Udu Mauri—Edena Dala Amo Oi Sibona Bona Ma Haida Oi Hahisidia Lasi

BEMA taunimanima idia noho neganai udu mauri be do ia ore diba lasi. Buka Helaga ese tanobada matamata ia perovetalaia bona unai tanobada matamata lalonai reana udu mauri be do ia noho.a (2 Petero 3:13) Taunimanima edia kara badana be edia turadia edia anina bada lasi gaudia idia kikilaia hebou. Unai amo edia hetura karadia be ia moru diba lasi to do ia goada noho.

Bema ta ita udu maurilaia mai hereva dikadia, eiava iena ladana ita hadikaia, unai be maoro lasi, badina unai kara ese ta ia haberoa diba bona ena mauri, hetura karadia bona ladana namona ia hadikaia diba. Unai dainai edena dala amo sibona oi naria udu mauri lalonai oi vareai garina? Edena bamona sibona oi naria diba? Buka Helaga ese sisiba hereadaedia ia henia ita dekenai. Namona be unai sisiba haida ita itadia.

Sibona Emu Malana Oi Naria Namonamo: Taunimanima momo idia gwau “herevahereva ese oiemu lalona ia hagaukaraia, to udu mauri ese malana sibona ia hagaukaraia.” Momokani, hahedika hereva ia vara bema ta ese sibona ena malana ia naria namonamo lasi bona ia laloa namonamo lasi, to ia hereva kava neganai. Taunimanima haida ese ma haida edia kara idia sivarailaia haraga herea; ma hereva koikoi haida edia sivarai latana idia atoa kava, to idia laloa lasi unai ese dika ia havaraia diba eiava lasi. Idia ese edia turadia, adavadia bona natudia edia kerere idia sivarailaia, to idia laloa lasi dahaka hekwakwanai idia havaraia unai.

Unai dainai Buka Helaga ena sisiba ia gwau: “Hereva momo ese kara kerere ia havaraia, to ena uduna bibina ia naria tauna be mai ena aonega.” (Hereva Lada-isidia 10:19) Namona be ita laloa namonamo guna, bena gabeai ita hereva diba. Oi lalohadai namonamo guna bena gabeai ma tau ta ena sivarai oi herevalaia diba. Namona be sibona oi nanadaia: ‘Inai bamona hereva do lau gwauraia inai tauna ena vairana dekenai, a? Lauegu mamina be edena bamona bema ta ese lau ia herevalaia neganai?’ (Mataio 7:12) Salamo 39:1 ia gwau: “Lau gwau lauegu dala lau naria namonamo, lauegu malana amo kara dika lau havaraia garina. Lauegu uduna lau koua, kara dika tauna be lau dekenai ia noho negadia iboudiai.”

Momokani, nega haida oi sibona oiemu malana ena hereva oi koua, hegeregerena emu malana oi koria be do ia auka. Hegeregere oi laloa taunimanima haida ese kara dika idia karaia oiemu ruma bese taudia dekenai. Oi be diba maoro oi abia lasi, unai kara ia vara momokani eiava lasi, to oi laloa namona be kara ta oi karaia be namo. Oi laloa ta ena ladana oi hamiroa diba bema unai hereva oi gwauraia oiemu turana namona ta dekenai, eiava mai ena dagi bada tauna ta dekenai, a? Oi be udu mauri dikana tauna ai oi lao bema ma ta oi nanadaia sisiba abia totona, a? Lasi momokani. Buka Helaga ia gwau, hunia hereva be aonega dalana. Oibe, lalohadai maoromaoro bona aonega oi gaukaralaia unai bamona herevadia oi herevalaia neganai.​—⁠Hereva Lada-isidia 15:​22.

Udu Mauri Dikana Oi Kamonai Henia Lasi: Dahaka do ia vara ‘uduna badadia’ dekenai bema ‘taiana badadia’ idia noho lasi neganai? Kerere be udu mauri taudia sibona dekenai lasi, to mai edia ura idia kamonai bona unai amo moale idia davaria taudia dekenai danu. Bema oi kamonai sibona, to oi hereva lasi, unai ese ia hahedinaraia oi danu be unai hereva oi hamomokania, bona unai hereva do ia bada diba bona murinai taunimanima momo do idia diba. Hereva Lada-isidia 17:4 ia gwau: “Kara dika tauna ese hisihisi idia havaraia herevadia ia kamonai henidia bona koikoi tauna ese malana gagevana ia kamonai henia.”

Unai dainai, bema taunimanima ta idia herevalaia neganai bona unai hereva ia dika ia lao, namona be mai lalo-auka danu oi gwau: ‘Inai sivarai ita haidaua be namo.’ To bema oiemu turadia be idia ura bada idia udu mauri noho bona hahisi herevadia idia kikilaia noho, unai neganai namona be oi lalohadai namonamo bona turadia matamatadia oi tahudia. Buka Helaga ia gwau: “Udu mauri tauna ese hereva hehunidia ia gwauraia hedinarai. Hereva kavakava ia gwauraia momo tauna oi tura henia lasi.” (Hereva Lada-isidia 20:​19) Momokani, nega daudau murinai lasi oi danu do idia sivarailaia diba.

Udu Mauri Dekenai Oi Hoa Kava Lasi: Bema unai sivarai be idia edia kara ena sivarai lasi taunimanima momo ese udu mauri idia moalelaia. To, nega haida taunimanima be oi dekenai hahisi hereva koikoidia idia gwauraia diba. Unai ia vara neganai, nega momo oi ura oi lao bona unai hahisi hereva koikoi idia gwauraia taudia oi tahudia bona unai hereva umui hamaoromaorolaia. To dahaka do ia vara bema inai hereva oi hamaoromaoroa diba lasi?

Bema oi badu bada herea neganai, unai ese oi ia durua diba lasi. Buka Helaga ia gwau: “Badu haraga tauna ese aonega lasi karana ia karaia diba.” (Hereva Lada-isidia 14:17) Unai dainai aonega tauna Solomon, ia gwau: “Taunimanima edia hereva idauidau dekenai oiemu kudouna oi henia lasi. . . . Badina be oiemu kudouna lalonai oi diba, nega momo oi danu, oibe oi sibona, ese taunimanima haida oi gwauraia dika danu.” (Kohelete 7:​21, 22) Udu mauri be iseda kara badana ta bona nega haida oi be ma haida oi sivarailaidia eiava oi maumauraidia. Unai kara ita badulaia momo be mai anina bada, a? Nega sisina murinai do ia ore ia lao, a? “Kiri be mai ena nega” bona bema unai hahisi hereva oi kirikirilaia, vadaeni, do oi laloaboio.​—⁠Kohelete 3:⁠4.

Lahi Latanai Au Haida Oi Atoakau Lasi: To bema unai sivarai be ia ore lasi, namona be sibona oi nanadaia: ‘Lauegu kara dainai ma haida ese lau idia udu mauri henia, a?’ ‘Sedira lauegu toana amo lau be kara maoromaoro lasi toana lau karaia, a?’ Namona be inai sivarai haida ita lalodia guna:

◻ Hahine ta be ena gaukara ia karaia namonamo, to ena gaukara taudia be idia udu mauri henia bona idia gwau ia be lahedo bona gaukara ia karaia namonamo lasi. Badina be dahaka unai bamona idia hereva? Badina ena kara be hegeregere gaukara ia laloa momo lasi bamona, unai dainai idia laloa ia be lahedo. Danu ena dabua bona ena toana be namo momokani lasi unai gabu ai ia gaukara totona. Danu, bema telefon dekenai ena turadia haida danu ia hereva neganai, ia hereva mai ena gado regena bada bona gaukara taudia iboudiai idia kamonai danu. Unai kara dainai udu mauri ia vara!

◻ Iena hanua maragina lalonai, taunimanima iboudiai be sitoa ia naria tauna ta idia udu mauri henia. Idia gwau, ia be heudahanai tauna. To unai sitoa naria tauna ia gwau, unai hereva iboudiai be koikoi momokani. Dahaka dainai unai udu mauri ia vara? Badina unai sitoa naria tauna be hahine bona kekeni be ena sitoa dekenai idia lao neganai, ia be idia ia ura henidia dikadika bona idia kahirakahira dekenai ia gini bona ia hereva henidia.

◻ Kekeni matamata ta ena sivarai be inai bamona: Taunimanima momo idia gwau ia be kara mirodia ia karaia bona ia be tatau idauidau danu ia sihari henidia bona muramura dikadia eiava drag ia anidia. To unai sivarai ibounai be koikoi. Unai bamona sivarai idia vara badina ia be kara mirodia idia karaia taudia danu ia hebamo dainai. Iena dabua, ena huina, bona ena toana be unai kara miro taudia bamona.

Bema harihari haida ese hahisi herevadia idia gwauraia oi dekenai, namona be oi laloa namonamo, oiemu kara, bona danu, ma haida dekenai oi karaia karadia, oiemu dabua, huina bona raka dalana oi laloa namonamo, badina nega momo unai hahisi herevadia idia vara unai gaudia dainai. Reana oiemu mauri dalana oi haidaua, unai hahisi herevadia oi hamasedia totona. Buka Helaga ia gwau: “Bema au ia noho lasi neganai, lahi do ia bodo.” (Hereva Lada-isidia 26:20) Danu, bema oiemu kara be maoromaoro momokani lasi, nega ta do oi moru diba bona kerere do oi karaia diba​—⁠unai neganai hahisi hereva o udu mauri dikana be ia momokani diba.​—⁠Galatia 6:​7, 8; 1 Korinto 10:12 oi hahegeregerea.

“Oi Sibona Emu Kara Oi Naria”

Udu mauri be ia ore diba lasi. To, namona be ita naria namonamo badina ia be mai ena siahu bada bona taunimanima ia hadikaia diba. Oi be unai lalohisihisi herevadia amo oi siri diba bema inai sisiba oi badinaia neganai: “Momokani karadia, boga hisihisi henia karadia, kara maoromaoro, kara goevagoeva, lalokau karadia, mai mataurai karadia. Lau dekena amo umui davaria gaudia, lauegu hadibaia hereva bona lauegu kara danu, inai sibona do umui karaia. Bona maino ia henia Diravana be umui danu do ia noho.”​—⁠Filipi 4:​8, 9.

Io, Dirava be ia ura diba ita ese ma taunimanima haida ita herevalaia neganai edena bamona ita herevalaidia. Iesu Keriso ese ita ia sisiba henia inai bamona: “Umui lau hamaoroa, hereva kava ibounai taunimanima ese do idia gwauraia be kota karaia dinanai edia davana do idia abia. Badina be emu hereva ese do idia hanamoa oi, bona emu hereva ese do idia hadikaia oi.”​—⁠Mataio 12:​36, 37; Salamo 52:​2-5 itaia danu.

Oi ura taunimanima danu oi noho namo, maino dekenai, bona, gau badana momokani, Dirava vairanai oiemu kara be ia goevadae, a? Namona be Dirava ena sisiba oi badinaia, ia gwau: “Inai bamona mauri umui tahua be namo: mai manau danu umui noho, haida edia mauri totona umui hereva momo lasi.” (1 Tesalonika 4:11) Namona be mai hebogahisi bona kara namo ma haida oi ura henidia. Unai amo hahisi herevadia bona udu mauri amo oi raka siri diba.

[Footnotes]

[Picture on page 9]

Hereva dika amo oi raka oho

[Picture on page 10]

Emu kara dainai taunimanima be oi idia udu mauri henia diba, a?