Baibel Ena Haere

Gadara Helulu Karana Ia Dika, A?

DINA namona ta ai, tatau buruka rua be laga-ani gabuna ai checker idia gadaralaia. Idia kahirakahira dekenai memero kekeni be regerege idia karaia, tag gadara lalonai idia heau neganai. Idia kahirakahira gabuna ma ta ai, uhau haida be basketball idia gadaralaia. Momokani, dina iboudiai ita kahirakahira dekenai, matamata taudia bona buruka taudia be spot bona gadara idia moalelaia. Idia momo be gadara negana lalonai idia kwalimu toho. Reana oi danu be unai bamona oi karaia.

To ita gwau diba unai bamona turana dalanai idia gadara helulu be dika, a? Momo be Paulo ena sisiba Galatia 5:26 (NW) ai idia diba, unuseniai ia gwau Keristani taudia be “kara helulu heheni do [idia] havaraia lasi” be namo. Unai dainai, Keristani taudia be moale totona spot eiava gadara lalonai, kwalimu totona idia gadara helulu be ia dika, a?

Lasi. Dahaka dainai? Haere ai do henia lasi neganai, spot bona gadara edia sivarai mani ita itaia guna.

Spot Bona Gadara Edia Histori

Idaunegai taudia be spot bona gadara lalonai idia vareai, bona unai be taunimanima edia sivarai dekenai ia hedinarai loulou—Dirava ena bese taudia edia sivarai dekenai danu. Inai hereva “bolo” be Baibel lalonai ia hedinarai danu. Isaia 22:18 ese Iehova Dirava ena hahemaoro herevadia kara dika taudia dekenai ia gwauraia neganai, ia gwau: ‘Ia ese idia do ia dogoatao, bolo bamona.’ Unai haheitalai be mai ena anina idia dekenai, badina be unai neganai idia noho taudia be bolo idia gadaralaia.

Ma danu, Baibel lalonai be Iakobo be aneru danu idia rosia helulu ena sivarai ia noho. Unai sivarai ese ia hahedinaraia Iakobo be mai ena diba unai gadara dekenai, badina hora momo lalonai idia karaia to ta ese ta ia halusia lasi. (Genese 32:24-26) Diba taudia haida idia gwau, unai sivarai ese ia hahedinaraia Iakobo be rosia helulu gadara ena taravatu ia diba danu. Toana be Israela taudia be peva bona diba idia gadaralaia helulu danu—ta ese unai spot ia diba totona ia karaia loulou be namo. (1 Samuela 20:20; Lalohisihisi ena Ane 3:12) Heau helulu be gunaguna idia noho tataudia edia spot ma ta, bona ia lalonai idia kwalimu totona treinini idia karaia.—2 Samuela 18:23-27; 1 Sivarai 12:8.

Edia lalona idia gaukaralaia diba gadara—hegeregere hunia herevadia hamaoroa gadarana—idia karaia momo bona idia laloa bada. Haheitalai ta, momo idia diba gauna, be Samson ena hunia herevana Pilistia taudia dekenai.—Gunalaia Taudia 14:12-18.

Keristani Greek Revarevadia lalonai, nega haida spot bona gadara idia gwauraia, Keristani mauri dalana idia haheitalaia totona. Hegeregere, 1 Korinto 9:24, 25 dekenai, Paulo ese spot tauna ena treinini goadagoada karana ia herevalaia, bona ia hahedinaraia Keristani tauna be spot tauna bamona ia boga auka bona ia haheauka be gau badana. Ma danu, ia hedinarai goevagoeva Iehova ese gadara ena ura be ia havaraia gaudia momo lalonai ia atoa, badina taunimanima bona animal danu be nega idia atoa idia gadara totona.—Iobu 40:20; Sekaraia 8:5; Heberu 12:1 itaia danu.

Kwalimu Toho Dikadika Karana

Paulo ena hereva “kara helulu heheni do ita havaraia lasi” ena anina be dahaka? (Galatia 5:26) Unai siri ese haere ia henia. Unai hereva ia do gwauraia lasi neganai, Paulo ia gwau idia “hekokoroku lasi” be namo. Paulo ena nega ai, spot taudia idia tahua goadagoada gaudia be ladana badana bona hairai.

Hari inai negai, anina lasi hairaina tahua karadia amo ia honu tanobadana lalonai, spot taudia momo be sibona edia ladana bona sibona edia diba idia abia isi toho. Haida ese ma haida idia gwauraia dika. Momo idia laloa ma haida idia hevaseha henia, eiava edia kerere idia gwauraia hedinarai, eiava idia hereva dika henidia be ia hegeregere. To, unai kara iboudiai be “kara helulu heheni” karadia, Galatia 5:26 dokona kahanai Paulo ese ia herevalaia gauna—mama—idia havaraia karadia unai.

Kwalimu totona gadara helulu dikadika karana ia dika momokani neganai, heatu bona mase ia havaraia. Saulo ena hesiai taudia bona Davida ena hesiai taudia be Gibeona dekenai idia hedavari neganai ia vara gauna mani oi laloa. Abinere bona Ioaba ruaosi idia ura “uhau taudia be do idia mai bona [edia] vairanai spot ai do idia gadara.” (2 Samuela 2:14-32, Tanakh) Toana be unai be rosia helulu bamona gadarana. Herevana ia be edena bamona spot gadara, karaharaga ia be rara ia habubua tuarina bamona ai ia lao.

Lalohadai Maorona

Moale totona ita karaia spot bona gadara ese iseda lalona bona iseda tauanina idia hanamoa be namo—lalo-metau idia havaraia be namo lasi. Inai ia vara diba bema ita laloa maoromaoro bona ita laloaboio lasi Dirava bona taunimanima ese ita idia laloa bada be spot o gadara dekenai ita kwalimu dainai lasi.

Bema iseda tauanina ia goada dainai o iseda lalona ia haraga dainai ita laloa ma haida ita hanaia, unai be aonega karana lasi. Namona be tanobada ena sibona abia isi karana ita dadaraia, haida be do idia mama garina, badina lalokau be ia heagi lasi. (1 Korinto 13:4; 1 Petero 2:1) Bona ena be ita gadara neganai ita moale dikadika dainai ita goadalaia, bona iseda gadara turadia ita hanamo henia, to namona be ita naria namonamo, unai kara ese hekokoroku idia hahedinaraia garina.

Ita laloa lasi ta ia namo badina spot o gadara ia diba namonamo dainai. Unai hegeregerena, bema spot bona gadara ita diba namonamo lasi, ita laloa lasi ita be unai dainai ita dika. Unai dainai, gadara neganai score ita makaia be ia kerere, a? Reana lasi. To namona be ita laloaboio lasi, gadara iboudiai be mai anina bada lasi—taunimanima ta ena namo korikori be gadara dekenai ena diba hegeregerena lasi. Haida be spot ta ai idia gadara neganai, kahana kahana dekenai idia gadara taudia idia haidaua loulou, kahana ta sibona ia kwalimu lasi totona.

Namona be Keristani taudia idia laloaboio lasi, ena be Baibel ese spot bona gadara ia herevalaia, sisina sibona ia herevalaia. Bema ita laloa Baibel ese spot ia herevalaia dainai spot iboudiai idia namo, iseda lalohadai be kerere. (1 Korinto 9:26 bona Salamo 11:5 oi hahegeregerea.) Danu, Paulo ia gwau, “tauanina hagoadaia totona treinini bema ita karaia, inai kara ese ita do ia durua sisina. To bema Dirava totona ita treinini noho, ia ese iseda lauma do ia hagoadaia, bona inai kara ese ita do ia durua bada herea.”—1 Timoteo 4:8.

Unai dainai, bema ita laloa maoromaoro neganai, spot bona gadara ese ita idia hamoalea bona idia hagoadaia diba. Baibel ese gadara helulu lalonai kwalimu toho karadia ibounai ia gwauraia dika lasi, to hekokoroku, heai, mataganigani, mama, eiava dagedage idia havaraia kwalimu toho karadia sibona ia gwauraia dika.