Iseda Haroro Bona Mauri Dalana Hebou Pepana Edia Referens
© 2024 Watch Tower Bible and Tract Society of Pennsylvania
JANUARY 6-12
BAIBEL ENA HEREVA BADADIA SALAMO 127-134
Tama Sina E—Inai Tulu Namodia Umui Gaukaralaia Noho Emui Natudia Hadibaia Totona, A?
Iehova Ena Ruma Bese ai Emu Maduna Oi Laloa Bada
9 Iehova ese taunimanima dekenai natudia havaraia siahuna ia henia. Danu, maduna ia henidia edia natudia idia hadibaia Ia idia lalokau henia bona hesiai henia totona. Bema oi be tama eiava sina ta, unai harihari gauna hereadaena oi moalelaia, a? Ena be Iehova ese aneru dekenai siahu ia henia gau namodia momo idia karaia totona, to idia dekenai natuna havaraia siahuna ia henia lasi. Unai dainai, bema oi be tama eiava sina, natuna naria ena hahenamo oi laloa bada be namo. Dirava ese tama sina dekenai maduna ia henia edia natudia be ‘Iehova ena matahakani bona sisiba amo idia hadibaia totona.’ (Efe. 6:4; Deu. 6:5-7; Sal. 127:3) Tama sina durua totona Dirava ena orea ese Baibel ia herevalaia pablikeisen, vidio, miusiki, bona websait ai idia noho atikol ia halasidia. Unai ese ia hahedinaraia, iseda guba Tamana bona iena Natuna ese natudia idia lalokau henia. (Luka 18:15-17) Tama sina be Iehova dekenai idia tabekau bona idia gaukara goada edia natudia idia naria neganai Iehova ia moale. Danu, unai bamona tama sina ese edia natudia idia durua Iehova ena ruma bese lalonai idia noho hanaihanai totona!
Tama Sina E—Natudia Umui Treinia Iehova Idia Lalokau Henia Totona
20 Idia oi diba namonamo. Salamo 127 ese natudia be diba (arrow) ida ia hahegeregerea. (Salamo 127:4 duahia.) Diba be gau idauidau amo idia karaia bona edia toana be idauidau hegeregerena, natudia danu be idauidau. Unai dainai tama sina ese edia natudia ta ta do idia hadibaia dalana idia laloa be namo. Israela ai, headava tau bona hahine ta ese edia natudia rua ese Iehova idia hesiai henia totona, idia ia durua dalana be inai bamona idia herevalaia, “Emai natudia ta ta edia Baibel stadi ai karaia.” Momokani, ruma bese kwaradia ta ta ese abia hidi idia karaia be namo bema unai bamona stadi dalana idia badinaia eiava lasi.
Hakaua Hereva Namodia
it-1-E rau 543
Baibel Negadia ai Idia Vara Tubutubu Gaudia
Salamo torea tauna ese olive auna ena kara haida ia herevalaia, Iehova idia gari henia taudia dekenai inai gwauhamata ia karaia neganai, ia gwau: “Emu natudia memero be olive au ena rau matamatadia bamona teibolo idia hagegea.” (Sal 128:1-3) Olive au badana amo rigi maragina idia utua olive au matamatana idia hatubua totona. Danu, lagani momo lalonai idia tubu olive audia be edia ramuna amo olive au matamatadia idia havaraia, unai amo unai olive auna ia bada ia lao. Unai au maragidia bamona, natudia memero ese edia tamana idia durua, unai amo ruma bese ena moale idia habadaia.
JANUARY 13-19
BAIBEL ENA HEREVA BADADIA SALAMO 135-137
“Iseda Lohiabada be Dirava Ibounai Ia Hereaia”
it-2-E rau 661 par. 4-5
Siahu, Siahu Karadia
Dirava be lai guba bona medu bamona gaudia ia biagua diba. Iehova ia ura hahedinaraia ia be Dirava momokanina dainai, Ia ese lai guba bona medu bamona gaudia biagua karana ia hahedinaraia diba, unai kara ese iena ladana ia abia isi. (Sal 135:5, 6) Dina, hua, planeti, bona hisiu be nega ibounai edia heau dalana idia badinaia, danu lai, medu, bona unai bamona gaudia be edia taravatu idia badinaia, bona nega maorona ai kwadi momo herea idia hedinarai bona manu be gabu ma ta dekenai idia roho lao. To, tomadiho koikoi bona Dirava idia inai henia taudia dekenai, unai gaudia be hegeregere lasi Dirava ena ladana hahelagaia totona.
To, Iehova Dirava ese ena havaraia gaudia be edia nega korikori ai lasi, to nega idauna ai, ia makaia negana ai, ia gaukaralaidia diba ena Lohia siahuna ia hamomokania totona. Hegeregere medu lasi negana, lai gubana, eiava unai bamona weda gaudia be vaia idia vara gaudia, to Iehova ena peroveta hereva hegeregerena idia vara neganai idia hamomokania ia be kara idauna. (1Ki 17:1; 18:1, 2, 41-45.) Nega momo unai gaudia be dala idauna ai idia vara, badina idia goada momokani, idia bada herea, (Eso 9:24) eiava vaia ita itaia o kamonai lasi, dala idauna momokani ai idia vara.—Eso 34:10; 1Sa 12:16-18.
Iehova Ena Noho Hanaihanai Lalokauna Oi Laloa Bada, A?
16 Iehova be iseda heau mauri gabuna ai ita halaoa neganai, do ita gari lasi. To, nega haida ita lalomanoka bona ita mamia gau ta ita karaia diba lasi. Unai bamona negadia ai, Iehova be ita totona dahaka do ia karaia? (Salamo 136:23 duahia.) Iena imana amo ita do ia dogoatao, metairametaira ita ia abia isi, bona ita ia durua ita raka lou totona. (Sal. 28:9; 94:18) Namo ita abia dalana: Ita diba nega ibounai Dirava dekenai ita tabekau karana ese ita ia durua inai dala rua ita laloatao totona. Ginigunana be, herevana edeseniai ita noho, to Iehova be hanaihanai ita ia gimaia. Iharuana be, iseda lalokau guba Tamana ese ita ia laloa bada.
Hakaua Hereva Namodia
it-1-E rau 1248
Iah
Inai hereva Iah be taunimanima ese mai lalona ibounai ida Iehova hanamoa bona ane abia karana, guriguri bona noinoi karana ida idia gaukaralaia. Danu, nega momo tuari amo idia kwalimu o hahemauri karana dainai idia moale negana ai idia gaukaralaia, eiava Dirava ena imana bona siahu idia itaia negana ai idia gaukaralaia. Inai hereva be Baibel ena kahana momo ai idia gaukaralaia. Hegeregere, “Iah Hanamoa!” (Aleluia) be Salamo bukana ai idia gaukaralaia momo Dirava hanamoa herevana, bona nega ginigunana be Salamo 104:35 ai idia gaukaralaia. Salamo ena ane haida ai ia be matamana kahana sibona ai ia hedinarai (Sal 111, 112), nega ta ta salamo anena ena huanai ia hedinarai (135:3), nega haida ane ena dokona sibona ai ia hedinarai (Sal 104, 105, 115-117), to nega momo ia be ane ena matamana bona dokona ai ia hedinarai (Sal 106, 113, 135, 146-150). Apokalupo bukana lalonai aneru ese nega momo unai hereva amo Iehova idia hanamoa loulou.—Apo 19:1-6.
Siri ma haida ai ane bona guriguri lalonai “Iah” idia gaukaralaia danu Iehova idia hanamoa totona. Hegeregere, Mose ese ia torea hahemauri anena. (Eso 15:2) Isaia ese ia torea siridia lalonai ladana rua “Iah Iehova” ia gaukaralaia, unai amo Dirava ena ladana ia hanamoa bada. (Isa 12:2; 26:4) Hesekaia be kahirakahira do ia mase gwauraia, to Iehova ese hoa dalanai ia hanamoa murinai, ena moale ia hahedinaraia totona, Iah ia gwauraia loulou. (Isa 38:9, 11) Idia mase taudia ese Iah idia hanamoa diba lasi, to idia mauri noho taudia ese edia lalona idia hadaia Ia sibona do idia hanamoa, ena idau idia hahedinaraia. (Sal 115:17, 18; 118:17-19) Bona salamo anedia ma haida lalonai guriguri amo Dirava idia tanikiu henia badina ia ese ia hamauridia, gimadia bona edia kara ia hamaoromaoroa.—Sal 94:12; 118:5, 14.
JANUARY 20-26
BAIBEL ENA HEREVA BADADIA SALAMO 138-139
Namo Lasi Gari Karana ese Oi Ia Koua
Kongrigeisen ai Iehova Hanamoa
10 Oi gari o oi hemarai dainai haere henia totona emu imana oi abia isi be auka, a? Bema oibe, ma haida danu be unai bamona idia mamia. Momokani, ita momo be haere ita henia neganai, ita gari. Emu gari karana oi hanaia totona, emu gari ena badina oi diba be namo. Oi gari dainai oi ura gwauraia gauna do oi laloaboio eiava haere kererena do oi gwauraia, a? Eiava oi laloa momo badina oi laloa haida edia haere ese emu haere do ia hereaia, a? Unai bamona oi mamia be kerere lasi. Unai ese ia hahedinaraia, oi be oi manau bona ma haida oi laloa danu. Iehova ese unai kara ia moalelaia. (Sal. 138:6; Fili. 2:3) To, Iehova ia ura ia oi hanamoa bona hebou ai emu tadikaka taihu oi hagoadaia. (1 Tes. 5:11) Oi ia lalokau henia bona oi do ia hagoadaia.
Kongrigeisen Heboudia ai Ta Ta Hagoadaia
7 Vanegai idia halasia Gima Kohorona ena hereva haida ese oi ia durua diba. Hegeregere, oi hegaegae namonamo. (Aon. 21:5) Oi hegaegae namonamo neganai do oi gari lasi haere oi henia totona. Danu, emu haere oi hakwadogia be namo. (Aon.15:23; 17:27) Bema emu haere ia kwadogi do oi gari lasi. Oi henia haere kwadogina, reana sentens ta o rua sibona ese tadikaka taihu ia durua idia laloparara totona, to emu haere ai point momo eiava haere latana oi gwauraia neganai do idia laloparara lasi. Sibona emu hereva dalana amo haere kwadogina oi henia neganai, oi hahedinaraia oi hegaegae namonamo bona stadi ena anina oi lalopararalaia.
Hakaua Hereva Namodia
it-1-E rau 862 par. 4
Gwauatao Karana
Ma danu, herevana nega hida ta ese ita ia kara dika henia, to ena dika ita gwauatao karana be Keristani karana ta. (Luka 17:3, 4; Efe. 4:32; Kol. 3:13) Bema ta ia ura lasi ma ta ena dika ia gwauatao, Dirava ese ena dika do ia gwauatao lasi. (Mt 6:14, 15) To, bema kara dika badana ia karaia dainai “kara dika tauna” be Keristani kongrigeisen murimurinai idia atoa, bena gabeai ia hahedinaraia ia helalo-kerehai momokani, nega maorona ai ena dika idia gwauatao diba. Unai nega ai, tadikaka taihu ese ia dekenai lalokau do idia hahedinaraia. (1 Kor. 5:13; 2 Kor. 2:6-11) To, mai ura ida kara dika idia karaia bona idia helaro-kerehai lasi taudia be Keristani taudia ese do idia gwauatao lasi. Unai bamona taudia be Dirava ena inai taudia.—Heb. 10:26-31; Sal. 139:21, 22.
JANUARY 27–FEBRUARY 2
BAIBEL ENA HEREVA BADADIA SALAMO 140-143
Heduru Totona Oi Guriguri Murinai Oi Badinaia
“Aonega Taudia Edia Hereva Oi Kamonai”
13 Sisiba abia karana be Dirava ena lalokau karana. Iehova be iseda namo ia laloa bada. (Aon. 4:20-22) Ia ese Baibel, pablikeisen idauidau, eiava lo tadikaka o taihu ta amo ita ia sisiba henia neganai, ia hahedinaraia ita ia lalokau henia. Heberu 12:9, 10 ia gwau, “Dirava ese iseda namo totona ita ia matahakani henia.”
14 Ita abia sisiba herevadia ita laloa bada, to idia henia dalana ita laloa bada lasi. Nega haida ita laloa sisiba ita abia dalana be maoro lasi. Oibe, ta ita sisiba henia neganai, do ia abia dae dalanai sisiba ita henia be namo. (Gal. 6:1) To bema ta ese ita ia sisiba henia, namo lasi ita ia sisiba henia dalana ita laloa, to namona be sisiba herevadia ita laloa bada. Reana sibona ita nanadaia: ‘Ena be sisiba ia henia dalana lau ura henia lasi, to unai sisiba herevadia amo gau ta lau dibaia, a? Lau ia sisiba henia tauna ena kara kereredia lau laloa lasi, to ia henia sisiba ena namo lau laloa, a?’ Aonega karana be dala ita tahua ita abia sisiba ita badinaia totona, unai amo namo do ita davaria.—Aon. 15:31.
Inai Nega Dikana Lalonai “Kudouna Ia Goeva” Noho
Dagedage taudia edia hagaria karadia, moni ena hekwakwanai, bona gorere badadia be Dirava ena hesiai taudia haida edia lalona ia hametaua. Nega haida Dirava idia hesiai henia taudia be idia lalomanoka. King Davida be unai ia mamia danu, ia gwau: “Egu lalona ia metau dainai, lau ese laloa dika lau davaria vadaeni. Egu lalona ia hisihisi, dika momokani, mai gari danu.” (Sal. 143:4) Dahaka ese ia durua unai bamona negadia ia hanaia totona? Davida be Dirava ese ena hesiai taudia dekenai ia karaia karadia ia laloatao bona Dirava ese ia hamauria karana ia laloa danu. Davida be Iehova ese Iena ladana hahelagaia totona ia karaia gaudia ia laloa dobu. Davida be Dirava ena gaukara sibona ia laloa bada. (Sal. 143:5) Unai hegeregerena, iseda Havaraia Tauna, ia karaia gaudia ibounai bona vaira nega ai do ia karaia gaudia ita laloa dobu neganai, unai ese ita do ia durua hahetoho ita haheaukalaia totona.
“Lohiabada Lalonai Sibona” Headava be mai Anina, A?
Nega haida ita be salamo torea tauna Davida bamona ita mamia, ia gwau: “[Iehova] e, lau dekenai do oi haere haraga, badina be egu lauma ia manoka momokani, mase bamona. Oiemu vairana be lau dekena amo do oi hunia lasi.” (Sal. 143:5-7, 10) Unai bamona negadiai, namona be oi naria emu guba Tamana ese oi dekenai ena ura ia hahedinaraia totona. Unai oi karaia dalana ta be ena Hereva oi duahia bona laloa dobu. Oi ese iena taravatu do oi diba bona idaunegai ena taunimanima ia durua daladia do oi itaia. Ia oi kamonai henia neganai, do oi diba unai be aonega karana.
Hakaua Hereva Namodia
it-2-E rau 1151
Poisini
Laulau dalanai idia gaukaralaia. Kara dika taudia edia koikoi herevadia bona ta ena ladana namona idia hadikaia herevadia be gaigai ena poisini dikana ida idia hahegeregerea. (Sal. 58:3, 4) Baibel ese ma ta ena ladana idia hadikaia taudia be inai bamona ia herevalaia, “Gaigai ena poisini be edia uduna dekenai ia noho,” badina gaigai ena poisini ena pusepuse be ena udu bibina bona ataiai isena murinai ia noho. (Sal. 140:3; Roma 3:13) Taunimanima edia malana be “tau ta ia hamasea poisini amo ia honu,” bema ta ena ladana idia hadikaia, idia maumau, hahediba koikoi herevadia, eiava unai bamona hadikaia herevadia idia gwauraia.—Iam 3:8.
FEBRUARY 3-9
BAIBEL ENA HEREVA BADADIA SALAMO 144-146
“Iehova be Edia Dirava ai Idia Halaoa Taudia be Idia Moale!”
Duahia Taudia Edia Henanadai
2. Salamo ena siri haida mani ita laloa. Siri 12 ai inai hereva “ai” ena anina be siri 12 ia lao 14 ese idia gwauraia hahenamo namodia be kara maoromaoro taudia dekenai ia herevalaia—idia ura dika amo ‘do ia hamauria’ taudia unai (siri 11). Inai lalohadai be siri 15 ese ia hahedinaraia danu, unai siri ai inai hereva “moale” be nega rua ia gwauraia bona unai ese kara maoromaoro taudia ma ia herevalaia lou—badina ‘edia Dirava be Iehova.’
3. Inai lalohadai be Baibel ma haida edia hereva Dirava ese iena abidadama taudia totona ia gwauhamatalaia hahenamodia ida ia hegeregere. Inai salamo ese Davida ia abia dae helarona ia hahedinaraia unai be Dirava ese Israela taudia be edia inai taudia amo ia hamauridia murinai, Ia ese ena taunimanima do ia hanamodia bona do idia moale. (Lev. 26:9, 10; Deut. 7:13; Sal. 128:1-6) Hegeregere, Deuteronomi 28:4 ena hereva bamona: “Lohiabada ese natuna momo umui dekenai do ia henia. Emui uma ese edia anina momo do idia havaraia, bona emui boromakau bona mamoe danu be do idia momo herea, Lohiabada ese ia hanamodia dainai.” Bona momokani, Davida ena natuna Solomona ia lohia negana ai, bese ibounai be maino bona mauri namona do idia moalelaia. Danu, Solomona ia lohia neganai idia vara gaudia ese Mesia ena lohia dalana ia laulaulaia.—1 Kin. 4:20, 21; Sal. 72:1-20.
Emu Helaro Oi Hagoadaia
16 Iseda mauri hanaihanai ena helaro be Dirava amo ia mai harihari gauna. Vaira nega ena mauri namona ita naria noho—ita abia dae do ia vara momokani. Iseda helaro be dogo bamona, ita ia hagoadaia hekwakwanai idauidau, dagedage, bona mase idia vara neganai ita haheauka diba. Iseda helaro be kwara gauna bamona, iseda lalohadai ia gimaia unai amo gau dikadia ita dadaraia bona gau namodia sibona ita karaia. Iseda helaro ese Dirava kahirakahira ita ia hakaua lao bona unai ese iena lalokau ita totona ia hahedinaraia. Iseda helaro ita hagoadaia neganai, namo bada do ita abia.
17 Aposetolo Paulo be Roma taudia dekenai revareva ia torea neganai, inai hereva “emui helaro dainai umui moale” ese ia hagoadaia. (Roma 12:12) Paulo ia moale diba badina ia diba momokani, bema ia abidadama noho guba ai mauri hanaihanai ia abia diba. Ita danu be iseda helaro dainai ita moale diba badina ita diba momokani Iehova ese ena gwauhamata ibounai do ia hagugurua. Salamo torea tauna ia hereva hegeregerena: “Dirava amo heduru ia tahua tauna be ia moale, Ia ese Iehova, iena Dirava ia abidadama henia, . . . Ia be hanaihanai ia kara momokani.”—Sal. 146:5, 6.
Edena Bamona Lalokauna ese Moale Korikorina Ia Havaraia?
19 Taunimanima be lagani 6,000 bamona lalonai hisihisi idia mamia vadaeni, to kahirakahira Satani ena tanobada be do ia ore. Tanobada ai momo be idia sibona, moni, bona moale karadia idia laloa bada. Do idia abia gaudia sibona idia laloa, bona edia mauri lalonai edia ura gaudia sibona idia tahua. Unai bamona taudia be idia moale diba lasi. To Salamo torea tauna ia gwau: “Iakobo ena Dirava ese ia durua noho taudia, be idia moale noho.”—Sal. 146:5.
20 Iehova ena taunimanima be ia idia lalokau henia bada, bona lagani ta ta ai edia namba be ia bada daekau. Unai ese ia hahedinaraia Dirava ena Basileia be ia lohia noho, bona kahirakahira tanobada ai hahenamo momo do ia mailaia. Dirava ena ura ia karaia tauna be do ia moale, badina ia diba ia be Atai Momokani Diravana ia hamoalea. Bona Iehova idia lalokau henia taudia be do idia moale ela bona hanaihanai! Vaira wiki ena stadi ai, ita ese sibona laloa bada karana ena dika bona Iehova ena hesiai taudia ese idia hahedinaraia kara namodia do ita herevalaia.
Hakaua Hereva Namodia
it-1-E rau 111 par. 9
Animal Idauidau
Baibel ese mai kara maoromaoro bona hebogahisi ida animal ita kara henia dalana ia hadibaia. Oibe, Iehova be animal ia naria bona idia dekenai Harihari Gaudia Ia Henia Tauna. (Aon. 12:10; Sal. 145:15, 16) Mose ena Taravatu ese animal naria namonamo karana ia herevalaia. Bema ta ena animal ia boio bona tau ta ese ia davaria, namona be ena biaguna dekenai ia hakaua lao, bona bema metau gauna ta ia huaia dainai ia moru, namona be ta ese ia durua bona ruhaia. (Eso. 23:4, 5) Namona be mai hebogahisi ida idia gaukaralaidia. (De 22:10; 25:4) Animal be taunimanima ida Sabati Dinana ai idia laga-ani be namo. (Eso. 20:10; 23:12; Deu. 5:14) Idia dagedage animal be do idia biagua eiava hamasea. (Gen. 9:5; Eso. 21:28, 29) Animal idaudia rua idia atoa idia sihari totona be taravatu.—Le 19:19.
FEBRUARY 10-16
BAIBEL ENA HEREVA BADADIA SALAMO 147-150
Badina Momo Dainai Iah Ita Hanamoa
Dahaka Dainai Iehova Ita Hanamoa be Namo?
5 Iehova ese Israela besena be orea ta hegeregerena ia hagoadaia sibona lasi, to idia ta ta ia hagoadaia danu. Hari danu be unai bamona. Salamo torea tauna ese Dirava ia herevalaia, ia gwau: “Edia kudoudia idia makohia taudia, be Lohiabada ese ia hagoadaia lou noho, bona edia bero ia kumia noho.” (Sal. 147:3) Oibe, ita gorere o lalometau neganai, namona be ita abia dae momokani Iehova be ita ia laloa bada. Iehova ia ura dikadika ita ia hagoadaia bona iseda lalohisihisi ia hamaragia. (Sal. 34:18; Isa. 57:15) Ita dekenai aonega bona goada ia henia, unai amo ita davaria hekwakwanai ita haheaukalaidia diba.—Iam. 1:5.
6 Gabeai salamo torea tauna ese guba ia itaia, bona ia gwau Iehova ese “hisiu edia namba ia gwauraia vadaeni, bona ia ese idia ibounai edia ladana ia atoa.” (Sal. 147:4) Dahaka dainai ia ese guba gaudia ia herevalaia? Mani oi laloa: Salamo torea tauna ese ena matana amo hisiu ia itadia, to edia namba ia diba lasi. Lagani idia hanaia noho lalonai, ita itaia hisiu be idia momo idia lao. Haida idia laloa iseda Milky Way galaksi lalonai hisiu bilioni momo idia noho. Bona iunives lalonai galaksi trilioni momo idia noho! Momokani, ita ese hisiu ita duahidia diba lasi! To Havaraia Tauna ese idia ta ta dekenai ladana ia henia. Unai ese ia hahedinaraia Iehova be hisiu ta ta ia laloa bada. (1Kor. 15:41) To tanobada ai ia havaraia taudia be edena bamona? Hisiu ta ta idia noho gabuna ia diba namonamo Diravana be ita ta ta ia diba danu—ita noho gabuna, iseda hemami, bona ita ura henia gaudia ia diba!
Dahaka Dainai Iehova Ita Hanamoa be Namo?
7 Iehova be oi ia laloa bada sibona lasi, to ia be mai ena siahu bona ia be hebogahisi Diravana dainai, ia ura ita ta ta ia durua iseda hekwakwanai ita haheaukalaia totona. (Salamo 147:5 duahia.) Reana do oi mamia oi davaria hekwakwanai be bada herea bona oi huaia diba lasi. To Dirava be iseda goada ena hetoana ia diba. Oibe, ia diba “ita be kahu sibona.” (Sal. 103:14) Ita be goevadae lasi dainai, nega ibounai ita kerere. Reana hereva kererena ita gwauraia, ura kereredia ita mamia loulou, eiava ma haida edia gau dainai ita mama! To Iehova be unai bamona lasi, ia be iseda hemami ia lalopararalaia, badina “iena diba be ta ese do ia davaria diba lasi.”—Isa. 40:28.
Dahaka Dainai Iehova Ita Hanamoa be Namo?
18 Salamo torea tauna ia diba Dirava ese Israela besena ia lalonamo henia. Dirava ese unai bese sibona dekenai ena “hereva” bona ‘taravatu bona oda’ ia henia. (Salamo 147:19, 20 duahia.) Hari ita moale, badina ita sibona be Dirava ena ladana ita abia. Danu, ita moale badina Iehova ita dibaia, iena Hereva ese ita ia hakaua, bona ia ita tura henia diba. Salamo 147 ia torea tauna bamona, ita be badina momo dainai Iehova ita hanamoa diba bona ma haida ita hagoadaia danu unai idia karaia totona.
Hakaua Hereva Namodia
it-1-E rau 316
Manu Idauidau
Salamo torea tauna ese “manu ibounai” ia boiria Iehova do idia hanamoa totona (Sal 148:1, 10), bona manu ese edia tauanina ena toana bona gaukara dalana amo unai idia karaia. Manu ta ena huina be 1,000 eiava 20,000 mai kahana. To, manu edia huina ta ta be mai edia shaft bona ia dekenai bard handred idia noho, bona unai be web maragidia idia karaia, bona barb ta ta dekenai barbule maragidia handred momo idia noho, danu barbule be mai edia barbicel bona hook maragidia hundred momo. Kerea manu ena apena ena huina be 15 sentimita bamona, bona ia dekenai barbule tausen momo bona barbicel milioni momo idia noho. Manu edia apena bona tauanina be aerodynamic eiava hodahoda ena heau dalana ena taravatu idia badinaia, bona hari idia noho peleini edia roho dalana idia hereaia. Manu edia turia be paipa bamona, unai dainai idia be metau lasi. Unai dainai, frigate manu ta mai ena apena ena turia be 2-m (7 ft) bamona ena metau be 110 g (4 oz) sibona. Manu badadia haida edia apena ena turia haida be manu ena tauanina idia durua unai amo idia roho maoromaoro diba, peleini edia apena lalonai be unai bamona gauna ta ia noho danu.
FEBRUARY 17-23
BAIBEL ENA HEREVA BADADIA AONEGA HEREVADIA 1
Matamata Taudia E—Daika Do Umui Kamonai Henia?
Namo Lasi Gau ta ese Oi Ia Koua Bena Davana Oi Abia Lasi
16 Bema oi be matamata tauna bona oi mamia emu Keristani tama sina ese emu kara idia laloa kerere bona taravatu momo idia atoa be edena bamona? Reana oi badu dainai, oi abia dae lasi Iehova tomadiho henia karana be mauri dala namona. To bema badu dainai Iehova hesiai henia karana oi rakatania, gabeai do oi laloparara tanobada tauna ta lasi, to emu Keristani tama sina bona emu kongrigeisen sibona be oi idia lalokau henia bada.
17 Mani oi laloa, bema emu tama sina be oi idia matahakani henia lasi, edena bamona do oi diba idia be oi idia lalokau henia? (Heb. 12:8) To reana emu tama sina ese oi idia matahakani henia dalana ese emu lalona ia hahisia. Namo lasi unai oi laloa bada, to edia kara ena badina oi lalopararalaia toho. Unai dainai oi badu haraga lasi. Baibel ia gwau: “Aonega tauna ese hereva momo ia gwauraia noho lasi, bona ia badu haraga lasi tauna, be mai ena lalona kehoa.” (Aon. 17:27) Oibe, namona be tau badana bamona oi laloa bona sisiba oi abia dae, herevana unai sisiba be edena dala ai idia henia, badina idia be emu namo idia laloa. (Aon. 1:8) Emu tama sina be Iehova idia lalokau henia neganai, unai be hahenamo badana. Edia ura badana be oi ese mauri ena davana oi abia.
Iseda Keristani Toana Ita Gimaia
11 Dirava ita hamoalea, taunimanima lasi. Orea ta lalonai ita noho be iseda toana ita hahedinaraia karana ta. Taunimanima ibounai be mai edia turadia be namo, bona ita idia abia dae karana ese iseda lalona ia hamoalea. Matamata taudia dekenai turadia edia laloani herevadia be mai ena siahu, bona unai ese ma haida tohotohoa eiava hamoalea lalohadai goadana ia havaraia. To iseda turadia be nega momo iseda namo idia laloa momokani lasi. Nega haida idia ura kara dika ta idia karaia, bona idia ura ta ese idia ia bamoa. (Aonega Herevadia 1:11-19) Keristani tauna be ena bamodia edia laloani herevadia ia abia dae neganai, nega momo ena Keristani toana ia hunia. (Salamo 26:4) Aposetolo Paulo ia gwau: “Inai tanobada taudia edia kara bamona do umui karaia lasi.” (Roma 12:2) Iehova ese ita dekenai lalogoada ia henia, unai amo taunimanima edia laloani karadia ita dadaraia diba.—Heberu 13:6.
12 Taunimanima edia laloani karadia ese iseda Keristani toana ia hadikaia gwauraia neganai, namona be ita laloatao Dirava badinaia karana be mai anina bada, to taunimanima edia lalohadai be anina lasi. Esodo 23:2 ena hereva be hakaua hereva namona: “Taunimanima momo idia kerere, edia laloa do umui abia dae lasi.” Israela taudia momo ese Iehova ena gwauhamata hagugurua karana idia daradaralaia neganai, Kaleba be mai goada ida hutuma edia lalohadai ia dadaraia. Ia diba Dirava ena gwauhamata ia abidadama henia diba, bona ia gini goada dainai hahenamo ia abia. (Numera 13:30; Iosua 14:6-11) Unai hegeregerena, emu hetura karana Dirava ida oi gimaia totona, taunimanima edia lalohadai oi dadaraia, a?
Hakaua Hereva Namodia
it-1-E rau 846
Kavakava
Unai hereva be kwarana ia dika tauna (o mental gorerena ia abia tauna) ia herevalaia lasi, to Baibel lalonai inai hereva “kavakava” idia gaukaralaia neganai, Dirava ena kara maoromaoro taravatudia ia badinaia lasi eiava ia laloa namonamo lasi tauna ia herevalaia.
FEBRUARY 24–MARCH 2
BAIBEL ENA HEREVA BADADIA AONEGA HEREVADIA 2
Dahaka Dainai Sibona Emu Stadi Karana Oi Laloa Bada?
‘Hereva Momokani ai Umui Raka Noho’
16 Ita momo be duahiduahi bona stadi karana dekenai ita manada momokani lasi. To, Iehova ese ita ia boiria hereva momokani ita “tahua noho,” unai amo ita lalopararalaia namonamo diba. (Aonega Herevadia 2:4-6 duahia.) Ita hekwarahi unai bamona ita karaia neganai, namo do ita davaria. Corey be Baibel duahiduahi ia karaia neganai, siri ta ia stadilaia namonamo. Ia gwau: “Futnout ta ta lau duahia, Baibel siri ibounai (cross-reference) lau sekea, bona tahua gaukara ma haida lau karaia. . . . Unai stadi dalana ese lau ia durua gau momo lau dibaia totona!” Ena be unai bamona stadi dalana o dala ma ta ita badinaia, to stadi totona iseda nega bona goada ita henia neganai, ita hahedinaraia hereva momokani be mai anina bada.—Sal. 1:1-3.
Aonega Korikori be Ia Boiboi Badabada Noho
3 Aonega korikori ena anina be, ita dibaia gaudia ita gaukaralaia abia hidi maorodia ita karaia totona. To, aonega korikori be unai sibona lasi. Baibel ia gwau: “Iehova gari henia karana be aonega ena matamana, bona Helaga Herea Diravana dibaia karana ese laloparara ia henia.” (Aon. 9:10) So bema abia hidi badana ta ita ura karaia, namona be Iehova ena lalohadai, ‘Helaga Herea Diravana ena diba,’ ita tahua. Unai ita karaia totona, Baibel bona Baibel idia herevalaia pablikeisen ita stadilaia. Unai ita karaia neganai aonega korikori do ita hahedinaraia.—Aon. 2:5-7.
4 Iehova sibona ese ita dekenai aonega korikori ia henia diba. (Roma 16:27) Dahaka dainai? Ginigunana, ia be Havaraia Tauna bona ia havaraia gaudia ia diba bona ia lalopararalaidia goevagoeva. (Sal. 104:24) Iharuana, Iehova ena kara ibounai ese ena aonega idia hahedinaraia. (Roma 11:33) Ihatoina, Iehova ena sisiba idia badinaia taudia be hanaihanai namo idia davaria. (Aon. 2:10-12) Bema ita ura aonega korikori ita abia, namona be unai hereva momokani ita abia dae, bona abia hidi eiava kara ta ita ura karaia neganai, unai badina toi ese ita ia hakaua be namo.
Matamata Taudia E, Emui Abidadama Umui Hagoadaia
2 Oi be Iehova oi hesiai henia o Ia oi dibaia noho dainai, nega haida oi ura momo ese idia abia dae gaudia oi abia dae, a? Hegeregere, evolusen oi abia dae, to oi abia dae lasi Havaraia Tauna ia noho, a? Bema unai ia vara, gau haida oi karaia be namo emu abidadama oi hagoadaia totona. Dala ta be laloa kehoa oi gaukaralaia, unai ese oi do ia “naria namonamo.” Danu, emu abidadama idia hadikaia diba lalohadaidia amo oi do ia gimaia.—Aonega Herevadia 2:10-12 duahia.
3 Iseda abidadama ia goada totona, namona be Dirava dekenai diba maorona ita abia. (1Tim. 2:4) Unai dainai Baibel bona iseda Keristani buka bona magasin oi stadilaia neganai, namo lasi oi duahia haraga sibona. Namona be laloa kehoa oi gaukaralaia, unai amo oi duahia gauna “ena anina [oi] lalopararalaia” diba. (Mat. 13:23) Unai oi karaia neganai, do oi abia dae momokani Dirava be iseda Havaraia Tauna, bona Baibel ena hereva be momokani.—Heb. 11:1.
Hakaua Hereva Namodia
it-1-E rau 1211 par. 4
Badinaia Karana
Ta be badinaia karana ia hahedinaraia diba, sibona ena goada amo lasi, to Iehova ena siahu ia abidadama henia dainai unai ia karaia diba. (Sal 25:21) Dirava be ia idia badinaia taudia dekenai ia gwauhamata, edia “kesi” bona “gimaia” tauna ai do ia lao. (Ao 2:6-8; 10:29; Sal 41:12) Abidadama taudia be nega ibounai idia gaukara goada, badina idia ura Iehova ena lalonamo idia abia, bona unai ese edia mauri dalana ia hanamoa, bona edia tahua gauna idia hagugurua diba. (Sal 26:1-3; Ao 11:5; 28:18) Iobu ia daradara badina ia itaia, kerere lasi taudia be hisihisi idia davaria badina kara dika taudia edia lohia henunai idia noho bona unai kara dika taudia ida idia mase. To, Iehova ese kerere lasi tauna ena hisihisi ibounai ia itaia bona ia gwauhamata ia dekenai noho hanaihanai ahuna do ia henia bona vaira nega ai maino ai do ia noho bona gau namodia do ia moalelaia. (Iobu 9:20-22; Sal 37:18, 19, 37; 84:11; Ao 28:10) Iobu ena sivarai amo ita itaia, taga maurina be anina lasi, to ta ese badinaia karana ia hahedinaraia be gau badana, badina taunimanima ese do idia laloa bada bona matauraia. (Ao 19:1; 28:6) Unai bamona tamana ena natudia be do idia moale (Ao 20:7), badina edia tamana ena haheitalai namona amo ahuna namona idia abia, bona ena ladana namona bona hemataurai do idia moalelaia.