Guna Oi Regula Painia, A?

1. Guna momo ese dahaka gaukara idia moalelaia, to haida be dahaka idia karaia?

¹ Idia hanaia laganidia lalonai, ful-taim hesiai taudia tausen momo ese “sivarai namona hadibaia bona harorolaia” gaukarana idia moalelaia. (Kara 5:42) To, haida be badina idauidau dainai painia gaukara idia rakatania. Bema guna oi regula painia, hari emu noho dalana oi sekea diba, unai amo do oi painia lou, a?

2. Dahaka dainai guna idia painia taudia be hari edia noho dalana idia laloa be namo?

² Noho Daladia Idia Idau: Guna reana hekwakwanai ta dainai emu painia gaukara oi rakatania, to hari unai hekwakwanai ia ore. Hegeregere, bema guna painia oi rakatania badina hua ta lalonai hora 90 oi abia diba lasi, hari painia horana be 70 dainai, oi painia lou diba, a? Painia gaukara oi rakatania murinai, moni gaukara o ruma bese ena maduna ia maragi ia lao, a? Taihu ta be gorere dainai, painia gaukara ia rakatania, to ena mauri lagani be 89 neganai, ia painia lou. Lagani ta mai kahana ia be hospital dekenai ia noho lasi, bona ia laloa ena gorere ia namo dainai, ia painia lou diba!

3. Edena dala ai ruma bese ese ta idia durua ia painia lou totona?

³ Reana oi be guna painia gaukara oi karaia lasi, to emu ruma bese lalonai ta be painia gaukara ia rakatania, tama o sina burukana ia naria totona. (1 Tim. 5:​4, 8) Bema unai ia vara, ruma bese lalonai oi eiava ma haida be painia gaukara ia rakatania tauna umui durua diba, a? Namona be unai umui herevalaia hebou, ani? (Aon. 15:22) Bema ruma bese taudia ese ta idia durua ia painia totona, unai be mai ena namo bada.

4. Bema hari painia gaukara oi karaia lou lasi, dahaka oi karaia be namo?

⁴ Bema hari emu noho dalana dainai oi painia lou diba lasi, oi lalomanoka lasi. Iehova be emu ura unai gaukara dekenai ia itaia dainai, ia moale. (2 Kor. 8:12) Painia neganai oi dibaia gaudia be hari emu haroro gaukara ai oi gaukaralaidia. Painia gaukara oi karaia lou totona oi abia urana oi gurigurilaia, bona oi itaia bema dala ia kehoa, vadaeni emu noho dalana oi haidaua diba. (1 Ioa. 5:14) Reana gabeai, Iehova ese oi dekenai gaukara ena “iduara badana” do ia kehoa, unai amo regula painia gaukara amo idia mai moale do oi mamia lou!​—1 Kor. 16:9.