laloa be namo, bona ena anina be dahaka?
15. (a) Iesu ia gwau Ierusalem ena hisihisi badana murinai dahaka dahaka do idia vara? (b) Iesu ena hereva Mataio 24:23-28 ai edia anina be edena bamona ia vara?
[Chart on page 14, 15]
4 “Iesu ia haere idia dekenai, ia gwau, ‘Umui naria namonamo, tau ta ese umui do ia hakaua kerere garina. 5 Badina be taunimanima momo lauegu ladanai do idia mai, do idia gwau, “Lau inai Keriso,” vadaeni taunimanima momo do idia hakaua kerere. 6 To umui be tuari ena regena bona tuari ena sivarai do umui kamonai neganai do umui laloa daradara lasi. Inai gaudia be do idia vara guna, to dokona be do vaira neganai.
7 “ ‘Badina be bese ta ese do ia toreisi, bese ta do ia tuari henia. Bona basileia ta ese do ia toreisi, basileia ta do ia tuari henia. Gabu idauidau dekenai hitolo bada do ia vara, tano danu do ia mareremarere. 8 To unai be hisihisi nega ena hamatamaia sibona, natuna havaraia ena hisihisi bamona.
9 “ ‘Unai neganai umui emui mase totona hereva do idia atoa, do idia hadikaia umui, do idia alaia mase umui. Lauegu ladana dainai bese ibounai ese umui do idia badu henia. 10 Vadaeni taunimanima momo edia abidadama do idia rakatania, vadaeni idia ta ta ese ta ta do idia samania, bona idia ta ta ese ta ta do idia badu henia. 11 Peroveta koikoi taudia momo danu do idia toreisi, taunimanima momo do idia hakaua kerere. 12 Kara dikadia danu do idia vara gabu idauidau dekenai, vadaeni taunimanima momo edia lalokau be do ia keru. 13 To ena lalona do ia goada noho ela bona dokona, unai tauna be do ia mauri. 14 Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.
------------------------------------------------------------------
15 “ ‘Peroveta tauna Daniela guna ia gwauraia gau dika rohorohona, gabu ia hadikaia gauna, gabu helagana dekenai ia gini dohore umui itaia.’ — Duahia tauna ese inai hereva ena anina do ia laloa namonamo. — 16 ‘Unai neganai Iudea dekenai idia noho taudia be ororo dekenai do idia heau lao. 17 Bona ruma ena atai dekenai ia helai noho tauna be ruma lalonai do ia raka vareai lasi ena kohu abia totona. 18 Bona uma dekenai ia gaukara noho tauna danu ena dabua abia totona do ia giroa lao lasi. 19 Unai neganai rogorogo hahine bona natuna maragi idia rata henia hahine be madi do idia dika. 20 Do umui guriguri, keru neganai, o Sabati dina neganai be do umui heau lasi. 21 Badina be unai dinadia lalonai hisihisi bada herea do idia vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi. 22 Bema Dirava ese unai nega do ia hakwadogia lasi, taunimanima ta be do ia mauri diba lasi. To ia abia hidi taudia dekenai ia laloa dainai unai nega do ia hakwadogia.
------------------------------------------------------------------
23 “ ‘Unai neganai ta do ia gwau, “Oi itaia, Keriso be inai,” o, “Keriso be unai.” To do umui kamonai henia lasi. 24 Badina be Keriso koikoi taudia bona peroveta koikoi taudia do idia toreisi, toa bona hoa gaudia do idia hedinaraia. Inai bamona do idia karaia, Dirava ia abia hidi taudia do idia hakaua kerere totona, bema mai dalana. 25 Do umui laloaboio lasi, umui lau hamaoroa guna inai. 26 Unai dainai, bema umui dekenai do idia hamaoroa, do idia gwau, “Umui itaia, ia be taunimanima idia noho lasi tano dekenai ia noho,” to do umui lao lasi. O do idia gwau, “Umui itaia, ia be ruma lalonai ia noho,” to do umui kamonai lasi. 27 Kevaru bamona, guba dekenai ia diari haraga bamona, guba ena dina daekau kahana ia lao bona dina diho kahana, unai bamona danu Taunimanima ena Natuna be do ia mai. 28 Mase edia tauanina idia noho gabuna dekenai ugava do idia haboua unuseni.
------------------------------------------------------------------
------------------------------------------------------------------
29 “ ‘Unai nega dikana do ia ore, vadaeni maoromaoro dina be do ia dibura, hua danu do ia diari lasi, hisiu guba dekena amo do idia moru, bona guba dekenai idia noho siahu gaudia do idia mareremarere. 30 Vadaeni Taunimanima ena Natuna ena toana guba dekenai do ia hedinarai. Unai neganai tanobada ena bese ibounai do idia tai, badina be Taunimanima ena Natuna do idia itaia, guba ena ori latanai do ia mai, mai ena siahu bada, bona mai ena hairai danu. 31 Vadaeni ia ese ena aneru do ia siaia, mai kibi ena regena bada danu, lai edia gabuna 4 dekena amo, bona guba kahana ena dokona dekenai ia lao bona guba kahana ena dokona dekenai. Unai gabudia dekena amo inai aneru ese iena abia hidi taudia do idia gogoa.’ ”
5 “Iesu ia haere henia, ia gwau, ‘Umui naria, tau ta ese [umui do ia] hakaua kerere garina. 6 Badina taunimanima momo lauegu ladanai do idia mai, do idia gwau, “Lau be Keriso.” Taunimanima momo do idia hakaua kerere. 7 Tuari sivarai do umui kamonai, bona tuari hereva koikoi do umui kamonai danu neganai, umui gari lasi. Badina inai gaudia do idia vara, to dokona be gabeai.
8 “ ‘Badina bese do idia tuari bese dekenai, bona gavamani do idia tuari gavamani dekenai. Gabu momo tano do ia marere bada, hitolo bada negana danu do ia vara. Inai gaudia dekenai nega dikana do ia matamaia.
9 “ ‘To umui sibona dekenai naria namonamo, badina be idia ese umui do idia hakaua lao kaunsolo vairadiai, bona dubu lalodiai do idia dadabaia umui. Lau dainai do umui gini gavana bona king taudia vairanai, idia dekenai hereva momokani do umui hedinaraia totona. 10 To Sivarai Namo bese ibounai dekenai be do idia haroro henia guna. 11 Idia ese umui hakaua kota taudia vairanai neganai, umui laloa guna lasi dahaka do umui gwauraia, hereva inai neganai do lau henia umui dekenai, badina be umui sibona do gwauraia lasi, to Lauma Helaga ese do ia hereva. 12 Kakana ese tadina do ia samania, ia mase, tamana danu natuna dekenai unai bamona do ia karaia, natudia danu ese tamadia sinadia do idia samania, idia mase. 13 Lauegu ladana dainai taunimanima ibounai do idia badu henia umui dekenai, to edena tauna ia gini auka ela bona dokona, mauri do ia davaria.
------------------------------------------------------------------
14 “ ‘To umui ese dika rohoroho gauna itaia neganai, iena gabu lasi dekenai ia gini, — namo duahia tauna inai hereva anina ia diba namonamo — unai neganai Iudea noho taudia namo idia heau lao ororo dekenai. 15 Ruma latanai noho tauna namo ia diho lasi ruma lalonai, iena gau abia totona. 16 Uma lalonai noho tauna, namo ia giroa lou lasi, ena dabua abia totona. 17 Unai neganai rogorogo hahine taudia bona hahine taudia mai rata inua natudia, madi nega dika do idia davaria! 18 Umui guriguri, inai nega dika do ia mai lasi keru neganai. 19 Badina unai neganai be nega dika bada, idaunegai Dirava ese tanobada ia karaia ia mai bona harihari, dika unai bamona be lasi, gabeai danu dika unai bamona do ia vara lou lasi. 20 Bema unai nega dikadia Lohiabada ese ia hakwadogia lasi, taunimanima ta ia mauri lasi, to ia abia hidi taudia ia laloa dainai do ia hakwadogia.
------------------------------------------------------------------
21 “ ‘Bema tau ta ia hamaoroa umui, “Umui itaia, Keriso be iniseni,” o, “Umui itaia, ia be unuseni,” umui abidadama henia lasi. 22 Badina be Keriso koikoidia bona peroveta koikoidia do idia vara, toana gaudia bona hoa karadia do idia hedinaraia, kahirakahira Dirava ena abia hidi taudia do idia hakaua kerere. 23 Umui naria namonamo, unai gabeai do idia vara gaudia ibounai, hari lau hedinaraia vadaeni umui dekenai.
------------------------------------------------------------------
------------------------------------------------------------------
24 “ ‘Unai neganai, nega dikana ia ore murinai, dina do ia dibura, hua danu ia diari lasi. 25 Hisiu guba dekena amo do idia moru, bona lauma siahudia gubai do idia mareremarere. 26 Unai neganai Taunimanima ena Natuna do idia itaia, ori latanai do ia mai, mai siahu bada, mai hairai bada danu. 27 Ia ese ena aneru do ia siaia, lai 4 gabudia dekena amo, iena abia hidi taudia do idia haboua, tanobada gabudia ibounai bona guba gabudia ibounai dekena amo.’ ”
8 “Ia gwau, ‘Do umui naria namonamo, umui dekenai do idia koia garina. Badina be taunimanima momo lauegu ladanai do idia mai, do idia gwau, “Tauna be lau inai,” bona, “Negana ia kahirakahira vadaeni.” To idia edia murina dekenai do umui lao lasi. 9 To tuari bona heatu bada edia sivarai do umui kamonai, do umui gari lasi, badina be inai gaudia do idia vara guna, to dokona be gabeai.’
10 “Ma Iesu ia gwau, ‘Bese ta bese ta danu do idia alaia ta ta dekenai bona basileia ta basileia ta danu do idia tuari. 11 Gabu ibounai dekenai tano do idia mareremarere, hitolo bada, bona ta ta dekenai do ia hanaia gorerena do idia vara, gari gaudia bona guba ena toana badadia do idia hedinarai.
12 “ ‘To unai gaudia do idia vara lasi neganai idia ese umui do idia guia, hisihisi do idia henia umui dekenai, dubu dekenai bona dibura ruma dekenai umui do idia doria vareai, king bona gavana edia vairana dekenai umui do idia hakaua lao, lauegu ladana dainai. 13 To unai neganai umui be mai emui dala Sivarai Namo do umui gwauraia hedinarai. 14 Umui laloa guna lasi edena bamona edia samani do umui haere henia. 15 Badina be lau ese hereva bona aonega do lau henia umui dekenai. Vadaeni umui dekenai badu henia taudia ibounai be do idia hegeregere lasi emui hereva do idia koua. 16 To emui tamana, emui sinana, emui tadikakana, emui varavarana, emui turana, ese umui do idia samania, bona idia ese umui haida danu do idia alaia mase. 17 Taunimanima ibounai ese do idia badu henia umui dekenai lau dainai. 18 To emui kwarana huina tamona do ia dika lasi. 19 Emui gini auka dainai emui laumana do idia mauri.
------------------------------------------------------------------
20 “ ‘Tuari orea ese Ierusalema do idia koua hagegea do umui itaia, vadaeni do umui diba iena dokona ia kahirakahira vadaeni. 21 Unai neganai Iudea dekenai idia noho taudia be ororo dekenai do idia heau lao, bona hanua lalonai idia noho taudia be do idia heau murimuri dekenai, bona gunika dekenai idia noho taudia be hanua dekenai do idia raka vareai lasi. 22 Badina be davana karaia negana be unai. Ia torea guna herevadia hamomokania dinana be unai. 23 Unai neganai rogorogo hahine bona natuna matamata havaraia hahine be madi idia dika! Badina be hisihisi badana inai tano dekenai do ia vara, bona inai bese taudia edia latanai badu do ia ginidae. 24 Haida be kaia edia matana dekenai do idia mase, haida be do idia abia mauri, idau hanua idau hanua dekenai do idia abia lao.
------------------------------------------------------------------
Idau bese taudia ese Ierusalema do idia moia diho, ia lao bona unai idau bese edia nega do ia ore.
------------------------------------------------------------------
------------------------------------------------------------------
25 “ ‘Dina, hua, hisiu dekenai toa do idia vara, bona tanobada besedia be do idia hisihisi bona edia kudouna dekenai do idia gari dikadika. Davara ena regena bona hurehure danu do idia bada. 26 Taunimanima edia kudouna dekenai do idia gari momokani, edia laloa danu do idia doko, unai idia vara gaudia dainai. Badina be guba ena siahu do ia mareremarere, ena toana be do idau momokani. 27 Vadaeni idia ese Taunimanima ena Natuna do idia itaia, ori ena latanai do ia mai, mai ena siahu bada bona mai ena hairaina danu. 28 To inai gaudia do idia vara hamatamaia neganai be emui kwarana do umui abia isi. Badina be umui emui hahemauri be ia kahirakahira vadaeni.’ ”
[Picture on page 10]
Lagani 70 C.E. ai Ierusalem bona Iuda besena latadiai ia vara hisihisina ese guna idia davaridia hisihisidia ia hereadia