Tanobada Ia Lohiaia Diba Gavamani Namona ta Ia Noho, A?​—Baibel be Dahaka Ia Gwau?

Tanobada ena gavamani ibounai be daradara lalonai idia noho. Tano haida ai gavamani goadadia idia noho, to kara koikoi idia vara, lalotamona be lasi, taunimanima ese idia trast henia lasi bona protest karadia idia vara.

To Baibel ese gavamani namona ta ia herevalaia. Reana oi ese unai gavamani ena sivarai oi kamonai vadaeni. Iesu Keriso be unai gavamani totona ia guriguri.

• “Vadaeni inai bamona do umui guriguri: ‘Aiemai Tamana guba dekenai oi noho, namona be ibounai ese emu ladana idia hahelagaia. Oiemu Basileia ia mai be namo. Emu ura gauna tanobada dekenai ia vara be namo, guba dekenai ia vara bamona.’”​—Mataio 6:9, 10.

Baibel ese edena dala ai unai Basileia ia herevalaia?

Basileia—ia be gavamani namona

Inai Basileia be guba dekena amo ia lohia noho

• Iesu ese unai gavamani ia gwauraia “guba Basileia.” (Mataio 4:17; 5:3, 10, 19, 20) Unai badina dainai ia gwau: “Lauegu Basileia be inai tanobada ena lasi.”​—Ioane 18:36.

Unai Basileia ese taunimanima edia gavamani ena gabu do ia abia.

• Baibel ia gwau: “Unai basileia ese [taunimanima edia] basileia ibounai do ia hamakohia bona haorea momokani, bona ia sibona do ia gini ela bona hanaihanai.”​—Daniela 2:44.

Unai Basileia bona ena King Iesu Keriso be do idia hadikaia lasi.

• Baibel ia gwau: “Iena lohia siahuna be do ia noho hanaihanai, do ia doko lasi, bona ena basileia be do idia hadikaia lasi.”​—Daniela 7:13, 14.

Unai Basileia ese tanobada ai maino bona noho namona do ia havaraia.

• Baibel ia gwau: “Taunimanima ta ta ibounai, be maino dekenai do idia noho. Ta ta ese sibona edia vain uma bona fig audia, be do idia naria noho, bona tau ta ese idia do ia hagaria lasi.”​—Mika 4:4, Buka Helaga.

Basileia ena diba ma haida abia

Iesu be tanobada dekenai ia noho neganai, ena nega bada ia gaukaralaia “Basileia ena sivarai namona ia harorolaia” totona. (Mataio 9:35) Danu Iesu ia gwau:

• “Basileia ena sivarai namona be tanobada ibounai dekenai do idia harorolaia, bese ibounai idia kamonai totona, unai murinai dokona do ia ginidae.”​—Mataio 24:14.

Hari inai negai, Basileia ena sivarai namona be tano 240 mai kahana ai idia harorolaia noho. Oi ai invait inai gavamani bona ena lohia karana amo namo do oi abia dalana oi dibaia totona.

Mani inai vidio oi itaia Dirava Ena Basileia be Dahaka?