Lagani Ta Ta Ena mai Anina Bada Dinana Totona Oi Hegaegae, A?

1. Dahaka dainai Memorial hebouna be mai anina bada? (Luka 22:​19, 20)

IEHOVA ena taunimanima dekenai Keriso ena mase idia laloatao dinana be mai anina bada. Iesu be ena murina idia raka taudia ia hamaoroa unai dina sibona do idia laloatao. (Luka 22:​19, 20 duahia.) Badina momo dainai ita ura Memorial dekenai ita lao. Mani unai badina haida ita herevalaia.

2. Dahaka badina haida dainai Memorial hebouna dekenai ita lao?

² Memorial hebouna ese ita ia durua Iesu ena mauri ia bouboulaia karana ena namo ita laloatao totona. Bona ita ia hagoadaia Iesu ena boubou karana ita laloa bada totona. (2 Kor. 5:​14, 15) Danu, unai be nega namona iseda tadikaka taihu ida “ta ta do ita hagoadaia.” (Roma 1:12) Lagani ta ta ai idia manoka pablisa taudia be unai hebou dekenai idia mai. Haida be unai Memorial hebouna ai, tadikaka taihu edia lalokau karana dainai idia ura Iehova dekenai idia giroa lou. Bona taunimanima momo be idia itaia bona kamonai gaudia dainai, Baibel idia stadilaia matamaia. Momokani, unai badina dainai, Memorial hebouna ita laloa bada!

3. Tanobada hegegemadai, edena dala ai Memorial hebouna ese tadikaka taihu ia hatamonaia? (Laulau itaia danu.)

³ Danu, tanobada hegegemadai Memorial hebouna ese tadikaka taihu ia hatamonaia. Iehova ena Witnes taudia be dina ia diho lalonai, unai hebou totona idia haboua matamaia. Ita ese mauri davana ia hahedinaraia namonamo tok ta ita kamonai. Bona ane rua amo Iehova ita hanamoa, paraoa bona wain ita siaia loaloa bona guriguri foa edia dokonai mai kudouna ibounai ida “amen” ita gwauraia. Dina tamona lalonai kongrigeisen ibounai be unai dala tamona idia badinaia. Iehova bona Iesu idia itaia ita ibounai be unai hebou dekenai ita lao neganai, mani idia abia moalena ita laloa.

4. Inai atikol ai dahaka do ita herevalaia?

⁴ Inai atikol ai, inai henanadai do ita herevalaia: Edena dala ai Memorial hebouna totona iseda kudouna do ita hegaegaelaia? Edena dala ai ma haida ita durua unai hebou amo namo idia abia totona? Bona edena dala ai idia manoka taudia ita durua diba? Unai henanadai edia haere ese ita do ia durua unai mai anina bada dinana totona ita hegaegae.

EDENA DALA AI MEMORIAL TOTONA ISEDA KUDOUNA DO ITA HEGAEGAELAIA?

5. (a) Dahaka dainai mauri davana ena namo ita laloa be namo? (Salamo 49:​7, 8) (b) Vidio ladana, Dahaka Dainai Iesu Ia Mase amo dahaka oi dibaia?

⁵ Memorial hebouna totona iseda kudouna ita hegaegaelaia dalana ta be, Iesu Keriso ena mauri ia bouboulaia karana ena namo ita laloa. Ita be mase bona kara dika amo sibona ita hamauria diba lasi. (Salamo 49:​7, 8 duahia; vidio ladana, Dahaka Dainai Iesu Ia Mase? Itaia.)a Unai dainai Iehova ese dala ia karaia Iesu ena mauri ia henia ita ia hamauria totona. (Roma 6:23) Iehova bona Iesu ese ita totona idia karaia gauna ita laloa dobu neganai, unai ese ita do ia durua mauri davana ita laloa bada totona. Idia ese mauri davana idia henia totona, idia haheaukalaia gaudia haida mani ita herevalaia. To mani inai ita itaia herevalaia guna, dahaka dainai Iesu ese mauri davana ia henia?

6. Dahaka dainai Iesu ese mauri davana ia henia?

⁶ Mauri davana ena anina be gau ta oi hoia lou totona ena davana oi henia. Iehova ese Adamu ia karaia neganai, ia be goevadae tauna. To, ia kara dika neganai, ia sibona bona ena natudia totona mauri hanaihanai ena hahenamo ia haboioa. Adamu ese ia haboioa gauna hoia lou totona, Iesu ese ena mauri goevadaena ia bouboulaia. Tanobada ai ia noho neganai, “kara dika ta ia karaia lasi, bona ena uduna amo hereva koikoi ia gwauraia lasi.” (1 Pet. 2:22) Iesu ia mase neganai, iena mauri goevadaena amo Adamu ese ia haboioa maurina ia hoia lou.—1 Kor. 15:45; 1 Tim. 2:6.

7. Iesu be tanobada ai dahaka hahetoho ma haida ia davaria?

⁷ Iesu be tanobada ai ia noho neganai, ena be hahetoho idauidau ia davaria, to iena guba Tamana ia badinaia. Ia maragi neganai, iena goevadae lasi tama sina ia kamonai henia, ena be ia be goevadae. (Luka 2:51) Ia be mero matamata neganai, haida idia ura iena tama sina do ia gwau-edeede henia eiava Iehova do ia badinaia lasi, to unai ia karaia lasi. Bona Iesu ia bada neganai, Satani ese ia tohoa do ia kara dika bona Iehova do ia badinaia lasi, to unai ia dadaraia. (Mat. 4:​1-11) Satani ia ura Iesu do ia kara dika, unai amo mauri davana do ia henia lasi.

8. Iesu be dahaka hahetoho ma haida ia haheaukalaia?

⁸ Iesu be tanobada ai ena haroro gaukara ia karaia lalonai, hahetoho ma haida ia haheaukalaia. Ena inai taudia be ia idia dagedage henia bona idia ura ia idia hamasea. (Luka 4:​28, 29; 13:31) Bona ia murinai idia raka taudia edia manoka gaudia ia haheaukalaia. (Mar. 9:​33, 34) Iesu be kota dekenai ia gini neganai, idia hahisia bona kirikirilaia. Bena hisihisi bada ia davaria bona kara dika tauna bamona idia hamasea. (Heb. 12:​1-3) Ena hahetoho ginigabena ai Iehova ese ia gimaia lasi, to ia sibona ese ia haheaukalaia.b—Mat. 27:46.

9. Iesu be ita totona ia karaia gaudia be edena bamona ita laloa? (1 Petero 1:8)

⁹ Momokani, Iesu be mauri davana ia henia totona, hisihisi bada ia abia. Iesu be mai ura bada ida ita totona ia karaia gaudia ita laloa neganai, ia ita lalokau henia bada.—1 Petero 1:8 duahia.

10. Mauri davana totona Iehova be dahaka ia karaia?

¹⁰ Iehova be mai ura bada ida dahaka ia karaia unai amo Iesu be mauri davana ia henia diba? Iehova bona ena natuna, Iesu, edia hetura karana be ia goada momokani. (Aon. 8:30) Unai dainai, Iehova ia itaia tanobada ai, Iesu idia hahisia bona dadaraia neganai, Iehova ia lalohisihisi bada.

11. Iesu ia mase neganai, Iehova ena hemami be edena bamona? Haheitalai gwauraia.

¹¹ Tama sina be mase amo edia natuna ta idia haboioa ena hisihisi idia diba. Ita be toreisi lou helarona ita abidadama henia, to unai ese iseda lalokau tauna ta ia mase neganai ita abia hisihisi ia kokia lasi. Unai haheitalai amo Iehova ena hemami ita lalopararalaia ia itaia ena Natuna lalokauna be ia hisihisi bona lagani 33 C.E.c ai idia hamasea neganai, ia lalohisihisi bada—Mat. 3:17.

12. Memorial negana ia kahirakahira lalonai, dahaka ita karaia be namo?

¹² Hari ela bona Memorial dinana ai, reana sibona emu stadi eiava ruma bese tomadihona ai, mauri davana umui stadilaia diba? Unai oi karaia totona, Research Guide for Jehovah’s Witnesses eiava iseda pablikeisen ma haida amo tahua gaukara oi karaia.d Danu, Iseda Haroro Bona Mauri Dalana—Hebou Pepana ai, Memorial Baibel duahiduahi ena sediual oi badinaia diba. Bona laloatao, Memorial dinana ai, Daba Tomadiho ena spesel program oi itaia be namo. Memorial totona iseda kudouna ita hegaegaelaia neganai, ma haida ita durua diba namo idia abia totona.—Esr. 7:10.

EDENA DALA AI MA HAIDA ITA DURUA NAMO IDIA ABIA TOTONA?

13. Ma haida ita durua totona, dala ginigunana be dahaka?

¹³ Edena dala ai ma haida ita durua Memorial amo namo idia abia totona? Dala ginigunana be, idia ita invait. Danu, haroro gaukara ai ita davaria taudia sibona lasi, to lista ta dekenai ita diba taudia edia ladana ita torea bona idia ita boiria. Hegeregere, iseda varavara, gaukara turadia, sikuli turadia, bona ma haida. Bema iseda invateisen pepadia be momo lasi, iseda fon amo invateisen ena link ita siaia diba. Ita diba lasi taunimanima hida do idia mai!—Had. 11:6.

14. Invateisen siaia eiava henia karana ena namo oi herevalaia.

¹⁴ Invateisen siaia eiava henia karana oi laloa maragi lasi. Nega ta, taihu ta ia hoa badina ena Witnes lasi adavana ese ia hamaoroa Memorial totona, ia ida do ia lao. Taihu be dahaka dainai ia hoa? Badina guna hebou totona, nega momo ena tau ia invait to ia lao diba lasi. Hari dahaka dainai unai be ia idau? Ena tau ia gwau: “Ena turana ta ese invateisen pepa ta ia henia,” ia be taihu ena kongrigeisen ena elda ta. Taihu ena adavana be unai lagani bona murinai laganidia ena Memorial hebouna totona ia lao.

15. Memorial totona ta ita invait neganai, dahaka ita laloatao be namo?

¹⁵ Laloatao ita invait taudia be mai edia henanadai momo, bema guna iseda hebou ta dekenai idia mai lasi. Unai dainai do idia henia henanadai ita laloa bona ita hegaegae idia ita haere henia totona. (Kol. 4:6) Hegeregere, reana haida do idia laloa: ‘Memorial hebouna ai dahaka do ia vara?’ ‘Dahaka taim do ia ore?’ ‘Edena bamona dabua do lau hahedokilaia?’ ‘Unai hebou lau lao totona davana do lau henia, a?’ ‘Hebou ai moni idia gogoa, a?’ Memorial totona ta ita invait neganai, reana ia ita nanadaia, “Oi be mai emu henanadai haida, a?” bena ia henia henanadai ita haerelaia diba. Danu ta ita durua iseda hebou ita karaia dalana ia lalopararalaia totona, inai vidio rua, Iesu Ena Mase Laloatao bona Kingdom Hall ai Dahaka Idia Karaia? ita gaukaralaia diba. Bona Mauri Moalelaia Hanaihanai! bukana ena leseni 28 ai, point namodia ita gaukaralaia diba.

16. Memorial hebouna ai idia mai taudia be dahaka henanadai ma haida do idia henia?

¹⁶ Kamonai taudia be Memorial ai idia mai murinai, reana henanadai ma haida do idia henia. Dahaka dainai haida sibona be paraoa idia ania bona wain idia inua? Do idia laloa Memorial hebouna be nega hida ita karaia? Bona reana do idia ura diba, bema Iehova ena Witnes taudia edia hebou ibounai be unai bamona idia karaia. Ena be Memorial ena tok ai unai point momo idia herevalaia, to nega ginigunana ia mai tauna be reana do ia ura, diba ma haida ia abia. Iseda websait jw.org ai, atikol ladana, “Dahaka Dainai Iehova ena Witnes Taudia ese Lohiabada ena Anibou idia Karaia Dalana be Dubu ma Haida amo ia Idau?” Inai oi gaukaralaia diba edia henanadai haida oi haerelaia totona. Ita ura gaukara goada, Memorial do lasi neganai, lalonai, bona murinai, “kudou maoro taudia” ita durua Memorial hebouna amo namo idia abia totona.—Kara 13:48.

IDIA MANOKA TAUDIA ITA DURUA

17. Edena dala ai elda taudia ese manoka taudia idia durua diba? (Esekiela 34:​12, 16)

¹⁷ Memorial ena wiki lalonai, edena dala ai elda taudia ese manoka taudia idia durua diba? Namona be umui hahedinaraia idia umui laloa bada. (Esekiela 34:​12, 16 duahia.) Memorial do lasi neganai, idia momo umui rini henia. Bona idia umui hamaoroa umui lalokau henidia bona umui ura idia umui durua. Danu, idia umui invait Memorial hebouna ai idia mai totona. Bema idia mai, idia umui welkam henia. Memorial murinai, unai tadikaka bona taihu umui vadivadi eiava rini henia, bona umui durudia Iehova dekenai idia giroa lou totona.—1 Pet. 2:25.

18. Edena dala ai ita ibounai ese manoka taudia ita durua diba? (Roma 12:10)

¹⁸ Kongrigeisen ai ibounai ese Memorial dekenai idia mai manoka taudia idia durua diba. Edena dala ai? Mai lalokau ida idia umui kara namo henia bona matauraia. (Roma 12:10 duahia.) Laloatao, unai tadikaka eiava taihu be ia hekwarahi hebou ta dekenai ia mai totona. Reana idia gari badina idia laloa tadikaka taihu ese idia do idia abia dae lasi.e Unai dainai idia do ia hahemaraia henanadai eiava hahisia herevana ta oi gwauraia lasi. (1 Tes. 5:11) Unai manoka taudia be iseda tadikaka bona taihu. Bona ita moale idia ida Iehova ita tomadiho henia lou!—Sal. 119:176; Kara 20:35.

19. Iesu ena mase ita laloatao ena namo be dahaka?

¹⁹ Ita moale badina Iesu ese ita ia hamaoroa lagani ta ta ai, iena mase ita laloatao bona ita laloparara dahaka dainai unai be mai anina bada. Unai bamona ita karaia neganai, ita bona ma haida be dala idauidau ai namo ita davaria. (Isa. 48:​17, 18) Iehova bona Iesu dekenai iseda lalokau ia goada. Bona ita hahedinaraia ita totona idia karaia gaudia ita laloa bada. Danu, tadikaka taihu ida iseda hetura karana ia goada. Bona ma haida ita durua diba mauri davana ese ia havaraia hahenamo idauidau idia moalelaia totona. Namona be ita gaukara goada inai lagani ena mai anina bada dinana totona ita hegaegae, unai be Memorial hebouna!