Iehova Ena Taunimanima be Kara Maoromaoro Idia Ura Henia

1. Iosepa be dahaka hahetoho ia davaria, bona dahaka ia karaia?

IAKOBO ena natuna Iosepa be hahetoho badana ta ia davaria. Hahine ta be ia dekenai ia gwau, “Lau ida oi mahuta.” Unai hahine be Iosepa ena biaguna, Potifara, ena adavana. Iosepa ese hahine ena noinoi ia dadaraia. Hari inai negai, reana ta do ia laloa, ‘Dahaka dainai Iosepa be unai hahetoho ia dadaraia?’ Potifara be ruma dekenai ia noho lasi. Danu, Iosepa be Potifara ena ruma dekenai hesiai gaukara ia karaia. Bema hahine ena noinoi ia dadaraia, ia ese Iosepa dekenai hekwakwanai momo ia havaraia diba. To, Iosepa ese hahine ena noinoi loulou karana ia dadaraia noho. Dahaka dainai? Iosepa ia gwau: “Edena bamona inai dika badana do lau karaia bona Dirava vairanai lau kara dika?”​—Gen. 39:7-12.

2. Edena dala ai Iosepa ia diba Dirava ese heudahanai karana ia inai henia?

² Edena dala ai, Iosepa ia diba Dirava ese heudahanai karana ia gwauraia kara “dika badana”? Israela taudia be lagani 200 murinai Mose Ena Taravatu idia abia, ia gwau, “Namo lasi umui heudahanai.” (Eso. 20:14) To, Iosepa ia laloparara Iehova ese heudahanai karana ia inai henia. Hegeregere, Iosepa ia diba Iehova ese headava be tau tamona bona hahine tamona huanai ia havaraia. Bona reana ena tubuna hahine, Sara, ena sivarai ia kamonai. Sara be nega rua Iehova ese ia gimaia, unai amo ena adavana sibona ia badinaia. Bona Dirava ese Isako ena adavana, Rebeka, be unai bamona ia gimaia danu. (Gen. 2:24; 12:14-20; 20:2-7; 26:6-11) Iosepa be unai sivarai ia lalodia dainai, ia ese Dirava ena vairanai dahaka be maoro bona kerere edia idau ia lalopararalaia. Bona Dirava ia lalokau henia dainai, Iena kara maoromaoro taravatudia ia ura henia bona badinaia.

3. Inai stadi ai, dahaka do ita herevalaia?

³ Kara maoromaoro oi ura henia, a? Oibe. To ita be goevadae lasi taudia dainai, bema ita naria namonamo lasi, tanobada taudia ese kara maoromaoro idia laloa dalana ita abia diba. (Isa. 5:20; Roma 12:2) Unai dainai kara maoromaoro be dahaka, bona unai kara ita ura henia amo namo ita davaria dalana do ita herevalaia. Bona dala toi do ita herevalaia unai ese ita ia durua Iehova ena taravatu ita ura henia bada totona.

KARA MAOROMAORO BE DAHAKA?

4. Kara maoromaoro dekenai momo be dahaka lalohadai kererena idia abia?

⁴ Taunimanima momo idia laloa kara maoromaoro tauna be, ia hekokoroku, ma haida ia hahemaoro henia, eiava ma haida ia laloa maragi. To Dirava be unai bamona karadia ia ura henia lasi. Iesu be tanobada ai ia noho neganai, ia ese tomadiho gunalaia taudia ia gwau henia, badina idia be sibona edia kara maoromaoro taravatudia idia haginia. (Had. 7:16; Luka 16:15) Iehova ena ura hegeregerena kara maoromaoro ia badinaia tauna be ma haida hereaia lalohadaina ia abia lasi.

5. Baibel ai, kara maoromaoro ena anina be dahaka? Haheitalai haida gwauraia.

⁵ Kara maoromaoro be kara namo hereana ta. Anina be, Iehova Dirava ese ia ura henia karadia ita karaia. Baibel ai, inai hereva “kara maoromaoro” ese Iehova ena taravatu badinaia karana ia herevalaia. Hegeregere, Iehova ena taravatu ia gwau hoihoi tauna ese “sikele momokani” ia gaukaralaia be namo. (Deu. 25:15) Heberu gado herevana idia hahanaia “momokani,” ena anina ma ta be “kara maoromaoro.” Unai dainai, Dirava ena vairanai Keristani tauna ia ura kara maoromaoro ia karaia totona, ena bisinesi lalonai ia kara momokani be namo. Kara maoromaoro tauna be kota maoromaoro ia ura henia dainai, ia ura lasi ta idia hahisia. Kara maoromaoro tauna be disisen ta ia karaia totona Iehova ena lalohadai ia tahua guna, unai amo ‘[Iehova] ia hamoalea.’​—Kol. 1:10.

6. Dahaka dainai Iehova ena taravatu maoro bona kerere dekenai ita badinaia be namo? (Isaia 55:8, 9)

⁶ Baibel ia gwau Iehova be “kara maoromaoro” Diravana. (Ier. 50:7) Ia be Havaraia Tauna dainai, maoro bona kerere dekenai taravatu maorodia ia atoa diba. Ita be kara dika bona goevadae lasi taudia dainai, maoro bona kerere edia idau ita diba lasi. To Iehova be goevadae Diravana dainai, maoro bona kerere edia idau ia diba namonamo. (Aon. 14:12; Isaia 55:8, 9 duahia.) To, ita be Dirava ena toana hegeregerena ia karaia dainai, iena kara maoromaoro taravatudia ita badinaia diba. (Gen. 1:27) Bona ita ura unai bamona ita karaia. Iseda Tamana ita lalokau henia dainai, ita gaukara goada Ia ita tohotohoa totona.​—Efe. 5:1.

7. Dahaka dainai taravatu maorodia ita badinaia be namo? Haheitalai gwauraia.

⁷ Iehova ena taravatu maoro bona kerere dekenai ita badinaia neganai, namo ita davaria. Unai ena badina oi itaia, a? Mani oi laloa, bema konstraksen kampani ta ta be ruma haginia ena mesament totona sibona edia taravatu idia badinaia, dahaka do ia vara? Daradara do ia vara. Bema doketa bona nesi be gorere taudia durua totona idia noho taravatudia idia badinaia lasi, reana unai ese gorere taudia haida ia hamasea diba. Momokani, taunimanima ese taravatu maorodia idia badinaia neganai, idia ia gimaia. Unai hegeregerena, Dirava ese maoro bona kerere dekenai ia atoa taravatudia ese ita ia gimaia.

8. Kara maoromaoro idia badinaia taudia ese dahaka hahenamo do idia davaria?

⁸ Iehova ese iena taravatu idia badinaia totona idia gaukara goada taudia ia hanamoa. Ia gwauhamata: “Kara maoromaoro taudia be tanobada do idia abia, bona tanobada ai do idia noho ela bona hanaihanai.” (Sal. 37:29) Mani oi laloa, taunimanima ibounai ese Iehova ena taravatu idia badinaia neganai, lalotamona, maino, bona moale do ia noho, ani? Iehova ia ura unai bamona mauri dalana oi moalelaia. Oibe, badina namodia dainai ita ta ta ese kara maoromaoro ita ura henia! Edena dala ai unai kara ita ura henia bada? Do ita badinaia daladia toi mani ita herevalaia.

IEHOVA ENA TARAVATU ITA URA HENIA BADA

9. Dahaka ese ita do ia durua kara maoromaoro ita ura henia totona?

⁹ Dala Ginigunana: Taravatu ia henia Tauna ita lalokau henia. Kara maoromaoro ita ura henia totona, maoro bona kerere dekenai taravatu ia henia Tauna, Iehova, ita lalokau henia bada. Unai bamona ita karaia neganai, do ita ura Iena kara maoromaoro taravatudia ita badinaia noho. Inai haheitalai ita laloa: Bema Adamu bona Heva ese Iehova idia lalokau henia, Iena taravatu maorodia idia badinaia diba.​—Gen. 3:1-6, 16-19.

10. Aberahamo be dahaka ia karaia Iehova ena disisen ia lalopararalaia totona?

¹⁰ Ita ura lasi Adamu bona Heva ese idia karaia kererena ita karaia. Bona unai ita dadaraia diba, bema Iehova ita dibaia noho, iena kara namodia ita laloa bada, bona ita hekwarahi iena laloa dalana ita lalopararalaia. Unai bamona ita karaia neganai, Iehova ita lalokau henia bada. Mani Aberahamo ita laloa. Ia ese Iehova ia lalokau henia bada. Ena be Aberahamo dekenai ia auka Iehova ese ia karaia disisen ia lalopararalaia totona, to ia gwau-edeede lasi. Ia hekwarahi Iehova ia diba namonamo totona. Hegeregere, Aberahamo ia diba Iehova be disisen ia karaia Sodoma bona Gomora ia hadikaia neganai, matamanai ia gari badina ia laloa “Tanobada ibounai edia Hahemaoro Tauna” ese kara maoromaoro taudia be kara dika taudia ida do ia hadikaia ore. Aberahamo ese unai ia abia dae be auka, unai dainai Iehova dekenai henanadai haida ia henia. Iehova be mai haheauka ida unai ia haerelaia. Dokonai, Aberahamo ia laloparara Iehova be taunimanima edia kudouna ia itaia, bona kerere lasi taudia be kerere taudia ida ia panisia hebou lasi.​—Gen. 18:20-32.

11. Edena dala ai Aberahamo ia hahedinaraia Iehova ia lalokau henia bona abidadama henia?

¹¹ Aberahamo bona Iehova be Sodoma bona Gomora edia siti totona idia herevahereva karana ese Aberahamo ia hagoadaia bada. Ia ese ena guba Tamana ia lalokau henia bona matauraia bada, guna bamona lasi. To lagani haida murinai, Aberahamo dekenai ia vara gauna ese Iehova dekenai ena abidadama ia tohoa. Iehova ese ia hamaoroa ena lalokau natuna, Isako, ia bouboulaia totona. To Aberahamo be ena Dirava ia diba namonamo dainai, ia nanadaia lasi. Aberahamo be Iehova ese ia gwauraia herevana ia badinaia. To, unai gaukara ia karaia totona ia mamia lalohisihisi mani oi laloa! Reana Aberahamo be Iehova dekenai ia dibaia gaudia ia laloa dobu. Ia diba Iehova be kara maoromaoro bona lalokau Diravana. Aposetolo Paulo ia gwau, Aberahamo ia diba Iehova be hegeregere ena natuna lalokauna, Isako, ia hatoreaisi lou totona. (Heb. 11:17-19) Danu, Iehova ia gwauhamata Isako be bese ibounai edia tamana ai do ia lao, bona unai nega ai, ia be mai ena natudia lasi. Aberahamo be Iehova ia lalokau henia, unai dainai ia abia dae iena guba Tamana be kara maorona do ia karaia. Aberahamo be ena abidadama karana dainai, Dirava ena hereva ia badinaia.​—Gen. 22:1-12.

12. Edena dala ai Aberahamo ita tohotohoa? (Salamo 73:28)

¹² Edena dala ai Aberahamo ita tohotohoa? Aberahamo bamona, Iehova ita dibaia noho be namo. Unai bamona ita karaia neganai, Dirava kahirakahira do ita lao bona Ia do ita lalokau henia bada. (Salamo 73:28 duahia.) Iseda lalomamina ita hadibaia loulou, unai amo Iehova ena lalohadai ese ita do ia hakaua. (Heb. 5:14) Unai dainai kara dika karaia totona ta ese ita ia tohoa neganai, unai do ita dadaraia. Do ita ura lasi ita karaia gauna ta ese iseda guba Tamana ia hahisia bona Ia ida iseda hetura karana ita hadikaia. To, edena dala ai ita hahedinaraia kara maoromaoro ita ura henia?

13. Edena dala ai kara maoromaoro ita tahua? (Aonega Herevadia 15:9)

¹³ Dala Iharuana: Dina ta ta ai ita gaukara goada kara maoromaoro ita ura henia totona. Bema ita ura iseda masolo ia goada, ita gaukara goada dina ta ta ai ita eksasais totona. Unai hegeregerena, Iehova ena kara maoromaoro ita ura henia totona ita gaukara goada be namo. Dina ta ta ai unai bamona ita karaia diba. Iehova be laloa maoromaoro Diravana, bona ita ia doria lasi ita karaia diba lasi gauna ita karaia totona. (Sal. 103:14) Ia ese ita ia hamaoroa “kara maoromaoro ia tahua tauna be ia lalokau henia.” (Aonega Herevadia 15:9 duahia.) Bema Iehova hesiai henia totona tahua gauna ita atoa, ita gaukara goada unai ita hagugurua totona. Kara maoromaoro ita tahua neganai, unai bamona ita karaia danu be namo. Bona Iehova be mai haheauka ida ita do ia durua, iseda tahua gauna ita hagugurua totona.​—Sal. 84:5, 7.

14. “Kemena dekenai kara maoromaoro ena auri dabua” be dahaka, bona dahaka dainai ita hahedokilaia be namo?

¹⁴ Iehova be mai lalokau ida ita ia hadibaia, kara maoromaoro ita badinaia be auka lasi. (1 Ioa. 5:3) Bona dina ta ta ai kara maoromaoro ese ita ia gimaia diba. Aposetolo Paulo ese ia herevalaia tuari dabua ita laloatao. (Efe. 6:14-18) Edena tuari dabua ena kahana ese soldia ena kemena ia gimaia? Unai be “kemena dekenai kara maoromaoro ena auri dabua,” ia be Iehova ena kara maoromaoro taravatudia ia laulaulaia. Kemena ena auri dabua ese ta ena kudouna ia gimaia hegeregerena, Iehova ena kara maoromaoro taravatudia ese ta ena lalona ia gimaia diba. Unai dainai, gau badana be tuari dabua ibounai oi hahedokilaia, kara maoromaoro ena auri dabua danu!​—Aon. 4:23.

15. Edena dala ai kemena dekenai kara maoromaoro ena auri dabua oi hahedokilaia?

¹⁵ Edena dala ai kemena dekenai kara maoromaoro ena auri dabua oi hahedokilaia? Dina ta ta ai oi karaia abia hidi dekenai Dirava ena taravatu oi laloa be namo. Oi herevalaia gaudia, oi kamonai henia miusiki, oi itaia moale karadia, eiava oi duahia bukadia totona, abia hidi oi do karaia lasi neganai, sibona oi nanadaia: ‘Egu kudouna ai dahaka gaudia do idia noho? Iehova ese unai gaudia ia abia dae, a? Eiava unai gaudia ese matabodaga, dagedage, mataganigani, bona sibona laloa bada karadia ia havaraia, a?’ (Fili. 4:8) Bema oi karaia abia hidi be Iehova ena ura hegeregerena, iena kara maoromaoro taravatudia ese emu kudouna do ia gimaia.

16-17. Edena dala ai Isaia 48:18 ese ita ia hagoadaia hanaihanai Iehova ena kara maoromaoro taravatudia ita badinaia totona?

¹⁶ Dina ta ta eiava lagani ta ta ai Iehova ena kara maoromaoro taravatudia oi badinaia totona oi lalohekwarahi, a? Iehova ese Isaia 48:18 ai ia gaukaralaia haheitalai mani oi laloa. (Duahia.) Iehova ia gwauhamata iseda kara maoromaoro be “davara ena hurehure bamona do ia goada.” Mani oi laloa, oi be kone dekenai oi gini bona idia doko diba lasi hurehure oi itaia noho. Unai nega ai, do oi lalohekwarahi badina dina ta hurehure do idia doko, a? Lasi! Oi diba unai kone dekenai hurehure be lagani tausen momo lalonai idia hedinarai noho.

¹⁷ Emu kara maoromaoro be davara ena hurehure bamona! Edena dala ai? Oi ura disisen ta oi karaia neganai, Iehova ia ura do oi karaia gauna oi laloa guna be namo. Bena unai oi karaia. Ena be do oi karaia disisen be auka, to emu lalokau Tamana ese hanaihanai oi do ia hagoadaia bona oi do ia durua dina ta ta ai Iena kara maoromaoro taravatudia oi badinaia totona.​—Isa. 40:29-31.

18. Dahaka dainai ma haida ita hahemaoro henia lasi?

¹⁸ Dala Ihatoina: Iehova sibona ese hahemaoro ia karaia. Ita gaukara goada Iehova ena kara maoromaoro taravatudia ita badinaia totona, to namo lasi ita karaia gaudia be ma haida ida ita hahegeregerea bona ita laloa ma haida ita hereaia. Ita be maoro lasi ma haida ese Iehova ena kara maoromaoro taravatudia idia badinaia eiava lasi karana dekenai abia hidi ita karaia totona. Namona be ita laloatao Iehova be “Tanobada ibounai edia Hahemaoro Tauna.” (Gen. 18:25) Iehova ese hahemaoro gaukarana be ita dekenai ia henia lasi. Momokani, Iesu ia gwau: “Ma haida hahemaoro henia karana umui hadokoa, vadaeni Dirava ese umui do ia hahemaoro henia lasi.”​—Mat. 7:1.b   

19. Edena dala ai Iosepa ia hahedinaraia Iehova ena hahemaoro karana ia abidadama henia?

¹⁹ Kara maoromaoro tauna Iosepa ena haheitalai mani ita laloa lou. Ena be haida ese idia kara dika henia, to idia ia hahemaoro henia lasi. Iosepa be ena tadikaka korikoridia ese idia hahisia, igui hesiai tauna bamona idia hoihoilaia, bona edia tamana idia hamaoroa Iosepa ia mase vadaeni. Lagani momo murinai, Iosepa be ena famili ida idia hedavari lou. Ia be lohia tauna goadana ta dainai, ena tadikaka ia hahemaoro auka henia bona edia dika davana ia haloua diba. Iosepa ena tadikaka idia gari badina idia laloa ia be unai bamona do ia karaia, ena be edia kara amo idia helalo-kerehai momokani. To Iosepa ese idia ia hamaoroa: “Umui gari lasi. Lau be Dirava, a?” (Gen. 37:18-20, 27, 28, 31-35; 50:15-21) Iosepa ia laloparara Iehova sibona ese ena tadikaka do ia hahemaoro henia.

20-21. Edena bamona kara ita dadaraia be namo?

²⁰ Iosepa bamona, ita diba Iehova sibona ese hahemaoro do ia karaia. Hegeregere, namo lasi ita laloa iseda tadikaka eiava taihu ese kara ta ia karaia ena badina ita diba. Badina ita be ta ena kudouna ita itaia lasi, to “Iehova be iena kudouna ai idia noho gaudia ia tahua.” (Aon. 16:2) Ia be taunimanima ibounai ia lalokau henia, ena be edia mauri dalana bona hanua be idauidau. Bona Iehova ese ita ia hagoadaia “[iseda] lalokau [ita] habadaia” totona. (2 Kor. 6:13) Dala ita tahua iseda tadikaka bona taihu ita lalokau henia, to ita hahemaoro henia lasi.

²¹ Danu, unai ena anina be hereva momokani idia diba lasi taudia ita hahemaoro henia lasi be namo. (1 Tim. 2:3, 4) Emu varavara ta be oi abia dae gaudia ia abia dae lasi dainai, do oi hahemaoro henia bona oi gwau, “Unai tauna be hereva momokani do ia abia dae lasi,” a? Lasi, unai be kara maorona lasi bona sibona laloa bada karana. Iehova ese “taunimanima ibounai” dekenai dala ia kehoa noho idia helalo-kerehai totona. (Kara 17:30) Hanaihanai ita laloatao, bema ta ia laloa ia be kara maoromaoro ia badinaia dainai ma haida ia hereaia, ia be Iehova ese ia gwauraia kara maoromaoro lasi tauna.

22. Dahaka dainai iseda lalona ita hadaia kara maoromaoro ita ura henia totona?

²² Iehova ena kara maoromaoro taravatudia ita badinaia noho neganai, do ita moale bona iseda haheitalai namona ese ma haida do ia durua Dirava idia lalokau henia bada totona. “Kara maoromaoro totona [ita] hitolo bona ranu mase” noho be gau badana. (Mat. 5:6) Namona be ita diba, hanaihanai kara maoromaoro badinaia totona ita gaukara goada neganai, Iehova be unai ia moalelaia. Inai tanobada ai kara maoromaoro badinaia lasi karana be ia bada ia lao noho, to ita lalogoada be namo! Nega ibounai ita laloatao, “Iehova ese kara maoromaoro taudia ia lalokau henia.”​—Sal. 146:8.