Tanobada Amo Sivarai Idauidau

Taga bona Ogogami Hapararaia Karana Ia Bada

United Nations Development Program ena ripoti ladana Human Development Report 1992 lalonai idia torea, hanaia lagani 30 lalonai taga bona ogogami taudia hapararaia karana be ia bada herea. Lagani 1960 lalonai tahua taudia idia davaria taga taudia 100 100 amo 20 20 edia kohu ese ogogami taudia edia kohu be nega 30 amo idia hereaia. To lagani 1989 ai kahirakahira nega 60 idia hereaia. Bona tanobada lalonai idia taga taudia bilion tamona be nega 150 amo idia ogogami taudia bilion tamona idia hereaia.

Edia Ruma Bese Rarana ese Mase Ia Havaraia Diba

Japan ai, Asahi Shimbun magasin ia gwau, Red Cross Society “ese doketa idia haganidia bese tamona taudia, hegeregere tama o sina ese natuna dekenai, eiava natuna ese sina o tama dekenai rara henia karana idia hadokoa.” Unai Red Cross ena ripoti ma ia gwau bema bese tamona taudia ese rara idia henia neganai, GVHD (Graft-Versus-Host-Disease) gorere do idia davaria. Unai gorere ena vara dalana be rara idia henia hanai neganai, unai rara lalonai lymphocytes idia noho bona idia be rara ia abia tauna ena turia lalona, baragina bona ena kopina idia hadikaia. Tauanina be sibona ia hanamoa siahuna be ia ore bona mase ia vara diba. Ma danu, doketa danu idia hagania rara idia abia matamata murinai hora 72 lalonai be ma ta dekenai idia henia lasi, badina unai bamona rara ese unai GVHD gorere ia havaraia danu. Lagani rua lalodiai GVHD idia davaria taudia sinahu sinahu bona doketa 14,083 idia nanadaidia murinai, unai ripoti idia hahegaegaelaia. Unai doketa oreana kahana ta idia laloa tauanina be sibona hanamoa siahuna ia ore neganai sibona GVHD ia vara, bona rara henia hanai karana ese unai gorere ia havaraia diba lasi​—⁠to edia lalohadai be ia kerere vaitani.

Naria​—⁠Muramura Koikoi Dainai

Lagani ta ta iboudiai muramura koikoidia hoihoilaia taudia ese moni bilion bilion idia davaria. World Health Organization amo idia halasia sivarai ia gwau taunimanima be nega ibounai moni eiava kohu koikoidia idia hoihoilaia, to unai “muramura koikoidia ese ta ena mauri do ia hadikaia bona ta do ia hamasea diba.” Unai muramura koikoi momo ese gorere, hegeregere malaria eiava suga gorere ia davaria tauna, do ia durua diba lasi. Unai muramura koikoi momo lalonai idia taravatudia muramuradia o muramura kereredia idia atoa vareai. Sivarai ta ia gwau, “Unai muramura hoihoilaia karana ena dika be ia hedinarai momokani Nigeria tano ai. Natudia maragidia haida be edia hua totona muramura idia henia murinai idia mase.” Unai hekwakwanai be ogogami tanodiai idia noho ogogami taudia dekenai idia vara hanaihanai, badina idia laloa idia hoia muramura be kampani namona ta amo bona ena davana be sisina ia maragi. Oibe, unai muramura eiava ena kavabu o pepa ai idia torea ladana ibounai be koikoi.

Nigeria ese Ena Taunimanima Ia Duahia

March 20, 1992 ai, Nigeria ena niuspepa badadia dekenai inai namba 88.5 milion, be toretore bada ai idia torea. Nigeria ena national census be 1991 November hua ai ese ia hahedinaraia unai tano ena taunimanima ena namba korikorina be 88,514,501. Unai duahiduahi gaukara amo gau badadia rua idia hedinarai. Ta be tatau edia namba ese hahine edia namba ia hanaia, to idau tano momo ai hahine ese tatau edia namba ia hanaia. Iharuana be guna 1963 ai idia gwau lagani 1991 ai taunimanima edia namba be do ia daekau 100 milion eiava 120 milion, to unai namba idia davaria lasi. Ena be unai bamona ia vara to Africa ena tano iboudiai amo Nigeria taunimanima edia namba be ia daekau momokani.

Hari Inai Negai Idia Penia Laulaudia Idia Dika Haraga

Taunimanima momo ese hari negai idia penia laulaudia momo dekenai idia daradara​—⁠badina idia momo be idia dika haraga. London ena niuspepa, The Sunday Times, ia gwau laulau idia penia momo taudia, hegeregere David Hockney, Jackson Pollock, bona Mark Rothko ese idia penia laulaudia edia kala be idia valahuvalahu bona peni be ia makuku bona ia moru. Lagani 1960 ia lao 1970 ai idia gaukaralaidia peni ta ladana Acrylic ese unai hekwakwanai ia havaraia. Ena be lagani 1962 ai peni matamata idia halasia neganai momo ese idia heagilaidia, to New York City ena Museum of Modern Art ai ia gaukara hahine ta, Carol Stringari, ia gwau: “Nega ginigunana ta ese unai acrylic peni amo idia penia laulau ta amo miro ia ura hagoevaia neganai miro be ia kamokau auka masemase. Ai diba lasi dahaka do ai karaia.”

Rhine Sinavai ai Tano-Laga Ia Vara

April 1992 lalonai Rhine sinavai kahana ta ai tano-laga badana ta ia vara. Lagani 1756 amo ia mai hari unai bamona tano-laga ia vara lasi. Tano-laga ena siahu Richter sikele ai be 5.5 bona 5.8 huanai, bona taunimanima momo ese bero idia davaria bona ia hadikaia ruma bona kohu edia davana be moni milion milion ia hanaia. Tano ia mareremarere dainai niuklia power station idia koua. Saiens ena magasin ta ladana GEO lalonai sivarai ia gwau Cologne badinai unai station ta ena gaukara masini be “idia davea lao davea mai dainai toretore gaudia be idia gageva bona inika be pepa latanai ia bubua kerere kerere.” Unai tano-laga ena siahu ese saiens taudia idia hahoadia bona tano-laga ena siahu bona do ia vara nega idia gwauraia guna diba lasi.

France ai Katolik Taudia Idia Daradara

Ena be France dekenai taunimanima 100 100 amo 84 84 idia gwau idia be Roman Katolik taudia, to idia momo lasi ese unai dubu ena taravatu idia badinaia. Oibe, taunimanima 100 100 amo 12 12 idia gwau hanaihanai idia lao dubu bona 100 100 amo 24 24 be holide neganai mass dekenai idia lao. France magasin ta ladana L’Express ese unai tano taudia idia nanadaia badina idia ura diba taunimanima hida ese dubu ena hahediba badadia idia badinaia. Bona unai tahua ese ia hahedinaraia taunimanima 100 100 amo 25 25 be Iesu Keriso ena toreisi lou karana idia hamomokania lasi; 30 30 ese Iesu ena hoa karadia idia daradaralaia; 38 38 be Toi Tamona hahedibana idia hamomokania lasi. Bona 59 59 ese dubu ena hahediba pegatori dekenai idia abia dae lasi, 60 60 ese hel ena hahediba idia abia dae lasi bona 62 62 be idia gwau Satana be ia noho lasi.

Tano ai Idia Giroa Lou Golf Bolo

Golf be tano ena gadara ta, unai dainai momo idia laloa unai gadara ese davara gaudia do ia hamasea lasi. To lagani momo lalodiai momo ese golf gadara be kada ai idia karaia hanaihanai. New Scientist magasin ia gwau “Ema bona 1989 ai, golf gadara taudia be golf bolo hegeregere 500,000 be kada amo idia davea diho bena matabudi, lakara-donodono bona kidurui ese idia ania.” Unai dainai lagani 1989 ai, gwarume naria MARPOL oreana ese plastik momoru be davara eiava ranu dekenai negea lasi taravatu idia atoa neganai, golf bolodia danu idia torea. Unai nega amo kada dekenai golf gadara gabunai bolo be davara ai do idia moru lasi totona reke bamona gaudia idia atoa. To San Diego, California dekenai tau ta ese golf bolo idauna ta ia karaia. Unai bolo ena auka be golf bolo korikori ena auka bamona bona koua gauna be plastik lasi to pepa, gelatin, bona alaga, bona ia lalonai raba lasi, to sodium bicarbonate bona sodium citrate​—⁠bogahisi hanamoa muramura ladana Alka-Seltzer hegeregerena.

Dubu Idia Ura Hadikaia

Johannesburg ai, South Africa ena niuspepa, The Star, dekenai toretore bada ai inai hereva, “Raskol Taudia ese ‘Helaga’ Gaudia Idia Ura Hadikaia” idia torea. Ripoti momo ese idia hahedinaraia raskol ese dubu bona welfare oreadia idia hahisidia hanaihanai badina idia diba edia kara idia koua diba lasi. Pura tamonai nega rua ipidi amo idia hagaridia bona edia moni idia henaodia murinai sisiba idia abia “sekiuriti ma haida idia abia totona.” Nega ta dubu ai burukadia edia pension moni idia abia neganai, raskol be mai ipidi danu unai moni ibounai idia dadia. Tanobada gunalaia taudia idia gwau unai bamona kara ia vara badina taunimanima momo ese mauri hanamoa karadia idia negea vadaeni dainai. Polisi tauna ta ia gwau: “Unai dagedage dala amo dubu ena moni idia henaoa karana ese ia hahedinaraia gau ta ese do ia koudia diba lasi henaohenao totona.”

Moni Gaukara Idia Karaia Sinadia

United States ai idia gaukara hahine bona kekeni edia huanai daidia edia namba be ia tubudae haraga? National Association of Working Women orea ena haere be, edia natudia edia lagani be 18 henunai moni gaukara idia karaia sinadia. Bona idia gaukara hahinedia 100 100 amo 66 66 be mai edia natuna ruma dekenai. Idia gaukara hahine bona kekeni edia namba be 21 milion, unai ese lagani 1960 ena namba 6.6 milion ia hanaia momokani. Oibe, unai hahine momo edia natudia lagani be 2 henunai. Lagani 1970 amo ia mai bona hari edia namba be 129 pesen amo ia daekau lao 3.1 milion dekenai. Vaira dinadiai dahaka do ia vara? Unai orea ia gwau, lagani 1990 bona lagani 2000 ena huana laganidiai mai edia pre-school natudia sinadia 100 100 amo 65 65 be moni gaukara do idia karaia bona mai edia sikuli natudia sinadia 100 100 amo 77 77 be moni gaukara do idia karaia.