Pawel Gluza/500Px Plus/Getty Images
UMUI GIMA NOHO!
Lagani 50 Lalonai Animal Idauidau 73% Idia Ore Vadaeni—Baibel be Dahaka Ia Gwau?
October 9, 2024 ai, World Wildlife Fund ese ripoti ta ia halasia. Unai ripoti ese ia hahedinaraia taunimanima idia karaia gaudia be animal idauidau dekenai dika ia havaraia noho. Ripoti ia gwau “idia hanaia lagani 50 lalonai (1970-2020), animal idauidau edia namba ia diho 73%.” Bona ripoti ia gwau: “Gabeai laganidia 5 lalonai do ita itaia Tanobada ena mauri gaudia dekenai dahaka do idia vara.”
Oibe, unai bamona ripoti dainai taunimanima idia lalohisihisi. Iseda tanobada hairaina ita lalokau henia bona ita ura lasi animal idauidau hadikaia karana ita itaia. Unai bamona ita mamia, badina Dirava ese ita ia karaia animal idauidau ita naria totona.—Genese 1:27, 28; Aonega Herevadia 12:10.
Unai dainai reana do oi laloa, ‘Ita ese tanobada ena animal idauidau ita gimaia diba, a? Baibel be dahaka ia gwau?’
Vaira nega ena helaro
Herevana ita gaukara goada heduru ita henia totona, to tanobada ena animal idauidau edia mauri be Dirava ese ia naria namonamo diba. Baibel ena peroveta hereva Apokalupo 11:18 ai ia gwau, Dirava ese ‘tanobada idia hadikaia taudia do ia hadikaia ore.’ Unai Baibel siri ese ita dekenai gau rua ia hadibaia:
1. Dirava ese taunimanima do ia koua tanobada idia hadikaia lasi totona.
2. Kahirakahira Dirava ese kara ta do ia karaia. Edena dala ai unai ita diba? Badina hari animal edia mauri be taunimanima ese idia hadikaia noho, guna bamona lasi.
Unai dika koua totona, Dirava be dahaka do ia karaia? Iena guba gavamani eiava Basileia, do ia gaukaralaia tanobada ibounai ia lohiaia totona. (Mataio 6:10) Unai gavamani ese Dirava idia badinaia taudia dekenai edukeisen bona treinini do ia henia, tanobada ena animal idauidau naria bona gimaia totona.—Isaia 11:9.