Hahediba Taudia Halaoa Gaukarana Karaia Noho
1. Taunimanima idia mauri totona, dahaka ita karaia be namo?
1 Hesiai lagani 2014 ena ripoti ese ia hahedinaraia, Dirava ena taunimanima be edia lalona idia hadaia Basileia ena sivarai namona idia harorolaia goadagoada totona. (Mat. 24:14) Unai idia karaia daladia be: Ruma-ta-ruma-ta haroro gaukara, pepapepa bona invateisen hariharilaia, bona pablik gabudiai haroro dala matamatadia amo taunimanima momo ita durua Baibel ena hereva idia abia dae totona. To, bema taunimanima idia ura mauri idia abia, namona be idia ita durua Baibel idia stadilaia, unai amo Iesu ena hahediba taudia ai idia lao totona.—1 Tim. 2:4.
2. Baibel stadi ta hamatamaia totona, dahaka henanadai ita laloa be namo?
2 Baibel Stadi Momo Hamatamaia: Bema ta ia kamonai namonamo, oi hekwarahi ena ladana bona adres oi abia, unai amo Baibel stadi ta oi hamatamaia totona, a? Nega ginigunana oi vadivadi neganai, Baibel stadi hamatamaia dalana oi hahedinaraia, a? Emu magasin rut dekenai Baibel stadi dalana oi hahedinaraia, a? Dahaka Dainai Baibel Oi Stadilaia? bona Baibel Stadi ai Dahaka Ia Vara? ena vidio be emu gaukara turadia, sikuli turadia, varavara bona ma haida dekenai oi hahedinaraia, a? Pablikeisen atoa teibolo o troli oi gaukaralaia neganai, stadi pablikeisen idia abia taudia oi hadibaia davana lasi Baibel stadi ita karaia danu, a?
3. Haroro gaukara ita karaia namonamo totona, dahaka ita karaia be namo?
3 Iehova Bona Iesu Edia Heduru: Iesu ese ‘hahediba taudia halaoa’ gaukarana ena hahegani ia gwauraia neganai, inai hereva “umui lao” ia gaukaralaia. Anina be mai goada bona ura bada ida unai gaukara ita karaia. To, ia gwauhamata ita do ia rakatania lasi. (Mat. 28:19, 20) Danu, Iehova be ita dekenai tulu idauidau, treinini, bona iena lauma helaga amo ita ia durua taunimanima dekenai hereva momokani ita hadibaia totona. (Sek. 4:6; 2 Kor. 4:7) Guriguri amo Iehova ita noia eda “ura ia hagoadaia,” unai amo mai anina bada gaukarana ita karaia totona.—Fili. 2:13.
4. Dahaka dainai hahediba taudia halaoa gaukarana ita karaia noho be namo?
4 Sivarai namona harorolaia karana ese ita dekenai moale ia mailaia. To, ta dekenai hereva momokani ita hadibaia bona ia ita durua ita ida “mauri ia lao henia dalana” dekenai ia raka neganai, unai ese moale bada ia havaraia. (Mat. 7:14; 1 Tes. 2:19, 20) To mai anina bada guna be inai: Hahediba taudia halaoa gaukarana ita karaia noho, unai amo Iehova ita hamoalea, badina “ia ura lasi tau ta ia mase, to ia ura taunimanima ibounai idia helalo-kerehai.”—2 Pet. 3:9.