Momo Idia Ura Vaira Nega Namona Idia Moalelaia
Oi ura emu vaira negana be edena bamona? Momo hegeregerena, oi ura oi bona emu famili be vaira nega namona umui noholaia, hegeregere moale, helt namona, maino, bona noho namo.
To, momo be edia vaira nega totona idia daradara. Hegeregere COVID-19 gorerena ese karaharaga noho dalana ia haidaua, ogogami maurina ia havaraia, bona momo ia hamasea. Unai dainai, idia laloa edia vaira nega be do ia namo lasi.
Unai bamona idia laloa dainai, idia gaukara goada vaira nega namona davaria dalana idia tahua totona. Haida idia laloa idia itaia lasi siahudia ese edia mauri ia biagua. Momo be edukeisen bona kohu idia tahua, badina idia laloa unai gaudia ese edia ura gauna do ia henia. Haida idia laloa mauri namona abia totona, tau o hahine namona ai idia lao be namo.
Oi laloa unai dala ta ta ese oi do idia durua vaira nega namona oi abia totona, a? Unai oi diba totona, namona be inai henanadai oi laloa:
Dahaka ese emu vaira nega ia gwauraia diba?
Edukeisen bona moni ese mauri namona ia henia diba, a?
Tau o hahine namona ai oi lao neganai, emu vaira nega do ia namo, a?
Vaira nega namona oi davaria totona, edeseniai heduru maorona oi abia diba?
Inai Gima Kohorona ese oi ia durua, unai henanadai edia haere oi davaria totona.