Natudia Havaraia—Mai Ena Namo Eiava Mai Ena Dika?

UNAI hereva famili planin bona taunimanima edia namba ia bada haraga herevana be nega momo idia gwauraia hebou. Tanobada ena sivarai gunana lalonai, taunimanima edia namba be ia tubu metairametaira; idia mase taudia edia namba be idia vara beibi matamata edia namba bamona. Bena lagani 1830 bamona lalonai, tanobada hegegemadai taunimanima edia namba be bilion tamona ia davaria.

Bena medical bona saiens taudia ese heduru haida idia henia dainai taunimanima sisina momo be gorere amo idia mase lasi, hegeregere natudia momo be gorere amo idia mase lasi. Lagani 1930 ia mai neganai bamona, tanobada hegegemadai taunimanima edia namba be ia bada daekau bilion rua dekenai. Lagani 1960 ia mai neganai, namba ia bada daekau bilion toi dekenai. Lagani 1975 ia mai neganai, namba ia bada daekau bilion hani dekenai. Lagani 1987 ia mai neganai, ia bada daekau bilion ima dekenai.

Unai be hegeregere tanobada dekenai taunimanima edia namba be miniti ta lalonai 170 ia bada daekau. Dina ta ta iboudiai, taunimanima 250,000 bamona idia vara, unai be siti ta ai idia noho taudia edia namba hegeregerena. Unai anina be, lagani ta ta iboudiai, taunimanima edia namba be 90 milion amo ia bada daekau, Canada dekenai idia noho taudia edia namba be nega toi amo ia bada, eiava Mexico dekenai idia noho taudia edia namba hegeregerena idia davaria. Edia namba idia bada idia lao tanodia 90 pesen bona ma haida be idia goada idia lao noho tanodia ai, tanobada taudia 75 pesen be unai tano dekediai idia noho.

Idia Lalo-Hekwarahi Gavamanidia

To dahaka dainai gavamani taudia be famili planin karana amo idia ura taunimanima edia namba idia bada haraga lasi? Doketa Babs Sagoe, Nigeria ena National Program Officer for the UN Population Fund oreana, ese haheitalai amo unai henanadai ia haerelaia, to iena sisiba be, unai haheitalai ese hekwakwanai ena dika ibounai ia hahedinaraia momokani lasi, unai hekwakwanai ia bada bona ia be hepapahuahu havaraia momo gauna. Ia gwau:

‘Bema biru tauna ta ese tano hectare 10 ia biagua. Bema mai ena natuna 10 dekenai unai tano ia haria namonamo neganai, unai natudia ta ta ese tano hectare tamona do idia abia. Bema unai natudia ta ta iboudiai ese natudia 10 10 idia havaraia, bona edia tano idia haria edia natudia 10 dekenai, edia natudia ese tano hectare ena kahana 10 amo kahana tamona sibona do idia abia. Unai ese ia hahedinaraia, unai natudia edia mauri do ia auka sisina, to edia tubudia edia mauri ia namo, badina guna tubudia be tano hectare 10 idia biagua.’

Unai haheitalai ese ia bada diba lasi tanobadana bona ia latanai idia noho gaudia bona taunimanima edia namba ia tubu daekau karana ia hahedinaraia. Taunimanima edia namba ia bada daekau noho lalonai, idia goada idia lao tanodia momo be edia taunimanima ena namba idia hekwarahilaia. Hekwakwanai haida mani oi laloa.

Tano ese ia havaraia gau namodia. Taunimanima edia namba ia tubu daekau dainai, uda dekenai au momo idia utua, tano namona, aniani hadoa tanodia momo bona ranu namona idia gaukaralaia. Dahaka ia vara? Populi magasin ia gwau: “Idia goada idia lao tanodia dekenai . . . nega momo edia tano amo idia abia diba gaudia edia bese ia goada totona idia gaukaralaia momo, bona unai gaudia ena kahana idia rakatania momo lasi do idia tubu lou totona.”

Gaukara haida idia karaia dalana. Taunimanima edia namba ia tubu daekau dainai, gavamani idia hekwarahi momo ruma, sikuli, momoru negea daladia, dala, gorere durua muramura taunimanima dekenai idia henia totona. Abitorehai be bada bona tano ese ia havaraia gau namodia idia ore noho bona taunimanima edia namba ia bada daekau gauna idia lalo-hekwarahilaia sibona lasi, to gabeai taunimanima edia namba do ia bada momokani ena hekwakwanai gauna idia lalo-hekwarahilaia danu.

Moni Gaukara. The UN Population Fund ena magasin Population and the Environment: The Challenges Ahead ia gwau idia goada idia lao tanodia momo dekenai, moni gaukara idia karaia taudia iboudiai edia namba amo, 40 pesen be moni gaukara amo idia doko. Idia goada idia lao tanodia dekenai, taunimanima 500,000,000 bona ma haida be moni gaukara idia karaia lasi, eiava part-time gaukara idia karaia sibona; unai namba be kahirakahira ia hegeregere idia goada vadaeni tanodia dekenai idia gaukara taudia dekenai.

Unai hekwakwanai ena dika noho dalana idia koua totona, idia goada idia lao tanodia dekenai, lagani ta ta iboudiai gaukara matamatadia 30 milion idia havaraia be namo. Unai gaukara do idia ura abia taudia be hari idia mauri noho​—⁠idia be hari idia noho natudia. Diba momo taudia idia gwau gaukara lasi karana ese taunimanima do ia doria gavamani do idia gwau-edeede henia totona, ogogami bada do ia havaraia, bona tano ese ia havaraia kohu namodia hadikaia karana do ia bada.

Unai dainai, ita hoa lasi idia goada idia lao tanodia momo dekenai gavamani idia hekwarahi famili planin karana idia habadaia totona. Dina vaira dekenai do ia vara gauna ia kikilaia neganai, Britain ena medical magasin Lancet ena toretore tauna, ia gwau: “Idia do ogogami tanodia momo dekenai, taunimanima edia namba ia bada daekau karana ese edia hekwakwanai ia habadaia bona idia lalo-hekwarahilaia bada. . . . Taunimanima milion momo be sikuli dekenai do idia lao lasi, moni gaukara do idia abia lasi, ruma dikadia ai do idia noho, bona idia dekenai gorere hanamoa gaudia bona momoru kokia gaudia be lasi, bona taunimanima edia namba ia bada daekau, bema do idia koua lasi hekwakwanai badadia do idia vara.”

Idia Lalo-Hekwarahi Ruma Besedia

Gabu ibounai dekenai famili planin program havaraia karana be gau ta; to taunimanima edia lalona veria unai gaudia gaukaralaia totona be ma gau ta. Tano momo dekenai edia sene karana be ruma bese badana idia ura henia bada. Hegeregere, Nigeria dekenai sina ta be gavamani ena hereva, natudia momo havaraia lasi herevana, ia kamonai henia, ia gwau: “Lauegu tamana ena natudia ibounai be 26 bona lau be natuna dokona. Lauegu taihudia bona kakadia edia natudia be 8 bona 12 bamona. Unai dainai, lau ese natudia momo lasi lau abia be namo, a?”

To, momo ese unai lalohadai idia laloa lasi, guna idia karaia bamona, badina Nigeria dekenai danu, hahine momo ese natudia 6 idia havaraia. Kohu edia davana idia bada daekau dainai, taunimanima milion momo idia hekwarahi edia ruma bese edia dabua bona aniani idia henidia totona. Momo be edia mauri lalonai idia mamia dainai Yoruba taudia edia hereva ta idia hamomokania, ia gwau: “Ọmọ bẹẹrẹ, òṣì bẹẹrẹ” (natudia momo, ogogami bada).

Headava taudia momo be famili planin ena namo idia diba to famili planin gaudia idia gaukaralaia lasi. Unai dainai, dahaka ia vara? United Nations Children’s Fund ese ia halasia bukana, The State of the World’s Children 1992, ese ia hahedinaraia idia goada idia lao tanodia dekenai rogorogo hahinedia toi toi amo ta ta be unai rogorogo ia palanilaia lasi bona unai beibi idia ura lasi.

Famili Planin ese Mauri Ia Naria

Moni ena hekwarahi sibona lasi, to famili planin karana ita laloa bada badina sinana bona natuna edia namo ita laloa dainai. West Africa ena hereva ta ia gwau: “Rogorogo karana be moni gadara ta bamona, bona natuna havaraia neganai, ia be mase bona mauri hekwarahilaia karana.” Lagani ta ta iboudiai, idia goada idia lao tanodia dekenai, hahine 500,000 be idia rogorogo lalonai eiava natuna idia havaraia lalonai idia mase, bona natudia 1 milion be sinana lasi, bona sinadia 5 milion ia lao 7 milion edia tauanina kahana ta ia dika, eiava idia marere diba lasi badina natuna idia havaraia dainai gorere idia abia.

Idia goada idia lao tanodia dekenai idia noho hahine iboudiai lasi ese unai hekwakwanai idia davaria. Henuai maua ese ia hahedinaraia hegeregerena, idia do matamata neganai natudia momo idia havaraia, natuna idia havaraia murinai idia rogorogo lou, eiava edia mauri lagani idia bada momokani neganai, natudia idia havaraia hahine ese dika bada idia davaria diba. UN taudia haida idia gwau famili planin karana ese rogorogo amo idia mase hahine eiava natuna havaraia karana amo idia mase hahine edia namba kahana idia hamaragia diba, bona hahine milion momo edia tauanina idia dika dalana idia koua diba.

To, taunimanima milion momo hamauria karana ese taunimanima edia namba do ia habadaia, eiava? Ita hoa badina diba momo taudia idia gwau taunimanima edia namba do ia habadaia lasi. Lagani 1991 Human Development Report ia gwau: “Reana ita laloa natudia momo idia mauri neganai, taunimanima edia namba be do ia bada daekau momokani. To unai bamona ia vara lasi. Tama bona sina idia diba edia natudia do idia mauri neganai, natudia ma haida idia ura havaraia lasi.”

To, ogogami tanodia dekenai, hahine milion momo be natudia momo idia do havaraia noho. Dahaka dainai? Badina edia tano taudia idia ura natudia momo idia havaraia, badina natudia momo idia havaraia neganai haida do idia mauri, bona famili planin karana idia diba lasi, eiava famili planin gaudia haida idia abia diba lasi dainai.

To, mai edia ruma bese bada hahinedia idia laloa momo lasi. Idia gwau natudia be Dirava ena amo hahenamo ta.

[Box on page 6]

Idia Goada Idia Lao Tanodia ai Dika Idia Havaraia Rogorogodia

Idia Do Matamata Hahinedia: Edia mauri lagani 15 ia lao 19 hahine be edia rogorogo lalonai bona natuna idia havaraia neganai idia mase diba, unai be edia mauri lagani 20 ia lao 24 hahinedia idia mase ena namba be nega toi amo ia bada. Kekeni matamata ese idia havaraia beibidia be nega momo idia mase, nega korikori ia do ginidae lasi neganai beibi ia vara, eiava ena metau be ia maragi.

Natuna ta Ia Bada Lasi Bena Ma Ta Havaraia: Sinana ese beibi ta ia havaraia bona daudau lasi ma ta ia havaraia, unai ese beibi ena mauri ia hadikaia diba. Bema natuna ena mauri lagani be rua ia do abia lasi bona sinana ese ma beibi ta ia abia neganai, unai bamona natuna matamata 100 100 amo 66 66 idia mase diba. Bema unai natudia idia mauri noho, do idia tubu namonamo lasi, bona edia harana dekenai do idia laloa namonamo lasi. Natudia havaraia nega ena padana ia namo neganai, idia mase natudia ima amo tamona ia mauri diba. Bema natuna ena mauri lagani be toi eiava ma haida bona beibi ma ta sinana ese ia havaraia neganai, dika do ia vara momo lasi.

Natudia Momo: Natudia hani bona ma haida idia havaraia neganai, bema sinana ia rogorogo lou, ena rogorogo eiava beibi havaraia neganai dika bada ia vara diba, unai be momokani bema natuna ia havaraia murinai lagani rua idia do abia lasi neganai ma ta ia havaraia. Sinana ese natudia hani ia havaraia murinai, ena rara ia goada lasi bona rara momo ia negea diba, bona edia natudia idia havaraia neganai unai beibi ena tauanina kahana ta ia dika diba.

Edia Mauri Lagani Bada Hahinedia: Edia mauri lagani 35 bona ma haida hahinedia momo be edia rogorogo lalonai eiava beibi havaraia lalonai idia mase diba, edia mauri lagani 20 ia lao 24 hahine be unai hekwakwanai idia davaria momo lasi. Edia mauri lagani idia bada hahinedia ese idia havaraia natudia idia mase diba.

Sources: World Health Organization, UN Children’s Fund, and the UN Population Fund.