Matamata Taudia Idia Henanadai . . .

Spot Tim Lalonai Do Lau Vareai be Namo, A?

“DAHAKA dainai ta be tim ta lalonai ia gadara be gau badana?” Magasin ta ladana Seventeen lalonai unai bamona idia henanadai. Edia haere be inai: “Umui gaukara hebou, umui tahua hebou gauna abia totona, unai dainai emui hebamo ia goada ia lao. Bona ma haida ida gaukara hebou daladia, hegeregere orea maragina ta ida hekwakwanai hanaia dalana, manau bona hebogahisi dalana, bona sibomu emui ura dadaraia karana umui manadalaia danu.”

Unai dainai, toana be spot tim lalonai gadara karana be mai ena namo, badina be unai ese gadara taudia ia hamoaledia bona edia tauanina ia hagoadaia danu.a Haida idia gwau spot tim lalonai gadara karana ese gadara taudia ia durudia, kara namo idia goadalaia totona. Matamata taudia edia beisibolo oreana ta ena hereva badana be inai: “Kara Namo, Boga-Auka, Badinaia Karana.”

To hekwakwanai ta be inai: Nega haida spot tim taudia be unai bamona idia kara lasi. Buka ta ladana Kidsports ia gwau: “Nega haida memero kekeni haida, ma haida ese edia lalona idia ania haraga diba taudia, ese hereva mirodia gwauraia karana, kara koikoi, heatu, hagaria karana, bona taunimanima hahisia karana idia manadalaia.”

Kwalimu Sibona Oi Tahua be Namo, A?

Seventeen magasin ena hereva ta be inai: “Spot be mai ena kahana dikana danu; taunimanima idia laloa do idia kwalimu be mai anina bada.” To unai lalohadai be Baibel ena hereva hegeregerena lasi; ia gwau: “Ita hekokoroku lasi, ita ta ta ita habadua lasi, bona ita ta ta dekenai kohu totona ita mama henia lasi.” (Galatia 5:​26) Bema mai emu lalohadai namona ida oi gadara helulu sisina, unai amo emu gadara oi moalelaia diba, to bema oi gadara helulu lalo-dika, unai ese badu ia havaraia diba​—bona gadara ena moale ia koua diba.

Jon, guna haisikuli dekenai futbol tim lalonai ia gadara merona, ia gwau: “Aiemai spot hadibaia tauna ese ena gaukara ia goadalaia momokani; nega ibounai ai ia lolo henia . . . treinini negadia lau garilaia. . . . Mamina lau abia dibura kamepana ai lau noho.” Ena be spot hadibaia taudia haida sibodia idia hereva dika, to momo idia gwau uini be gau badana. Toretore tauna ta ia gwau: “Gadara helulu taudia momo . . . edia gadara helulu moalena ia boio, badina be kwalimu tahua dikadika madunana idia huaia diba lasi.” Unai dainai dahaka ia vara diba?

Science News magasin ia gwau haida idia davaria kolesi ai futbol bona basketbol idia gadaralaia taudia “100 100 amo 12 12 idia gwau inai hekwakwanai imaosi amo rua idia davaria: lalohisihisi, tauanina ena hisihisi, drag eiava kekero muramurana dadaraia karana ena hekwarahi, lalona bona tauanina hadikaia karana, bona sikuli gaukarana karaia namonamo lasi karana.” Unai hegeregerena, buka ta ladana On the Mark ia gwau: “Spot ai idia vareai taudia kahirakahira iboudiai idia lalo-tamonalaia gauna be, drag ania kava karana be hekwakwanai badana spot taudia idauidau iboudiai dekenai.”

Kara Maoromaoro Badinaia Lasi Karana

Haida ese mero o kekeni ta idia doria iena gadara lalonai do ia uini totona neganai, reana unai ese ia hagoadaia do ia kara kerere do ia uini totona. Buka ta ladana Your Child in Sports ia gwau: “Hari inai nega ena spot lalonai, ta do ia uini be namo sibona lasi; ia be taunimanima ese idia abia dae karana tamona. Ta do ia uini lasi be dika sibona lasi, ia be taunimanima ese idia abia dae lasi momokani karana.”

Gau dikana ma ta be inai: Nega momo spot hadibaia taudia ese gadara taudia idia doria auka, idia gadara henidia taudia do idia haberoa totona. Psychology Today magasin ia gwau: “Ta be spot lalonai do ia kwalimu totona, namona be ia dagedage. Gadara taudia, spot hadibaia taudia bona spot taudia edia sapota taudia momo be unai bamona idia laloa.” Moni abia totona futbol ia gadaralaia tauna ta ia gwau, iena kara korikori be ‘ia hereva mai ena manau ida, taunimanima edia namo ia tahua bona ia gado namo henidia.’ To ia gadara neganai iena kara be idau vaitani. Unai kara be inai bamona ia gwauraia: “Unai neganai lau dagedage. . . . Lau be mai egu hebogahisi lasi. Lau botaia gwauraia tauna lau matauraia lasi momokani.” Nega momo spot hadibaia taudia ese spot taudia idia hagoadaia unai bamona do idia kara.

Baibel ese Keristani taudia ia hagania, ia gwau: “Inai bamona karadia, dabua bamona do umui atoa: Bogahisihisi, durua, manau, manada bona haheauka.” (Kolose 3:​12) Bema dina iboudiai ta ese oi ia hagoadaia oi gadara henia taudia do oi hahisia, do oi moia, bona do oi hadikaia, unai kara namodia do oi goadalaia diba, a? Lagani 16 merona ta ladana Robert ia gwau: “Lau be spot tim ta lalonai lau gadara vadaeni. Bema ta ai hahisia, unai ai laloa lasi; gau badana be do ai uini.” Hari ia be bapatiso Keristani tauna, bona ena lalohadai ia haidaua vadaeni. Ia gwau: “Lau be unai bamona karana do lau karaia lou diba lasi.”

Tauanina Hagoadaia o Tauanina Hadikaia?

Spot ese tauanina ia hadikaia diba dalana danu ita laloa be namo. Momokani, moale totona iseda turadia ida ita gadara hebou neganai danu, kerere idia vara diba. To spot hadibaia taudia ese memero kekeni idia hagoadaia spot be moni abia totona idia gadara taudia bamona do idia gadara neganai, dika momo idia vara diba.

Buka ta ladana Your Child in Sports ia gwau namona be Keristani taudia ese ‘edia tauanina idia henia Dirava dekenai. Boubou gauna bamona do idia henia, mai mauri bona mai helaga danu, Dirava idia dekenai do ia moale totona.’ (Roma 12:1) Unai dainai namona be oi laloa namonamo, emu tauanina ese dika do ia davaria diba dainai, spot oi gadaralaia be namo eiava?

Inai Danu Mani Oi Laloa

Ena be reana toana be bero dikadia do oi davaria lasi, to bema spot tim ta lalonai oi vareai, unai ese emu nega bada do ia haorea. Treinini negadia ese emu hebamo negana do idia hamaragia sibona lasi, to emu nega bada do idia haorea bena emu stadi negana bona emu houmwok negana do idia hegeregere lasi. Science News magasin ia gwau, kolesi edia spot taudia edia sikuli maka be sikuli horadia murinai kara haida idia karaia stiuden taudia ma haida edia “maka henunai sisina.” Bona gau badana be, bema spot tim ta lalonai oi gadara, reana Baibel ese ia gwauraia “gau namodia”​—lauma gaudia unai​—do oi tahua be auka. (Filipi 1:​10) Sibomu emu lalona ai oi henanadai, oi gwau, ‘Bema tim ta ai do lau vareai, unai kara dainai Keristani heboudia haida do lau reaia, eiava egu haroro gaukara negana do lau hamaragia, a?’

Mani inai danu oi laloa namonamo: Bema memero kekeni bona taunimanima badadia, oiemu lalohadai kara maoromaoro, hereva goevadia, eiava gadara helulu dekenai idia abia dae lasi taudia, be hora momo lalodiai oi bamodia, dahaka do ia vara diba? Baibel ia gwau: “Bema kara dika taudia danu umui turana karaia neganai, idia ese emui kara namona do idia hadikaia.” (1 Korinto 15:33) Hereva ta New York Times niuspepana lalonai mani oi laloa; ia gwau: “Dabua atoa seifidia daiutuna lalonai . . . tatau ese hahine edia tauanina be dala mirona ai idia herevalaia, kekeni dekenai idia ‘kwalimu’ karadia idia heagilaia, bona hahine idia dadabaia karadia idia hevasehalaia.” Bema emu ura hegeregerena unai bamona gabu lalonai oi vareai, lauma dalana ai do oi goada diba, a?​—Iamesi 3:18 itaia.

Aonega Dalana ai Emu Lalona Oi Hadaia

Spot tim ta ai do oi vareai karana be oi lalohadailaia, a? Bema unai oi laloa, reana ai gwauraia vadaeni herevadia ese oi do idia durua, unai kara dainai do idia vara diba gaudia do oi laloa namonamo totona. Emu lalona oi hadaia neganai, emu kara ena anina ma haida edia lalona dekenai mani oi laloa. (1 Korinto 10:​24, 29, 32) Momokani, taravatu aukana ta ita atoa diba lasi, badina be tano idauidau ai taunimanima edia kara be idauidau. Tano haida dekenai, reana sikuli edia taravatu be memero kekeni be spot lalodiai do idia vareai. To bema oi daradara, emu tamana bona sinana eiava lo Keristani tauna ta ida unai gau oi herevalaia.

Keristani memero kekeni momo, ena be edia lalona idia hadaia spot tim ta ai do idia gadara lasi be auka, to unai bamona idia karaia vadaeni. Bema spot oi diba momo bona oi moalelaia, unai bamona do oi karaia be auka! Bema sikuli tisa, spot hadibaia taudia, bona emu tamana bona sinana ese oi idia doria, unai ese emu lalohisihisi ia habadaia diba. Mero ta ladana Jimmy ia gwau: “Gadara lalonai do lau vareai urana lau koua be hekwarahi bada lau dekenai. Egu tamana, Keristani lasi tauna, ena haisikuli negana lalonai, ia be spot diba momo merona. Tim ta ai do lau vareai lasi be nega haida ia auka lau dekenai.” To emu tamana bona sinana, Keristani taudia, bona lo Keristani taudia kongregesen lalonai, ese oi idia durua bada diba, emu lalohadai do oi badinaia totona. Jimmy ia gwau: “Egu sinana lau tanikiu henia. Nega haida egu lalona ia hisihisi badina be haida ese lau idia doria, spot do lau gadaralaia totona. To nega ibounai sinagu ia noho bona egu mauri lalonai lau tahua gaudia korikoridia be lau ia hamaorolaia loulou.”

Tim ta lalonai spot gadaralaia karana ese gadara taudia be gaukara hebou dalana bona hekwakwanai hanaia dalana ia hadibalaidia reana. To Keristani kongregesen ida gaukara hebou karana amo unai gau do oi dibaia dalana be ia noho. (Efeso 4:​16 itaia.) Ta be spot tim lalonai ia gadara be moale gauna, to gadara do oi moalelaia totona, tim ta lalonai oi vareai be herevana. Spot haida be emu Keristani turadia ida umui gadaralaia diba, ta ena ruma badinai eiava gabu idauna ta dekenai. Reana ruma bese taudia be gabu ta dekenai idia lao diba, gadara namona totona. Lagani 16 merona ta ladana Greg ia gwau: “Lau be egu kongregesen taudia ida ai gadara hebou be namo herea momokani. Ai gadara moale abia totona sibona, bona unai neganai egu turadia ida lau noho!”

Momokani, emu ruma badinai oi gadara neganai oi abia moalena be maragi, to tim ta lalonai oi gadara neganai bema umui uini, unai amo oi abia moalena be bada. To, mani oi laloaboio lasi, “tauanina hagoadaia totona treinini bema ita karaia inai kara ese ita do ia durua sisina. To bema Dirava totona ita treinini noho, ia ese iseda lauma do ia hagoadaia, bona inai kara ese ita do ia durua bada herea.” (1 Timoteo 4:8) Dirava badinaia karana oi goadalaia, bena momokani oi be kwalimu tauna ai do oi lao Dirava vairanai!

[Footnote]

[Blurb on page 26]

“Aiemai spot hadibaia tauna ese ena gaukara ia goadalaia momokani; nega ibounai ai ia lolo henia . . . Treinini negadia lau garilaia”

[Picture on page 27]

Nega momo, spot hadibaia taudia idia gwau uini be gau badana​—do idia uini totona haida do idia haberoa be herevana