“Ta Ta Do Umui Hagoadaia Noho”

1. Tesalonika Ginigunana 5:11 hegeregerena, dahaka ita karaia be namo?

EMU KONGRIGEISEN ese Kingdom Hall ta idia haginia eiava hanamoa lou vadaeni, a? Bema oibe, reana Kingdom Hall matamatana dekenai emu hebou ginigunana oi laloatao. Iehova oi tanikiu henia bada. Momokani, oi moale bada dainai oi tai bona hamatamaia ane oi abia be auka. Ita haginia Kingdom Hall ese Iehova ia hanamoa. To tomadiho gabudia dekenai idia mai taudia ita hagoadaia neganai, unai ese Iehova ia hanamoa bada. Aposetolo Paulo be inai stadi ena siri badana 1 Tesalonika 5:11 ia torea neganai, unai ia laloa.​—Duahia.

2. Inai atikol ai, dahaka do ita herevalaia?

² Aposetolo Paulo be ena tadikaka taihu hagoadaia daladia ia diba, unai dainai ia be haheitalai namona. Idia dekenai hebogahisi karana ia hahedinaraia. Inai atikol ai, do ita itaia aposetolo Paulo ese ena tadikaka bona taihu ia durua dalana amo (1) hekwakwanai idia haheaukalaia, (2) ta ta huanai maino idia karaia, bona (3) Iehova dekenai edia abidadama idia hagoadaia. Paulo ita tohotohoa bona iseda tadikaka bona taihu ita durua dalana do ita itaia.​—1 Kor. 11:1.

PAULO ESE TADIKAKA TAIHU IA DURUA IDIA HAHEAUKA TOTONA

3. Paulo be dahaka lalohadai maorona ia abia?

³ Paulo ese ena tadikaka taihu ia lalokau henia bada. Paulo be metau idauidau ia davaria, unai dainai ena tadikaka taihu be hekwakwanai idia davaria neganai idia ia hebogahisi henia bona ia laloa bada. Nega ta, Paulo ena moni idia ore bona gaukara ia tahua ia bona ena turadia durua totona. (Kara 20:34) Ia be palai turia tauna. Bona Korinto dekenai ia ginidae neganai, Akwila bona Prisikila ida palai turia gaukara idia karaia. To “sabati ibounai” lalonai, Iuda taudia bona Grik taudia ia haroro henia. Bena Sila bona Timoteo idia ginidae neganai, “Paulo ese nega bada ia gaukaralaia Dirava ena hereva ia harorolaia totona.” (Kara 18:2-5) Paulo ena mauri lalonai Iehova ena hesiai gaukara ia laloa bada. Ia be haroro gaukara ia goadalaia bona tauanina dalanai sibona ia naria diba dainai, ia hegeregere ena tadikaka taihu ia hagoadaia. Idia ia hadibaia “mai anina bada gaudia,” unai be Iehova tomadiho henia karadia idia atoa guna, to mauri ena lalohekwarahi gaudia bona ruma bese naria karana idia laloa momo lasi.​—Fili. 1:10.

4. Edena dala ai Paulo bona Timoteo ese tadikaka taihu idia durua, dagedage karana idia haheaukalaia totona?

⁴ Tesalonika kongrigeisen ia gini bena daudau lasi murinai, tadikaka taihu matamatadia be dagedage bada idia davaria. Dagedage taudia ese Paulo bona Sila idia davaria lasi neganai, “tadikaka ma haida be siti biagudia dekenai idia veria lao,” bona idia boiboi: “Unai tatau ibounai be Kaisara ena oda herevana idia badinaia lasi.” (Kara 17:6, 7) Mani oi laloa, Keristani taudia matamatadia be idia gari bada badina siti taudia ese idia dagedage henia. Reana idia be Iehova hesiai henia karana idia laloa maragi diba, to Paulo ia ura lasi unai bamona ia vara. Ena be ia bona Sila ese unai kongrigeisen matamata idia rakatania, to dala idia karaia tadikaka taihu ese heduru idia abia totona. Paulo ese Tesalonika taudia ia hamaoroa: “Umui dekenai iseda tadikaka, Timoteo, . . . ai siaia. Ia ese emui abidadama ia hagoadaia bona durua totona, dika hisihisi idauidau ese umui ta ena abidadama ia hamanokaia.” (1 Tes. 3:2, 3) Reana Timoteo be ena taoni Lusitera ai dagedage ia davaria. Unuseniai Timoteo be Paulo ese tadikaka taihu ia hagoadaia dalana ia itaia. Bona Iehova ese idia ia durua dalana ia itaia dainai, kongrigeisen matamata ai idia noho tadikaka taihu ia hagoadaia Iehova be idia do ia durua danu.​—Kara 14:8, 19-22; Heb. 12:2.

5. Edena dala ai, tadikaka Bryant be elda ta ena heduru amo namo ia davaria?

⁵ Edena dala ma ta ai Paulo ese ena tadikaka taihu ia hagoadaia? Paulo bona Banaba be Lusitera, Ikonio, bona Antioka idia vadivadi henia lou neganai, “kongrigeisen ta ta ai, tau badadia idia abia hidi.” (Kara 14:21-23) Unai tau badadia ese kongrigeisen idia hagoadaia bada, hari elda taudia idia karaia hegeregerena. Tadikaka ta ladana Bryant ena hereva mani oi laloa, ia gwau: “Egu mauri lagani be 15 neganai, egu tamana be ai ia rakatania bona egu sinana be orea amo idia atoa siri. Lau mamia lau be sibona lau noho bona lau lalomanoka.” Dahaka ese Bryant ia durua unai hekwakwanai ia haheaukalaia totona? Ia gwau: “Elda ta, Tony, be hebou negadiai bona nega ma haida ai lau ida ia herevahereva. Hahetoho idia davaria to idia moale noho taudia edia sivarai be lau dekenai ia herevalaia. Ia ese Salamo 27:10 ia herevalaia bona nega momo Hesekaia ena sivarai ia gwauraia, ia be Iehova ia hesiai henia herevana ena tamana be haheitalai dikana ia hahedinaraia.” Edena dala ai unai ese Bryant ia durua? Ia gwau, “Tony ese lau ia hagoadaia dainai, gabeai ful-taim hesiai gaukara lau hamatamaia.” Elda taudia e, umui noho hegaegae, hagoadaia “hereva namona” idia ura taudia umui durua, Bryant dekenai ia vara bamona.​—Aon. 12:25.

6. Edena dala ai, Paulo ese mauri sivaraidia ia gaukaralaia tadikaka taihu ia hagoadaia totona?

⁶ Paulo ese tadikaka taihu ia hadibaia Iehova ena heduru dainai, “witnes orea badana” be metau idauidau idia haheaukalaia. (Heb. 12:1) Paulo ia laloparara metau idauidau idia haheaukalaia taudia edia sivarai ese ena tadikaka taihu ia hagoadaia bona durua “mauri Diravana ena siti” idia laloa bada totona. (Heb. 12:22) Hari, unai ia vara danu. Baibel ai Iehova ese Gideona, Baraki, Davida, Samuela, bona ma haida ia durua dalana ita duahia neganai, ita ia hagoadaia bada. (Heb. 11:32-35) Bona iseda negai abidadama taudia edia haheitalai ese ita ia hagoadaia bada. Iseda hedikwota dekenai, ai be nega momo tadikaka taihu amo revareva ai abia. Idia be hari inai negai abidadama taudia edia mauri sivarai idia duahia, unai ese edia abidadama ia hagoadaia.

PAULO ESE TADIKAKA TAIHU IA DURUA MAINO AI IDIA NOHO TOTONA

7. Roma 14:19-21 ai Paulo ena sisiba amo dahaka oi dibaia?

⁷ Iseda hereva bona kara amo kongrigeisen ai maino ita havaraia neganai, unai ese eda tadikaka bona taihu do ia hagoadaia. Namo lasi ta ena lalohadai be ma ta amo ia idau dainai, unai ese ita ia hapararaia. Bema ta ena lalohadai be Baibel ena hakaua herevana ia utua lasi, unai ita abia dae diba. Mani inai haheitalai oi laloa. Roma kongrigeisen ai Iuda bona Idau Bese Keristani taudia idia noho. Idia be Mose Ena Taravatu henunai idia noho lasi dainai, ia taravatua aniani haida idia ania diba. (Mar. 7:19) Unai nega amo, Iuda Keristani taudia haida idia laloa aniani idauidau idia ania be namo. To, Iuda Keristani taudia ma haida idia laloa unai aniani idia ania be maoro lasi. Unai hekwakwanai dainai kongrigeisen ia parara. Maino ai idia noho totona, Paulo ia gwau: “Bema vamu oi ania eiava wain oi inua eiava kara ma ta amo emu tadikaka oi hahekwakwanaia, namo lasi unai gaudia oi karaia.” (Roma 14:19-21 duahia.) Paulo ese tadikaka taihu ia durua, unai amo idia itaia hepapahuahu karana ese idia ta ta o kongrigeisen ibounai ia hadikaia diba. Danu Paulo be sibona ena kara ia naria namonamo, unai amo ma haida ia hahekwakwanaia lasi. (1 Kor. 9:19-22) Bema hepapahuahu ia havaraia karadia ita dadaraia, ita ese ma haida ita hagoadaia diba bona maino do ia noho.

8. Mai anina bada gauna ta ese kongrigeisen ena maino ia hadikaia neganai, Paulo be dahaka ia karaia?

⁸ Haida be mai anina bada gaudia dekenai idia lalotamona lasi neganai, Paulo be idia ida maino ia karaia noho, unai amo haheitalai namona ia hahedinaraia. Hegeregere, aposetolo edia negai ia noho Keristani kongrigeisen lalonai, haida idia gwau Idau Bese Keristani taudia ese kopina utua karana idia badinaia be namo, unai amo Iuda taudia ese idia gwauraia dika lasi. (Gal. 6:12) Paulo be unai lalohadai dekenai ia lalotamona lasi, bona ia gwau lasi ena ura dalana sibona idia badinaia, to mai manau ida Ierusalema ai idia noho aposetolo bona tau badadia dekenai unai hekwakwanai ia herevalaia. (Kara 15:1, 2) Paulo be dala maorona ai hekwakwanai ia hamaoromaoroa dainai, Keristani taudia ia durua kongrigeisen dekenai moale bona maino ai idia noho totona.​—Kara 15:30, 31.

9. Edena dala ai, Paulo ena haheitalai ita tohotohoa?

⁹ Bema mai anina bada gauna ta dekenai lalotamona karana ia vara lasi, Iehova ese ia abia hidi taudia amo hakaua daladia ita tahua, unai amo maino do ita havaraia. Nega momo, Baibel ena hakaua daladia be iseda pablikeisen eiava orea ese ia henia hakaua daladia amo ita abia diba. Bema unai hakaua herevadia ita badinaia to iseda lalohadai ita badinaia lasi, kongrigeisen ai maino do ia noho.

10. Paulo ese kongrigeisen ai maino ia havaraia totona dahaka ia karaia?

¹⁰ Paulo be ena tadikaka taihu edia kara namodia ia laloa bada to edia kerere ia laloa bada lasi, unai amo maino ia havaraia. Hegeregere, Roma taudia dekenai ia torea revareva ena dokonai momo edia ladana ia gwauraia bona edia kara namodia ia herevalaia. Paulo hegeregerena, iseda tadikaka taihu edia kara namodia ita herevalaia be namo. Unai bamona ita karaia neganai, ta ta iseda hetura karana ita hagoadaia bona kongrigeisen ai lalokau do ia noho.

11. Lalotamona ia noho lasi neganai, edena dala ai maino ita havaraia?

¹¹ Nega haida, lo Keristani taudia huanai lalotamona karana ia noho lasi eiava idia hepapahuahu. Paulo bona ena turana namona Banaba dekenai unai ia vara. Inai tatau rua edia misinari laolao ma ta dekenai, Mareko ese idia ia bamoa totona idia lalotamona lasi. Idia rua huanai “hepapahuahu badana” ia vara, bona idia parara. (Kara 15:37-39) To Paulo, Banaba, bona Mareko be edia hetura karana idia hanamoa lou, unai amo idia hahedinaraia kongrigeisen ai maino bona lalotamona ia noho be mai anina bada. Gabeai, Paulo ese Banaba bona Mareko edia kara namodia ia herevalaia. (1 Kor. 9:6; Kol. 4:10) Bema kongrigeisen ai ma haida ida ita lalotamona lasi, namona be unai ita hamaoromaoroa bona edia kara namodia ita laloa bada. Unai amo maino bona lalotamona do ia noho.​—Efe. 4:3.

PAULO ESE TADIKAKA TAIHU EDIA ABIDADAMA IA HAGOADAIA

12. Iseda tadikaka taihu haida be dahaka hekwakwanai idia davaria?

¹² Namona be iseda tadikaka taihu ita durua, Iehova dekenai edia abidadama idia hagoadaia totona. Haida be edia Witnes lasi ruma bese taudia, gaukara turadia eiava sikuli turadia ese idia gwauraia dika. Ma haida be gorere badadia idia davaria eiava haida ese idia hahisia karana idia haheaukalaia noho. To ma haida be lagani momo lalonai idia bapatiso bona nega daudau idia naria noho inai nega oromana ena dokona ia ore totona. Unai gaudia ese Keristani taudia edia abidadama ia tohoa. Keristani kongrigeisen ginigunana dekenai unai bamona hekwakwanai idia vara danu. Paulo be ena tadikaka taihu ia hagoadaia totona dahaka ia karaia?

13. Haida ese Keristani taudia edia abidadama idia gwauraia dika neganai, edena dala ai Paulo ese idia ia durua?

¹³ Paulo ese Toretore Helagadia ia gaukaralaia tadikaka taihu edia abidadama ia hagoadaia totona. Hegeregere, abidadama lasi ruma bese taudia idia laloa Iuda tomadihona ese Keristani tomadihona ia hereaia, bona reana Iuda Keristani taudia idia diba lasi unai idia haerelaia totona. Oibe, Paulo ese Heberu taudia dekenai ia torea revarevana ese unai Keristani taudia ia hagoadaia bada. (Heb. 1:5, 6; 2:2, 3; 9:24, 25) Bona unai revareva ai idia noho point namodia idia gaukaralaia edia abidadama lasi ruma bese taudia idia haere henia totona. Hari inai negai, edia abidadama dainai idia kirikirilaia tadikaka taihu ita durua, pablikeisen idauidau idia gaukaralaia idia abia dae gaudia ena badina idia herevalaia totona. Bona iseda matamata taudia be dina badadia hahelagaia bona vara dinana idia moalelaia lasi dainai idia kirikirilaia neganai, idia ita durua Mauri Moalelaia Hanaihanai! bukana ena leseni 44 amo infomeisen haida idia tahua, unai amo unai gaudia idia moalelaia lasi ena badina idia herevalaia diba.

14. Ena be Paulo be haroro bona hadibaia gaukara dekenai ia bisi, to dahaka ia karaia?

¹⁴ Paulo ese tadikaka taihu ia hagoadaia “kara namodia” amo lalokau idia hahedinaraia totona. (Heb. 10:24) Paulo be ena hereva bona kara amo tadikaka taihu ia durua. Hegeregere, Iudea ai hitolo bada ia vara neganai, Paulo be tadikaka taihu edia dabu gaudia haida ia abia lao. (Kara 11:27-30) Momokani, ena be Paulo be haroro bona hadibaia gaukara dekenai ia bisi, to dala idauidau ia tahua tauanina dalanai tadikaka taihu ia durua totona. (Gal. 2:10) Unai bamona ia karaia neganai, ena tadikaka taihu idia abia dae Iehova be idia ia naria. Hari inai negai, iseda nega, goada, bona diba ita gaukaralaia disasta gabudiai heduru ita henia neganai, iseda tadikaka taihu edia abidadama ita hagoadaia. Ita ese Tanobada Ibounai Gaukarana totona nega ibounai kontribiusen ita henia neganai, tadikaka taihu edia abidadama ita hagoadaia danu. Dala idauidau ai idia ita durua neganai, idia abia dae Iehova be idia do ia rakatania lasi.

15-16. Edena dala ai, abidadama manoka taudia ita kara henia?

¹⁵ Paulo ese abidadama manoka taudia ia hagoadaia noho. Ia be hebogahisi karana ia hahedinaraia, lalohadai maorona ia abia, bona mai gado namo ida ia hereva henidia. (Heb. 6:9; 10:39) Hegeregere, Heberu taudia dekenai ia torea revareva lalonai, inai hereva “ita” ia gaukaralaia momo, unai amo ia hahedinaraia ia henia sisiba ia badinaia danu. (Heb. 2:1, 3) Paulo hegeregerena, namo lasi edia abidadama ia manoka taudia ita laloa maragi. To, ita hahedinaraia idia ita laloa bada, unai ese edia abidadama ia hagoadaia. Unai bamona ita karaia neganai, ita hahedinaraia idia ita lalokau henia. Bona iseda hereva dalana ese idia do ia hagoadaia bada.

¹⁶ Paulo ese ena tadikaka taihu ia hamaoroa Iehova be edia gaukara namodia ia itaia. (Heb. 10:32-34) Ita ese abidadama manoka taudia ita hagoadaia neganai, Paulo ita tohotohoa be namo. Reana idia ita nanadaia hereva momokani idia abia dae dalana idia herevalaia, eiava ita hagoadaia Iehova ese idia ia durua daladia idia laloa lou totona. Bona ita hamaoroa guna idia karaia kara namodia be Iehova ese ia laloaboio lasi bona vaira negai idia do ia rakatania lasi. (Heb. 6:10; 13:5, 6) Unai bamona herevahereva karana ese idia do ia hagoadaia Iehova idia hesiai henia noho totona.

“TA TA DO UMUI DURUA” NOHO

17. Edena bamona karadia ita habadaia noho?

¹⁷ Nega ia hanaia lalonai konstraksen gaukara ia karaia tauna be ena diba ia habadaia hegeregerena, ita danu be ma haida ita hagoadaia noho. Guna idia haheauka taudia edia sivarai be ma haida dekenai ita gwauraia neganai, idia ita durua edia hekwakwanai idia haheaukalaia totona. Maino ia noho totona, ma haida edia kara namodia ita herevalaia, maino ia hadikaia daladia ita koua, bona hepapahuahu ia vara neganai maino ita karaia be namo. Bona tadikaka taihu edia abidadama ita hagoadaia noho totona, namona be idia ida Baibel ena hereva momokanidia ita herevalaia, dala ita karaia heduru ita henia, bona abidadama manoka taudia ita hagoadaia noho.

18. Emu lalona oi hadaia dahaka oi karaia totona?

¹⁸ Tomadiho rumadia haginia gaukarana idia durua taudia be idia moale. Ita gaukara goada iseda tadikaka bona taihu edia abidadama ita hagoadaia neganai, do ita moale. Idia haginia rumadia be do idia dika, to ma haida edia abidadama ita hagoadaia karana be do ia noho hanaihanai! Namona be iseda lalona ita hadaia, “ta ta do ita durua bona ta ta do ita hagoadaia noho.”​—1 Tes. 5:11.