Heduru Ia Ura Henia Tauna Idia Durua Taudia Edia Hahenamo Idauidau

Tanobada hegegemadai ai taunimanima momo be aniani bona ruma idia tahua. Haida idia ura nega vaira helarona idia abia. Edena dala ai unai bamona taudia do ita durua unai amo Dirava ena lalonamo bona hanamoa do ita abia?

BAIBEL IA GWAU

“Bema ogogami taudia dekenai oi bogahisihisi henia neganai, oi ese Lohiabada dekenai oi heniatorehai noho. Lohiabada ese unai davana oi dekenai do ia henia lou.”​—AONEGA HEREVADIA 19:17.

HEDURU IA URA HENIA TAUNA ITA DURUA ENA BADINA

Iesu be henaohenao taudia ese idia haberoa bona kahirakahira idia hamasea tauna ena parabole ia herevalaia. (Luka 10:29-37) Idau tauna ta be idia haberoa dikadika tauna ia itaia bona ia durua. Ena be ia be idau bese tauna, to unai tauna ia durua.

Inai hebogahisi tauna be idia haberoa tauna dekenai medikol heduru bona tauanina dalanai heduru ia henia sibona lasi, to iena hisihisi amo ia hagoadaia danu.

Inai parabole amo dahaka ita dibaia? Iesu ia hahedinaraia, namona be ita karaia diba gaudia amo heduru idia ura henia taudia ita durudia. (Aonega Herevadia 14:31) Baibel ese ita ia hadibaia kahirakahira Dirava ese ogogami bona hisihisi do ia haorea. Reana do ita laloa, edena dala ai bona edena negai Dirava ese unai do ia karaia? Atikol ma ta ai, emu lalokau Havaraia Tauna ese oi dekenai do ia henia hahenamo idauidau do ita herevalaia.