Tuari Lasi Tanobadana be Kahirakahira

UNAI Baibel ena peroveta herevana Isaia dekenai mani oi laloa lou, ia gwau: “Idia ese edia tuari kaia do idia botaia, idia amo tano geia auri do idia karaia, bona edia io be au rigi utua kaia ai do idia halaoa: bese ta ese bese ta dekenai tuari kaia do ia abia isi lou lasi, bona tuari dalana be do idia dibaia lou lasi.” Unai siri oi duahia neganai, oi itaia edia tuari kaia do idia botaia, idia amo tano geia auri do idia karaia taudia be “taunimanima momo,” idia be Dirava ena dala dekenai idia raka. (Isaia 2:​2-4, King James Version) Unai ena anina be inai taudia ese Iehova Dirava idia tomadiho henia bona iena taravatu idia badinaia. Idia be daidia?

Idia be bese idauidau taudia, tuari kohudia idia dadaraia sibona lasi, to idia gaukara goada vadaeni edia lalona bona edia kudouna ai, hepapahuahu bona heai idia havaraia lalohadai idia kokia vaitani totona. (Roma 12:2) Edia dekena tauna idia alaia lasi, to idia lalokau henia. (Mataio 22:​36-39) Oi kamonai vadaeni unai bamona idia karaia taudia idia noho, a?

Reana oi kamonai vadaeni, Iehova ena Witness taudia ese tanobada hegegemadai, edia tadikaka ida idia lalokau heheni bona idia be tuari kohudia idia abia lasi ma haida idia alaia totona. Mani oi laloa: Bema tanobada dekenai taunimanima ibounai be unai bamona lalohadai idia abia, inai tanobada dekenai maino bona noho namo be ia vara vadaeni, ani?

Momokani, taunimanima ibounai lasi ese unai lalohadai idia abia. Unai be King Solomona ese lagani 3,000 gunanai ia torea bamona: “Egu matana dekena amo, tanobada lalonai kota maoromaoro lasi kara lau itaia. Haida ese idia dagedage henidia taudia idia tai noho, bona tau ta ese ia durudia lasi. Io, tau ta ese unai hisihisi taudia ia durudia lasi, badina be unai dagedage taudia be mai edia siahu.”​—Hadibaia Tauna 4:1.

Maino Idia Lalokau Henia Taudia Idia Boiridia

Tuari lasi tanobadana do ia vara, a? Oibe. Taunimanima edia hekwarahi amo do ia vara, a? Lasi. Taunimanima iboudiai ese tomadiho momokanina dekenai do idia vareai dainai do ia vara, a? Lasi. Baibel ena buka Salamo ese haere ia henia, ia gwau: “Umui mai! [Iehova] ena gaukara do umui itaia. . . . Tuari be Dirava ese ia hadokoa noho, tanobada kahana ibounai dekenai.”​—Salamo 46:​8, 9.

Iehova Dirava ese edena bamona unai do ia karaia? Aonega Herevadia bukana ia haere, ia gwau: “Badina be kara maoromaoro taudia, be inai tano dekenai do idia mauri noho, bona laloa maoromaoro taudia be, inai tano lalonai do idia noho momokani. To kara dika taudia be tano dekena amo, Dirava ese do ia abidia siri, bona kara koikoi taudia be, tano dekena amo do ia kokidia momokani.”​—Aonega Herevadia 2:21, 22.

Dirava ese guna gau ta ia karaia lasi ema bona hari ena badina badana be inai: Ia ese dala ia kehoa taunimanima ese iena kara do idia diba totona bona iena dala dekenai do idia raka totona. Aposetolo Petero ia gwau: “[Iehova] ese iena gwauhamata badinaia totona ia hesiku [“metairametaira”, NW] lasi, haida idia laloa bamona. Lasi, to umui totona ia haheauka noho. Badina be ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.” (2 Petero 3:9) Unai dainai, Dirava ena taunimanima ese haida idia durua Iehova idia dibaia totona. Isaia ese ia hereva bamona, idia boiboi: “Umui mai, Lohiabada ena ororo dekenai do ita daekau, . . . Ia ese iena kara ita dekenai do ia hadibaia.”​—Isaia 2:3.

‘Dina Gabedia’

Isaia ena siri ia gwau danu ‘dina gabedia’ lalonai maino karadia be taunimanima dekenai do idia hadibaia. (Isaia 2:2) Ita be unai nega lalonai ita noho. Oibe, lagani 1900 amo ema bona hari, idia vara tuaridia ese idia hahedinaraia ita be unai nega lalonai ita noho.

Iesu ena hahediba taudia be idia nanadaia dahaka toa amo do idia diba tanobada ena dokona be ia ginidae neganai, “tano do idia mareremarere, hitolo bada, bona ta ta dekenai do ia hanaia gorerena do idia vara” ia perovetalaia. (Luka 21:11; Mataio 24:3) Ia gwau danu: “ ‘Tuari bona heatu bada edia sivarai do umui kamonai, do umui gari lasi, badina be inai gaudia do idia vara guna, to dokona be gabeai.’ Ma Iesu ia gwau: ‘Bese ta bese ta danu do idia alaia ta ta dekenai, bona basileia ta be basileia ta danu do idia tuari.’ ”​—Luka 21:9, 10.

Ena be lagani tausen momo lalodiai tuari idia vara, to vanegai laganidia 95 sibona lalonai tanobada ibounai tuaridia rua idia vara vadaeni, bona tuari maragidia 100 haida idia vara danu. Inai nega lalonai tuari amo idia mase taudia be milioni momo herea be gari bada gauna. World Watch magasin ia gwau, lagani 2,000 gunadia lagani 1900 ia do ginidae lasi negana ai, tuari lalonai idia mase taudia edia averes be lagani 50 lalonai taunimanima 1 milioni idia mase. To lagani 1900 ema bona hari, tuari lalonai idia mase taudia edia averes be lagani tamona lalonai taunimanima milioni tamona idia mase.

Tuari Lasi Tanobadana

Iseda nega ena tuari dikadia bona Baibel ese ia perovetalaia karadia idia hahedinaraia ita be tanobada matamatana, Dirava ese do ia karaia gauna, ena kahirakahira dekenai ita noho. Inai tanobada gunana be do idia haorea bona maino bona kara maoromaoro ‘tanobada matamata’ ese ena gabu do ia abia. (2 Petero 3:13) Dirava ena Hereva ia gwau: “Kara dika taudia be, dika momokani do idia davaria, to Lohiabada idia abidadama henia taudia ese, edia tano dekenai do idia noho, mai namo danu. To manau taudia ese noho gabuna tano do idia abia, do idia helai namonamo, mai moale bona mai maino danu.”​—Salamo 37:9, 11.

Hari tanobada hegegemadai, taunimanima milioni momo herea idia ura dikadika tuari lasi tanobadana idia abia. Dirava ena peroveta tauna ta ese ia hahedinaraia Dirava ese iena gwauhamata tuari lasi tanobada totona do ia hagugurua. Idau negai inai ia torea: “Inai lau palania kara be harihari do ia vara lasi. Unai dainai ena anina do oi torea, ia noho. To ia be nega daudau lasi lalonai do ia vara. Lau koikoi lasi. Sedira oi laloa iena mai be haraga lasi, to do oi naria noho, ia be do ia vara momokani.”​—Habakuku 2:3.

Unai dainai aonega dalana be, Dirava oi abidadama henia bona iena gwauhamata oi moalelaia, ia gwau: “Dirava ena noho gabuna be [iena] taunimanima edia huanai do ia noho, . . . Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”​—Apokalupo 21:​3, 4.

[Box/Pictures on page 9, 10]

Baibel ese Unai Tanobada Matamatana Ia Gwauhamatalaia Herevadia:

Taravatu Utua Karadia, Dagedage, O Gwau-edeede be Lasi

“Tuari be Dirava ese ia hadokoa noho, tanobada kahana ibounai dekenai.”​—Salamo 46:9.

“Kara dika taudia be, dika momokani do idia davaria, . . . Nega daudau lasi lalonai kara dika taudia do idia ore.”​—Salamo 37:​9, 10.

Taunimanima Ibounai Maino Dekenai

“Ita totona natuna ta ia vara! Dirava ese ita dekenai, natuna mero do ia henia! Bona ia be iseda gunalaia tauna do ia lao, bona iena ladana do idia gwauraia, . . . Maino ena Lohia. Iena King siahuna, be do ia bada daekau lao, bona iena basileia be nega ibounai, mai maino danu do ia noho.”​—Isaia 9:​6, 7.

Tanobada Ibounai be Paradaiso

Iesu ia gwau: “Ita ruaosi Paradaiso dekenai do ita ginidae.”​—Luka 23:43.

“Kara maoromaoro taudia ese, Dirava ia henidia tano dekenai do idia noho ela bona hanaihanai.”​—Salamo 37:29.

Tanobada Hegegemadai mai Lalokau Tadikaka Oreana

“Dirava ese taunimanima edia toana ia laloa lasi. To bese ibounai lalonai, Dirava dekenai idia gari, bona kara maoromaoro idia karaia taudia, be Dirava ese do ia abia dae.”​—Kara 10:​34, 35.

Emu Lalokau Mase Taudia Idia Toreisi Lou

“Nega ta do ia mai, mase guri gabu dekenai idia noho taudia ibounai ese iena gadona do idia kamonai. Vadaeni guria gabu dekena amo do idia toreisi.”​—Ioane 5:​28, 29.

Gorere, Buruka, Eiava Mase be Lasi

“Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”—Apokalupo 21:4.