Udu Mauri—Dahaka Dainai Idia Ura Karaia?

UDU MAURI be tanobada hegegemadai lalonai ia noho. China taudia edia gado dekenai ia be shén-tán; Finland taudia edia gado dekenai ia be juoru; Italy edia gado dekenai ia be pettegolézzo; bona Spain taudia edia gado dekenai ia be chisme. Gado haida dekenai udu mauri be hereva namona lasi, to English gado dekenai “udu mauri” ena anina korikori be “anina bada lasi gaudia herevalaia.”

Nega momo English gado dekenai udu mauri idia hahanaia neganai, idia gwau “udu mauri hereva dikana” eiava “udu mauri hahisihisi herevana.” Unai hereva idia gwauraia badina nega momo bema anina bada lasi gaudia oi herevalaia neganai, hahisi herevadia danu oi gwauraia diba bona unai ese ta ena kara namo ia hadikaia. Danu oi ese ta ena hereva oi gwauraia koikoi diba. Unai dainai Hereva Lada-isidia ia gwau: “Udu mauri ese badu ia havaraia, mirigini ena lai ese medu ia havaraia bamona.”​—⁠Hereva Lada-isidia 25:​23.

Ita diba udu mauri be hisihisi ia havaraia, to dahaka dainai nega momo taunimanima momo idia ura udu mauri herevadia idia kamonai henia? Edena bamona ita diba unai hereva be udu mauri hereva dikana eiava ia be hereva dikana lasi?

Udu Mauri​—⁠Sivarai Halasia bona Abia Dae

Taunimanima idia udu mauri be mai ena anina: Idia ura ma haida danu idia tura heheni. Danu ita ura taunimanima haida ita sivarailaidia. Saiens tauna Max Gluckman ia gwau: “Dina ta ta iboudiai ita taunimanima momo be nega bada ita halusia haida ita sivarailaidia totona. Bema iseda nega ita hagaua neganai, vadaeni do ita davaria udu mauri be anina bada gauna iseda mauri lalonai​—⁠reana gaukara kikilaia sibona murinai.”

Bema ta oi vadivadi henia bona umui herevahereva neganai, nega momo umui be hahegoada hereva umui herevalaia. Danu umui ura diba dahaka gaudia idia vara noho o idia vara vadaeni, hegeregere daika ia headava o daika ia mase bona daika be ia rogorogo. Nega haida hevaseha herevadia umui gwauraia bona umui kikilaia diba to ta umui hadikaia lasi.

To, nega momo anina lasi herevadia ese namo lasi lalohadai haida idia havaraia. Hegeregere, hereva momokani idia hagagevaia o idia hakoikoia. Bona taunimanima hevasehalaia gauna ese tau ta ia hahemaraia. Hetura karadia bona kara namodia ia hadikaia diba. Ta ena dika tahua karana bona maumau ese heabidae herevadia ia hadikaia diba. Ena be ta ia ura lasi ma ta ia hadikaia, to unai bamona karadia ese idia gwauraia tauna idia hahisia. Unai dainai udu mauri be hegeregere kopukopu oi tahoa bona haba goeva dekenai ia kamokau bamona. Ena be oi huria to kopukopu ena maka be do ia noho.

Taunimanima Hamoalea Totona

Ma badina ta udu mauri lalonai ita vareai be ita ura ma taunimanima haida ese ita idia ura henia. Saiens taudia rua John Sabini bona Maury Silver, idia gwau: “Taunimanima be mai edia maduna idia hereva totona, unai amo udu mauri be ia auka lasi bona taunimanima ese unai kiki dalana idia abia dae.” (Moralities of Everyday Life) Unai dainai, ita itaia udu mauri be hereva ena hatubua gauna ta, bona unai amo emu kiki ese taunimanima ia hamoaledia, bona idia ura kamonai.

Nega momo taunimanima idia ura haida edia dika idia kamonai henia to ena namo sivarai idia ura lasi kamonai henia. Haida be idia moale bona idia hoa dikadika bema haida edia dika idia kamonai neganai. Unai amo udu mauri ese taunimanima edia lalona ia ania​—⁠bona unai sivarai dikana kamonai henia idia ura bada. To momo idia laloa momo lasi bema unai sivarai dikana be ia momokani eiava lasi.

Niuspepa Edia Udu Mauri Herevadia

Taunimanima be unai udu mauri idia ura henia badina idia ura sivarai idaudia momo idia kamonai henia. Ita ibounai be hehuni herevadia ita ura henia. Danu ita moale bema sivarai idauidau ita diba neganai. Lagani 1730 lalonai, tau ta ladana Benjamin Franklin ese sivarai haida ia torea niuspepa ladana ta Pennsylvania Gazette lalonai, bona ia hedinarai taunimanima ese moni idia halusia diba udu mauri ena sivarai idaudia idia kamonai o duahia totona.

Niuspepa ena udu mauri sivaraidia be idia do noho​—⁠bona ia ore diba lasi. Europe ena tano idauidau lalonai, niuspepa bona magasin momo lalodiai idia ese King bona Queen idauidau edia ruma bese edia sivarai idauidau idia toredia. Unai sibona lasi, to laulau bona sivarai idia karaia lada bada eiava mai edia taga taudia idauidau dainai. Niuspepa ta ia gwau, udu mauri sivaraidia ese bisinesi bada ia havaraia diba.

To, taunimanima edia hehuni karadia eiava edia ruma dekenai idia karaia gaudia ita diba be maoro, a? Unai sivarai idauidau ita duahia neganai iseda lalona ia veria miro karadia ita laloa totona, to unai ese namo ia havaraia, a? Lasi. Niuspepa bona magasin edia udu mauri sivaraidia ese gau namodia idia havaraia lasi.

“ ‘Grapevine’ amo Sivarai Lau Kamonai”

Anina lasi bona koikoi herevadia ese udu mauri ia havaraia diba. America taudia idia tuari heheni (American Civil War) negana lalonai, telefon ena du idia haginia tuari edia kampa idauidau dekenai bona varo idia kwatua unai du idauidau dekenai. Unai hereva “grapevine” o vine auna ese anina lasi sivaraidia ia laulaulaia. Taunimanima momo idia gwau “grapevine” amo sivarai haida idia kamonaidia, to unai anina lasi sivarai idia ura kamonai henia bona idia ura idia halasia danu.

To madi, nega momo vine auna ese huahua iditana ia havaraia. Udu mauri ese dika ia havaraia diba, hegeregere gari, mase, bona hahedika karadia. Unai bamona karadia ese bisinesi idia hamakohidia. Hegeregere, aniani gabuna ta ese moni bada ia halusia badina taunimanima haida idia gwau edia vamu be mai ena gaigai maragidia, bona unai dainai taunimanima be unai aniani gabu dekenai idia lao lasi. Bisinesi ta ese sopu ia hoihoilaia bona moni bada herea idia halusia. Badina be haida idia gwau edia bisinesi ena toana be Satana ena toana ta bamona bona unai bisinesi be Satana ena tomadiho lalonai ia noho.

Momokani, ita taunimanima ta ta ese lalohisihisi bada ita davaria bema haida ese ita idia sivarai dika henia neganai. Unai sivarai dika idia kamonai neganai idia hoa bona unai sivarai latanai ma hereva idaudia idia atoa kau. To, nega momo unai sivarai idaudia be koikoi bona hereva momokani idia laloa momo lasi, bona dahaka dika idia havaraia idia laloa lasi.

Udu Mauri​—⁠Ladana Hadikaia

Nega momo, mama bona badu be udu mauri bona ladana hadikaia karana edia badina badana. Greek gado dekenai di·aʹbo·los idia hahanaia be “ladana hadikaia.” Buka Helaga lalonai be Diabolo. (Apokalupo 12:9) Unai hereva Diabolo ese Satana ia hahegeregerea badina ia ese Dirava ena ladana ia hadikaia. Satana bamona, taunimanima ese ma haida idia sivarai dika henia neganai, edia ladana idia hadikaia. Nega haida edia ura be dika idia haloua badina mama o badu karadia dainai. Unai bamona idia karaia neganai, ta ena ladana namona idia hamiroa sibodia edia ladana idia habadaia totona.

Ena be ladana hadikaia bona hahedika herevadia be udu mauri dikana idia havaraia, ita naria namonamo hahisi herevadia eiava hereva kereredia maragidia danu ita gwauraia garina, badina unai ese do ia hahedinaraia ita be kara mirona eiava maduna huaia namonamo lasi taudia bamona. Edena bamona ita ese sibona eda uduna ita naria bona ma haida edia ladana ita hadikaia lasi?

[Picture on page 5]

Herevahereva haida be sivarai kikilaia karana namona

[Picture on page 6]

Udu mauri dikana be hegeregere kopukopu oi tahoa bona haba goeva dekenai ia kamokau bamona. Ena be oi huria to kopukopu ena maka be do ia noho

[Picture on page 7]

Taunimanima haida idia udu mauri taunimanima edia lalona idia ania totona