Duahia Taudia Edia Amo

Roho Mauri Dibura Kampa Amo  Lau ese umui torea sivaraina “Gabu Daudau ai Lau Gwauhamata, Dirava Do Lau Hesiai Henia” sivaraina (Issue Number 4, 1992) gauna be hari sibona lau duahia haorea. Lau moale badina Gerd Fechner be hari mauri namona ia abia, to taunimanima ese ma taunimanima haida idia kara dika henidia sivaraidia ita diba be namo, eiava?

C. T., United States

Ai diba Gerd Fechner ena mauri sivaraina Russia ena dibura kampa dekenai ese duahia taudia haida edia lalona do ia hamanokaia. Unai dainai unai sivarai ai torea namonamo. To gau haida ai torea hedinarai badina Gerd Fechner ese Dirava ia tahua ena badina be unai. Fechner ese ia ekspirienslaia mauri aukana ese ia hahedinaraia “taunimanima haida ese edia bamodia idia biagudia bona idia hahisidia.” (Kohelete 8:⁠9)​—⁠ED.

Mahuta Hebou Hadibaia Karana  Lau be kekeni matamata ta, bona inai magasin (Issue Number 4, 1992) lau duahia neganai heduru bada lau abia. Lauegu tama bona sina be mahuta hebou karana hadibaia dalana maorona idia diba lasi, unai dainai ai idia hadibaia namonamo lasi. Iehova ena heduru amo, iena taravatu namodia lau badinaia. Edia natudia be mahuta hebou karana idia do hadibaia lasi tama sina taudia unai, be inai sivarai ese do ia durudia bada.

A.M., Mexico

Inai magasin ena hereva be hemarai gauna lasi, to ia hahedinaraia goevagoeva mai hemataurai ida, edena dala amo iseda natudia ita hadibaia diba. Guna lauegu natudia lau hadibadia lasi. Tanikiu bada lau umui durua dainai, lau ese egu natudia lau hadibaia vadaeni, unai magasin namo hereana dainai.

V.B., France

Umui gwau mahuta hebou hadibaia karana be “ruma bese ena hehuni hereva,” unai bamona hereva dainai duahia taudia haida do ia hahekwakwanaidia diba. Taunimanima idia durudia gaukara taudia, tisa taudia, nesi taudia bona mai edia diba momo taudia be haida ese idia hadikaia natudia edia toana idauidau idia tahua. Inai hereva “hehuni herevana” be natuna ta ese ia gwauraia neganai, unai be natuna hadikaia karana ta ena toana, unai be hegeregere natuna ia hadikaia tauna ta ese unai natuna ia hadibaia ta do ia hamaoroa lasi.

E.R.N., United States

Duahia taudia momo ese unai hereva ai dekenai idia gwauraia danu, bona ai sori natuna hadikaia herevana idia laloa momo taudia dekenai. Bona ai laloa edia hereva be namo. Namona be tama bona sina be mahuta hebou herevana idia kikilaia neganai idia gwau, “ruma bese lalonai sibona idia gwauraia” to namo lasi idia gwau unai be “hehuni herevana.”​—⁠ED.

Aniani Namonamo Lasi Taudia  Lau tanikiu bada umui dekenai badina “Idia Aniani Namonamo Lasi Taudia Durudia” ena sivarai (Issue Number 4, 1992) ai umui torea dainai. Unai sivarai ese lau ia durua badina hari lau diba lau be aniani namonamo lasi tauna ta. Hari lau diba lauegu hekwakwanai be aniani dekenai lasi, to gau haida dekenai, hegeregere, lauegu ruma bese taudia dekenai. Lauegu aniani namonamo lasi karana ese hekwakwanai momo ia havaraia lauegu mauri lalonai, bona lauegu haroro gaukara danu ia hadikaia. Unai sivarai lau duahia neganai, lau diba nega daudau lalonai do lau hekwarahi bada unai kara lau hanamoa totona. To lau diba Iehova be mai ena haheauka bada bona ena lalokau be bada dainai unai ese lau ia durua bada.

J. S., United States