Inai Dala Amo Emu Mauri—Do Oi Hanamoa Diba

MAURI namona be raisi o paraoa bamona lasi, unai dainai heduru oreana tauna ese ia hariharilaia diba lasi. Paketi lalonai oi abia diba lasi, badina be ia be hoihoi gauna lasi. WHO (World Health Organization) idia gwau: “Ta ena mauri ia namo, badina be ena tauanina, iena lalona, bona iena hebamo karana be ia namo guguru.” To, dahaka ese ta ena mauri ia hanamoa?

Ruma maragina be au, ikoko, bona kapa amo idia karaia diba, to unai ibounai be ruma ena daiguni dudia ese idia imudaia. Unai hegeregerena, iseda mauri ena oromana be gau idauidau ese idia havaraia, to iboudiai be “daiguni” gaudia hani edia amo. Gaudia be (1) kara, (2) noho gabuna, (3) medikal heduruna, bona (4) tauanina. Bema emu ruma ena du dikadia oi kokia bona edia gabunai du namodia oi atoa, unai amo emu ruma oi ha-aukaia diba; unai hegeregerena, bema unai gau haniosi oi hanamodia, emu mauri be unai dala amo oi hanamoa diba. To, bema emu moni be bada lasi, unai be edena bamona oi karaia diba?

Emu Kara Bona Emu Mauri

Unai gau haniosi amo, oi biagua haraga gauna be emu kara. Do oi hanamoa be namo. Momokani, bema oi ogogami, emu aniani bona emu kara do oi haidaua daladia be momo lasi, to oi karaia diba karadia bema oi karaia, do oi haidaua momokani diba. Mani haheitalai ta oi laloa.

Sina momo ese dala idia abia hidi diba, edia beibi be edia rata amo do idia ubua, eiava botolo amo. United Nations Children’s Fund ia gwau, sina be edia rata amo edia natudia idia ubua be “dala hereana, tauanina dalana ai bona moni naria dalana ai.” Diba momo taudia idia gwau, sina ena rata be ena beibi “ena mauri hanamoa anianina hereadaena,” badina be ia lalonai be “protin, digara, laktousi, vaitamin, mineral bona treisi elemen​—beibi ena sikele hegeregerena ena tubu idia durua momokani gaudia unai.” Sina ena rata be mai ena gorere koua muramurana, unai amo beibi ia durua bada, do ia gorere lasi totona.

Siahu tanodia momo ai, ranu goeva be lasi dainai, sina ese edia rata amo edia beibi idia ubudia be mai anina bada. Haida ese botolo amo natu idia ubulaidia milikana be ranu momo amo idia hamanokaia, ena davana hamaragia totona, eiava idia hegaegaelaia kerere, eiava botolo mirodia idia iusilaia, to sina edia rata be unai bamona lasi. Canadian Society for International Health be edia niuspepa ladana Synergy ai idia gwau, ogogami besedia ai, botolo amo idia ubudia beibidia momo be kukuri ranu o nimonia dainai idia mase, to sinadia be sibodia edia rata amo idia ubudia beibidia ta ta mo be unai gorere dainai idia mase.

Bona moni do oi negea lasi. Ogogami tanodia ai, milika paudana ena davana be bada. Hegeregere, Brazil ai, famili ogogamina ta ena moni momo​—K10 K10 amo K2 K2​—be beibi be botolo amo ubua totona idia negea. Bema sinana ese ena rata amo ia ubua, aniani namona idia hoia diba, ruma bese taudia iboudiai edia​—sinana ena danu.

Sina ese edia rata amo edia beibi idia ubudia karana be mai ena namo momo dainai, reana oi laloa unai kara be bada. To, sisita Philippines ai be idia gwau, unuseniai unai kara “be kahirakahira do ia ore vaitani,” bona Brazil dekenai ripoti ta ai idia gwau maragidia momo be huahua dainai idia mase, badina be edia sinadia ese “edia rata amo idia ubudia lasi.” To emu beibi be unai dika amo do ia roho mauri dalana be oi ese oi abia hidi diba.

To, ruma momo lalodiai, sina be ena beibi ena mauri naria totona ia karaia karadia be ruma taudia ma haida ese idia hadikaia. Sina ta Nepal dekenai be mani oi laloa. Ia mai ena adavana bona edia natuna, lagani toi kekenina, ida, be daiutu ta mai ena hodahoda pariparina idia noholaia. Panoscope magasin ia gwau, unai daiutu maragina be kwalahu amo ia honudae, aniani nadua gabuna amo bona kuku amo. Kekeni be mai ena huahua gorerena. Ena sinana be mai ena lalohisihisi ida ia gwau: “Egu adavana lau koua diba lasi, kuku do ia ania lasi totona. Hari lau ese sigareti lau hoidia egu adavana ena, bona muramura egu natuna ena.”

Madi, hahine momo be unai bamona idia lalo-hekwarahi, badina be ogogami tanodia ai taunimanima momo ese edia moni be kuku ania karana ai idia haorea kava. Europe eiava United States ai taunimanima ta ese unai kara ia hadokoa neganai, Latin America eiava Africa ai rua ese idia hamatamaia. Netherlands ena buka ta, Roken Welbeschouwd, ia gwau unai be kuku hoihoilaia taudia edia lalo-ani herevadia koikoidia dainai. Unai hereva haida be inai: “Varsity [sigareti] dainai emu kwarana ena mamina do ia namo” bona “Gold Leaf [sigareti] be ladana bada sigaretidia, ladana bada taudia edia.” Unai bamona herevadia dainai ogogami taudia idia laloa kuku ania karana dainai do idia noho namonamo bona kohu momo do idia abia. To unai be koikoi bada herea. Kuku ese emu moni ia gabua ore bona emu mauri ia hadikaia.

Mani inai oi laloa. Ta ese kuku sigareti ta ia ania negadia ta ta iboudiai, ena mauri be miniti 10 amo ia hakwadogia diba karana ia karaia unai, bona dala ia kehoa, hatatek bona strouk do ia abia, bona kensa be iena baragi, iena gadona, bona iena uduna ai do ia abia, bona ma gorere haida danu. UN Chronicle magasin ia gwau: “Taunimanima be edia nega ia do ore lasi neganai idia mase, badina badana be kuku ania karana; idia koua diba karana unai.” Mani oi laloa, ia gwau “idia koua diba.” Emu sigareti ginigabena oi habodoa diba.

Momokani, emu mauri hanamoa daladia ma haida danu be oi abia hidi diba. Rau 11 ai be maua ta, ia lalonai be Iehova ena Witness taudia edia Kingdom Hall ena laiberi lalonai oi duahia diba herevadia edia lista. Momokani, unai diba abia totona do oi hekwarahi. To, WHO tauna ta ia gwau: “Bema taunimanima edia mauri naria dalana idia hadibalaidia lasi bona unai idia lalo-pararalaia lasi, mauri namona idia davaria diba lasi.” Unai dainai, emu mauri hanamoa totona diba oi tahua; unai be davana lasi.

Ruma Dekenai Gorere Koua

Buka ta ladana The Poor Die Young ia gwau, emu mauri hanamoa gaudia o hadikaia gaudia momo be emu ruma lalonai bona murimurinai. Bema umui abia ranuna ena bada be hegeregere lasi o bema ia goeva lasi, unai dainai gorere idauidau umui abia diba. Gaudia be: sipoma, kuhikuhi, kukuri ranu, kolera, taifoid, bona ma gorere haida danu.

Bema emu imana huridia totona oi be tapu oi kehoa sibona, edia ruma be ranu paipa lasi taudia be dina ta ta iboudiai ranu abia karana ai idia hekwarahi dalana be do oi lalo-pararalaia haraga lasi. Nega momo taunimanima 500 mai kahana ese tapu tamona idia iusilaia. Anina be idia naria. To ogogami taudia be hora momo lalodiai idia gaukara, bona buka ta ladana Environmental Problems in Third World Cities ia gwau, ranu idia naria negana lalonai “moni gaukarana idia karaia diba lasi.” Bema famili ta be taunimanima 6, dina ta ta iboudiai ranu baketi 30 idia abia be namo, to edia nega do idia haorea garina, 30 idia abia lasi. To unai dainai edia ranu be hegeregere lasi, aniani, disi, bona dabua do idia huria, bona do idia digudigu danu. Idia goeva lasi dainai, utu bona lao idia noho, idia hagoreredia diba gaudia unai.

Mani inai oi laloa. Bema baisikele amo emu gaukara gabuna daudauna oi lao henia, oi laloa pura ta ta iboudiai nega sisina be seini ena oela atoa, ena bereiki hanamoa o ena spouki matamatana atoa karana dekenai oi haorea be nega haorea kava karana, a? Lasi, badina be oi diba, ena be hari emu baisikele naria gaukarana bema oi reaia dainai hora haida oi abia, to do ia dika neganai, reana gaukara dinana ta ibounai do oi halusia. Unai hegeregerena, oi abia ranuna ena bada bema ia hegeregere lasi emu mauri do oi durulaia momokani, reana pura ta ta hora haida bona moni sisina do oi abia, to emu mauri oi naria namonamo lasi dainai gabeai do oi gorere neganai, reana dina momo bona moni momo do oi halusia.

Famili taudia iboudiai ese ranu idia abia diba. Ena be hanua taudia idia gwau unai be hahine bona ena natuna edia gaukara, to tama mai ena lalokau ese ena goada amo do ia durudia.

Ranu be emui ruma lalonai umui atoa murinai, do ia goeva noho be gau badana. Diba taudia edia sisiba be inai: Inuinu ranuna bona dala idaudia amo do umui gaukaralaia ranuna be gabu tamona ai umui atoa lasi. Nega iboudiai daramu o plastik be ena koua gauna amo oi koua momokani. Bena oi rakatania ela bona ranu ena miro ia diho. Ranu oi kadoa neganai, emu imana kwakikwakidia amo oi daua toho lasi, to kadoa gauna mai ena imana latana oi gaukaralaia. Nega momo plastik o daramu be snowaiti muramurana amo oi huria, bena unai murinai ranu goevana amo oi huria. Medu ranuna be edena bamona? Ia be davana lasi, bona bema miro be ranu tanika lalonai ia aru vareai lasi, bona manumanu bona bita bona ma animal haida do idia vareai lasi totona, bema ena matu be uaea amo oi koua, unai ranu be ia namo.

Bema oi daradara ranu ia namo eiava, WHO ia gwau namona be klorin halasia muramurana, soudiam haipoklorait eiava kalsiam haipoklorait, be ranu lalonai do oi atoa. Ranu ia hagoevaia, bona ena davana be maragi. Peru lalonai, famili ta be unai totona ia negea monina be kina rua henunai.

Medikal Heduruna

Madi, ogogami taudia momo ese idia itaia daladia ruaosi be inai mo: (1) Doketa idia noho, to edia davana idia karaia diba lasi, bona (2) kliniki edia davana idia karaia diba, to unuseniai heduru be lasi. Siti ta ladana São Paulo ena skwota setelmen lalodiai be taunimanima 650,000 bamona; idia ta, Donna Maria, ia gwau: “Ai dekenai, doketa edia heduru namona be dava bada gaudia hoihoilaia sitoana ta ena uindo lalonai idia hahedinaraia gauna bamona. Ai raraia diba, to ai hoia diba lasi.” (Vandaar magasin) Momokani, unai siti lalonai hospital ai operesen badadia idauidau idia karaia bona masini bona muramura matamatadia idia gaukaralaia, to Maria ese unai gau edia davana ia karaia diba lasi.

Bema unai gau be dava bada gauna ta bamona sitoa badana ta lalonai, ena davana ia karaia diba henarina be dava maragi gauna ta bamona, idia doria heheni kastoma taudia handred momo ese nega tamona idia hoia toho. Vanegai niusi ripotina ta South America tanona ta ai be ia gwau: “Gorere taudia be dina rua laini ai idia gini ela bona doketa ese ia itadia. Uodi be idia honu momokani. Gavamani ena hospital be moni, muramura, bona aniani ai idia dabu. Gorere taudia naria gaukarana be ia dika.”

Moni momo lasi taudia naridia gaukarana hanamoa totona, WHO ese gorere koua gaukarana ia rakatania, bona unai taunimanima sibodia ese edia gorere do idia koua o hanamoa daladia ia hadibalaidia. UN Chronicle ia gwau, aniani namona abia hidi bona ranu goeva inua bona toileti namodia karaia daladia idia hadibalaidia dainai, “tanobada hegegemadai edia mauri idia hanamoa momokani.” Unai gaukara ta ese oi ia durua, a? Reana idia ta ese. Edena? EPI (Expanded Program on Immunization) unai.

Ripoti ta lalonai unai gaukara idia gwauraia, idia gwau: “Veksineisen hekodona henia tauna ese hanua bona ruma ia vadivadi henidia loulou.” Idia hanai laganidia 10 lalodiai, maragidia be veksineisen niladia amo idia kododia, Amazon amo ela bona Himalayas, bona WHO ia gwau, lagani 1990 ia do matamaia lasi neganai, tanobada ena memero kekeni maragidia 100 100 amo 80 80 idia kododia vadaeni, mase goreredia 6 do idia abia lasi totona.a Lagani ta ta iboudiai, EPI ese memero kekeni milioni toi mai kahana ia hamauridia. Ma 450,000 be guna gorere ese idia hadikadia diba, to hari idia raka, idia heau bona idia gadara diba. Unai dainai, gorere koudia totona, tama sina momo be sibodia edia lalona idia hadaia, edia natudia be unai hekodo do idia abia.

Nega haida, ena be gorere ta ena vara do oi koua diba lasi, to reana do oi hadokoa diba. World Health magasin ia gwau: “Idia laloa henari gaukarana ena kahana badana be, taunimanima be sibodia idia naria o edia famili ese idia naridia.” Unai dala ta, davana maragi gauna, be inai: damena, suga, bona ranu goeva idia buloa, bena gorere tauna idia henia, ena tauanina ena ranu habadaia lou totona.

Doketa momo idia laloa unai be kukuri ranu dainai ena tauanina ena ranu ia ore tauna hamauria lou dalana namo hereana. Lagani ta ta iboudiai ogogami tanodia ai kukuri ranu goreredia be nega bilioni ta mai kahana idia vara, bona unai dainai memero kekeni milioni toi mai kahana idia mase, to bema unai muramura be tanobada hegegemadai idia gaukaralaia, idia momo idia hamauridia diba. Unai muramura ladana ORS, suga bona damena idia mikisia vadaeni gauna, paketi maragina ena davana be 35 toea sibona.

To WHO ena revareva ta ladana Essential Drugs Monitor ia gwau, tano haida ai “ORS idia iusilaia momo lasi” to drag idia iusilaidia momo, kukuri ranu hadokoa totona. Ogogami tanodia haida ai, drag idia iusilaia negadia ese ORS idia iusilaia negadia be nega toi idia hanaia. Unai revareva ia gwau: “Drag be unai bamona idia iusilaia be mai badina lasi bona davana be bada herea.” Idia abia totona, reana famili ogogamidia haida ese edia aniani idia hoihoilaia. Unai revareva be ma ia gwau, unai drag edia namo idia hamomokania lasi, bona idia haida be dika. “Namona be doketa ese unai drag idia gwauraidia hidi lasi, . . . bona famili ese idia hoidia lasi be namo.”

WHO ese drag ia gwauraia hidi lasi, to kukuri ranu gorerena hanamoa daladia toi ia gwauraia. (1) Emu natuna ena tauanina ena ranu do ia ore lasi totona, raisi nadulaia ranuna o ti oi henia. (2) Bema ena tauanina ena ranu ia ore lao, ORS oi henia bona kliniki tauna oi nanadailaia. (3) Ia kukuri ranu negana lalonai bona murinai, iena aniani korikori oi henia. (4) Bema ena tauanina ena ranu ia ore vaitani, namona be hospital ai drip amo do idia hanamoa lou.b

Bema ORS be paketi ai oi hoia diba lasi, inai dala haragana amo oi karaia: Damena sipunu maragina tamona, suga sipunu maragidia 8, bona ranu goeva lita tamona (kapusi maragidia 5) ida oi mikisia. Emu natuna ia kukuri ranu negadia ta ta ai, kapusi ta oi henia, o bema ia maragi, kapusi ta ena kahana mo. Rau 10 ena maua mani oi itaia, ia lalonai be inai kara herevadia ma haida.

To gau namba 4, iseda tauanina, be edena bamona? Hanamodia dalana be dahaka? Hereva gabena ese unai henanadai ia haerelaia.

[Footnotes]

[Box on page 8, 9]

MAURI NARIA DALANA GINIGUNANA BE DAHAKA?

Inai henanadai ena haere davaria totona, Noga! torea tauna ta be Doketa Michael O’Carroll, WHO tauna ta South America ai, ida ia herevahereva. Doketa ena hereva haida be inai.

‘AI ESE gorere be medikal daladia amo hanamodia dalana be ai idia gunalaia taudia edia amo ai abia. Bema oi gorere, doketa dekenai oi lao. Uiski botolo rua oi inua vadaeni be herevana. Oi be nega ta lasi oi eksasaisi be herevana. Doketa oi itaia bena oi noia, oi gwau: “Doketa e, egu gorere oi hanamoa.” Bena doketa ese gau ta be emu uduna lalonai ia udaia, emu imana ia kodoa, gau ta ia utua oho, eiava gau ta ia atoa kau. Oi diba, unai medikal dalana gunana ena kerere hahedinaraia totona, lau hevasehalaia inai. Emai kerere be, ai gwau taunimanima edia hekwakwanai, sibona alaia karana, malniutrisen, bona drag iusilaidia kerere karana unai, be medikal daladia amo do ai hanamodia toho be namo. To unai gau be taunimanima edia noho daladia kereredia dainai idia vara, bena gorere idia havaradia.

‘Bena, idia hanai laganidia 20 lalodiai, taunimanima idia gwau, “E, naria sisina. Dala kererena ai ita gaukara noho. Namona be mauri naria dalana maorona do ita tahua.” Unai dainai mauri naria dalana ginigunana taravatudia idia hedinarai. Haida be inai:

‘Gorere hanamodia toho be namo, to hebogahisi bada dalana mai ena davana maragi be gorere koudia. Unai hegeregerena, bema kudou goreredia edia badina idia tahua lasi, unai gorere hanamoa operesen karaia rumana idia haginia be anina lasi. To momokani, bema gorere idia vara, idia hanamodia toho be namo. Bema dala ena guri badana ta dainai dina iboudiai aksiden idia vara, ia lalonai ia moru neganai ena aena idia kwaidu tauna do idia hanamoa toho, to hebogahisi dalana mai ena davana maragina be inai: Guri be tano amo do idia hahonua.

‘Taravatu ma ta be inai: Medikal gaukarana totona idia abia monidia bona taudia do idia gaukaralaia namonamo. Bema ta ena ruma taudia ese ena bero idia hanamoa diba, kliniki dekenai idia siaia lao be kerere. Eiava kliniki ai idia hanamoa diba, hospital idia siaia lao be kerere. Eiava, doketa ta, lagani 10 iunivesiti ai idia hadibaia vadaeni tauna, bema idia siaia lao hekodo henia totona, unai danu be kerere, badina be hua 6 mo idia hadibaia tauna ese unai gaukara ia karaia diba. Unai doketa be idia hadibalaia gaukarana do ia karaia be namo neganai, namona be ia do idia davaria haraga diba. Mauri naria dalana ginigunana ena anina be inai: Taunimanima hadibadia, gorere koudia, bona emui medikal monidia bona taudia gaukaralaidia namonamo.’

[Box on page 10]

ORS MA TA KOLERA TOTONA

WHO be hari ia gwau, kolera gorerena idia abia taudia edia tauanina edia ranu habadaia lou totona, suga amo idia karaia muramurana (ORS) lasi, to raisi amo idia karaia muramurana idia gaukaralaia be namo. Badina be idia davaria, unai muramura idia inua taudia edia kukuri be bada lasi bona edia kukuri negadia be momo lasi, suga amo idia karaia muramurana idia inua taudia hegeregeredia lasi. Raisi amo idia karaia neganai, suga lasi to idia nadua vadaeni raisi pauda gram 50 bona 80 padadiai bona damena be ranu lita ta lalonai idia mikisia.—Essential Drugs Monitor.

[Box on page 11]

HEREVA MA HAIDA BE INAI:

Kara: “Gorere Lasi Maurina​—Dahaka Oi Karaia Diba?” (Noga!, Issue Number 3/1990) “Kuku Ania bona Gorere​—Unai Kuku Ania Karana ese Ia Havaraia, A?” (Noga!, Issue Number 1/1990) “Natu Durudia Idia Mauri Noho Totona!” (Noga!, Issue Number 2/1989) “Hanamoa Dalana Ia Noho”​—Noga!, Issue Number 1/1993.

Noho: “Kara Goeva Badinaia Karana” (Noga!, Issue Number 2/1989) “Stay Clean, Stay Healthy!”​—Awake!, September 22, 1977.

Mauri Naria Karana: “Hamauria Karadia Ma Haida” (Noga!, Issue Number 2/1989) “A Salty Drink That Saves Lives!”​—Awake!, September 22, 1985.

[Picture on page 7]

Ranu abia karana ai, nega idia haorea bona idia hekwarahi

[Credit Line]

Mark Peters/Sipa Press

[Picture on page 9]

Edia mauri do ia namo totona​—namona be edia ranu namona be hegeregere

[Credit Line]

Mark Peters/Sipa Press