4. Dirava Ese Ita Ia Havaraia Hisihisi Ita Davaria Totona, A?

Dahaka Dainai Ena Haere Ita Diba be Gau Badana?

Inai henanadai ena haere ese mauri dekenai iseda lalohadai ia haidaua diba.

Oi Lalohadailaia Totona

Dahaka dainai tanobada ai gau hairaidia ia karaia Diravana ese hisihisi ia koua lasi?

Tomadiho idia laloa bada lasi taudia idia gwau, hisihisi ia vara ena badina be Dirava be ita ia laloa lasi. Idia abia dae hisihisi idia vara badina (1) Dirava be siahu lasi, (2) Dirava ia ura lasi eiava (3) Dirava ia noho lasi, hisihisi ia koua totona.

Unai badina sibona dainai taunimanima be hisihisi idia davaria noho, a?

DIBA MA HAIDA ABIA

Inai vidio ladana, Edena Bamona Ita Diba Baibel Ena Hereva be Momokani? be jw.org ai oi itaia.

Baibel Ia Gwau

Dirava be ita ia havaraia lasi hisihisi ita davaria totona.

Ia ura mauri ita moalelaia.

“Taunimanima edia dala namona tamona be inai: Do idia moale, bona idia edia mauri dina ibounai lalonai, kara namodia do idia karaia. Ita ibounai ese iseda gaukara ena anina do ita moalelaia, do ita aniani bona inuinu. Inai be Dirava ena harihari gauna.”—HADIBAIA TAUNA 3:12, 13.

Dirava be tau bona hahine ginigunana dekenai mauri goevadaena ia henia.

Idia bona edia tubudia ia havaraia lasi hisihisi idia davaria totona.

“Dirava ese . . . idia dekenai ia gwau, ‘Emui bese do umui havaraia, do umui momo herea. Tanobada ena gabu ibounai dekenai do umui noho, bona unai tano do umui biagua.’”—GENESE 1:28.

Tau bona hahine ginigunana be Dirava idia gwau-edeede henia.

Unai badina dainai, idia bona edia tubudia ibounai dekenai hisihisi idia havaraia.

“Tau tamona dekena amo kara dika be tanobada dekenai ia vareai, bona kara dika ese mase ia mailaia. Bona unai dainai mase be taunimanima ibounai dekenai ia hanaia lao, badina idia ibounai be idia kara dika vadaeni.”—ROMA 5:12.a

Dirava be taunimanima dekenai maoro ia henia lasi, sibona idia hakaua totona.

Taunimanima be ranu lalonai idia mauri diba lasi hegeregerena, do ia auka sibona idia lohiaia totona.

“Taunimanima ta lasi ese iena mauri ia biagua noho.”—IEREMIA 10:23.

Dirava ia ura lasi hisihisi ita davaria.

Ia ura hekwakwanai lasi maurina ita noholaia.

“Egu oda hereva bema umui kamonai henia neganai, emui noho be do ia namo, mai maino danu, sinavai hegeregerena.”—ISAIA 48:18.

a Baibel lalonai, inai hereva “kara dika” be kara kereredia sibona ia herevalaia lasi to iseda tama sina ginigunana amo ita abia kara dika ia herevalaia danu.