Medu Lasi Negana—Baibel be Dahaka Ia Gwau?

• “China be edia ripoti ai idia hahedinaraia inai lagani ai siahu bada herea ‘nega aukana’ ia vara, bona histori ai unai be medu lasi negana ihatoina.”​—The Guardian, September 7, 2022.

• “Lagani 5 lalonai, Africa tanona ena kahana haida ai medu lasi negana ia vara.”​—UN News, August 26, 2022.

• “Europe ena tano momo ai medu lasi negana do ia vara ena hadibaia hereva idia henia, bona unai be medu lasi nega aukana lagani 500 lalonai.”​—BBC News, August 23, 2022.

Diba bada taudia momo idia laloa unai bamona medu lasi negana be do ia vara noho bona do ia dika herea. Vaira nega totona gau ibounai do idia namo, a? Baibel be dahaka ia gwau?

Medu lasi negana bona Baibel ena peroveta hereva

Baibel ena peroveta hereva iseda nega totona:

• “Gabu idauidau ai hitolo bada . . . do idia vara.”​—Luka 21:11.

Medu lasi negana dainai hitolo bada idia vara. Unai bamona hitolo bada negadia, bona idia havaraia hisihisi bona mase ese Baibel ena peroveta herevana idia hagugurua.​—Apokalupo 6:6, 8.

Medu lasi negadia idia vara ena badina

Baibel ese medu lasi negadia ena badina ia herevalaia. Ia gwau:

• “Tau ta be ia hegeregere lasi sibona ia hakaua totona.”​—Ieremia 10:23.

Unai ena anina be taunimanima be hegeregere lasi ‘sibona idia hakaua,’ eiava sibona idia lohiaia totona. Edia abia hidi kereredia dainai medu lasi negadia bona ranu ia ore karana ia havaraia.

• Saiens taudia momo idia gwau, taunimanima idia karaia gaudia ese global warming ia havaraia, unai dainai tanobada hegegemadai medu lasi negana ia vara.

• Mataganigani bona anina lasi taravatudia dainai uda momo idia utudia, hodahoda, tano, bona ranu idia hadikaia, bona tano amo idia abia dava bada gaudia (natural resources) idia gaukaralaia kerere, unai dainai ranu namodia abia gabudia idia hadikaia.

To, Baibel ese helaro ia henia.

Vaira nega totona helaro ia noho, a?

Baibel ia gwauhamata, Dirava ese ranu ena hekwakwanai ibounai do ia haorea. Edena dala ai?

1. 1. Dirava ese “tanobada idia hadikaia taudia do [ia] hadikaia ore.” (Apokalupo 11:18) Ranu ena hekwakwanai idia havaraia taudia, tanobada idia hadikaia kara dika mataganigani taudia, be Dirava ese do ia hadikaia ore.​—2 Timoteo 3:1, 2.

2. 2. “Tano kakoro be ranu gabuna ai do ia lao.” (Isaia 35:1, 6, 7) Medu lasi negana ese ia havaraia dika idauidau be, Dirava ese do ia hanamoa lou. Bona inai tanobada be mai ena ranu namona gabuna ai do ia halaoa.

3. 3. “Oi ese tanobada oi naria namonamo, huahua momo oi havaraia bona tano oi hanamoa.” (Salamo 65:9) Dirava ena hahenamo dainai tanobada be aniani namodia bona ranu goevadia amo do ia honu.