Iseda Haroro Bona Mauri Dalana Hebou Pepana Edia Referens
© 2022 Christian Congregation of Jehovah’s Witnesses
JANUARY 2-8
BAIBEL ENA HEREVA BADADIA | 2 KING TAUDIA 22-23
“Dahaka Dainai Ita Manau be Namo?”
Manau Tauna Iosaia ese Iehova Ena Lalo-Namo Ia Abia
Daba momokani amo, dubu hanamoa lou taudia idia gaukara goadagoada. Momokani, Iosaia be Iehova ia tanikiu henia badina iena tubuna dikadia haida ese Dirava ena ruma idia hadikaia gaudia be gaukara taudia ese idia hanamoa vadaeni. Gaukara idia karaia lalonai, Sapana be sivarai ta gwauraia totona ia mai. To, dahaka ia dogoatao? Oibe, lokua gauna ta ia dogoatao! Ia gwau Hahelaga Tauna Badana “Hilekaia ese Lohiabada ena Taravatu Buka, Dirava ese Mose dekenai ia henia gauna, ia davaria.” (2 Sivarai 34:12-18) Idia davaria gauna be mai anina bada—idia daradara lasi unai be Taravatu bukana ginigunana!
Iosaia ia ura bada unai buka ena hereva iboudiai ia kamonai. Sapana ese unai buka ia duahia lalonai, king ia ura ia itaia unai hahegani ta ta edia anina ia dekenai bona taunimanima dekenai be dahaka. To, unai buka ese tomadiho momokani ia gwauraia badabada dalana bona taunimanima ese tomadiho koikoi idia badinaia neganai do ia vara hisihisidia ia perovetalaia dalana ia hoalaia. Hari, Iosaia ia lalo-parara taunimanima be Dirava ena hahegani ibounai idia badinaia lasi, unai dainai iena dabua ia darea bona Hilekaia, Sapana bona ma haida dekenai oda henia, ia gwau: ‘Umui lao, Lohiabada umui nanadaia, inai idia davaria Buka ena hadibaia hereva do ita laloa namonamo totona. Badina Lohiabada be ita dekenai ia badu, iseda sene taudia ese iena hereva idia kamonai henia lasi, bona inai Buka ia torea hereva idia badinaia lasi dainai.’—2 King Taudia 22:11-13; 2 Sivarai 34:19-21.
Manau Tauna Iosaia ese Iehova Ena Lalo-Namo Ia Abia
Iosaia ena gwaukau taudia be peroveta hahinena Hulida dekenai, Ierusalema ai, idia lao bona idia giroa lou neganai, hereva idia hamaorolaia. Hulida ese Iehova ena hereva ia gwauraia, ia hahedinaraia idia davaria bukana ese ia gwauraia panisi herevadia be tomadiho momokani negea besena dekenai do ia vara. To, Iosaia be Iehova Dirava ena vairana ai ia manau dainai, unai panisi kara do ia itaia lasi. Ia be do ia mase bona maino ai gara gabuna ai do idia abia lao.—2 King Taudia 22:14-20; 2 Sivarai 34:22-28.
Hakaua Hereva Namodia
Herevana Edena Bamona Oi Tubu Daekau Oi Kwalimu Diba
Ena be Iosaia ena maragi negana be ia dika, to Iehova ena matana ai kara namo ia karaia. Iena lohia negana be namo herea dainai Baibel ia gwau: “Nega gunadia lalonai, king ta be lasi Iosaia hegeregere, Lohiabada ena hesiai gaukara ia karaia mai ena laumana ibounai, mai ena kudouna ibounai, bona mai ena goada ibounai danu, Mose ena taravatu ibounai hegeregere. Bona Iosaia ena dina murinai danu king ta lasi ia toreisi, Iosaia hegeregerena.”—2 King Taudia 23:19-25.
Iosaia ena haheitalai ese idia maragi neganai mauri dikana idia haheaukalaia taudia ia hagoadaia bada! Iena haheitalai amo dahaka ita dibaia diba? Dahaka ese Iosaia ia durua, dala maorona ia abia hidi bona unai dala ia badinaia noho totona?
JANUARY 9-15
BAIBEL ENA HEREVA BADADIA | 2 KING TAUDIA 24-25
“Hari Ita Noho Negana Oi Laloa Namonamo”
Iehova Ena Hahemaoro Dinana be Kahirakahira!
2 Sepanaia ena peroveta herevadia dainai, matamata tauna King Iosaia ia diba momokani Iuda ena tomadiho karadia mirodia ia kokia be namo. To, king ese unai tano amo tomadiho koikoi ia kokia neganai, unai ese ena taunimanima edia kara dika ibounai ia koua lasi bona iena tubuna tau, King Manase, ena kara dika ibounai ena davana ia karaia diba lasi. Manase ese “Ierusalema dekenai kerere lasi taudia momo ia alaia mase.” (2 King Taudia 24:3, 4; 2 Sivarai 34:3) Unai dainai, Iehova ena hahemaoro dinana do ia mai.
Ieremia Bukana Ena Hereva Badadia
Lagani be 607 B.C.E., Sedekaia be lagani 11 ia lohia vadaeni. Babulonia ena King Nebukanesa be hua 18 lalonai Ierusalema ia hagegea bona ena lohia laganina 18, ena hua 5 ena dina namba 7 ai, Nebusaradana, tuari biaguna badana “be Ierusalema dekenai ia ginidae.” (2 King Taudia 25:8) Reana, hanua ena magu murimurina dekenai ena kamepa ia karaia bona idia vara gaudia edia oromana ia itaia bona tuari dalana ia palanilaia. Dina toi murinai, unai hua ena dina namba 10 ai, “Nebusaradana ese Ierusalema dekenai ia raka vareai” bona hanua ia gabua.—Ieremia 52:12, 13.
Hakaua Hereva Namodia
King Taudia Iharuana Bukana Ena Hereva Badadia
24:3, 4. Manase be rara dekenai ia kerere dainai, Iehova ese Iuda ena “rara habubua kava ena dika ia gwauatao lasi.” Dirava ese kerere lasi tauna ena rara ia matauraia. Ita diba momokani Iehova ese kerere lasi taudia edia rara idia bubua kava taudia do ia haorea momokani.—Salamo 37:9-11; 145:20.
JANUARY 16-22
BAIBEL ENA HEREVA BADADIA | 1 SIVARAI 1-3
“Baibel be Hereva Momokani Ia Gwauraia Bukana”
w09-E 9/1 14 par. 1
Adamu bona Heva—Idia be Taunimanima Korikoridia, A?
Hegeregere, 1 Sivarai Karoa 1-9 bona Evanelia bukana Luka karoa 3 ai, Iuda taudia edia bese ena lista mani oi itaia. Unai lista ese nega idaudia rua ai idia noho bese 48 bona 75 be edia gabu maorona ai ia atoa. Luka bukana be Iesu Keriso ena bese ena lista ia herevalaia, bona 1 Sivarai bukana ese Israela besena edia king bona hahelaga taudia edia lista ia herevalaia. Unai lista rua ai, ita diba momo taudia edia ladana ia noho hegeregere, Solomona, Davida, Iakobo, Isako, Aberahamo, Noa, bona Adamu. Unai lista rua ai idia noho taudia be taunimanima korikoridia, bona Adamu danu be tau korikorina.
w08-E 6/1 3 par. 4
Noa bona Abata Sivaraina be Ia Vara Momokani
Baibel ai idia noho bese ena lista rua ese ia hahedinaraia Noa be tau korikorina. (1 Sivarai 1:4; Luka 3:36) Esera bona Luka ese unai bese edia lista idia tahua namonamo bona idia torea. Luka be Iesu Keriso amo ia lao Noa ena bese ena lista ia torea.
w09-E 9/1 14-15
Adamu bona Heva—Idia be Taunimanima Korikoridia, A?
Hegeregere, hanaihanai dubu idia lao taudia ese inai Baibel ena hahediba herevana idia laloa bada, unai be mauri davana. Unai hahediba herevana hegeregerena, Iesu Keriso ese ena mauri goevadaena ia henia, taunimanima edia kara dika amo ia hamauridia totona. (Mataio 20:28; Ioane 3:16) Momokani ita diba, gau ta ena davana idia henia eiava ta idia ruhaia totona davana korikorina do idia henia. Unai dainai Baibel ese Iesu ia gwauraia, “mauri davana karaia” tauna. (1 Timoteo 2:6) Reana do ita henanadai, dahaka totona mauri davana ia karaia? Baibel ia gwau: “Adamu dainai taunimanima ibounai idia mase noho, unai hegeregerena Keriso amo taunimanima ibounai be mauri do idia abia.” (1 Korinto 15:22) Iesu ese ena mauri goevadaena ia bouboulaia kamonai taudia ia hoia lou totona, unai amo Adamu ese Eden ai ia haboioa mauri goevadaena ena davana ia karaia. (Roma 5:12) Unai dainai, bema Adamu be ia noho momokani lasi, Keriso ena mauri davalaia boubouna be anina lasi.
Hakaua Hereva Namodia
it-1-E 911 par. 3-4
Bese Taudia Edia Lista
Hahine Edia Ladana. Hahine ena ladana idia gwauraia, bema histori lalonai ia be mai anina bada gaukarana ta ia durua. Genese 11:29, 30, ese Sarai (Sara) ia gwauraia, bona ena badina be ia amo gwauhamata Garana do ia mai, to Aberahamo ena adavana ta amo lasi. Unai siri tamona ai Milika ena ladana ia noho, badina ia be Isako ena adavana, Rebeka ena tubuna hahine, unai amo ia hahedinaraia Rebeka be Abrahamo ena varavara ta. Badina taravatu hegeregerena, Isako be bese ma haida amo kekeni ta do ia adavaia lasi. (Ge 22:20-23; 24:2-4) Genese 25:1 ai, gabeai Aberahamo ese ia adavaia hahinena Ketura ena ladana ia noho. Unai ese ia hahedinaraia Sara ia mase murinai, Aberahamo ia headava lou bona ia do hegeregere natuna ia havaraia totona, ena be lagani 40 murinai, Iehova ese hoa dalanai natuna havaraia siahuna ia henia. (Ro 4:19; Ge 24:67; 25:20) Danu, Midiana bona Arabia iduhu ma haida edia hetura karana Israela besena ida ia hahedinaraia.
Lea, Rahela, Iakobo ena hesiai hahinedia, bona idia havaraia natudia edia ladana ia noho. (Ge 35:21-26) Unai ese ita ia durua, gabeai Dirava ese unai natudia ia kara henia dalana ita lalopararalaia. Unai dainai hahine haida edia ladana be bese ena lista ai idia rejista. Ahuna idia abia neganai, edia ladana be lista ai ia noho. (Nu 26:33) To Tamara, Rahaba, bona Ruta edia ladana ia noho be mai anina bada. Badina idia ta ta amo gau namona ta ia vara, hegeregere edia bese amo Mesia, Iesu Keriso ia vara. (Ge 38; Ru 1:3-5; 4:13-15; Mt 1:1-5) 1 Sivarai 2:35, 48, 49; 3:1-3, 5 lalonai hahine ma haida edia ladana ena lista ia noho.
JANUARY 23-29
BAIBEL ENA HEREVA BADADIA | 1 SIVARAI 4–6
“Egu Guriguri ese Edena Dala ai Egu Kara Ia Hahedinaraia?”
w10-E 10/1 23 par. 3-7
“Guriguri kamonai Diravana”
Iabesa be hanaihanai ia guriguri. Ena guriguri ia hamatamaia neganai, Dirava ena hahenamo totona ia noinoi. Ia be gau toi totona ia noinoi bona ena guriguri ese ia hahedinaraia ena abidadama be ia goada.
Ginigunana, Iabesa ese Dirava ia noia: “Tano momo oi henia.” (Siri 10) Inai hemataurai tauna be ena dekena tauna ena tano ia ura henia bona abia kava lasi. Reana ia be tano totona Iehova ia noia lasi, to taunimanima totona. Reana ia be Iehova ia noia ena tano ai maino do ia habadaia, unai amo Dirava momokanina idia tomadiho henia taudia momo idia noho diba.
Iharuana, Iabesa ese Dirava ia noia ia “ida” do ia noho totona. Dirava ese ena siahu ia gaukaralaia ia idia tomadiho henia taudia ia durua totona. (1 Sivarai 29:12) Ena kudouna ena ura gauna ia abia totona, Iabesa be Dirava ena heduru ia tahua, badina ia diba Dirava ena imana be ia kwadogi lasi ia idia abidadama henia taudia ia durua totona.—Isaia 59:1.
Ihatoina, Iabesa ia guriguri: “Lau dekenai do idia vara dika amo lau oi gimaia, unai amo lau dekenai gau dikana ta do ia vara lasi!” Inai hereva “lau dekenai gau dikana ta do ia vara lasi!” ena anina be Iabesa ia guriguri lasi, dika do ia hanaia totona. To Iehova ia noia do ia durua, ia lalohisihisi lasi eiava idia vara dika gaudia dainai ia hesiku lasi totona.
Iabesa ena guriguri ese ia hahedinaraia, ia be tomadiho momokani ia laloa bada bona guriguri ia Kamonai Diravana ia abidadama henia. Edena dala ai Iehova ese ena guriguri ia haerelaia? Siri ena kahana dokona ia gwau: “Vadaeni Dirava be Iabesa ena noinoi hegeregerena ia durua.”
Hakaua Hereva Namodia
Sivarai Ginigunana Bukana Ena Hereva Badadia
5:10, 18-22. King Saulo ena negai, ena be Hagara taudia be momo herea, to Ioridane ena ist kahanai idia noho iduhu taudia ese idia halusidia. Unai iduhu taudia idia kwalimu badina edia tatau goadadia be Iehova dekenai idia tabekau. Lauma tuari lalonai iseda inai taudia be momo herea, unai dainai Iehova dekenai ita tabekau momokani be namo.—Efeso 6:10-17.
JANUARY 30–FEBRUARY 5
BAIBEL ENA HEREVA BADADIA | 1 SIVARAI 7-9
“Iehova Ena Heduru amo Asainmen Badadia Oi Hagugurua Diba”
Sivarai Ginigunana Bukana Ena Hereva Badadia
9:26, 27. Geiti idia naria Levi taudia be gaukara badana idia karaia. Idia be dubu ena helaga gabudia edia iduara ena ki idia dogoatao. Idia be dina ta ta ibounai geiti idia kehoa. Iseda maduna be iseda teritori dekenai taunimanima ita lao henia bona idia ita durua Iehova idia tomadiho henia totona. Geiti idia naria Levi taudia bamona, namona be ita hamomokania ita be gaukara goadagoada taudia.
Emu Maduna Ia Metau Neganai, Pineha Oi Tohotohoa, A?
Israela ai Pineha be maduna metauna ia huaia, to Dirava dekenai ia tabekau, ia aonega bona ia gari lasi dainai, Israela besena ia naria dalana be Iehova ese ia moalelaia. Lagani 1,000 murinai lauma helaga ena siahu amo, Esera ia gwau: “Unai nega gunadia lalonai, Pineha Eleasara ese idia ia biagua, bona Lohiabada be ia danu ia noho.” (1 Siv. 9:20) Namona be hari inai negai mai abidadama ida Dirava ena taunimanima idia gunalaia taudia, bona Keristani taudia ibounai idia diba Iehova be idia danu ia noho.
Hakaua Hereva Namodia
Iehova Dekenai Ane Abia!
6 Oibe, Iehova ese iena peroveta taudia amo ia idia tomadiho henia taudia ia oda henidia ane amo ia do idia hanamoa. Ane idia abia bona miusiki gaudia idauidau idia gadaralaia hahelaga taudia haida be dubu helaga ena gaukara ma haida idia karaia lasi. Unai amo edia nega bada be ane bona miusiki idia torea, bona idia tohoa loulou.—1 Siv. 9:33.
FEBRUARY 6-12
BAIBEL ENA HEREVA BADADIA | 1 SIVARAI 10-12
“Dirava Ena Ura Oi Karaia Totona Emu Ura Oi Habadaia”
“Oiemu Ura Ena Kara, be Lau Dekenai Mani Do Oi Hadibaia”
12 Davida ena kara amo gau ma ta ita dibaia. Ia be hakaua herevadia edia anina ia lalopararalaia, bona ia ura ena mauri lalonai ia badinadia. Hakaua herevadia be ita idia durua abia hidi maorodia ita karaia, bona Iehova ena lalohadai ita dibaia totona. Davida hegeregerena, Iehova ena taravatu ta amo ita ese hakaua herevana ta ita dibaia diba. Hegeregere, dina ta Davida ia gwau ia ura ‘Betelehema ena ranu guri amo ranu sisina ia inua.’ To, Betelehema be Pilistia taudia ese idia biagua. Davida ena tuari taudia toi be edia mauri idia laloa lasi, to ranu idia abia totona Betelehema dekenai idia lao. To, Davida ia ura lasi idia mailaia ranuna do ia inua. Ia ese “unai ranu ia bubua ore, Lohiabada dekenai ia henia, boubou gauna” bamona. Dahaka dainai? Davida ia gwau: “Lau ese inai ranu lau inua diba lasi. Bema lau inua, unai be unai tau goadadia edia rarana do lau inua bamona, badina be unai ranu abia totona, edia mauri idia negea bamona.”—1 Siv. 11:15-19.
13 Davida ia diba Taravatu ia gwau rara be do idia ania lasi, to Iehova dekenai do idia bubua. Danu, Davida ia laloparara dahaka dainai unai bamona do idia karaia. Ia diba “mauri gaudia ibounai edia mauri be rara” lalonai ia noho. To, iena tuari taudia toi be ranu idia abia mai, rara idia mailaia lasi. Dahaka dainai Davida ia ura lasi unai ranu ia inua? Badina ia ese Taravatu amo hakaua herevana ta ia laloatao. Ia diba Iehova ena matanai rara be helaga, bona unai tuari taudia ese ranu idia abia totona, edia mauri idia haboioa diba. Unai dainai, Davida ese unai ranu ia inua lasi, badina ia laloa bema unai ranu ia inua, anina be ia ese edia rara ia matauraia lasi.—Lev. 17:11; Deu. 12:23, 24.
Dirava Ena Taravatu Bona Hakaua Herevadia amo Emu Lalomamina Oi Hadibaia
5 Dirava ena taravatu ese ita idia durua totona, ita duahia eiava diba sibona be hegeregere lasi. To, taravatu ibounai ita ura henia bona matauraia. Baibel ia gwau: “Kara dika umui inai henia, bona kara namo umui ura henia.” (Amo. 5:15 NWT) To edena bamona unai ita karaia diba? Gau badana be Iehova ena laloa dalana ita tohotohoa. Haheitalai ta be inai: Oi be oi mahuta namonamo lasi. Unai dainai, emu doketa ia gwau namona be aniani namodia oi ania, oi eksasais, bona emu mauri ai gau haida oi haidaua. Doketa ena sisiba oi badinaia neganai, namo oi davaria! Reana emu doketa oi tanikiu henia badina oi ia durua, emu mauri oi hanamoa.
6 Unai hegeregerena, iseda Dirava be taravatu ia henia badina ia ura kara dikadia ita dadaraia bona iseda mauri ita hanamoa. Momokani, Baibel ia taravatua karadia haida be inai: Koikoi, palani dikadia, henaohenao, matabodaga, dagedage, bona meamea karadia. (Aonega Herevadia 6:16-19 duahia; Apok. 21:8) Iehova ita badinaia dainai namo bada ita davaria neganai, ita ese Iehova bona ena taravatu ita lalokau henidia bada.
Hakaua Hereva Namodia:
it-1-E 1058 par. 5-6
Kudouna
‘Mai Kudouna Ibounai’ Ida Hesiai Gaukara Karaia. Ta ena kudouna be ia gaukara namonamo totona, kahana ibounai idia gaukara hebou be namo, to lauma dalana ai bema ita naria namonamo lasi, iseda hetura karana Iehova ida ia dika diba. Davida ia guriguri: “Egu lalona oi hatamonaia, unai amo emu ladana dekenai do lau gari,” unai ese ia hahedinaraia ta be gau ta ia lalokau henia eiava ia gari henia neganai, Iehova do ia lalokau henia lasi. (Sal 86:11) Unai bamona taudia be Iehova idia “badinaia momokani lasi” bona mai kudouna ibounai ida Iehova idia tomadiho henia lasi. (Sal 119:113; Apo 3:16) Ta ia “daradara” diba hegeregere, biaguna rua ia hesiai henia eiava mai koikoi ida gau ta ia gwauraia bona gau idauna ia laloa diba. (1Si 12:33ftn; Sal 12:2) Iesu ese unai bamona koikoi taudia ia gwau henia.—Mt 15:7, 8.
Dirava ia ura hamoalea tauna be ia daradara lasi, to namona be mai kudouna ibounai ida Iehova ia hesiai henia. (1Si 28:9) Iseda kudouna ia ura dika ia havaraia bona kudouna ai idia noho lalohadai be hanaihanai idia dika, unai dainai ita gaukara goada be namo. (Ier 17:9, 10; Ge 8:21) Inai gaudia ese ita do idia durua: mai kudouna ibounai ida ita guriguri (Sal 119:145; La 3:41), hanihanai Dirava ena Hereva ita stadilaia (Esr 7:10; Ao 15:28), mai ura ida sivarai namona ita harorolaia (Ier 20:9 hahegeregerea), bona mai kudouna ibounai ida Iehova idia badinaia taudia ida ita hebamo.—2Ki 10:15, 16 hahegeregerea.
FEBRUARY 13-19
BAIBEL ENA HEREVA BADADIA | 1 SIVARAI 13-16
“Hakaua Herevana Badinaia Karana ese Namo Ia Havaraia”
Nega Haida Oi Henanadai, “Iehova be Edeseni?”
12 Taravatu mauana be Israela dekenai idia abia giroa bona Kiriata Iearimi dekenai ia noho daudau murinai, King Davida ia ura Ierusalema dekenai ia abia lao. Ia be taunimanima gunalaia taudia ida ia herevahereva bona ia gwau ‘bema idia dekenai ia namo, bona bema Lohiabada, iseda Dirava ia ura neganai,’ Maua do idia abia lao. To unai gauna ia karaia totona Iehova ena ura ia tahua namonamo lasi. Bema unai bamona ia karaia, treila latanai Maua do idia atoa lasi. Dirava ese ia hadibadia bamona, Kohata Levi taudia ese edia pagana dekenai do idia huaia. Ena be Davida be nega ibounai Iehova ia tahua, to unai nega ai ia be dala maorona ai unai ia karaia lasi. Unai dainai dika ia vara. Gabeai Davida ia gwau: “Lohiabada iseda Dirava ese ita ia dagedage henia. Inai dika ita davaria badina Dirava ena ura dalana ita tahua guna lasi.”—1 Sivarai 13:1-3; 15:11-13; Numera 4:4-6, 15; 7:1-9.
Nega Haida Oi Henanadai, “Iehova be Edeseni?”
13 Unai Maua be Levi taudia ese Obeda Edoma ena ruma amo idia abia lao Ierusalema neganai, Davida ese ia torea anena ta idia abia. Ane lalonai inai hadibaia hereva ia noho: “Durua totona Lohiabada dekenai ita lao be namo, bona Lohiabada kahirakahira do ita noho nega ibounai be namo. Dirava ese ia karaia kara badadia do umui laloa. Tau dikadia edia kerere davana karaia totona, Dirava ese ia karaia gaudia danu do umui laloa.”—1 Sivarai 16:11, 12.”
Hakaua Hereva Namodia
Iehova, Noho Hanaihanai King, Tomadiho Henia
14 Davida ese Taravatu Mauana be Ierusalema dekenai ia abia lao neganai, Levi taudia ese Dirava hanamoa anena ta idia abia, bona mai anina bada herevana ta idia gwauraia. Sivarai Ginigunana 16:31 ia gwau: “Bese idauidau dekenai inai bamona do umui hereva, do umui gwau, ‘[Iehova] be King momokani!’” New World Translation Baibel ai unai siri ia gwau: “Iehova sibona be King ai ia lao!” To, reana ta do ia henanadai, ‘Iehova be Noho Hanaihanai King dainai, edena dala ai unai nega ai ia be King ai ia lao?’ Iehova ese ena lohia siahuna ia gaukaralaia, o ma ta ia abia hidi hekwakwanai ta ia hamaoromaoroa neganai, unai ese ia hahedinaraia Iehova be King. Unai ita lalopararalaia be mai anina bada. Davida ia do mase lasi neganai, Iehova ia gwauhamata Davida ena lohia siahuna be do ia noho ela bona hanaihanai. Ia gwau: “Oiemu natuna ta do lau haginia, king dagi do ia abia. Do lau haginia goada.” (2 Sam. 7:12, 13) Lagani 1,000 mai kahana murinai, Davida ena “natuna“ ia hedinarai neganai, unai gwauhamata ia guguru. Unai “natuna” be daika, bona edena negai King ai ia lao?
FEBRUARY 20-26
BAIBEL ENA HEREVA BADADIA | 1 SIVARAI 17-19
“Ena be Oi Lalohisihisi To Oi Moale”
Iehova Ena Orea Ita Moalelaia
GUNAGUNA ia noho Israela tauna Davida be Heberu Revarevadia ese idia herevalaia tau namona ta. Ia be Iehova Dirava ia badinaia tauna, herevana ia be mamoe naria tauna, miusiki gadaralaia tauna, peroveta tauna, bona king. Davida be Iehova ia lalokau henia bada dainai, ia ura Dirava ena dubu ta ia haginia. Unai dubu be Israela taudia edia tomadiho momokani gabuna ai do ia lao. Davida ia diba, dubu bona ena gaukara be Dirava ena taunimanima dekenai moale bona hahenamo momo do idia mailaia. Unai dainai, Davida ia gwau: “Oi [Iehova] ese oi abia hidi taudia, bona oi ese oiemu gabu helagana dekenai oi mailaidia taudia, be idia moale bada. Inai oiemu Ruma ena lalonai, gau namodia momo idia noho. Unai dainai oiemu Dubu Helaga ai noho neganai, aiemai lalona idia namo momokani.”—Salamo 65:4.
Emu Hesiai Gaukara Oi Moalelaia
11 Unai hegeregerena, mai goada ida Iehova ena hesiai gaukara ita karaia neganai, iseda moale do ita habadaia. Namona be haroro gaukara ai ‘nega bada ita gaukaralaia,’ bona ita hekwarahi kongrigeisen ena gaukara idauidau ita durua. (Kara 18:5; Heb. 10:24, 25) Kongrigeisen heboudia totona ita hegaegae namonamo, unai amo haere namodia ita henia diba. Wiki ena hebou totona ita abia asainmen ita laloa bada. Bema kongrigeisen ai gaukara ta idia henia, namona be nega korikori ai unai oi karaia bona oi karaia namonamo. Namo lasi oi laloa idia henia gaukara be anina bada lasi bona nega bada do oi henia lasi unai oi karaia totona. To oi hekwarahi emu gaukara oi karaia namonamo totona. (Aon. 22:29) Bema Iehova totona oi gaukara goada, ena turana namona ai do oi lao bona do oi moale. (Gal. 6:4) Bona oi ura gaukarana be ma haida ese idia abia neganai, idia totona do oi moale.—Roma 12:15; Gal. 5:26.
Hakaua Hereva Namodia
w20.02 12, maua
Iseda Tamana, Iehova, Ita Lalokau Henia Bada
Iehova be Lau Ia Laloa, A?
Nega ta inai bamona oi laloa, ‘Tanobada dekenai idia noho taudia bilioni momo amo, dahaka dainai Iehova ese lau ia laloa?’ Bema oibe, emu hemami be ma haida edia hemami hegeregerena. King Davida ia gwau: “[Iehova] e, ai taunimanima be dahaka, oi ese oi laloa noho ai dekenai? Ai be gau ta lasi bamona, anina lasi, to edena bamona oi ese ai oi naria noho?” (Sal. 144:3) Davida ia abia dae, Iehova be ia ia diba namonamo. (1 Siv. 17:16-18) Danu Iehova ese iena Hereva bona iena orea amo ia hahedinaraia, ia totona oi hahedinaraia lalokau karana ia laloa bada. Mani Baibel ese oi ia durua daladia haida oi itaia:
• Oi do vara lasi neganai Iehova ese oi ia itaia.—Sal. 139:16.
• Iehova be emu kudouna ai idia noho gaudia bona emu lalohadai ia diba.—1 Siv. 28:9.
• Iehova be oi gwauraia guriguri ta ta ia kamonai.—Sal. 65:2.
• Emu kara ese Iehova ia hahisia eiava ia hamoalea diba.—Aon. 27:11.
• Iehova sibona ese oi ia boiria ia dekenai oi mai totona.—Ioa. 6:44.
• Iehova be oi ia diba namonamo dainai, ena be oi mase, to oi do ia hatoreaisi lou. Emu tauanina do ia hanamoa lou, emu lalohadai ibounai bona emu kara namodia danu do ia henia lou.—Ioa. 11:21-26, 39-44; Kara 24:15.
FEBRUARY 27–MARCH 5
BAIBEL ENA HEREVA BADADIA | 1 SIVARAI 20-22
“Matamata Taudia Durua Idia Kwalimu Totona”
“Unai Hereva be Abidadama Taudia Dekenai Do Oi Henia”
8 Sivarai Ginigunana 22:5 duahia. Reana Davida ia laloa Solomona be ia hegeregere lasi unai mai anina bada gaukarana ia naria totona. Unai dubu helaga idia haginia neganai, namona be ia be “mai hairaina,” bona unai nega ai Solomona be “eregabe tauna sibona, bona gaukara dekenai ia do manada lasi.” To, Davida ia diba Iehova ena heduru amo Solomona ese ia abia gaukarana do ia karaia namonamo. Unai dainai Davida ese Solomona do ia durua daladia ia laloa bona kohu momo ia haboua.
“Unai Hereva be Abidadama Taudia Dekenai Do Oi Henia”
7 Davida ese Solomona ia durua, ena be ia diba ia ese dubu helaga haginia gaukarana totona hanamoa do ia abia lasi. Bona momokani, unai dubu helaga idia gwauraia Solomona ena dubu helaga, to Davida ena lasi. Reana Davida ia lalohisihisi badina ia ura karaia gauna do ia hagugurua lasi, to ia ese unai haginia gaukarana ia durua. Mai ura bada ida gaukara taudia ia hegaegaelaia, bona auri, auri laboralabora, siliva, golo, bona sida audia ia haboua. Bena Solomona ia hagoadaia, ia gwau: “Egu natuna e, Lohiabada ese oi dekenai do ia noho, bona Lohiabada, oiemu Dirava ena Dubu Helaga do oi haginia haorea, ia ese ia gwauhamata do oi karaia hegeregerena.”—1 Siv. 22:11, 14-16.
Tama Sina E, Emui Natuna Umui Durua Noho Ia Bapatiso Totona, A?
14 Kongrigeisen elda taudia be mamoe naria taudia dainai, tama sina edia hekwarahi idia hanamoa bona idia dekenai tahua gaudia namodia idia herevalaia. Lagani 70 mai kahana lalonai painia gaukara ia karaia taihu ta ena mauri lagani be 6 neganai, Tadikaka Charles T. Russell ida ia herevahereva negana ia laloatao. Ia gwau: “Tadikaka be lau ida miniti 15 lalonai egu tahua gaudia ai herevalaia hebou.” Oibe, hagoadaia hereva namodia amo ta ia haheauka diba. (Aon. 25:11) Elda taudia ese Kingdom Hall gaukaradia lalonai tama sina bona natudia idia gaukaralaia diba, bona matamata taudia edia lagani bona diba hegeregerena gaukara idia henia.
15 Namona be kongrigeisen taudia ese matamata taudia laloa bada karana maorona idia hahedinaraia. Hegeregere, namona be idia itaia mero o kekeni be orea lalonai ia goada noho eiava. Matamata tauna ta be haere namona ta ia henia o wiki ena hebou lalonai kahana namona ta ia henia, a? Eiava matamata tauna ta be mai abidadama ida hahetoho ia hanaia o sikuli gabunai ia haroro, a? Karaharaga ita hanamodia be namo. Hebou dekenai oi do lao lasi neganai, palani oi karaia matamata taudia ida oi herevahereva totona, a? Matamata taudia dekenai inai bamona dala idauidau ai oi kara heniadia, do idia mamia ‘hebou lalonai’ idia be mai anina bada.—Sal. 35:18.
Hakaua Hereva Namodia
Sivarai Ginigunana Bukana Ena Hereva Badadia
21:13-15. Iehova ese aneru ia hamaoroa taunimanima hadikaia karana ia hadokoa totona, badina Iehova be ena taunimanima edia hisihisi ia mamia. Momokani, “Lohiabada ena bogahisihisi be bada.”