‘‘Iehova Ena Witness Taudia USSR amo—Gabeai, Nega Namona Do Idia Davaria’’

ENGLISH gado niuspepa The Warsaw Voice, August 19, 1990 gauna, lalonai unai hereva kwarana ia noho. Unai niuspepa be Poland dekenai idia karaia. Unai hereva ia torea hahinena, Anna Dubrawska, ese August 1990 ai Warsaw lalonai idia karaia “Gado Goevadaena” Hebouhebouna ia herevalaia. Soviet Union amo idia mai Witness taudia ia henanadai henidia, idia haida be edia tomadiho dainai lagani 15 lalonai dibura rumadia bona dibura kamepadia dekenai idia noho. To hari idia ese edia tano lalonai idia vara kara namodia idia gwauraia hedinarai.

Grigor Goryachek be ruma haginia gaukara tauna ta bona Crimea amo ia mai. Ia maragi neganai, Witness tomadihona dekenai idia hadibaia. Siberia dekenai idia siaia bona lagani 15 lalonai unuseniai ia noho. Ia gwau: “Ai laloa nega namodia do idia mai.” Ma Witness tauna ta, Anton Pohanich, ia gwau: “Nega namodia idia ginidae vadaeni. Hari ai harorolaia gaudia be ruma ta ruma ta dekenai ai gwauraia, gari lasi, to guna unai bamona ai karaia diba lasi.”

Caucasus amo ia mai Witness tauna ta, Igor Cherny, ena mauri lagani be 17. Dubrawska ese ena hereva ia gwauraia lou, ia gwau: “Lagani 70 lalonai taunimanima idia veria​—⁠bona matamata taudia idia veria goadagoada​—⁠Dirava idia negea totona. Unai dainai hari idia ura dikadika Ia dekenai do idia giroa mai, eiava idia ura Iena sivarai do idia kamonaia.”

Polish magasin Dziennik Wieczorny (Adorahi Niuspepa) lalonai, hereva kwarana Radość braci (Tadikaka Edia Moale) henunai, ia gwau Zawisza steidiam Bydgoszcz hanuana dekenai ia gaukara tauna ta ia gwau: “Lau moale badina edia hereva ia miro lasi bona memero kekeni edia kara taunimanima dekenai idia namo.”

Poland niuspepa Trybuna lalonai, hereva kwarana Głosiciele Królestwa (Basileia Harorolaia Taudia) henunai, Zofia Uszynska ese hebouhebou ena sivarai ia torea, ia gwau: “Miniti 30 lalonai nega 10 aniani bona kofi lau dekenai idia henia toho. Nega 5 tau ta ese iena helai gauna lau ia henia gwauraia do lau helai totona. Dina 4 lalonai taunimanima 30,000 bona ma haida Dziesieciolecia Steidiam Warsaw dekenai be [tomadiho] aria lalonai idia vareai. Idia haida be hahine, do idia mara negana ia kahirakahira; haida be ruma bese taudia mai edia natu maragidia; ma haida be taunimanima badadia bona memero kekeni. Idia bapatiso taudia amo, ta ena mauri lagani be 11 bona ta ena mauri lagani be kahirakahira 80.”

Unai hereva be ma ia gwau: “Russia taudia tausen tausen [momokani, idia be 16,000 bona ma haida] be hari lagani idia mai unai hebouhebou dekenai. Lagani gunanai Russia taudia 6,000 idia mai. Russia tanona ena hetoana idia naria taudia ese edia PMV idia koua lasi, unai dainai kilomita momo laini latana lalonai idia naria lasi. Soviet Union ena gabu iboudiai amo idia mai: Vladivostok amo, Khabarovsk amo, Vorkuta amo. Idia haida be idia mai totona dina 4 o 5 lalonai train dekenai idia noho.”

Unai niuspepa lalonai Ivan M. Grevniak ena hereva ia gwauraia lou, ia gwau: “Lau itaia pope bona pris taudia idia kara maoromaoro lasi, bona kara maoromaoro lau tahua.” Niuspepa be ma ia gwau: “Ia itaia Iehova ena Witness taudia edia kara be edia hereva hegeregerena, idia idau lasi.” Bena Ivan be ma ia gwau: “Dirava lau tanikiu henia badina lau dekenai dala ia kehoa hereva momokani lau diba totona.”

Trybuna niuspepa ia gwau Ivan be elda tauna ta Lvov ena kongregesen ta dekenai. Lvov dekenai “kongregesen 13 idia noho bona Witness taudia iboudiai be 2,000 bona ma haida. . . . Grevniak ia gwau: ‘Gabu iboudiai dekenai tomadiho oreadia lalonai taunimanima ese sibona edia bese idia abia isi. To, egu tomadiho taudia lalonai unai bamona karana ta be lasi.’ ”

Iehova ena Witness taudia edia Warsaw hebouhebou dekenai ese unai lalo-tamona ia hahedinaraia. Hebouhebou ena hereva iboudiai be Poland bona Russia gadodia ai idia henia bona steidiam ena kahana idaudia dekenai idia siaia. Bese idauidau taudia idia badu heheni lasi.

Witness taudia ese dala idia hegaegaelaia namonamo, ruma, aniani, bona gorere taudia naria karadia be unai hebouhebou taudia 35,000 bona ma haida dekenai idia henidia totona. Zofia Uszynska ese edia kara ia itaia dainai edia gaukara dalana ia matauraia. Ena hereva dokona be inai: “Edia hebouhebou ia namo bona idia tura heheni namonamo. Gunanai, unai bamona hebouhebou dekenai nega ta lau mai lasi.”

Vadivadi taudia momo do idia abia dae totona, steidiam idia hegaegaelaia. Polish niuspepa Sztandar Młodych (Memero Kekeni Edia Pepe) ese edia gaukara steidiam dekenai inai bamona ia gwauraia: “Hanua taudia durudia totona . . . Iehova ena orea taudia ese helai gaudia idia karaia lou, henunai daladia bona toileti idia hamaoromaorodia, bona rei gabuna idia hagoevaia. Unai hebouhebou ena davana be sibona edia moni amo idia karaia. Iehova ena Witness taudia ese daiutu 22,000 taunimanima edia ruma ai idia hegaegaelaia vadivadi taudia edia, sibona edia rumai Soviet hanua taudia idia abia dae unuseniai idia mahuta totona, bona dala idia hegaegaelaia gorere taudia idia durua totona.”

Momokani, hari, Iehova ena Witness taudia East Europe dekenai ese “nega namona” idia davaria vadaeni, bona idia guriguri Romania, Hungary bona Poland dekenai idia davaria vadaeni gauna, be kahirakahira Czechoslovakia, Albania, Bulgaria bona Soviet Union dekenai danu do ia vara, gavamani ese edia tomadiho do ia abia dae unai.​—⁠2 Tesalonika 3:1; 1 Timoteo 2:​1, 2.a

[Footnotes]

[Pictures on page 31]

Soviet Witness taudia Warsaw “Gado Goevadaena” Hebouhebouna dekenai, bona bapatiso idia abia gwauraia taudia (ataiai bona laulau maragina dekenai), Russia haroro tauna, Russia gado program, bona Soviet taudia edia PMV vairadia ai