Hereva Helagadia Ita Kamonai Henia
1 Taunimanima ese idia gwauraia hereva ibounai ita kamonai henia be anina lasi. To Dirava ia hereva neganai, unai be badina namona ita kamonaia totona. (Deut. 28:1, 2) Ita moale bada, badina Dirava ena lauma amo toretore taudia ese ‘iena hereva helagadia’ idia torea iseda namo totona. (Roma 3:2) Ia mai noho distrik hebouhebouna dekenai unai hereva idia duahia bona herevalaia neganai, dala namona do ia kehoa unai bamona gaudia ita kamonai henia totona. Edena dala ai unai hereva do oi hakala henia namonamo diba?
2 Daba Ta Ta ai Oi Ginidae Haraga: Iehova ese Israela taudia ia hadibaia Sinai Ororo dekenai do idia lao iena taravatu do idia kamonai henia totona neganai, edia moale mani oi laloa! (Eso. 19:10, 11, 16-19) Bema distrik hebouhebou dekenai Iehova ena hadibaia herevadia kamonai henia karana dekenai emu lalohadai be edia lalohadai bamona, dala do oi karaia daba ta ta ai do oi ginidae haraga totona. Program ibounai do ita kamonai henia lasi bema ita mai leiti bona helai gabuna davaria totona haida edia kamonai karana ita hadikaia. Namona be oi laloatao, dina ta ta ai program be 9:00 a.m. ai ia matamaia.
3 Ena be haida idia ginidae haraga, to hebou ia matamaia neganai edia helai gabudia dekenai idia noho lasi. Dahaka dainai? Idia naria ela bona seamani ese hebou ia kehoa anena ia gwauraia, bena edia turadia ida herevahereva idia hadokoa bona edia helai gabudia dekenai idia giroa lou. Namona be inai ita laloa, miniti haida idia do noho ela bona hebou kehoa anena ia matamaia neganai, seamani be patapata dekenai ia helai vadaeni bona Basileia miusiki idia gadaralaia. Unai ese ia hahedinaraia namona be iseda helai gabudia dekenai ita giroa lou! Bena, hebou kehoa anena ia gwauraia neganai, ita gini hegaegae vadaeni hebou taudia ida Iehova hanamoa ane do ita abia totona.
4 Lalo-Tamona Ruma Besena Bamona Kamonai: Idia hebou Israela besena dekenai hereva helagadia idia gwauraia neganai, ruma bese taudia bona ‘memero kekeni’ danu idia kamonai bona diba idia abia. (Deut. 31:12) Iseda hebouhebou dekenai, natudia be ‘sibona edia ura idia karaia’ lasi be namo. (Aon. 29:15) Tama sina e, namona be dala umui karaia emui ruma bese be gabu tamona dekenai umui helai hebou—matamata taudia danu. Tama sina haida idia naria ela bona ane ita abia bena edia maragidia idia abia lao mei rumana dekenai. To, unai kara ese natudia dekenai iseda tomadiho karana lalonai ane bona guriguri edia anina bada do ia hadibaia lasi. Namona be hebou ia do matamaia lasi neganai, natudia be mei rumana dekenai ita abia lao be namo!
5 Heduru gauna be, do ita kamonai namonamo bema hanuaboi ta ta dekenai ita laga-ani namonamo bona dina lalonai aniani bada ita ania lasi. Hereva ia henia tauna ena hereva oi laloa namonamo. Oi hekwarahi gau ma haida oi laloa lasi totona. Baibel siri ia duahia neganai, namona be emu Baibel amo oi badinaia. Hereva kwadogidia oi torea. Hereva ta ta idia henia neganai, hereva henia tauna ese ia henia herevana be emu lalona ai oi laloa lou bona unai hereva oi badinaia diba dalana oi laloa namonamo. Dina ena dokonai, emui ruma bese ida unai dina ena program umui herevalaia. Idia ta ta be edena hereva idia moalelaia? Edena dala ai emu ruma bese ese unai hereva idia gaukaralaia namonamo diba?
6 Dirava Ena Hereva Hemataurai Henia: Hebouhebou negadiai, iseda turadia ida ita herevahereva bona ita ia hagoadaia hebamo ita moalelaia. Bema ita ginidae haraga, ita be mai iseda nega program ia do matamaia lasi neganai ma haida ida ita herevahereva totona. Program ia heau noho lalonai haida idia herevahereva, idia laloa hebouhebou rumana badana lalonai haida edia kamonai karana do ia hadikaia lasi. Ena be hebouhebou be gabu badana ta dekenai ita karaia, to Kingdom Hall dekenai hebou ta dekenai ita noho bamona, namona be ita kamonai. Program ia heau noho lalonai, abia loaloa telefon, pagers, vidio kamera, bona kamera ita gaukaralaia lasi be namo, haida edia kamonai karana ita hadikaia garina.
7 Mose be Iehova amo Taravatu ia abia neganai, “aniani ia ania lasi, ranu danu ia inua lasi.” (Eso. 34:28) Unai hegeregerena, program ia heau noho lalonai ita aniani eiava ita inuinu be maoro lasi. Bema ta ia gorere lasi eiava hekwakwanai badana ta be lasi, ia naria diba ela bona aniani ena “nega korikori” ai.—Had. 3:1.
8 Hebouhebou haida dekenai, program ia heau noho lalonai, tadikaka bona taihu bona natudia maragidia danu be murimuri ai, motuka atoa gabudia bona mei ruma idia noho gabudia dekenai, idia loaloa kava. Atendan taudia idia hadibaia vadaeni, idia ese unai bamona taudia do idia noia edia helai gabudia dekenai do idia giroa lou be namo. Dipatmen idauidau dekenai idia gaukara volantia taudia be edia gaukara idia haorea murinai, maoromaoro edia helai gabudia dekenai do idia giroa lou. Nega haida volantia taudia be hebou ia heau noho lalonai mai anina gaukara idia karaia, to bema unai bamona gaukara be lasi, namona be edia helai gabuna dekenai idia noho bona program idia kamonai henia. Program ia heau noho lalonai, edia gaukara gabuna dekenai idia noho kava, ma haida ida idia herevahereva totona be namo lasi.
9 Dirava ena Hereva ita kamonai neganai, ita ura lasi iseda ‘lalona idia metau.’ (Heb. 5:11) Unai dainai ia mai noho distrik hebouhebouna dekenai Iehova ena hereva helagadia idia herevalaia neganai, namona be iseda lalona ita hadaia do ita kamonai namonamo, unai amo iseda hemataurai do ita hahedinaraia.