Haida Ese Idia Abia Dae Lalohadaina

Hindu taudia

idia abia dae ta be guna eiava hari ia karaia kara kereredia dainai hisihisi ia davaria. Ta be moksha maurina ia abia diba​—vara loulou karana do ia rakatania​—bena ena laloa dalana be tomadiho idia herevalaia lasi gaudia amo do ia idau.

Muslim taudia

idia abia dae hisihisi be panisia karana ta kara dika taudia bona abidadama tohoa totona. Islamic Society of North America ena presiden, Doketa Sayyid Syeed ia gwau, dika idauidau idia vara karana ese ita ia hadibaia, “Dirava ese ita dekenai ia henia hahenamo ibounai dainai ita moale noho bona namona be ita diba heduru idia ura abia taudia ita durudia.”

Iuda taudia edia sene herevadia

idia hahedinaraia ta ena kara kerere dainai hisihisi ia davaria. Iuda taudia haida idia gwau toreisi lou do ia vara, unai murinai Dirava ese idia kerere lasi bona hisihisi idia davaria taudia totona, kota maoromaoro do ia karaia. Iuda tomadihona, Kabbalistic be ta ia mase neganai ena tauanina ia rakatania bona tauanina idauna ai ia vara lou lalohadaina idia hadibaia.

Buddhist taudia

idia abia dae mauri lalonai hisihisi do oi abia noho, unai be ia vara loulou karana bamona ela bona ta be ena kara, hemami, bona ura dikadia idia ore. Bema ta be aonega, gaukara ia karaia namonamo, bona ena lalohadai ia biagua namonamo, ia be nirvana maurina ia abia diba​—anina be hisihisi ibounai ia ore maurina dekenai ia ginidae.

Confucianist taudia

idia abia dae gauna be inai buka ta ladana, Dictionary of Comparative Religion ese ia gwauraia, ia gwau, “taunimanima ese gau ta idia karaia namonamo lasi karana bona edia kara kerere” dainai hisihisi momo idia vara. Confucian taudia edia hadibaia dalana ai, idia hahedinaraia bema ta be mauri dala namona ia noholaia, ena hisihisi ena kahana haida ia hamaragia diba, to hisihisi ena kahana badana be “lauma dikadia ese idia havaraia noho, edia siahu be taunimanima edia ia hereaia. Unai bamona negadiai, lauma dikadia ese dahaka abia hidi idia karaia, vadaeni taunimanima ese do idia abia dae sibona.”

Tomadiho taudia ma haida

idia abia dae meamea karadia dainai hisihisi idia vara. Unai lalohadai hegeregerena, meamea taudia be namo eiava dika bada idia havaraia diba bona sene kara idauidau amo hisihisi idia hamaragia diba. Bema ta be gorere ia abia, taunimanima idia abia dae kastom karadia bona meamea taudia edia muramura ese meamea gaukara idia karaia taudia edia siahu ia koua diba.

Keristani taudia

idia abia dae tau bona hahine ginigunadia edia kara dika dainai hisihisi ia vara, Baibel bukana Genese ena hereva hegeregerena. To, tomadiho momo be unai hahediba herevana dekenai sibodia edia lalohadai idia atoa. Hegeregere, Katolik tomadiho haida idia gwau, Oi davaria hisihisi be ‘boubou gauna bamona Dirava dekenai oi henia’ diba unai amo dubu ia hanamoa eiava ta ia hamauria totona.