Aonega Tauna be Kara Namodia Ia Hahedinaraia
1. Haida ese iseda gaukara be edena bamona idia laloa?
1 Nega momo ruma taudia haida be ita o Iehova ena Witnes taudia idia laloa kerere. Eiava TV, reidio o niuspepa edia ripoti koikoi idia kamonai. Gabu haida ai, momo be Iehova ena Witnes taudia idia gwauraia, tomadiho oreana dikana. Unai bamona hadikaia herevadia ita kamonai neganai, dahaka ita karaia be namo?
2. Haida ese ita idia gwauraia dika neganai, dahaka ese ita do ia durua ita lalomanoka lasi totona?
2 Lalomanoka Lasi: Aposetolo edia negai, momo be Iesu bona Iehova ena hesiai taudia dekenai lalohadai kererena idia abia dainai, idia gwauraidia dika. (Kara 28:22) To, Iesu bona unai hesiai taudia idia lalomanoka lasi bona edia haroro gaukara dekenai idia hemarai lasi. Iesu ia gwau: “Tau ta ese ia karaia kara namodia ese idia hamomokania, ia be aonega tauna.” (Mat. 11:18, 19) Iesu be ena Tamana ena ura ia karaia goadagoada, bona ia abia dae sivarai namona ese hereva momokani idia tahua taudia do ia durua. Bema ita laloatao Dirava ena Natuna be hisihisi ia abia danu, unai ese ita do ia durua ita lalomanoka lasi totona.
3. Dahaka dainai ripoti koikoi ita kamonai bona dagedage ita davaria be hoa gauna lasi?
3 Iesu ia hahedinaraia, ena murinai idia raka taudia be tanobada taudia ese do idia badu henia, guna Iesu idia badu henia hegeregerena. (Ioa. 15:18-20) Unai dainai, hari inai negai, ripoti koikoi ita kamonai bona dagedage ita davaria be hoa gauna lasi. Danu, ita diba nega dokonai Satani ia badu dikadika dainai, unai bamona hadikaia karadia do idia bada idia lao. (Apok. 12:12) To, ita moale badina ita diba Satani ena tanobada be kahirakahira do ia ore.
4. Ruma tauna ta ese ita samania koikoi herevana ta ia gwauraia neganai, edena bamona ita hereva diba?
4 Hebogahisi ida Hereva: Ruma tauna ta ese ita samania koikoi herevana ta ia gwauraia neganai, nega ibounai mai hebogahisi bona manau ida ita hereva be namo. (Aon. 15:1; Kol. 4:5, 6, NW ) Bema ruma tauna ia badu lasi, vadaeni ia ita hamaoroa momo be Iehova ena Witnes taudia dekenai lalohadai kererena idia abia danu, o ita nanadaia dahaka dainai unai bamona lalohadai ia abia. Mai manau ida ita hereva neganai, reana unai ese ruma tauna ena lalona do ia haidaua bena do ia gwau Iehova ena Witnes taudia ia gwauraia dika be namo lasi bona gabeai Witnes taudia do ia abia dae. To, bema ruma tauna ia badu, vadaeni ia oi rakatania haraga be namo. Ita diba, herevana haida ese ita idia laloa kerere, to Iehova ese iseda haroro gaukara ia laloa bada.—Isa. 52:7.