Lalo-Manoka Negana ai Dahaka Ita Karaia Diba?

TA IA lalo-manoka neganai, edena bamona ia hanaia diba? Unai henanadai be sekit naria taudia haida, Iehova ena Witness taudia edia kongregesen idia vadivadi henidia loulou taudia, dekenai idia gwauraia. Edia haere ese ita idia durua diba lalo-manoka idia havaraia gaudia bona unai hemami, Keristani taudia ia hametaua diba hemamina, haorea daladia ita laloa totona.

Lalo-manoka hanaia totona unai gaudia ita laloa sibona be hegeregere lasi, to unai hemami ena toana haida be, ta ena ura guriguri bona sibona ena stadi karana dekenai ia ore, ia hebou hanaihanai lasi, ena ura ia goada lasi, bona reana ena Keristani turadia ia lalokau henia momokani lasi. To, toana badana ta be iena ura goadana haroro gaukara totona ia ore. Unai toana idauidau mani ita itaia namonamo bona hanaia daladia haida ita laloa.

Iseda Haroro Gaukarana ai Lalo-Manoka Gaudia

Iesu Keriso be hahediba taudia halaoa gaukarana ena hekwarahi idauidau ia lalo-pararalaia. (Mataio 28:​19, 20) Iena murinai idia raka taudia ia siaia bona idia be “mamoe, uda sisia edia huanai bamona,” bona ia diba edia haroro gaukarana dainai dagedage do idia davaria. (Mataio 10:​16-​23) To, namona be unai gauna dainai do idia lalo-manoka lasi. Momokani, nega momo dagedage ese Iehova Dirava ena hesiai taudia, guriguri amo ia dekenai idia tabekau taudia, ia hagoadaia.​—⁠Kara 4:​29-​31; 5:​41, 42.

Keriso ena hahediba taudia ese dagedage bada idia davaria lasi neganai danu, taunimanima ese idia abidia dae hanaihanai lasi. (Mataio 10:​11-​15) Unai hegeregerena, hari Iehova ena Witness taudia edia haroro gaukarana be hanaihanai ia haraga sibona lasi.a Taunimanima momo idia laloa, Dirava abidadama henia karana be ta sibona ese do ia laloa gauna bona idia ura lasi herevalaia. Haida idia ura lasi tomadiho orea ta idia kamonai henia bema gau haida dainai idia inai henia kava. Momokani, taunimanima idia ura lasi kamonai, anina ita havaraia lasi, eiava hekwakwanai ma haida ese lalo-manoka idia havaraia diba. Edena dala ai unai koua gaudia ita hanaia diba?

Anina Namona Havaraia

Iseda haroro gaukarana amo moale mamina ita abia ena badina ta be anina namona ita havaraia dainai. Edena dala ai iseda haroro gaukara amo anina ita havaraia diba? Momokani, ita be ‘ita haoda karaia taunimanima ita abia’ totona. (Mareko 1:​16-​18) Idaunegai Israela haoda taudia be hanuaboi ai idia lao haoda badina unai nega lalonai gwarume momo idia abia diba. Namona be ita ese eda gabu ita laloa namonamo danu, unai amo taunimanima momo be ruma ai idia noho bona iseda sivarai do idia abia dae negana ai ita lao “haoda.” Reana unai be adorahi ai, Saturday bona Sunday ai, eiava ma nega ta ai. Sekit naria tauna ta ia gwau dina ibounai lalonai taunimanima idia gaukara gabudia dekenai unai be dala namona. Ia gwau adorahi haroro gaukarana be anina namodia ia havaraia. Telefon amo eiava nega bona dala idauidau ai ita haroro dainai taunimanima momo be sivarai idia kamonai diba.

Haroro gaukara lalonai haheauka amo huahua namodia idia vara. Eastern Europe lalonai bona Africa ena tano haida dekenai, Basileia harorolaia gaukarana ia heau namonamo noho, unai dainai taunimanima momo be orea lalonai idia vareai noho. Unai hegeregerena, guna idia laloa anina idia havaraia diba lasi gabudia dekenai bona idia haroro momo gabudia dekenai, kongregesen momo idia hamatamaia. To, bema oiemu gabu ai unai bamona anina idia hedinarai lasi be edena bamona?

Lalohadai Maorona Oi Abia Hanaihanai

Iesu ese ia atoa tahua gaudia ita laloa goevagoeva noho neganai, unai ese ita do ia durua, bena haroro gaukara lalonai taunimanima edia ura lasi karana ese iseda lalona do ia hamanokaia lasi. Keriso ia ura ena hahediba taudia ese lalo-namo taudia do idia tahua, to taunimanima momo herea be nega tamona ai edia tomadiho ai idia abia vareai karana ia gwauraia lasi. Nega haida taunimanima hutuma ia herevalaia neganai ia gwau idia be sivarai namona do idia abia dae lasi, Israela taudia momo ese peroveta taudia gunadia edia hereva idia kamonai lasi hegeregerena.​—⁠Esekiela 9:4; Mataio 10:​11-​15; Mareko 4:​14-​20.

“Idia diba lauma gaudia idia tahua be namo taudia” ese “Basileia ena Sivarai Namona” idia abia dae mai moale ida. (Mataio 5:​3, NW; 24:14) Idia ura Dirava ia gwauraia dalana ai iena hesiai gaukara idia karaia. Unai dainai, nega momo iseda gaukara edia anina be taunimanima edia kudouna ena namo hegeregerena do ia vara, to ita gwauraia dalana ena namo hegeregerena lasi. Momokani, lalona veria dalana ai sivarai namona do ita gwauraia be namo. To, anina ia havaraia tauna be Dirava, badina be Iesu ia gwau: “Lauegu Tamana, lau ia siaia Diravana, ese do ia veria mai tauna sibona lau dekenai do ia mai diba.”​—⁠Ioane 6:⁠44.

Iseda haroro gaukarana amo Iehova ena ladana ita hahedinaraia. Herevana taunimanima idia kamonai eiava lasi, to iseda haroro gaukarana be Iehova ena ladana hahelagaia karana ta. Danu, iseda haroro gaukarana amo, ita hamomokania ita be Iesu ena hahediba taudia, bona ita abia hahenamo be iseda nega lalonai mai anina bada gaukarana ita karaia.​—⁠Mataio 6:⁠9; Ioane 15:⁠8.

Lalo-Manoka Bona Kara Heheni Dalana

Taunimanima kara henidia dalana, ruma bese lalonai eiava kongregesen lalonai, be lalo-manoka ia havaraia diba. Hegeregere, reana ta ia laloa iena kara idia lalo-pararalaia lasi. Iseda abidadama tamona tadikaka edia kara kerere ese iseda lalona idia hamanokaia diba. Unai neganai danu, Baibel ese ita ia durua bada diba.

Tanobada hegegemadai, ‘Keristani tadikaka ibounai’ be lauma dalana ai ruma bese badana ta. (1 Petero 2:17) To lalo-tamona oreana ta lalonai ita noho ena mamina do ia maragi ia lao bema ta ta sibona eda hepapahuahu dainai hekwakwanai idia vara. Momokani, aposetolo edia nega lalonai idia noho Keristani taudia be unai idia mamia danu, badina aposetolo Paulo ese idia ia hamaoroa loulou namona be mai lalo-tamona ida do idia noho. Hegeregere, ia ese Keristani hahine rua​—⁠Euodia bona Sunutuke​—⁠ia sisiba henia, edia hepapahuahu idia hamaoromaoroa totona.​—⁠1 Korinto 1:⁠10; Efeso 4:​1-3; Filipi 4:​2, 3.

Bema unai be iseda hekwakwanai, iseda tadikaka bona taihu lalokau henia karana be edena bamona ita habadaia lou diba? Namona be ita sibona ita hamaoroa loulou Keriso be idia dainai ia mase bona idia be, ita bamona, iena boubou gauna idia abidadama henia. Do ita laloatao danu, iseda tadikaka momo be idia hegeregere Iesu idia tohotohoa bona ita dainai edia mauri do idia haboioa diba.

Lagani haida gunanai, Paris, France dekenai, Witness mero matamata ta be Kingdom Hall murimurinai idia atoa sutkeisi ta mai ena bomu ia abia isi sibona. Vadavada haida amo ia heau diho bena ranu lohilohi gabuna ta lalonai ia nega vareai, bona unuseniai ia pou. Unai bamona ena mauri ia haboioa diba ena badina idia henanadailaia neganai, ia haere ia gwau: “Lau itaia ai ibounai emai mauri do ai haboioa diba. Unai dainai lau laloa lau sibona lau mase be namo to ai ibounai ai mase be dika.”b Unai bamona turadia ita bamoa be hahenamo ta. Idia hegeregere Iesu do idia tohotohoa namonamo!

Danu, Tanobada Ibounai Tuarina Iharuana ena nega ai dibura kamepa lalodiai Iehova ena Witness taudia idia gaukara hebou namonamo karana ita laloa be namo.c Vanegai, Malawi dekenai iseda tadikaka bona taihu be Keristani taudia momokanidia dainai mai abidadama ida idia gini goada danu. Bema ita laloa unai bamona nega ai iseda kongregesen tadikaka danu be unai bamona do idia karaia, unai ese ita do ia hagoadaia dina ta ta edia lalohisihisi bona hekwakwanai do ita laloaboio eiava do ita hamaragia totona, ani? Bema Iesu ena lalohadai ita abia, iseda hetura karana iseda tomadiho tamona tadikaka ida ese lalo-manoka lasi to lalo-goada do ia havaraia.

Ta Sibona Ena Lalona Idia Hamanokaia Lalohadai

“Bema tau ta ia laloa gau namona ta do ia abia, to unai gau totona nega daudau ia naria kava, unai be lalohisihisi ia davaria noho, to bema unai tau ese, ia ura henia gauna ia abia neganai, moale momokani do ia davaria.” (Aonega Herevadia 13:12) Iehova ena hesiai taudia haida idia laloa inai nega ena dokona be do ia mai haraga lasi. Keristani taudia idia diba hari ita noho negana be ‘metau dikadia momo idia vara’ negana, bona abidadama lasi taudia momo danu be unai idia diba.​—⁠2 Timoteo 3:​1-5.

To, Keristani taudia be unai abidadama lasi taudia amo idia idau. Namona be idia moale badina inai hahetoho gaudia idia vara lalonai Iesu ia noho vadaeni ena “toana” idia itaia, bona unai ese ia hahedinaraia Dirava ena Basileia ese kahirakahira inai nega dikana do ia haorea. (Mataio 24:​3-​14) Herevana nega ia dika ia lao​—⁠“hisihisi bada herea” ai do ia vara momokani bamona​—⁠to unai gaudia dainai do ita moale, badina be idia hahedinaraia Dirava ena tanobada matamatana ia mai noho.​—⁠Mataio 24:21; 2 Petero 3:​13.

Bema Keristani tauna ta ia laloa Basileia be hari inai nega ena kara idauidau do ia hadokoa haraga lasi, unai lalohadai dainai tauanina gaudia tahua karana dekenai nega bada herea do ia haorea. Bema moni gaukara bona moale karadia dekenai ena nega bona goada ibounai ia haorea, Baibel ese ia gwauraia maduna idauidau do ia huaia be auka. (Mataio 6:​24, 33, 34) Unai bamona lalohadai ese lalohisihisi ia havaraia bena lalo-manoka ia vara. Sekit naria tauna ta ia gwau: “Inai nega lalonai nega matamatana ena mauri toana manokana ta ita haginia toho be laloa namonamo lasi karana.”

Dika Hanamoa Gaudia Namo Hereadia Rua

Ta ese toana idauidau amo dika ena badina ia dibaia murinai, hanamoa gauna namona be edena bamona ia davaria diba? Dala namo hereana ta be sibona ena stadi. Dahaka dainai? Sekit naria tauna ta ia gwau: “Unai ese ita ia hadibaia lou dahaka dainai ita karaia karana do ita karaia be namo.” Ma ta ia gwau: “Hahegani ta sibona dainai ita karaia haroro gaukarana be gabeai metau gauna ai ia lao.” To sibona eda stadi namona ese ita ia durua dokona ia kahirakahira lalonai iseda gaukara ita laloa maoromaoro lou totona. Unai hereva hegeregerena, Baibel ese ita ia hadibaia loulou Dirava ena ura ita karaia lalonai moale korikori ita davaria totona, lauma dalanai ita aniani namonamo be gau badana.​—⁠Salamo 1:​1-3; 19:​7-​10; 119:​1, 2.

Elda taudia ese ma haida hagoadaia totona idia vadivadi henidia karana amo do idia durua diba edia lalo-manoka idia haorea totona. Unai vadivadi negadia ai, elda taudia ese idia hahedinaraia diba ita ta ta be mai eda namo bona iseda gabu Iehova ena taunimanima edia huanai be mai anina bada. (1 Korinto 12:​20-​26) Elda ta ese ena Keristani tadikaka ia herevalaidia, ia gwau: “Edia namo lau hahedinaraia totona, idia ese guna idia karaia gaudia lau gwauraia lou. Idia lau hadibaia Iehova ena matana ai idia be mai anina bada bona iena Natuna ena rarana be idia dainai ia henia. Unai hereva be nega ibounai idia abia dae. Baibel ena siri namodia amo unai hereva ai hamomokania neganai, idia lalo-manoka taudia dekenai dala ia kehoa tahua gaudia matamatadia idia atoa totona, hegeregere ruma bese taudia idia guriguri bona stadi hebou bona Baibel idia duahia.”​—⁠Heberu 6:​10.

Elda taudia ese mamoe taudia idia vadivadi henia neganai, namona be idia naria namonamo, namo lasi idia hahedinaraia Dirava idia hamoalea be hegeregere lasi. To, elda taudia ese edia lalo-manoka tadikakana idia durua diba bena do ia lalo-parara Iesu ena murinai idia raka taudia edia maduna be metau lasi. Unai hegeregerena, iseda Keristani hesiai gaukara be moale havaraia gauna ta.​—⁠Mataio 11:​28-​30.

Lalo-Manoka Haorea

Herevana dahaka ese ia havaraia, to lalo-manoka be hisihisi ta bona do ita hanaia be gau badana. Namona be ita laloatao unai gauna ita hanaia totona ita sibona do ita hekwarahi lasi. Bema ita lalo-manoka namona be iseda Keristani tadikaka, bona gau badana be elda taudia edia heduru ita abia dae. Unai bamona ita karaia neganai, lalo-manoka ena mamina do ita hamaragia.

Bona kara hereadaena be Dirava ena heduru ita tahua, lalo-manoka hanaia totona. Bema guriguri amo Iehova dekenai ita tabekau, ia ese ita ia durua diba iseda lalo-manoka ita haorea momokani totona. (Salamo 55:22; Filipi 4:​6, 7) Ita hamaragia eiava ita haorea, to ita be iena taunimanima dainai, salamo torea tauna ena lalohadai ita abia dae, ia gwau: “Ane dekena amo oi idia tomadiho henia taudia, be mai edia moale momokani danu. Lohiabada e, idia be oiemu bogahisihisi ena diari lalonai idia mauri noho. Oi dainai idia be dina ibounai idia moale bada noho, bona oiemu kara namo dainai oi idia hanamoa noho. Oi ese ai dekenai kwalimu bada oi henia noho. Oiemu lalokau bona bogahisihisi dainai, tuari lalonai kwalimu ai dekenai oi henia noho.”​—⁠Salamo 89:​15-17.

[Footnotes]

[Picture on page 31]

Elda taudia ese mai lalokau ida idia karaia hagoadaia vadivadi be Keristani taudia idia durua diba lalo-manoka idia hanaia totona