Memorial be Moale Negana

1. Memorial negana ai, edena dala ai eda moale ita habadaia diba?

¹ Oi ura March, April, bona May ai emu moale oi habadaia, a? Dala ta be inai: Emu haroro gaukara oi habadaia, o heduru painia gaukara oi karaia. Edena dala ai unai ese emu moale do ia habadaia?

2. Edena dala ai haroro gaukara do ita habadaia bena do ita moale?

² Emu Moale Habadaia: Iehova ese ita ia karaia neganai, ia ura ia ita dibaia bona tomadiho henia karana amo moale ita davaria. (Mat. 5:3) Danu, Ia ura ita be henia karana amo moale bada ita davaria. (Kara 20:35) Haroro gaukara ita karaia neganai, ita be kara rua ita karaia​—Dirava ita tomadiho henia bona taunimanima ita durua. Unai dainai, haroro gaukara ita habadaia neganai, moale bada ita davaria. Ma danu, haroro gaukara ita karaia hanaihanai neganai, eda haroro daladia ita hanamoa momokani. Haroro daladia ita diba namonamo neganai, unai ese ita ia hagoadaia bona mai gari lasi ida ita haroro. Danu, dala idauidau ai ita haroro bona Baibel stadi ita hamatamaia. Unai ibounai dainai, eda haroro gaukara ita moalelaia.

3. Dahaka dainai March bona April be nega namodia heduru painia gaukara ita karaia totona?

³ March bona April be nega namodia heduru painia gaukara ita karaia totona, badina unai negai do ita abia hidi gauna ta be inai: Hora 30 o 50 ita ripotilaia diba. Danu, Saturday, March 22 ia lao Monday, April 14 ai, ita be invateisen pepadia do ita hariharilaia, unai amo ma haida do ita boiria Memorial hebouna idia mai totona. Unai nega lalonai, kongrigeisen taudia be mai moale bada ida bona mai lalotamona ida edia haroro teritori ibounai dekenai do idia haroro.​—Sep. 3:9.

4. Bema ita ura heduru painia gaukara ita karaia, dahaka ita karaia be namo?

⁴ Hari Palani Karaia: Hari be nega namona emu sediual oi sekea bona gau haida oi haidaua, unai amo hua tamona o ma haida lalonai emu haroro gaukara oi habadaia diba. Dirava dekenai unai oi gurigurilaia. (Iam. 1:5) Emu famili bona kongrigeisen taudia ma haida ida emu palani oi herevalaia. (Aon. 15:22, NW) Ena be oi gorere eiava emu gaukara be momo, to oi danu be heduru painia gaukarana amo emu moale oi habadaia diba.

5. Memorial negana ai haroro gaukara ita habadaia neganai, dahaka do ia vara?

⁵ Iehova ia ura iena hesiai taudia idia moale. (Sal. 32:11) Memorial negana ai haroro gaukara ita habadaia neganai, eda moale do ia habadaia bona eda guba Tamana do ia hamoalea.​—Aon. 23:24; 27:11.