Pablisa Goadadia amo Diba Ita Abia

Kongrigeisen lalonai idia noho pablisa goadadia ita laloa bada. Haida be lagani momo lalonai Iehova idia hesiai henia, bona haida be vanegai sibona haroro gaukara karaia namonamo dalana idia dibaia. Idia laloparara inai nega dokona ai Iesu ese haroro bona hahediba taudia halaoa gaukarana ia habadaia totona, Keristani kongrigeisen ia gaukaralaia noho. (Mat. 28:19, 20) Unai idia karaia totona, Dirava ese idia dekenai siahu ia henia, unai amo idia davaria hekwakwanai bona hahetoho idauidau idia hanaia diba. (2 Kor. 4:7) Unai pablisa goadadia idia ura ma haida idia hadibaia, bona idia amo gau momo ita dibaia diba. (Sal. 71:18) Unai dainai, namona be idia ida ita gaukara hebou. Edena bamona unai ita karaia diba?

Haroro Gaukara ai: Pablisa matamata o idia haroro momo lasi pablisa be edia haroro gaukara idia hanamoa totona, namona be treinini idia abia. Unai bamona pablisa taudia be pablisa goadana idia bamoa, bona ena haroro gaukara karaia dalana idia itaia neganai, gau momo idia dibaia diba. (February 15, 2015, Gima Kohorona ena atikol ladana, “Haroro Gaukara Oi Goadalaia” ena paragraf 3 ena hereva kwarana maragina “Pablisa Matamatadia Durua” itaia.) Haroro gaukara ai pablisa goadana oi bamoa karana ese edena bamona oi ia durua?

Pablisa goadana ta oi noia haroro gaukara ai oi ia bamoa totona, a? Bema ia buruka o ia raka diba lasi, reana wiki ta ta ai ena ruma dekenai emu Baibel stadi ta oi abia lao diba. Baibel stadi umui karaia murinai, iena heduru herevadia totona oi noia diba.

Oi Boiridia: Pablisa goadadia oi dibaia totona idia oi bamoa be namo. Emu ruma bese ena tomadiho ai, ta oi boiria bona oi intaviu henia. Bema pablisa be ia buruka, dala oi karaia diba emu ruma bese ena tomadiho be iena ruma ai umui karaia totona, a? Oi nanadaia edena dala ai hereva momokani ia dibaia. Dahaka hahenamo idauidau ia abia? Dahaka gau namodia idia vara ia itaia? Iehova hesiai henia karana dekenai dahaka ia moalelaia?

Namona be mai laloparara ida idia ita kara henia. Badina, haroro gaukara lalonai pablisa goadadia bona ita ibounai eda harihari gaudia be idauidau. (Roma 12:6-8) Haida be idia buruka dainai, idia hegeregere lasi nega bada lalonai ita idia bamoa totona. To, lagani momo lalonai Iehova idia hesiai henia dainai, ita idia durua bada diba.