Basileia Haroro Ripoti
Abidadama Dainai Idia Mase Taudia ese Sweden Dekenai Idia Hahedinaraia Gauna
GREEK gado ai, inai hereva “witnes” be martyr, unai amo English herevana ta idia abia, ena anina be “ena mase amo gau ta ia hahedinaraia tauna.” Keristani taudia ginigunadia momo be edia abidadama dainai idia mase karana amo Iehova idia gwauraia hedinarai.
Unai hegeregerena, Hitler ena lohia siahuna henunai, Witnes taudia tausen momo be politikol bona bese abia isi karadia amo idia gini siri dainai, Hitler idia durua taudia edia imana ai idia mase. Unai edia abidadama dainai idia mase taudia danu ese witnes idia henia. Inai be vanegai sibona Sweden dekenai ia vara gauna.
Tanobada Tuarina Iharuana ia ore bena lagani 50 idia lao murinai unai idia laloatao neganai, Sweden ena gavamani ese tano ibounai dekenai Holocaust hadibaia gaukarana ta idia hamatamaia. Unai gaukara idia gwauraia Ia Mauri Noho Histori Sivaraina. Iehova ena Witnes taudia idia boiria unai lalonai idia vareai bona edia ekspiriens idia gwauraia totona.
Unai dainai Witnes taudia ese taunimanima dekenai idia hahedinaraia totona laulau haida idia hegaegaelaia, ladana Holocaust Dekenai Idia Mase Bona Idia Lalodiaboio Taudia. Iehova ena Witnes taudia edia Assembly Hall, Strängnäs dekenai, idia hahedinaraia guna. Holocaust amo idia roho mauri taudia idia lao bona edia ekspiriens be dina ginigunana dekenai idia mai vadivadi taudia 8,400 dekenai idia gwauraia! Lagani 1999 ena dokonai, Sweden ena miusiam bona pablik laiberi 100 ia hanaia dekenai idia hahedinaraia, bona taunimanima 150,000 bamona ese idia itaia vadaeni. Idia vadivadi taudia haida be gavamani taudia, bona idia itaia gaudia dainai hanamoa herevadia idia gwauraia.
Sweden ai Iehova ena Witnes taudia edia gaukara ma ta be unai bamona idia herevalaia badabada bona idia gwauraia namo lasi. Vadivadi taudia momo idia henanadai: “Dahaka dainai guna Holocaust lalonai umui dekenai idia vara gaudia edia sivarai umui gwauraia lasi?”
Kongregesen ta ena gabu dekenai unai laulau idia hahedinaraia murinai, idia gwau Baibel stadi edia namba be 30 pesen amo ia bada daekau! Witnes tauna ta ese ena gaukara turana ta ia boiria idia hahedinaraia gaudia ia itaia totona. Ena gaukara turana ese unai boiria herevana ia abia dae bona turana ta ia abia mai danu. Unai murinai, unai turana ia gwau ia lalo-parara be auka edena bamona haida edia abidadama ena goada ia hegeregere do idia mase bona edia abidadama idia dadaraia pepana ta idia sainia lasi. Unai dainai idia herevahereva lou, bona unai hahine ida stadi idia hamatamaia.
Aposetolo taudia edia negai idia noho Keristani taudia hegeregerena, lagani 1900 murina laganidia lalonai edia abidadama dainai idia mase taudia ese idia hahedinaraia, Iehova sibona be Dirava momokanina, bona ia sibona ita abidadama henia bona badinaia be maoro.—Apokalupo 4:11.
[Picture Credit Line on page 13]
Camp prisoner: Państwowe Muzeum Oświęcim-Brzezinka, courtesy of the USHMM Photo Archives