Iehova Ena Ruma Ita Ura Henia Bada!
“Dirava e, oiemu Ruma lau lalokau henia bada, inai lalokau be egu lalona dekenai ia siahu, lahi bamona.”—IOA. 2:17.
1, 2. Lagani 30 C.E. ai, dubu helaga lalonai Iesu be dahaka ia karaia, bona dahaka dainai?
MANI inai oi laloa. Nega be lagani 30 C.E., Pasova negana. Hua 6 gunanai, Iesu be ena haroro gaukara ia hamatamaia. Bona hari ia be Ierusalema dekenai ia lao. Dubu helaga lalonai, Idau Bese Taudia Edia Ariara dekenai “Iesu ese boromakau bona mamoe bona pune manu idia hoihoilaia taudia ia itaia.” Ia ese kwadia gauna ta amo animal bona hoihoi taudia ibounai ia luludia. Bona ia ese moni senisia taudia edia moni ia bubua, bona edia pata ia girodia. Ia ese manu idia hoihoilaia taudia ia oda henia edia kohu do idia abia bona unai gabu do idia rakatania.—Ioa. 2:13-16.
2 Iesu ena kara amo ia hahedinaraia ia ese dubu helaga ia laloa bada. Ia oda henidia: “Egu Tamana ena Ruma be hoihoi Rumana dekenai umui halaoa lasi.” Iesu ena hahediba taudia ese unai gaudia idia itaia neganai, Davida ena hereva idia laloa, ia gwau: “Dirava e, oiemu Ruma lau lalokau henia bada.”—Ioa. 2:16, 17; Sal. 69:9.
3. Ita ta ta ese edena henanadai ita laloa be namo?
3 Iesu be Dirava ena ruma ia laloa bada dainai, unai bamona ia karaia. Hari iseda nega ai, Keristani taudia milioni 7 bamona be Dirava ena ruma idia ura henia bada. Namona be ita sibona ita henanadai, ‘Edena dala ai Iehova ena ruma ura henia karana lau habadaia diba?’ Unai henanadai ena haere ita diba totona, namona be hari inai negai Dirava ena ruma be dahaka, ita tahua guna. Baibel lalonai Dirava ena ruma idia ura henia bada abidadama taudia edia haheitalai do ita itaia. Edia haheitalai be “ita dekenai hadibaia totona idia torea” bona ita idia durua Dirava ena ruma ita ura henia bada totona.—Roma 15:4.
Dirava Ena Ruma—Guna Bona Hari
4. Solomona ese ia haginia dubu helaga dekenai dahaka idia karaia?
4 Idaunegai Israela ai, Dirava ena ruma be Ierusalema dekenai idia haginia dubu helagana. To momokani, Iehova be unuseniai ia noho lasi. Ia gwau: “Guba be lauegu terona, bona tanobada be lauegu aena atoa gauna. Unai dainai edena bamona ruma ta lau dekenai umui haginia diba? Lauegu noho rumana ta edeseni umui haginia diba?” (Isa. 66:1) Solomona ena lohia negana lalonai ia haginia dubu helaga be Iehova guriguri henia bona tomadiho henia gabuna badana ai ia lao.—1 Kin. 8:27-30.
5. Iehova ena ruma ena anina be dahaka?
5 Hari inai negai, Iehova ena ruma be Ierusalema o gabu ma ta dekenai idia karaia nadi rumana ta lasi. To Iehova ena ruma ena anina be, Keriso ena boubou gauna amo Dirava ita tomadiho henia dalana. Tanobada ai Dirava ena hesiai taudia ibounai be mai lalotamona ida unai lauma dubuna lalonai Iehova idia tomadiho henia.—Isa. 60:4, 8, 13; Kara 17:24; Heb. 8:5; 9:24.
6. Edena king hani ese tomadiho momokani idia ura henia bada?
6 Lagani 997 B.C.E. ai, Israela basileia be kahana rua ai ia parara murinai, Iuda besena idia lohiaia king iboudiai 19 amo, king hani be tomadiho momokani idia ura henia bada. Idia be Asa, Iehosapata, Hesekaia, bona Iosaia. Edia haheitalai namona amo dahaka ita dibaia?
Mai Kudouna Ibounai ida Hesiai Gaukarana ese Hahenamo Ia Mailaia
7, 8. (a) Iehova be edena bamona hesiai gaukarana ia hanamoa? (b) King Asa ena haheitalai amo dahaka ita dibaia?
7 King Asa ena lohia negana lalonai, Iehova ese peroveta taudia haida ia abia hidi Iena bese taudia be dala maorona dekenai idia hakaua totona. Hegeregere, Baibel ia gwau Asa be peroveta tauna Asaraia, Odede ena natuna, ia kamonai henia. (2 Sivarai 15:1-8 duahia.) Asa ese Iuda ena tano ibounai amo kaivakuku tomadiho henia karana ia haorea dainai, Iuda bona Israela taudia momo be Ierusalema dekenai tomadiho totona idia lao. Bona idia ibounai be mai lalotamona ida Iehova sibona do idia tomadiho henia gwauhamatana idia karaia. Baibel ia gwau: “Hebou taudia ese inai gwauhamata Lohiabada ena ladana dekenai idia henia, mai gadodia badadia bona mai boiboi badadia danu. Mai auri kibidia dekenai, bona doa kibidia edia regena danu inai gwauhamata idia karaia. Vadaeni Iuda tano dekenai noho taudia ibounai ese unai gwauhamata dekenai idia moale, badina be mai edia kudoudia ibounai danu idia gwauhamata, bona mai edia ura ibounai danu Lohiabada idia tahua vadaeni, bona idia ese ia idia davaria. Bona Lohiabada ese idia dekenai maino ia henia, edia tano kahana ibounai dekenai.” (2 Siv. 15:9-15) Unai hegeregerena, mai kudouna ibounai ida Iehova ita hesiai henia neganai, Ia ese ita do ia hanamoa.—Mar. 12:30.
8 Gabeai, Asa be peroveta tauna Hanani ese ia sisiba henia neganai, ia badu. (2 Siv. 16:7-10) Keristani elda tauna ta amo Iehova ese ita ia sisiba henia neganai, iseda hemami be edena bamona? Ita be edia Baibel sisiba ita abia dae bona ita badu haraga lasi, a?
9. Dahaka dainai Iehosapata bona Iuda basileia taudia idia gari, bona dahaka idia karaia?
9 Lagani 936 B.C.E. ia lao 911 B.C.E. ai, Iehosapata be Iuda basileiana ia lohiaia. Amono, Moaba, bona Seiri ororo taudia idia haboua Iehosapata bona Iuda taudia idia tuari henia totona, unai dainai idia gari. Ena be Iehosapata ia gari, to dahaka ia karaia? Ia, Iuda tatau iboudiai, edia adavadia bona edia natudia be guriguri totona Iehova ena ruma ai idia haboua. (2 Sivarai 20:3-6 duahia.) Dubu idia hahelagaia neganai, Solomona ese ia gwauraia herevadia hegeregerena, Iehosapata ese Iehova ia noia: “Oi be aiemai Dirava! Mani edia kerere davana do oi henia. Badina inai tuari orea bada herea, ese ai idia tuari henia noho, bona ai be goada lasi idia do ai koua. Edena bamona do ai karaia be ai diba lasi, to oi dekenai aiemai matana ai negea noho, oi ese ai do oi durua totona.” (2 Siv. 20:12, 13) Iehosapata ia guriguri murinai, “hebou taudia edia huanai” Iehova ena lauma helaga ese Levi tauna, Iahasiele, ia hasiahua bena idia hebou taudia ibounai dekenai hagoadaia herevadia ia gwauraia.—2 Sivarai 20:14-17 duahia.
10. (a) Iehosapata bona Iuda basileiana be daika ena amo hakaua herevadia idia abia? (b) Hari inai negai, edena bamona ita hahedinaraia Iehova ena hakaua herevadia ita abia dae?
10 Oibe, unai nega ai Iehosapata bona Iuda basileiana be Iahasiele amo Iehova ena hakaua herevadia idia abia. Hari inai negai, hesiai tauna mai ena kamonai bona mai ena kara maoromaoro oreana ese ita ia hagoadaia bona ita ia hakaua. Oibe, elda taudia ida ita gaukara hebou bona idia ita matauraia be namo, badina idia gaukara goada ita idia naria bona “hesiai tauna mai ena kamonai, bona mai ena kara maoromaoro” oreana ena hakaua herevadia amo ita idia gunalaia.—Mat. 24:45; 1 Tes. 5:12, 13.
11, 12. Iehosapata bona Iuda basileia taudia dekenai ia vara gauna amo dahaka ita dibaia?
11 Iehosapata bona ena taunimanima be idia hebou Iehova ena heduru idia noia hegeregerena, namona be iseda tadikaka taihu ida hanaihanai kongrigeisen heboudia dekenai ita lao. Bema ita be hekwakwanai badana ta ita davaria, bona ita diba lasi dahaka ita karaia, vadaeni Iehosapata bona Iuda basileia taudia edia haheitalai do ita tohotohoa: Iehova ita guriguri henia bona Ia dekenai do ita tabekau. (Aon. 3:5, 6; Fili. 4:6, 7) Ena be iseda noho gabuna be kongrigeisen amo ia daudau, to Iehova guriguri henia karana ese ita do ia durua bona ita mamia ita be “[iseda] Keristani varavara taudia tanobada kahana ibounai” ida ita gaukara hebou.—1 Pet. 5:9.
12 Iehosapata bona ena taunimanima be Dirava ese Iahasiele amo ia henia hakaua herevadia idia badinaia. Vadaeni, dahaka ia vara? Idia be tuari lalonai idia kwalimu, bona “mai edia moale bada danu” Ierusalema dekenai idia giroa lou bona “Dubu Helaga dekenai idia raka lao, mai miusiki ena regena namona danu, gita badadia bona maragidia bona kibi danu.” (2 Siv. 20:27, 28) Ita danu be Iehova ena orea amo ia henia hakaua herevadia ita matauraia bona Ia ita hanamoa.
Iseda Tomadiho Gabudia Ita Naria Namonamo
13. Hesekaia ena lohia hua ginigunana ai, dahaka ia karaia?
13 Hesekaia ena lohia hua ginigunana ai, ia be Iehova tomadiho henia karana ia ura henia bada badina dubu helaga ia kehoa lou bona ia hanamoa. Ia ese hahelaga taudia bona Levi taudia ia hamaoroa Dirava ena ruma idia hagoevaia totona. Bona dina 16 lalonai unai gaukara idia haorea. (2 Sivarai 29:16-18 duahia.) Unai sivarai ese ia hahedinaraia, iseda hebou gabudia ita hanamoa bona ita hagoevaia karana ese ia hamomokania ita be Iehova tomadiho henia karana ita ura henia bada. Reana ekspiriens haida oi kamonai, tadikaka taihu idia ura bada Dirava ena ruma hanamoa gaukaradia idia durua dainai, taunimanima ese idia hanamodia. Momokani, edia gaukara goada karana ese Iehova ia hanamoa bada.
14, 15. Hari, edena gaukara ese Iehova ena ladana ia hanamoa bada? Ekspiriens gwauraia.
14 England ena siti ta dekenai, tau ta be ia ura lasi ena ruma badinai Kingdom Hall idia hanamoa. To tadikaka be mai manau ida ia idia hereva henia. Idia itaia Kingdom Hall bona unai tau ena ruma huanai ia noho magu be ia dika dainai, unai tau idia hamaoroa ena magu do idia hanamoa bona davana do ia henia lasi. Oibe, idia gaukara goadagoada bona unai magu ena kahana badana idia haginia lou. Tadikaka edia kara namona ese unai tau ena lalohadai ia haidaua. Hari, unai tauna be ena ruma badinai ia noho Kingdom Hall ia naria.
15 Iehova ena taunimanima be tanobada hegegemadai Dirava ena ruma haginia gaukaradia idia karaia noho. Volantia taudia be mai edia ura bada ida ful-taim intenesenel konstraksen taudia idia durua Kingdom Hall, Assembly Hall bona Betele rumadia idia haginia totona. Sam bona ena adavana, Ruth be Europe bona Africa tanodia haida dekenai idia lao, konstraksen gaukarana idia durua totona. Idia lao gabudia dekenai, mai moale danu tadikaka taihu ida idia haroro hebou. Sam be intenesenel konstraksen gaukarana ia ura karaia ena badina ia herevalaia neganai, ia gwau: “Iniseniai bona tano ma haida edia Betele rumadia dekenai idia gaukara tadikaka taihu ese ai idia hagoadaia. Mai moale ida idia gaukara goadagoada karana lau itaia neganai, unai ese lau ia hagoadaia inai hesiai gaukara lau karaia totona.”
Dirava Ena Hadibaia Herevadia Badinaia
16, 17. Dirava ena taunimanima be mai edia ura bada ida dahaka gaukara namona ta idia karaia, bona dahaka ia vara?
16 Hesekaia be dubu helaga ia hanamoa lou bona lagani ta ta ai idia karaia Pasova ariana—Iehova ena hahegani hegeregerena—ia hamatamaia lou. (2 Sivarai 30:1, 4, 5 duahia.) Hesekaia bona Ierusalema ai idia noho taudia ese saut kahana bona not kahana basileiana taudia ibounai idia boiria unai hebou dekenai idia lao totona. Tatau haida be tano idauidau dekenai boiboi revarevadia idia abia lao.—2 Siv. 30:6-9.
17 Hari inai negai, ita be unai bamona gaukara ita karaia danu. Ita ese boiboi pepadia amo iseda teritori dekenai idia noho taudia ita boiria, Iesu ena oda hegeregerena, ita ida Lohiabada Ena Anibou idia moalelaia totona. (Luka 22:19, 20) Hesiai Hebou amo hadibaia herevadia ita abia bona unai ese ita ia durua mai eda ura ida unai boiboi pepana ita hariharilaia totona. Iehova ese unai gaukara ia hanamoa bada! Lagani gunanai, ita ibounai milioni 7 bamona be unai boiboi pepadia ita hariharilaia bona taunimanima 17,790,631 be Memorial hebouna dekenai idia mai!
18. Dahaka dainai tomadiho momokani ura henia bada karana be mai anina bada?
18 Baibel ia gwau: “Hesekaia ese Lohiabada, Israela ena Dirava ia abidadama henia. Ia hegeregerena ta ese Iuda ia gunalaia lasi, Iuda ena king gunana ta, o Iuda ena king gabeai ta. Badina be Hesekaia ese Lohiabada ia badinaia namonamo, bona Lohiabada ena murinai raka ena kara dekena amo ia raka siri lasi momokani. Hesekaia ese Lohiabada ena Taravatu ibounai, Mose dekenai ia henia gaudia ibounai, ia badinaia namonamo.” (2 Kin. 18:5, 6) Namona be Hesekaia ena haheitalai ita tohotohoa. Dirava ena ruma ita ura henia bada karana ese ita ia durua Iehova ita “badinaia namonamo” bona vaira negana ai mauri hanaihanai do ita abia.—Deu. 30:16.
Hakaua Daladia Badinaia Haraga
19. Memorial hebouna totona edena bamona ita hegaegae?
19 King Iosaia be Iuda basileia ia lohiaia neganai, Pasova ariana totona ia hegaegae danu. (2 Kin. 23:21-23; 2 Siv. 35:1-19) Ita danu be distrik, sekit bona dina tamona hebouhebou, bona Memorial hebou totona ita hegaegae. Tano haida dekenai, tadikaka taihu be Keriso ena mase laloatao hebouna idia karaia, ena be edia mauri idia haboioa diba. Idia gaukara goada elda taudia be kongrigeisen taudia idia durua unai amo ta be unai hebou ia reaia lasi. Buruka bona gorere taudia idia durua unai hebou dekenai idia lao totona.
20. (a) King Iosaia ena lohia negana lalonai dahaka ia vara, bona ia be dahaka ia karaia? (b) Unai sivarai amo dahaka ita dibaia?
20 King Iosaia be oda ia henia dubu helaga idia hagoevaia totona bona unai gaukara lalonai Hahelaga Tauna Badana, Hilekaia, ese “Lohiabada ena Taravatu Buka, Dirava ese Mose dekenai ia henia gauna, ia davaria.” Unai buka be toretore tauna Sapana dekenai ia henia, bona ia ese Iosaia dekenai ia duahia. (2 Sivarai 34:14-18 duahia.) Vadaeni, Iosaia be dahaka ia karaia? King be maoromaoro ena dabua ia darea bona tatau haida ia oda henia Iehova ena lalohadai idia tahua totona. Bona peroveta hahine Hulida amo Dirava ese Iuda taudia dekenai ena badu herevana ia gwauraia, badina idia be kaivakuku idia tomadiho henidia noho. Ena be Iehova ese Iena bese taudia ia hamaoroa dika do idia davaria, to Iosaia be kaivakuku ibounai ia kokia dainai Iehova ese ia lalonamo henia. (2 Siv. 34:19-28) Unai sivarai amo dahaka ita dibaia? Ita ura Iosaia ena haheitalai do ita tohotohoa. Iehova ena hakaua daladia ita badinaia haraga be namo, badina aposteit taudia edia hereva ita kamonai henia neganai, iseda tomadiho karana Iehova dekenai ia hadikaia diba bona Iehova ese ita do ia lalonamo henia lasi. Bona namona be ita diba momokani, Iehova be Iosaia dekenai ia karaia bamona, Ia ese tomadiho momokanina idia ura henia bada taudia do ia lalonamo henidia.
21, 22. (a) Dahaka dainai Iehova ena ruma ita ura henia bada be namo? (b) Hereva gabena ai dahaka do ita stadilaia?
21 Iuda ena king hani—Asa, Iehosapata, Hesekaia bona Iosaia—be ita totona haheitalai namona idia hahedinaraia, badina idia be Dirava ena ruma bona tomadiho momokanina idia ura henia bada. Namona be Dirava ena ruma ura henia bada karana ese ita do ia hagoadaia Iehova ita abidadama henia bona tomadiho momokanina ita goadalaia totona. Dirava amo idia mai hakaua herevadia ita badinaia haraga bona kongrigeisen elda taudia ese idia henia sisiba ita abia dae be aonega karana, bona unai amo do ita moale.
22 Hereva gabena ese ita do ia durua haroro gaukara ita goadalaia, bona matamata taudia do ia durua iseda lalokau Tamana idia hesiai henia goadagoada totona. Bona Satani ena tarapu ta dadaraia dalana do ita stadilaia danu. Bema mai iseda ura bada ida Iehova ena hakaua herevadia ita badinaia, ita be Iehova ena Natuna, Iesu, ena haheitalai namona ita tohotohoa unai. Baibel ese Iesu be inai bamona ia herevalaia: “Oiemu Dubu Helaga lau ura henia dikadika bona inai ura ese lahi bamona lau ia gabua noho.”—Sal. 69:9; 119:111, 129; 1 Pet. 2:21.
Oi Laloatao, A?
• Iehova be edena bamona hesiai gaukarana ia hanamoa, bona dahaka dainai?
• Edena dala ai ita hahedinaraia Iehova ita abidadama henia?
• Edena dala ai tomadiho momokanina ura henia bada karana ese ita ia hagoadaia Dirava amo idia mai hakaua herevadia ita badinaia totona?
[Pictures on page 9]
Edena dala ai Asa, Iehosapata, Hesekaia, bona Iosaia be Iehova ena ruma idia ura henia bada?