Haroro Bona Mauri Dalana Hebou Pepana Edia Referens
© 2023 Watch Tower Bible and Tract Society of Pennsylvania
MAY 1-7
BAIBEL ENA HEREVA BADADIA | 2 SIVARAI 17-19
“Iehova ese Ma Haida Ia Laloa Dalana Hegeregerena, Idia Oi Laloa”
Idia Torea Gaudia Oi Laloa Namonamo, A?
7 Hari mani Asa ena natuna, Iehosapata, ita laloa. Iena kara namodia be momo. Ia be Iehova dekenai ia tabekau dainai, gau namodia momo ia karaia. To, abia hidi kereredia ia karaia danu. Hegeregere, dala ia karaia ena natuna ta ese King Ahaba ena natuna ia adavaia totona. Bona ena be peroveta tauna Mikaia ese ia sisiba henia, to Iehosapata ese Ahaba ia bamoa bona Suria taudia idia tuari henia. Unai tuari lalonai, Iehosapata be kahirakahira ena mauri ia haboioa. Bena Ierusalema dekenai ia giroa lou. (2 Siv. 18:1-32) Vadaeni peroveta tauna Iehu ese ia nanadaia: “Kara dika taudia oi durua noho, bona Lohiabada idia badu henia taudia oi ura henia noho, be maoro, a?”—2Sivarai 19:1-3 duahia.
Iehova Ena Noho Hanaihanai Lalokauna Laloa Noho
8 Iehova ia ura do ita diba, ia be ita ia lalokau henia bona iseda kerere maragidia ia laloa bada lasi. Ia be iseda namo ia tahua. (2Siv. 16:9) Iuda ena King Iehosapata dekenai unai bamona ia karaia. Nega ta, Israela ena King Ahaba be Ramoto Gileada abia lou totona ia lao Suria taudia ia tuari henia neganai, Iehosapata be abia hidi kererena ia karaia, badina ia ida ia lao. Ena be peroveta koikoi taudia 400 idia gwau Ahaba be tuari lalonai do ia kwalimu, to Iehova ena peroveta tauna Mikaia ia gwau do idia kwalimu lasi. Ahaba be unai tuari lalonai ia mase, bona Iehosapata be kahirakahira ia mase. Unai dainai Ierusalema dekenai ia giroa neganai, sisiba ia abia. Hananaia ena natuna mero Iehu ese Iehosapata ia hamaoroa: “Namo sisina be oi dekenai ia noho.”—2Siv. 18:4, 5, 18-22, 33, 34; 19:1-3.
9 Iehosapata ia lohia matamaia neganai, ia ese lohia taudia, Levi taudia, bona hahelaga taudia ia siaia Iuda ena tano ibounai dekenai Iehova ena taravatu be ena taunimanima dekenai idia hadibaia totona. Unai ia karaia dainai, idau bese taudia be Iehova idia gari henia. (2Siv. 17:3-10) Herevana Iehosapata ia kerere, to Iehova be ia karaia kara namodia ia laloaboio lasi. Unai sivarai ese ita ia hadibaia, ena be ita be goevadae lasi taudia, to bema mai kudouna ibounai ida Iehova ita hamoalea, ita dekenai iena noho hanaihanai lalokauna do ia hahedinaraia.
Hakaua Hereva Namodia
Mai Kudouna Ibounai ida Iehova Hesiai Henia!
10 Asa ena natuna Iehosapata be “iena tamana ena kara hegeregerena” ia kara. (2Siv. 20:31, 32) Edena dala ai? Iena tamana hegeregerena, Iehosapata ese taunimanima ia hagoadaia Iehova idia tahua totona. Ia ese tatau haida ia siaia lao bona idia ese taunimanima dekenai “Lohiabada ena Taravatu Buka” idia hadibaia. (2Siv. 17:7-10) Israela ena not kahana Basileiana bona Eparaima ena ororo gabudia dekenai ia lao danu, Iehova “dekenai edia lalodia ia hagiroa lou” totona. (2Siv. 19:4) King Iehosapata be “mai ena kudouna ibounai danu Lohiabada ia tahua.”—2Siv. 22:9.
11 Hari danu, Iehova ia ura taunimanima be ia idia dibaia, bona ita ibounai be unai gaukara ita durua diba. Oi ura hua ta ta ai ma haida dekenai Dirava ena Hereva oi hadibaia, unai amo idia danu be Dirava idia hesiai henia diba, a? Bema oi hekwarahi, Dirava ese oi do ia hanamoa bona Baibel stadi ta do oi hamatamaia. Unai tahua gauna oi atoa bona gurigurilaia, a? Oi ura ta oi stadi henia, herevana unai be emu laga-ani negana, a? Iehosapata be Eparaima dekenai ia lao, badina ia ura taunimanima ia durua tomadiho momokani idia badinaia lou totona, ita danu ita ura idia manoka taudia ita durua. Danu, namona be elda taudia ese dala idia karaia orea amo idia atoa siri taudia idia vadivadi henia bona durua totona, bema idia be edia kara gunadia idia rakatania.
MAY 8-14
BAIBEL ENA HEREVA BADADIA | 2 SIVARAI 20-21
“Iehova Emui Dirava Umui Abidadama Henia”
Inai Tanobada Gunana Ena Dokonai Gaukara Hebou
8 King Iehosapata ena negai, “tuari taudia” goadadia momo be Dirava ena taunimanima tuari henia totona idia mai. (2Siv. 20:1, 2) Dirava ena hesiai taudia be sibona edia goada amo idia kwalimu lasi. To, Iehova dekenai idia tabekau. (2Sivarai 20:3, 4 duahia.) Bona idia ta ta sibona ena ura dalanai unai ia karaia lasi. Baibel ia gwau: “Iuda taudia ibounai be unuseni, Lohiabada ena vairanai idia gini, mai edia natudia maragidia, bona edia adavadia bona natudia danu.” (2Siv. 20:13) Herevana idia matamata o buruka, to mai abidadama ida idia gaukara hebou Iehova ena dala idia badinaia, bona Iehova ese ia gimadia. (2Siv. 20:20-27) Dirava ena taunimanima ese hekwakwanai idia davaria neganai, unai haheitalai namona idia badinaia diba, ani?
Headava Matamata Taudia E, Iehova Ena Hesiai Gaukara Laloa Bada
7 Iehova ese Levi tauna, Iahasiele, ia gaukaralaia Iehosapata ia hereva henia totona. Iehova ia gwau: “Emui gabu dekenai umui gini, umui marere lasi, bona Iehova ese umui do ia hamauria dalana do umui itaia.” (2Siv. 20:13-17) Unai be tuari dala idauna, ani? To, unai hadibaia herevadia be Iehova amo ia mai, to tau ta amo lasi. Iehosapata be unai hadibaia hereva ibounai ia badinaia. Ia bona ena taunimanima be edia inai taudia tuari henia totona idia lao neganai, tuari taudia idia raka guna lasi, to ane abia taudia idia raka guna. Iehova ese Iehosapata ia rakatania lasi, bona edia inai taudia ia halusia.—2Siv. 20:18-23.
Hakaua Hereva Namodia
it-1-E 1271 par. 1-2
Iehorama
Iena adavana Atalaia ese ia hakaua kerere dainai, Iehorama be ena tamana, Iehosepata ena haheitalai namona ia tohotohoa lasi. (2Ki 8:18) Iehorama ese iena tadikaka siks bona Israela ena lohia taudia haida ia alaia sibona lasi, to danu Iehova amo ena taunimanima ia hakaua siri bona dirava koikoidia idia tomadiho henia. (2Si 21:1-6, 11-14) Iena ruma bese lalonai bona taunimanima dekenai ia havaraia dika dainai, ena lohia dalana ia dika. Ginigunana, Edoma taudia ese Iuda ena lohia dalana idia dadaraia; bena Libina taudia ese idia dadaraia danu. (2Ki 8:20-22) Elia ese revareva ta amo Iehorama ia sisiba henia, ia gwau: “Unai dainai, Iehova ese emu taunimanima, emu natudia memero, emu adavadia bona emu kohu ibounai dekenai dika bada do ia havaraia. Bona oi be gorere idauidau do oi davaria, bogana gorere danu, dina ta ta do oi gorere ela bona emu bogarau ibounai do idia raka-lasi.”—2Si 21:12-15.
Unai gaudia ibounai be unai hereva hegeregerena idia vara. Arabia bona Filistia taudia ese Iuda tanona ai idia vareai bona Iehorama ena adavana ibounai bona ena natudia memero idia abidia. Iehova ese unai ia koua lasi. To Dirava ese dala ia kehoa unai amo Iehorama ena natuna dokona, Iehoahasa (ena ladana ta be Ahasaia), be do ia heau mauri. Unai amo Dirava ese Davida ida ia karaia Basileia gwauhamatana do ia guguru. “Unai gau ibounai idia vara murinai, Iehova ese Iehorama ena bogarau ai ia namo lou diba lasi gorere ta ia havaraia.” Lagani rua murinai iena “bogarau idia raka-lasi” bena ia mase. Unai dainai ia mase neganai “ta ia hebogahisi lasi.” Davida Ena Siti ai idia guria, “to king edia guria gabudia ai idia guria lasi.” Iena natuna Ahasaia ese ena gabu ia abia bona king ai ia lao.—2Si 21:7, 16-20; 22:1; 1Si 3:10, 11.
MAY 15-21
BAIBEL ENA HEREVA BADADIA | 2 SIVARAI 22–24
“Iehova ese Gari Lasi Karadia Ia Hanamoa”
w09-E 4/1 24 par. 1-2
Hebamo Dikadia Dainai Iehoasa ese Iehova Ia Rakatania
DIRAVA ena dubu helaga ia gini gabuna, Ierusalema ai, dika bada ia vara. King Ahasaia idia hamasea. Ahasaia ena sinana, Atalaia ese kara dika rohorohona ia karaia. Ia ese Ahasaia ena natudia—iena tubudia unai—ia aladia! Dahaka dainai unai ia karaia?—Unai amo ia sibona be lohia ai do ia lao, to idia ta lasi.
To, Atalaia ena tubuna mero ta, beibi Iehoasa, be ia mauri bona ena tubuna hahine be unai ia diba lasi. Edena dala ai unai ia vara?—Iena anti ta ladana be Iehoseba, ia ese Dirava ena dubu helaga lalonai Iehoasa ia hunia. Unai ia karaia diba badina ena adavana Iehoiada be Hahelaga Tauna Badana. So dala idia tahua Iehoasa idia gimaia totona.
w09-E 4/1 24 par. 3-5
Hebamo Dikadia Dainai Iehoasa ese Iehova Ia Rakatania
Lagani siks lalonai, dubu helaga dekenai Iehoasa idia hunia. Unuseniai, ia dekenai Iehova Dirava bona ena Taravatu idia hadibaia. Iehoasa ena mauri lagani be seven neganai, Iehoiada ese kara ta ia karaia Iehoasa be king ai ia halaoa totona. Iehoiada ese unai ia karaia dalana bona Iehoasa ena tubuna hahinena, Kwini Atalaia dekenai ia vara gauna oi ura diba, a?—
Hunia dalanai Iehoiada ese Ierusalema ai idia noho king edia gadi taudia ia boiria mai. Bona ia bona ena adavana ese King Ahasaia ena natuna mero idia hamauria dalana be idia dekenai ia gwauraia. Bena Iehoiada ese unai gadi taudia dekenai Iehoasa ia hahedinaraia, unai amo idia laloparara ia be lohia tauna maorona. Bona palani idia karaia.
Iehoiada ese Iehoasa be king ai ia halaoa. Unai negai, taunimanima be “edia imana idia pataia bona idia gwau: “King ia mauri daudau!’” Gadi taudia ese Iehoasa idia gimaia totona ia badinai idia gini. Atalaia be taunimanima edia moale regena ia kamonai neganai, ia heau raka-lasi bona ia badu dikadika. To Iehoiada ena oda hegeregerena, gadi taudia ese Atalaia idia hamasea.—2 King Taudia 11:1-16.
it-1-E 379 par. 5
Guria, Guria Gabudia
Hahelaga Tauna Badana Iehoiada be “Davida Ena Siti dekenai idia guria, king taudia idia guria gabuna ai.” Ia sibona dekenai unai bamona idia karaia, ena be ia be king lasi.—2Si 24:15, 16.
Hakaua Hereva Namodia
it-2-E 1223 par. 13
Sekaraia
12. Ia be Hahelaga Tauna Badana Iehoiada ena natuna mero. Iehoiada ia mase murinai, King Iehoasa be tomadiho momokani ia rakatania, bona sisiba kereredia ia badinaia to Iehova ena peroveta taudia ia kamonai henia lasi. Sekaraia, Iehoasa ena kasen (2Si 22:11), be unai dainai taunimanima ia sisiba henidia, to idia helalo-kerehai lasi, bona dubu helaga vairanai nadi amo ia idia hamasea. Sekaraia ia mase gwauraia neganai, inai bamona ia gwau: “Namona be Iehova ese inai ia itaia bona emu davana do ia henia.” Unai peroveta herevana ia guguru. Suria taudia ese Iuda idia hadikaia, to unai sibona lasi, Iehoasa ena hesiai taudia rua ese ia idia hamasea “badina ia ese hahelaga tauna Iehoiada ena natudia memero edia rara ia hadihoa.” Buka ladadia Greek Septuagint bona Latin Vulgate ese ia hahedinaraia, Iehoasa idia alaia, Iehoiada ena “natuna” ena mase davana karaia totona. To Masoretic text bona Syriac Peshitta bukana ai inai hereva “natudia” idia gaukaralaia Iehoiada ena natuna, Sekaraia, peroveta bona hahelaga tauna, ena kara namodia bona hairai idia herevalaia totona.—2Si 24:17-22, 25.
MAY 22-28
BAIBEL ENA HEREVA BADADIA | 2 SIVARAI 25-27
“Iehova ese Oi Dekenai Do Ia Henia Gauna ese Unai Do Ia Hereaia”
it-1-E 1266 par. 6
Iehoasa
Danu, Iehoasa ese Iuda ena king totona tuari taudia 100,000 ia hoidia Edoma taudia idia tuari henia totona. To, “Dirava momokanina ena hesiai tauna” ena hereva hegeregerena unai tuari taudia idia siaidia giroa lou, bona ena be 100 siliva talent ($660,600) amo ia hoidia vadaeni, to tuari ai edia ahuna idia abia lasi bona ruma dekenai idia siaidia giroa lou dainai idia badu dikadika. Unai dainai N kahana ai idia giroa lou neganai, saut kahana ena basileia henunai idia noho taoni edia kohu idia henaoa, unai be Samaria amo (reana edia tuari kamepa gabuna) ela bona Bete-horono dekenai.—2Si 25:6-10, 13.
Iehova Oi “Tohoa” Bona Ena Namo Do Oi Itaia
16 Iehova ita hesiai henia totona gau haida ita rakatania. Iehova ena ura ita karaia totona, ita moalelaia gaudia ibounai do ita rakatania lasi. (Had. 5:19, 20) To, bema Iehova ita hesiai henia lasi badina ita ura lasi ita moalelaia gaudia ibounai ita rakatania, ita be Iesu ena parabole lalonai ia gwauraia tauna bamona, ia ura mauri namona ia noholaia dainai Dirava ia dadaraia. (Luka 12:16-21 duahia.) France dekenai, tadikaka ta ladana Christian, ia gwau, “Lau ese egu nega bona goada bada lau henia lasi Iehova lau hesiai henia bona egu famili lau durua totona.” Ia bona ena adavana be abia hidi idia karaia idia painia totona. To unai idia karaia totona edia moni gaukara idia rakatania. Sibona idia durua totona bisinesi maragina ta idia haginia bona moni momo lasi maurina idia noholaia matamaia. Gau haida idia rakatania bona idia painia dainai idia moale, a? Christian ia gwau, “Hari emai haroro gaukara ai moalelaia bada bona ai itaia Baibel stiuden bona lou henia be Iehova idia dibaia neganai, ai moale bada.”
Hakaua Hereva Namodia
w07-E 12/15 10 par. 1-2
Oi be mai Emu Lo Keristani Turana, A?
USAIA ena mauri lagani be 16 neganai, Iuda ena saut kahana ena basileia ena king ai ia lao. Ia be lagani 50 mai kahana lalonai Iuda ia lohiaia, unai be lagani 900 ena dokona amo ela bona 800 B.C.E ena matamana ai. Usaia ia matamata negana amo “Iehova ena vairanai kara maoromaoro ia badinaia noho.” Dahaka ese ia durua kara maoromaoro ia badinaia totona? Baibel ia gwau: “Sekaraia ena nega lalonai Usaia ese Dirava ia tahua. Sekaraia be Usaia dekenai Dirava momokanina gari henia karana ia hadibaia. Usaia be Iehova ia tahua noho negana lalonai, Dirava momokanina ese ia hanamoa.”—2Sivarai 26:1, 4, 5.
Baibel ai inai siri sibona ese king ia sisiba henia tauna, Sekaraia, ia herevalaia. To, Sekaraia ese king matamata dekenai “Dirava momokanina gari henia” karana bona kara maorona karaia dalana ia hadibaia. The Expositor’s Bible ese ia hahedinaraia Sekaraia be “toretore helagadia ia diba namonamo, Dirava ia badinaia goada, bona ma haida ia hadibaia namonamo.” Baibel ia diba namonamo tauna ta ese Sekaraia be inai bamona ia herevalaia: “Ia be peroveta herevadia ia diba namonamo. . . mai ena aonega, tomadiho ia goadalaia, tau namona bona ia ese Usaia ia durua bada.”
MAY 29–JUNE 4
BAIBEL ENA HEREVA BADADIA | 2 SIVARAI 28–29
“Iehova Oi Hesiai Henia Diba, Ena be Emu Tama Sina be Iehova Idia Tomadiho Henia Lasi”
Iehova Ena Turadia Tohotohoa
8 Hesekaia ena bese be Ruta ena bese amo ia idau. Iena bese be Dirava ida gwauhamata ia karaia besena. To, Israela taudia ibounai ese Dirava idia badinaia lasi. Hesekaia ena tamana, King Ahasa, ena kara be dika. Ia ese Dirava ena dubu helaga ia matauraia lasi bona taunimanima edia lalona ia veria idau diravadia idia tomadiho henia totona. Danu, ia ese Hesekaia ena tadikaka haida be lahi dekenai ia gabua, ena dirava koikoi edia boubou gauna bamona. Hesekaia ena matamata negana be dika herea!—2Kin. 16:2-4, 10-17; 2Siv. 28:1-3.
Iehova Ena Turadia Tohotohoa
9 Ahasa ena haheitalai dikana dainai, reana ena natuna Hesekaia be Iehova ia badu henia diba o iena tamana ena kara ia tohotohoa diba. Hari inai negai, momo be Hesekaia hegeregerena idia haheauka, to gabeai Iehova o iena orea idia badu henia. (Aon. 19:3) Haida idia laloa edia ruma bese ena mauri dikana dainai, edia mauri be ia dika o edia tama sina edia kara idia tohotohoa. (Ese. 18:2, 3) To unai be momokani, a?
10 Hesekaia ena mauri dalana ese ia hahedinaraia unai be momokani lasi! Iehova ita badu henia be maoro lasi. Taunimanima dekenai idia vara dika be ia ese ia havaraia lasi. (Iobu 34:10) Momokani, tama sina ese edia natudia dekenai kara namo bona kara dika idia hadibaia diba. (Aon. 22:6; Kol. 3:21) To, namo lasi ita laloa iseda tama sina edia kara dainai ita danu be unai bamona kara ita karaia. Dahaka dainai? Badina Dirava ese ita dekenai ura kwalimu ia henia, anina be ita sibona ese dahaka be namo eiava dahaka be dika ita abia hidi diba. (Deu. 30:19) Hesekaia ese edena dala ai iena ura kwalimu ia gaukaralaia?
11 Ena be Hesekaia ena tamana be king dikana, to Hesekaia be tau namona. (2King Taudia 18:5, 6 duahia.) Ia be ena tamana ena kara ia tohotohoa lasi. To, Iehova ena peroveta taudia edia sisiba ia kamonai namonamo, hegeregere Isaia, Mika, bona Hosea. Unai dainai ena tamana ese ia havaraia hekwakwanai momo ia hamaoromaoroa. Bona dubu helaga ia hagoevaia, Dirava ia noia taunimanima edia dika ia gwauatao totona, bona kaivakuku ibounai ia hadikaia. (2Siv. 29:1-11, 18-24; 31:1) Gabeai, Asuria ena king, Senakeriba, ia ura Ierusalema ia tuari henia neganai, Hesekaia ia lalogoada bona Dirava ia abidadama henia. Ia diba Iehova ese idia do ia gimaia, unai dainai ena taunimanima ia hagoadaia. (2Siv. 32:7, 8) Nega ta Hesekaia be ia hekokoroku, to Iehova ese ia hamaoromaoroa neganai, sibona ia hamanaua. (2Siv. 32:24-26) Momokani, Hesekaia ena haheitalai ita tohotohoa be namo. Ia ese ena bese edia kara ia tohotohoa lasi. To, iena kara amo ia hahedinaraia ia be Iehova ena turana.
Hakaua Hereva Namodia
Natana—Tomadiho Momokani Badinaia Tauna
Natana be Iehova ia tomadiho henia dainai, ia noho hegaegae Davida do ia durua dubu helaga ginigunana ia haginia totona. To unai nega ai, Natana be sibona ena lalohadai ia gwauraia. Hanuaboi ai, Dirava ese Natana ia hamaoroa king dekenai inai do ia gwauraia: Davida be Iehova ena dubu helaga do ia haginia lasi, to ena natuna ta ese do ia haginia. To, Dirava be Davida ida kontraka ta do ia karaia, unai amo king dagina be iena bese lalonai do ia “noho hanaihanai.”—2Sam. 7:4-16.
Natana ia laloa Davida ese dubu helaga do ia haginia, to unai be Dirava ena ura hegeregerena lasi. To, Natana be ia manau bona ia maumau lasi. Iehova ena hereva ia abia dae bona ia badinaia. Bema Dirava ese eda kara ta ia hamaoromaoroa, namona be Natana ena haheitalai ita tohotohoa. Dirava ese Natana ia lalonamo henia, badina gabeai Iehova ese ia abia hidi peroveta gaukara ia karaia totona. Toana be Iehova be lauma helaga amo Natana bona Gadi ia hasiahua dainai, Davida idia hamaoroa miusiki gadara taudia 4,000 do ia abia hidi dubu helaga lalonai idia gaukara totona.—1Siv. 23:1-5; 2Siv. 29:25.
JUNE 5-11
BAIBEL ENA HEREVA BADADIA | 2 SIVARAI 30-31
“Hebou Lao Henia Karana be mai Ena Namo”
it-1-E 1103 par. 2
Hesekaia
Tomadiho Momokani Ia Ura Henia Bada. Hesekaia ena mauri laganai be 25 bona king dagina ia abia neganai, ia hahedinaraia Iehova tomadiho henia karana ia ura henia. Ia ura karaia gauna ginigunana be dubu helaga ia kehoa bona hanamoa lou. Bena hahelaga taudia bona Levi taudia ia boiria bona idia dekenai ia gwau: “Egu kudouna ena ura be Israela ena Dirava Iehova ida gwaubou ta do lau karaia.” Ia be abidadama gwaubouna, Taravatu gwaubou bamona, unai gwaubou ia noho, to idia badinaia lasi dainai Iuda ai idia hamatamataia lou. Maoromaoro Levi taudia dekenai gaukara ia henia bona miusiki gadaralaia taudia bona hanamoa ane abia taudia ia abia hidi. Unai be Nisan, Pasova aria do idia hahelagaia ena hua, to dubu helaga bona Levi taudia be idia goeva lasi. Nisan ena dina namba 16 ai, dubu helaga idia hagoevaia bona ena kohu ibounai idia atoa lou. Bena Dirava ese Israela taudia edia kara dika ia gwauatao totona boubou ta idia karaia. Ginigunana, gunalaia taudia ese basileia, dubu helaga bona taunimanima edia kara dika davana karaia totona kara dika bouboudia idia mailaia bona taunimanima ese gabua boubou idia mailaia danu.—2Si 29:1-36.
it-1-E 1103 par. 3
Hesekaia
Taunimanima be idia goeva lasi dainai Pasova aria idia karaia lasi, unai dainai Hesekaia ese taravatu hegeregerena dala ia karaia unai goeva lasi taudia be hua ta murinai Pasova aria idia karaia totona. Ia ese hesiai taudia amo revareva ia siaia unai amo idia be Bere-sieba ela bona Dano dekenai do idia lao Iuda bona Israela taudia idia boiria totona. Momo ese unai hesiai taudia idia kirikirilaia, to Asere, Manase bona Sebuluno ena bese taudia ta ta be idia manau dainai idia mai, danu Eparaima bona Isakara ena bese taudia haida idia mai. Bona Iehova idia tomadiho henia idau bese taudia idia mai danu. Not kahana basileiana ai tomadiho momokani idia badinaia taudia dekenai ia auka idia lao totona. Badina revareva idia abia lao hesiai taudia hegeregerena, ma haida ese do idia dagedage henidia bona kirikirilaia, danu unai iduhu ten basileiana be tomadiho koikoi idia badinaia bona Asuria taudia ese idia dagedage henia.—2Si 30:1-20; Nu 9:10-13.
it-1-E 1103 par. 4-5
Hesekaia
Pasova murinai, dina seven lalonai Isti Lasi Paraoa Ena Aria idia karaia badina ibounai idia moale dainai idia lalotamona dina ma seven lalonai unai aria idia karaia totona. Ena be dagedage negana ai unai gaudia idia karaia to Iehova ese idia ia hanamoa, unai amo “Ierusalema ai moale bada ia vara, badina Israela ena king Davida ena natuna Solomona ena nega ai unai bamona kara ta be Ierusalema ai ia vara lasi.”—2Si 30:21-27.
Unai aria idia moalelaia sibona lasi to unai ese idia ia durua bona hagoadaia tomadiho momokani idia goadalaia lou totona. Edia ruma dekenai idia do giroa lou lasi neganai, Iuda bona Beniamina amo ela bona Eparaima bona Manase tanodia ai idia noho nadi du helagadia, ataia gabudia bona pata helagadia idia makohia maragimaragi bona hadikaia ore. (2Si 31:1) Hesekaia be Mose ese au amo ia karaia gaigai ia makohia maragimaragi, badina taunimanima ese kaivakuku ai idia halaoa bona ia badinai gabua boubou idia gabua. (2Ki 18:4) Pasova aria badana murinai Hesekaia ese tomadiho momokani ia gunalaia, anina be hahelaga taudia dekenai gaukara ia henia bona dubu helaga ai idia gaukara taudia durua daladia ia hegaegaelaia. Danu, taunimanima ia sisiba henia Levi bona hahelaga taudia dekenai kontribiusen bona edia aniani ena anina ginigunadia idia mailaia neganai, Taravatu idia badinaia be namo, bona taunimanima be mai moale ida unai idia badinaia.—2Si 31:2-12.
Hakaua Hereva Namodia
“Bema Unai Gaudia Umui Diba Bona Bema Umui Karaia, Do Umui Moale”
14 Manau karana ita hahedinaraia diba dala ma ta be, mai iseda ura ida taunimanima edia hereva ita kamonai. Iamesi 1:19 ia gwau, do ita “kamonai haraga” be namo. Iehova be unai kara dekenai haheitalai hereadaena ia hahedinaraia. (Gen. 18:32; Ios. 10:14) Hegeregere Esodo 32:11-14 (duahia) ai, Dirava bona Mose edia herevahereva karana amo gau ta ita dibaia. Ena be Mose ese ena lalohadai ia gwauraia be anina lasi, to Iehova ese Mose dekenai nega ia henia ena hemami ia gwauraia totona. Reana do ita ura lasi kerere ia karaia tauna ese ia gwauraia herevana do ita kamonai bona badinaia. To, Iehova be mai haheauka ida ia idia abidadama henia taudia edia guriguri ia kamonai.
15 Sibona ita nanadaia: ‘Iehova be Aberahamo, Rahela, Mose, Iosua, Manoa, Elia bona Hesekaia dekenai kamonai karana ia hahedinaraia hegeregerena, lau be egu tadikaka taihu lau matauraia, idia lau hanamoa, edia lalohadai lau kamonai, bona edia lalohadai namodia lau badinaia, a? Egu kongrigeisen o famili lalonai ta be egu heduru ia ura, a? Dahaka do lau karaia? Edena dala ai unai do lau karaia?’—Gen. 30:6; Gun. 13:9; 1Kin. 17:22; 2Siv. 30:20.
JUNE 12-18
BAIBEL ENA HEREVA BADADIA | 2 SIVARAI 32-33
“Hekwakwanai Negadia ai Emu Tadikaka Taihu Oi Hagoadaia”
it-1-E 204 par. 5
Asuria
Senakeriba. Hesekaia ena lohia lagani namba 14 ai (732 B.C.E.) Senakeriba, Saragono II ena natuna, ese Iuda basileiana ia tuari henia. (2Ki 18:13; Isa 36:1) Hesekaia ena tamana Ahasa ena kara dainai Asuria ena king ese Hesekaia dekenai gaukara ia henia, to unai ia dadaraia. (2Ki 18:7) Senakeriba ese Iuda ena siti ibounai 46 ia tuari henia bona ia abia (Isa 36:1, 2 hahegeregerea), bena, ena kamepa Lakisi ai, Hesekaia ia doria golo talent 30 (c. $11,560,000) bona siliva talent 300 (c. $1,982,000) ia henia totona. (2Ki 18:14-16; 2Si 32:1; Isa 8:5-8 hahegeregerea.) Ena be unai moni ia siaia, to Senakeriba ese ena tatau ia siaia Ierusalema totona idia noinoi, unai amo do idia henia. (2Ki 18:17–19:34; 2Si 32:2-20) Unai hanuaboi tamona ai Iehova ese tuari taudia 185,000 ia hamasea, unai ia vara dainai Asuria ena hekokoroku king be unai gabu ia rakatania bona Nineva dekenai ia giroa lou. (2Ki 19:35, 36) Unuseniai, ena natudia memero rua ese idia hamasea bona ena natuna mero ma ta, Esara-hadona be king ai ia lao. (2Ki 19:37; 2Si 32:21, 22; Isa 37:36-38) Idia vara gaudia edia sivarai ia noho, to Asuria ena tuari oreadia idia mase dalana ia gwauraia lasi. To Senakeriba bona Esara-hadona edia sivarai be gabu tamona ai ia noho.—PICTURES, Vol. 1, p. 957.
“Mamoe Naria Taudia 7” Bona “Gunalaia Taudia 8”—Edia Anina Iseda Negai
12 Bema ita mamia ita sibona ese hekwakwanai ta ita hamaoromaoroa diba lasi, Iehova be ia noho hegaegae ita ia durua totona. To ia ura ita sibona danu be gau ta do ita karaia, unai hekwakwanai ita hamaoromaoroa totona. Hesekaia be “iena lohia taudia bona iena tuari biagudia” ida ia herevahereva hebou bona abia hidi idia karaia, “Ierusalema ena murimurinai ranu guridia be do idia koua . . . Hesekaia ese mai goada danu Ierusalema ena magu, idia makohia gabudia, ia haginia lou, bona kohoro haida be magu ena latanai ia haginia. Magu ena murimurinai danu be Hesekaia ese magu ta ma ia haginia . . . danu tuari gaudia bona kesi momo herea ia karaia.” (2Siv. 32:3-5) Unai nega ai, Iehova ese ena taunimanima ia gimaia bona naria totona, tatau goadadia haida hegeregere Hesekaia, iena lohia taudia bona abidadama peroveta taudia ia gaukaralaia.
“Mamoe Naria Taudia 7” Bona “Gunalaia Taudia 8”—Edia Anina Iseda Negai
13 Hesekaia ese gabeai ia karaia gauna be ranu guridia ia koua bona magu ia haginia lou karana ia hanaia. Ia be Mamoe naria tauna namona dainai, ena taunimanima ia haboua bona hagoadaia. Ia gwau: “Asuria king bona iena tuari taudia totona do umui gari lasi . . . . Badina ita dekenai ia noho siahu ese idia edia siahu ia hereaia noho momokani. Asuria taudia edia siahu be taunimanima edia siahu sibona, to iseda siahu be Lohiabada iseda Dirava. Ia ese iseda tuari lalonai ita ia durua noho.” Hesekaia ese taunimanima ia hadibaia Iehova be idia totona do ia tuari. Unai ese idia ia durua Dirava idia abidadama henia bona edia lalona ia goada. Hesekaia, ena lohia taudia, tuari biagudia bona peroveta taudia Mika bona Isaia ese idia hahedinaraia, idia be mamoe naria taudia namodia, Iehova ese ena peroveta tauna amo ia gwauhamata bamona.—2Siv. 32:7, 8; Mika 5:5, 6 duahia.
Hakaua Hereva Namodia
Helalo-Kerehai Momokani be Dahaka?
11 Nega ia hanaia murinai, Iehova ese Manase ena guriguri ia haerelaia. Dirava ese Manase ena guriguri herevadia amo ia itaia, ena kara ia haidaua momokani. Iehova ese Manase ia kamonai henia bona ena king dagina ia henia lou. Oibe, Manase be ena kara amo ia hahedinarai ia helalo-kerehai momokani. Ia ese Ahaba ia karaia lasi gauna ia karaia. Iena kara ia haidaua. Tomadiho koikoi ia dadaraia bona taunimanima ia hagoadaia Iehova idia tomadiho henia totona. (2Sivarai 33:15, 16 duahia.) Momokani, Manase be mai gari lasi bona abidadama goadana ida unai do ia karaia, badina guna ia be ena ruma bese, ladana bada taudia, bona ena taunimanima dekenai haheitalai dikana ia hahedinaraia. To ena buruka negana lalonai, ia ura ia karaia kara dikadia ia hanamoa. Reana ena tubuna Iosaia dekenai ia be haheitalai namona, badina gabeai Iosaia be king namona ai ia lao.—2Ki. 22:1, 2.
12 Manase ena haheitalai amo dahaka ita dibaia? Ia manau, bona gau ma haida ia karaia. Iehova ese ia hebogahisi henia totona ia guriguri. Bona ena kara ia haidaua. Ia gaukara goada, guna ia karaia kara dikadia ia hamaoromaoroa totona, bona ia ura Iehova ia tomadiho henia bona ma haida ia durua unai bamona idia karaia totona. Manase ena haheitalai ese kara dika badadia idia karaia taudia ia durua. Ita diba momokani Iehova Dirava ‘be namo bona ia noho hegaegae dika gwauatao totona.’ (Sal. 86:5) Oibe, Dirava ese idia helalo-kerehai momokani taudia edia dika ia gwauatao diba.
JUNE 19-25
BAIBEL ENA HEREVA BADADIA | 2 SIVARAI 34-36
“Dirava Ena Hereva Oi Gaukaralaia Namonamo, A”
it-1-E 1157 par. 4
Hulida
Hilekaia ese ia davaria “Taravatu bukana” be Sapana ese ia duahia bona Iosaia ese ia kamonai neganai, ena tatau ia siaia Iehova ena lalohadai idia tahua totona. Hulida dekenai idia lao bena idia dekenai Iehova ena hereva ia gwauraia, ia gwau, gwauedeede dainai unai aposteit besena dekenai dika bada do ia vara. Bona Hulida ma ia gwau, Iosaia be Iehova vairanai ia manau dainai, do ia vara dika do ia itaia lasi to Dirava ese ena sene taudia ida do ia haboua bona mai maino ida do idia guria.—2Ki 22:8-20; 2Si 34:14-28.
Iehova Ena Ruma Ita Ura Henia Bada!
20 King Iosaia be oda ia henia dubu helaga idia hagoevaia totona bona unai gaukara lalonai Hahelaga Tauna Badana, Hilekaia, ese “Lohiabada ena Taravatu Buka, Dirava ese Mose dekenai ia henia gauna, ia davaria.” Unai buka be toretore tauna Sapana dekenai ia henia, bona ia ese Iosaia dekenai ia duahia. (2Sivarai 34:14-18 duahia.) Vadaeni, Iosaia be dahaka ia karaia? King be maoromaoro ena dabua ia darea bona tatau haida ia oda henia Iehova ena lalohadai idia tahua totona. Bona peroveta hahine Hulida amo Dirava ese Iuda taudia dekenai ena badu herevana ia gwauraia, badina idia be kaivakuku idia tomadiho henidia noho. Ena be Iehova ese Iena bese taudia ia hamaoroa dika do idia davaria, to Iosaia be kaivakuku ibounai ia kokia dainai Iehova ese ia lalonamo henia. (2 Siv. 34:19-28) Unai sivarai amo dahaka ita dibaia? Ita ura Iosaia ena haheitalai do ita tohotohoa. Iehova ena hakaua daladia ita badinaia haraga be namo, badina aposteit taudia edia hereva ita kamonai henia neganai, iseda tomadiho karana Iehova dekenai ia hadikaia diba bona Iehova ese ita do ia lalonamo henia lasi. Bona namona be ita diba momokani, Iehova be Iosaia dekenai ia karaia bamona, Ia ese tomadiho momokanina idia ura henia bada taudia do ia lalonamo henidia.
Hakaua Hereva Namodia
Idia Torea Gaudia Oi Laloa Namonamo, A?
15 Bona King Iosaia amo dahaka ita dibaia? Ena be ia be king namona, to ia karaia kererena dainai ena mauri ia haboioa. (2Sivarai 35:20-22 duahia.) Dahaka ia vara? Iosaia be King Neko “tuari henia totona ia toreisi, ia lao,” ena be unai king ese Iosaia ia hamaoroa ia be ia tuari henia totona ia lao lasi. Baibel ia gwau Neko ese ia gwauraia herevadia be “Dirava ena hereva.” To, dahaka dainai Iosaia be Neko tuari henia totona ia lao? Baibel be unai ia gwauraia lasi.
16 Iosaia be edena bamona do ia diba Neko ese ia gwauraia herevadia be Iehova amo? Abidadama peroveta tauna ta, Ieremia, ia nanadaia diba. (2 Siv. 35:23, 25) To Baibel ia gwau lasi ia be unai ia karaia. Danu, Neko be Karakemisi dekenai ia lao bese ma ta ia tuari henia totona, to Ierusalema tuari henia totona lasi. Bona danu, ia ese Dirava ena ladana eiava ena taunimanima ia hadikaia lasi. Unai dainai Iosaia ese Neko ia tuari henia be kerere. Unai sivarai amo dahaka ita dibaia? Hekwakwanai ta ia vara neganai, namona be Iehova ena lalohadai ita tahua guna.
17 Bema hekwakwanai ta ia vara, namona be Baibel ena hakaua herevadia ita laloa bona ita badinaia. Nega ma haida ai, elda edia heduru ita noia diba. Reana unai hekwakwanai hanaia daladia haida ita diba bona iseda pablikeisen ai tahua karana ita karaia vadaeni. Danu, elda ta ese ita ia durua diba Baibel ena hakaua hereva ma haida ita laloa totona. Hegeregere, taihu ta ia diba sivarai namona harorolaia gaukarana be iena maduna. (Kara 4:20) Bema dina ta ia abia hidi ia haroro totona, to iena Witnes lasi adavana ia ura unai dina ai ia be ruma ai do ia noho. Ia ura idia ia hamoalea gaukarana idia karaia hebou, badina nega daudau unai idia karaia lasi. Reana taihu be Baibel siri haida do ia laloa, hegeregere Dirava do ia kamonai henia bona taunimanima be hahediba taudia ai halaoa gaukarana ena hahegani. (Mat. 28:19, 20; Kara 5:29) To namona be ia laloatao, iena tau be ena kwarana, unai dainai do ia laloa maoromaoro. (Efe. 5:22-24; Fili. 4:5) Iena adavana ese haroro gaukara amo ia ia koua, eiava ia noia unai dina tamona ai gau ma ta do idia karaia hebou? Dirava ena ura ita karaia neganai, namona be ita laloa maoromaoro bona lalomamina namona ita dogoatao.
JUNE 26–JULY 2
BAIBEL ENA HEREVA BADADIA | SERA 1-3
“Mai Ura Ida Iehova Oi Hesiai Henia”
Sekaraia ese Ia Itaia Gauna Oi Itaia, A?
UNAI be moale bada negana. Israela taudia be lagani momo lalonai Babulonia dekenai idia noho bona Iehova Dirava ese “Parasa ena king, Kurese ena lalona ia veria” idia ia ruhaia totona. King ese maoro ia henia Iuda taudia be edia tano dekenai do idia giroa lou bona edia Dirava Iehova ena ruma “idia haginia lou.” (Esr. 1:1, 3) Unai be moale gauna! Badina Dirava ese idia dekenai ia henia tanona ai Dirava momokanina do idia tomadiho henia lou.
Kariota Bona Korona ese Ita Ia Gimaia
2 Sekaraia ia diba Ierusalema dekenai idia lao taudia be abidadama taudia. Idia dekenai ‘Dirava ese laloa goada ia henia’ dainai, idia ese edia ruma bona bisinesi idia rakatania. (Esr. 1:2, 3, 5) Danu, edia tano idia rakatania bona idia diba lasi tanona dekenai idia lao. Bema idia dekenai Iehova ena dubu haginia gaukarana be anina lasi, idia be kilomita 1,600 bamona do idia laolao lasi.
Hakaua Hereva Namodia
Esera Bukana Ena Hereva Badadia
1:3-6. Babulonia dekenai idia noho Israela taudia haida bamona, hari Iehova ena Witnes taudia momo be ful-taim hesiai gaukara idia karaia diba lasi eiava haroro taudia be momo lasi gabuna dekenai idia lao diba lasi. To unai gaukara idia karaia diba taudia idia hagoadaia bona durua noho. Bona edia kontribusen monina amo Basileia harorolaia bona hahediba taudia halaoa gaukarana idia durua.