Paulo be “Dirava Ia Tanikiu Henia Bona Goada Ia Abia”

Roma ai idia noho kongrigeisen taudia idia kamonai Paulo be idia do ia vadivadi henia neganai, tadikaka haida be kilomita 64 bamona idia raka Paulo idia hedavari henia totona. Edena dala ai tadikaka edia lalokau karana ese Paulo ia durua? “Paulo ese idia ia itaia neganai, Dirava ia tanikiu henia bona goada ia abia.” (Ka 28:15) Momo idia diba Paulo be nega momo kongrigeisen taudia ia hagoadaia, to unai nega ai ia be dibura tauna bamona ia noho dainai, tadikaka ese ia idia hagoadaia.​—2Ko 13:10.

Hari inai negai sekit naria taudia be kongrigeisen ta ta idia vadivadi henia bona tadikaka taihu idia hagoadaia. Dirava ena taunimanima hegeregerena, idia danu be nega haida hesiku mamina idia abia, idia lalohekwarahi, bona idia lalomanoka. Bema sekit naria tauna bona ena adavana be emu kongrigeisen idia vadivadi henia, umui “hagoadaia heheni” totona dahaka do oi karaia?​—Ro 1:11, 12.

• 

  Haroro gaukara durua. Sekit naria tauna ena vadivadi purana ai pablisa taudia be edia nega bona goada idia henia bona idia gaukara hebou neganai, unai ese ia do ia hagoadaia. (1Te 1:2, 3; 2:20) Reana ena vadivadi huana ai heduru painia oi karaia diba. Reana nega oi atoa diba sekit tauna bona ena adavana ida haroro gaukara ai umui gaukara hebou totona, eiava idia ta ese oi ia bamoa Baibel stadi umui itaia totona. Idia moale pablisa idauidau ida idia gaukara hebou, hegeregere pablisa matamata o haroro gaukara dekenai idia manada lasi taudia.

• 

  Heabidae karana hahedinaraia. Mahuta gabuna o aniani kahana dekenai heduru oi henia diba. Unai kara ese ia hahedinaraia sekit tauna bona ena adavana oi lalokau henidia. Idia dekenai oi henia heduru karana do idia moalelaia.​—Lu 10:38-42.

• 

  Ena hakaua bona sisiba herevana oi kamonai bona badinaia. Sekit naria tauna be mai lalokau ida ita ia durua Iehova hesiai henia karana ita hanamoa totona. Nega haida, ita dekenai sisiba auka ia henia. (1Ko 5:1-5) Bema ia ita kamonai henia bona ita badinaia, do ia moale.​—He 13:17.

• 

  Tanikiu karana hahedinaraia. Sekit naria tauna bona ena adavana oi hamaoroa edena dala ai edia gaukara goada karana ese oi ia durua. Reana emu hereva amo eiava nouti o kadi ta amo hanamoa hereva haida oi torea diba.​—Kl 3:15.