Henanadai Mauana

◼ Edena dala ai ita ese kongrigeisen heboudia be hadibaia gabuna namona ai ita halaoa diba? (Deu. 31:12)

Iehova bona ena kongrigeisen heboudia ita matauraia totona, namona be hebou ia do hamatamaia lasi neganai, ita ginidae haraga bona ita hegaegae Iehova ese ita ia hadibaia totona. Kingdom Hall ena vaira kahanai idia noho helai gaudia dekenai ita helai be namo, bona murina kahanai idia noho helai gaudia ita rakatania tama o sina mai edia natudia o idia leiti taudia idia helai totona. Hebou ia do matamaia lasi neganai, mobael fon ena volium ita hamaragia o koua, unai amo taunimanima edia kamonai karana do ia hadikaia lasi. Bema hebou lalonai ita ibounai ese hemataurai karana ita hahedinaraia, hebou do idia hadikaia gaudia danu be momo lasi.​​—Had. 5:1; Fili. 2:4.

Kamonai taudia be hebou dekenai idia mai matamaia neganai, namona be idia ia diba tadikaka o taihu edia badinai idia helai totona. Idia haida be ruma bese taudia dainai, idia ida umui helai neganai, idia umui durua diba edia natudia umui hadibaia totona. Reana unai ruma bese taudia dekenai, hebou be gau matamatana ta. Unai dainai, reana idia ura Kingdom Hall ena murina kahana ai idia helai, unai amo natudia idia abia lao abia mai neganai, unai ese ma haida edia kamonai karana do ia hadikaia lasi. (Aon. 22:​6, 15) Bema tama o sina ia ura natuna ta ia matahakani henia o natuna ena ura gauna ma ta karaia totona, namona be Kingdom Hall murimurina dekenai idia lao, bona unai idia karaia murinai, mai edia natudia ida idia vareai lou diba.

Namona be atendan taudia idia itaia taunimanima be tomadiho gabuna idia matauraia. Namona be ruma bese o leiti taudia idia durua helai gabuna maorona ai idia helai totona. Namona be atendan taudia be mai aonega bona hemataurai ida ma haida edia helai gabuna idia tahua, unai amo ma haida edia kamonai karana idia hadikaia lasi. Bema gau ta be ma haida edia kamonai karana ia hadikaia, namona be atendan taudia be mai laloa maoromaoro ida kara ta idia karaia. Bema natuna ta ese ma haida edia kamonai karana ia hadikaia, atendan taudia be dala maorona ai heduru idia henia diba.

Tomadiho totona idia hebou taudia ibounai ese heduru idia henia neganai, idia ese inai gaudia do idia dibaia: Iehova bona ena ura be tanobada matamatana ai kara maoromaoro bona maino do idia noho.​​—Heb. 10:​24, 25.