Tanobada Amo Sivarai Idauidau

Voodoo Meamea Kara Gara Gabudiai

Niuspepa ta ladana Jornal da Tarde ia gwau, Brazil ena taoni, São Paolo ena siti kaunsolo bona siti naria tauna ese vanegai gwaumaoro idia henia siti ena gara gabudia lalonai, “voodoo meamea karana idia karaia diba totona.” Unai kara idia inai henia taudia idia moale lasi, badina idia gwau Afro-Brazil taudia ese unai gabu dekenai animal bouboulaia kara dikadia do idia karaia. Idia bouboulaia gaudia haida idia davaria, idia haida be, animal idia haberodia, idia ivadia bona idia aladia, idia mauri noho lalonai sisia maragidia be animal badadia lalonai idia guridia, bona pusikasi bona sisia edia matadia idia kokidia. Gavamani tauna ta ia gwau unai kara idia karaia Africa taudia be sibodia edia ura dainai Brazil dekenai idia mai lasi, to idia be hegui hesiai taudia ai idia mai. Unai dainai, ia gwau voodoo idia karaia taudia idia matauraidia be namo.

Idia Ala-Ala Noho

Niuspepa ta ladana JAMA (Journal of the American Medical Association), ia gwau Tanobada Ibounai Tuari Ginigunana lalonai idia mase taudia 100 100 amo 19 19 sibona be hanua taudia. Tanobada Ibounai Tuari Iharuana lalonai idia mase taudia 100 100 amo 50 50 bamona be hanua taudia. Unai nega ema bona hari tanobada lalonai tuari 150 bamona idia vara vadaeni. JAMA niuspepa ma ia gwau: “Tuari lalonai idia aladia taudia be 20 milion bona bero idia abia taudia be 60 milion, unai taudia 100 100 amo 80 80 bamona be hanua taudia, idia momo be natudia maragidia. Lagani 10 idia ore vadaeni lalodiai, natu ibounai 1.5 milion be tuari dainai idia mase vadaeni bona 4 milion ese bero idia abia.”

Gorere Bona Mase

Tanobada hegegemadai lagani ta ta iboudiai taunimanima 50 milion idia mase. WHO (World Health Organization) ia gwau, idia mase taudia amo 46.5 milion be gorere dainai idia mase. Lagani ta ta iboudiai daihanai gorere bona parasite amo idia vara gorere dainai, taunimanima 17.5 milion idia mase. Kudou gorere ese taunimanima 12 milion bamona ia hamasedia. Kansa gorere ese taunimanima 5 milion ia hamasedia. WHO orea ena dairekta-jeneral, Hiroshi Nakajima ia gwau: “Bema hosipele idia noho, bona dala ia noho muramura abia haraga totona, bona mauri namona idia noholaia bona gorere koua daladia idia diba neganai, lagani ta ta iboudiai taunimanima 20 milion do idia mase lasi.”

Pusikasi Bona Manu

Wisconsin, USA, dekenai idia davaria gauna be inai: pusikasi ese lagani ta lalonai manu ibounai 19 milion idia aladia. Britain dekenai unai kara idia tahua bona idia gwau pusikasi ibounai 5 milion ese manu ibounai 20 milion idia aladia lagani ta ta iboudiai lalonai. Australia ena taoni Sherbrooke Shire dekenai, manu idia dika lasi totona, taoni naria taudia ese taravatu idia atoa ruma taudia edia pusikasi be hanuaboi ai murimuri dekenai do idia noho lasi, bema taravatu idia makohia edia biagudia be K100.00 faini idia abia. United States dekenai, dina ta ta iboudiai pusikasi 35,000 idia vara. To, National Wildlife magasin ia gwau, “Wisconsin dekenai idia davaria pusikasi idia naria taudia 94 pesen idia ura ane idia abia manu be edia tano dekenai idia noho, bona 83 pesen idia ura taunimanima idia labana henia manudia idia noho danu, to 42 pesen sibona idia ura pusikasi edia namba ia diho, manu edia mauri idia namo totona.

Gadara Bona Gorere

Diba momo taudia idia gwau bema emu tauanina oi doria ia gadara goada momokani totona neganai oi gorere diba. Niuspepa ta ladana The European, ia gwau: “Doketa taudia ese idia davaria vadaeni, gadara momo taudia be kuru, gadona hisihisi bona toto idia davaria momo.” Doketa ta ladana Klaus Braumann, Germany edia Olympic gadara oreana ia naria tauna, ese gadara German taudia 481 ia henanadai henidia. Niuspepa ladana Süddeutsche Zeitung lalonai ia gwau, “idia be kuru idia davaria momo dainai edia udu bibinana dekenai toto [herpes simplex] idia vara.” Ena be Germany dekenai taunimanima 10 pesen bamona be unai toto idia abia nega haida, to gadara momo taudia 100 100 amo 50 50 be unai toto idia abia. Doketa ladana Heinz Liesen, gadara taudia edia muramura ia diba momo tauna ia gwau: “Bema oi gadara goada momokani dainai emu goada oi hanaia neganai, unai ese emu tauanina ena sibona naria siahuna ia hadikaia.”

“Aniani Momo to Idia Hitolo”

Geneva, Switzerland dekenai, vanegai hebouhebou ta idia abia neganai UN orea rua idia gwau, do idia gaukara hebou bona “tanobada lalonai idia gaukara bada momokani aniani bada lasi karana idia koua totona.” Paris ena niuspepa ladana, Le Monde ia gwau, Food and Agriculture Organisation bona World Health Organisation idia gwau, “aniani lasi” ena hekwakwanai do idia hamaoromaoroa. Ena be tanobada ena aniani be hegeregere taunimanima ibounai totona, to idia haria namonamo lasi dainai momo idia dabu. Africa dekenai dina ta ta iboudiai taunimanima 40 milion idia hitolo. Natudia 192 milion be idia aniani namo lasi, dina ta ta iboudiai idia 40,000 bamona idia mase.

Edia Ura Lasi

Paris ena niuspepa ladana Le Figaro ia gwau: “Bema tama sina ese kuku idia ania, natudia ese kuku do idia ania danu.” France ena matamata taudia edia mauri lagani 11 ia lao 18 idia henanadai henidia neganai, idia davaria idia 4 4 amo ta ta be tobako idia ania​—⁠anina be dina ta lalonai kuku tamona idia ania. Unai henanadai amo idia davaria kuku idia ania matamata taudia 100 100 amo 50 50 bamona edia tamadia be kuku idia ania. Bona ia hahedinaraia danu kuku idia ania matamata taudia ibounai 100 100 amo 72 72 idia ura kuku ania karana idia hadokoa.

Buruka Taudia Matauraia Lasi Karana

Asia tanodia dekenai buruka taudia edia namba ia bada ia lao noho. Japan dekenai idia gwau harihari edia mauri lagani 65 idia hanaia taudia be 15.5 milion, to lagani 30 murinai unai namba do ia daekau lao 32 milion ai. Magasin ladana Asiaweek lalonai ia gwau, Japan taudia 4 4 amo ta ta be lagani 2020 lalonai do ia buruka. Asiaweek magasin ma ia gwau: “Singapore taudia ibounai 9 pesen bamona be edia mauri lagani 60 idia abia vadaeni. Bona lagani 2000 ia mai neganai Malaysia taudia 1.5 milion bamona be idia buruka.” Ena be momo idia buruka, to idia matauraidia lasi karana be ia bada ia lao. Guna unai ia vara momo lasi. Singapore buruka taudia ia durudia tauna Henry Lim ia gwau: “Buruka taudia matauraia karana ia boio ia lao noho.” Ia gwau, “matamata taudia be nega bada idia henia edia sisia dekenai to edia tama sina idia lalodia lasi.”

Bisinesi Namona

Argentina dekenai taunimanima idia lalohisihisi badina animal bona taunimanima idia aladia boubou karana totona. Niuspepa ladana Clarin ia gwau, Argentina dekenai tomadiho orea maragi idauidau ibounai be 5,000 bamona idia noho, bona idia momo be lauma dikadia danu idia herevahereva, Satana idia tomadiho henia, bona meamea kara idauidau idia karadia. Unai bamona orea lalodiai, kaivakuku idia gaukaralaidia momo. Buenos Aires dekenai sitoa momo ese Iesu Keriso ena laulau bona Katolik taudia ese idia gwauraia “helaga taudia” edia laulau bona demoni gaudia danu gabu tamona dekenai idia atodia hedinarai. Idia hoia momo kaivakuku ta be “Lucifer, ia be Kapitan Badana bona ena dika be dirava dikadia iboudiai edia dika ia hanaia.” Clarin niuspepa ma ia gwau, Satana tomadiho henia gaudia idia hoihoilaia taudia ese Katolik tomadiho laulaudia danu idia hoihoilaidia. Sitoa biaguna ta ia gwau Katolik tomadiho laulaudia bona Satana tomadiho henia gaudia hoihoilaidia karana be “bisinisi namona.”

Gorere Taudia Garina

Niuspepa ladana The New York Times ia hahedinaraia, doketa taudia bona edia heduru taudia be gorere taudia amo gorere idia abia garina idia gari bada. Doketa taudia be gorere taudia dekenai idia gaukaralaia gaudia amo sibodia idia utua eiava gwadaia bona AIDS eiava hepatitis gorerena idia abia garina idia gari. Idia gari kava lasi. New York siti ena hosipele dekenai idia davaria tuberculosis (TB) gorere taudia idia durua doketa ibounai 60 pesen be unai gorere idia abia danu. Bona lagani ta ta iboudiai gorere taudia durua taudia ibounai 12,000 be hepatitis gorerena be unai gorere taudia amo idia abia. AIDS gorere ia vara neganai ema bona hari, United States dekenai AIDS gorere taudia idia durua taudia ibounai 47 be AIDS gorere idia abia unai gorere taudia amo.

Buatau Bona Kansa Gorere

“Oi ania eiava oi ania lasi . . . unai be henanadai ta.” Papua New Guinea ena niuspepa ladana Post-Courier lalonai unai henanadai buatau ania karana dekenai idia henanadailaia. Doketa tauna ladana Barrie Milroy be buatau ania taudia ia durudia tauna bona ia gwau: “Papua New Guinea lalonai hekwakwanai rua idia noho, unai be malaria gorerena bona buatau ania amo idia davaria uduna kansa gorerena.” Natu maragidia danu be buatau idia ania momo. Doketa Milroy ia gwau, ‘Bema ta ese buatau ia ania do ita gwau lasi, reana, to ita gwau edena negai kansa gorere do ia abia.’ Ma ia gwau, unai kara idia rakatania be namo, “bema lasi, muramura be hegeregere lasi idia durudia totona.”

Koikoi Moni Karaia Taudia

Niuspepa ladana The Wall Street Journal ia gwau: “Koikoi moni be banika dekenai ia vareai bona sitoa tauna dekenai idia henia neganai idia diba lasi ia be koikoi moni. To bema Federal Reserve edia kompiuta masini ese koikoi moni idia davaria lasi, unai be hoa gauna.” To tau ta ese US$100.00 koikoi pepa moni ia karadia bona masini ese ia davaria diba lasi. Ia be “moni korikori bamona” bona tanobada ibounai dekenai ia lao vadaeni. Koikoi moni idia karaia moni korikori ena toana, ena kala bona toretore dalana bamona. Idia karaia namo herea dainai, gavamani be banika idia faini henidia lasi. Gavamani taudia haida idia laloa reana unai kara be taunimanima alaia bona hagaria oreana ta eiava tano ta ena gavamani ese ia karaia.

Asthma Dainai Momo Idia Mase

Niuspepa ladana Süddeutsche Zeitung ia gwau: “[Germany dekenai] asthma gorere amo idia mase taudia edia namba ia bada ia lao haraga noho.” Orea ta ladana German Respiratory Tract League oreana ia gwau, lagani 1991 lalonai taunimanima 5,000 bona ma haida be baragi gorere amo idia mase Germany lalonai. To lagani 1975 lalonai idia mase taudia edia namba be 2,000 bamona lagani ta ta iboudiai. Germany dekenai idia noho taudia 20 milion bamona be gau idauidau amo gorere idia abia, toi toi amo tamona tamona be baragi gorere idia abia.