Udu Mauri Ena Siahu
ENGLAND ena hanua maragina ta dekenai, hahine matamata ta ese sibona ia hamasea. Doketa taudia ese tahua gaukara idia karaia neganai, inai idia davaria: ‘ Sibona ia hamasea badina udu mauri dainai.’ Unai hahine matamata ena ladana, ena kara bona ena mauri be unai hanua ena taunimanima ese idia hadikaia udu mauri amo.—Rumor and Gossip—The Social Psychology of Hearsay, Ralph L. Rosnow bona Gary Alan Fine idia torea bukana.
Ena be nega momo udu mauri be unai bamona hisihisi bada herea ia havaraia lasi, to udu mauri be mai ena siahu bada. Haida idia laloa ia be mai ena namo sisina badina aonega matamata bona hereva matamatadia oi abia diba. To nega momo ia be dika bada herea ia havaraia diba, hegeregere, gavamani lalonai, bona ruma bese ena mauri lalonai, bona oiemu gaukara gabuna dekenai taunimanima edia dagi ia hadikaia.
Udu mauri ese haida edia mahuta ia hadikaia, edia lalona ia hisihisi bona idia aniani namonamo lasi. Momokani, nega haida be unai bamona ia vara oi dekenai. Niuspepa torea tauna ta ladana William M. Jones ia gwau: “Namona be bisinesi idia haheaua taudia idia naria namonamo badina haida ese edia kara bona ladana idia hadikaia diba.”
Tanobada ena bese idauidau be udu mauri dikana idia ura henia lasi. America edia India taudia be idia gwau udu mauri be hegeregere koikoi bona henaohenao bamona. West Africa ena hanua ta lalonai, bema ta be ia udu mauri neganai ena bibina idia utua oho bona nega haida idia hamasedia. Gunaguna ema bona harihari, gau idauidau idia karaia udu mauri karana koua totona.
Lagani 1400 bona 1800 padadiai, England, Germany, bona America lalonai, udu mauri taudia idia panisidia. Idia be helai gauna latanai idia hahelaidia bona ranu lalonai idia atodia vareai loulou. Unai kara idia karaia udu mauri taudia idia hahemaraidia totona bona edia udu mauri kara idia hadokoa totona.
Hari inai negai, unai kara idia hadokoa vadaeni, to ma kara haida idia do karaia noho udu mauri taudia dekenai. Lagani 1960 ia lao 1969 bamona lalonai, America ena gavamani ese opesi haida idia haginidia. Unai opesi ese gavamani idia udu mauri henia taudia idia hereva henidia bona edia hekwakwanai idia hamaoromaorodia totona. Unai bamona opesi be England bona Northern Ireland dekenai danu. Tano haida dekenai taravatu idia karaia udu mauri koua totona, badina gavamani ena gaukara idia hadikaia garina.
Idau nega amo ema bona harihari tanobada ena gavamani be taravatu idauidau idia atoa udu mauri koua totona, to taunimanima edia taravatu eiava edia kara be udu mauri ia koua diba lasi. Udu mauri be mai ena siahu bona gabu ibounai dekenai ia noho. Hegeregere, oiemu dekena taudia idia udu mauri, gaukara gabunai idia udu mauri, sitoa dekenai idia udu mauri, pati idia karaia neganai idia udu mauri, bona oiemu ruma bese lalonai idia udu mauri. Ena be oi be kopi kurokuro o kopi korema eiava oiemu gado be idau, eiava oi taga o oi ogogami, to udu mauri be ia noho. Aonega bada tauna ta ia gwau: “Udu mauri be hahodi bamona.” Bona danu ia gwau: ‘Ia be taunimanima iboudiai edia kara badana ta.’
Momokani, udu mauri ese gau dikadia ia havaraia diba, hegeregere, ta ena kara namo ia gwauraia dika, hereva momokani ia hakoikoia, bona taunimanima edia mauri ia hadikaia. To, udu mauri edia hereva haida be idia dika lasi, nega haida taunimanima ese gau ta eiava tau ta idia kikilaia namo sibona idia havaraia. Unai dainai bema taunimanima haida danu oi herevahereva neganai, sibona emu uduna oi naria namonamo, hereva kererena ta oi gwauraia bona haida oi hadikadia garina—eiava sibona emu mauri oi hadikaia.
[Picture on page 4]
Gavamani haida ese udu mauri taudia idia atoa helai gauna ta dekenai bona ranu lalonai idia atodia vareai loulou
[Credit Line]
Historical Pictures Service