Hisihisi Ita Haheaukalaia Neganai, Namo Ita Davaria Diba
“Ita diba . . . haheauka taudia ese moale idia davaria vadaeni.”—IAMESI 5:11.
1, 2. Dahaka dainai ita diba Iehova ia ura lasi taunimanima idia hisihisi?
TAUNIMANIMA namodia ibounai idia ura lasi idia hisihisi; eda Havaraia Tauna Iehova Dirava danu ia ura lasi taunimanima idia hisihisi. Baibel bona Dirava ese Adamu bona Heva totona ia karaia gaudia amo ita diba, Dirava ia ura lasi taunimanima ibounai idia hisihisi. Dirava ese tau ia karaia dalana mani ita itaia guna. Baibel ia gwau: “Lohiabada Dirava ese tano ena kahu dekena amo tau ta ia karaia, bona Dirava ese mauri ena lagana be unai tau ena udu baubau lalonai ia hiriria vareai, vadaeni unai tau ese mauri ia davaria vadaeni.” (Genese 2:7) Adamu ena tauanina bona lalona be goevadae dainai, ia gorere lasi o mase lasi.
2 Adamu ena noho dalana be edena bamona? “Lohiabada Dirava ese uma ta dina ia daekau kahana dekenai ia karaia, ladana Eden, bona unai gabu dekenai, ia karaia vadaeni tauna ia atoa, unuseni ia noho. Lohiabada Dirava ese tano dekena amo toana namo au ibounai ia havaraia, bona aniani idia atoa audia danu.” (Genese 2:8, 9) Momokani, Adamu be gabu namona ai ia noho. Bona Eden lalonai, hisihisi ia havaraia gauna ta be lasi.
3. Adamu bona Heva edia mauri dalana be edena bamona?
3 Genese 2:18 dekenai, “Lohiabada Dirava ma ia gwau, ‘Unai tau sibona ia noho be ia namo lasi, lau ese durua tauna ia bamona do lau karaia.’ ” Iehova ese hahine goevadaena ta ia karaia Adamu totona, unai amo ruma bese be do ia namo herea. (Genese 2:21-23) Baibel ia gwau: “Dirava ese ia hanamodia, idia dekenai ia gwau, ‘Emui bese do umui havaraia, do umui momo herea. Tanobada ena gabu ibounai dekenai do umui noho, bona unai tano do umui biagua.’ ” (Genese 1:28) Dirava ese Adamu bona Heva dekenai gaukara hereadaena ia henia, idia ese Eden Paradaisona do idia habadaia ela bona tanobada ibounai be paradaiso ai do idia halaoa. Edia natudia be do idia hisihisi lasi to do idia moale. Eden lalonai, gau ibounai be namo herea!—Genese 1:31.
Hisihisi Ia Matamaia
4. Gunaguna bona hari, taunimanima edia noho dalana be edena bamona?
4 To, toana be gau ta ia vara dainai, gunaguna bona hari, taunimanima be idia noho namonamo lasi. Gau dikadia idia vara dainai taunimanima idia hisihisi. Lagani handred momo lalonai, Adamu bona Heva edia bese idia gorere, buruka, bona mase. Tanobada be paradaiso lasi, bona taunimanima idia moale lasi. Roma 8:22 ena hereva be momokani: “Dirava ese ia karadia gaudia ibounai be idia hisihisi noho . . . Oibe, idia tai noho, guna, ia mai bona harihari.”
5. Edena dala ai Adamu bona Heva be hisihisi idia hamatamaia taudia?
5 Gunaguna bona hari, Iehova be taunimanima ia hahisia lasi. (2 Samuela 22:31) To, taunimanima be hisihisi idia havaraia. Baibel ia gwau: “Idia ibounai be dika, kara mirodia idia karaia vadaeni.” (Salamo 14:1) Eden lalonai, Iehova be Adamu bona Heva dekenai gau namodia ia henia. Bona unai hahenamo do idia moalelaia hanaihanai bema idia ese Dirava idia badinaia noho. To, idia ese Iehova ena lohia siahuna idia dadaraia. Unai dainai, idia be goevadae lasi. Idia buruka idia lao bona idia mase. Bona edia kara dika be ita ibounai dekenai ia hanaia.—Genese 3:17-19; Roma 5:12.
6. Edena dala ai Satani be hisihisi ia hamatamaia danu?
6 Satani Diabolo ai ia lao aneruna be hisihisi ia hamatamaia danu. Ia be mai ena ura kwalimu. Bona unai ura kwalimu ia gaukaralaia kerere, badina ia ese taunimanima ia doria ia idia tomadiho henia totona. Iehova sibona ita tomadiho henia be maoro, to Ia havaraia gaudia ita tomadiho henia be kerere. Satani ena koikoi herevana dainai, Adamu bona Heva be Iehova ena lohia siahuna idia dadaraia. Badina Satani ia gwau bema Iehova idia dadaraia, idia be ‘Dirava hegeregere do idia noho, kara namona bona kara dikana do idia diba.’—Genese 3:5.
Iehova Sibona Ia Lohia be Maoro
7. Idia vara hisihisi idauidau ese dahaka idia hamomokania?
7 Idia vara hisihisi idauidau ese idia hamomokania, Iehova sibona ia lohia be maoro, badina ia be guba bona tanobada edia Lohia Badana. Lagani tausen momo lalonai, Satani—“inai tanobada ena lohia”—be kara dika bona dagedage ia habadaia. (Ioane 12:31) Danu, Satani ese ia biagua gavamani dikadia be kara maoromaoro ai idia lohia lasi. (Ieremia 10:23) Momokani, taunimanima ese idia haginia gavamani do idia kwalimu lasi. Gunaguna bona hari, idia vara gaudia ese idia hamomokania taunimanima be hegeregere lasi.
8. Iehova be gavamani idauidau dekenai dahaka do ia karaia? Edena dala ai Iehova be ena ura do ia hagugurua?
8 Gunaguna bona hari, taunimanima be lohia daladia idauidau idia haginia, to hari Iehova ia ura tanobada gavamanidia ia kokia bona guba gavamanina sibona do ia lohia. Daniela ia gwau: “Unai basileia [tanobada gavamani] namba 4 ena nega lalonai, guba ena Dirava ese basileia ta [Iena gavamani, Keriso ena imana ai Ia atoa gauna] do ia haginia, inai basileia be do idia hadikaia diba lasi ela bona hanaihanai. . . . Bona unai basileia ese basileia ibounai do ia hamakohia, bona haorea momokani, bona ia sibona do ia noho ela bona hanaihanai.” (Daniela 2:44) Dirava ese demoni bona tanobada gavamanidia ia kokia neganai, Dirava ena guba Basileia sibona be tanobada do ia lohiaia. Keriso be King ai do ia lao, bona Dirava ese tanobada amo ia hoia taudia 144,000 be Iesu ida do idia lohia.—Apokalupo 14:1.
Hisihisi Ena Namo
9, 10. Edena dala ai Iesu ese ia davaria hisihisi ese ia idia durua?
9 Namona be ita tahua edena bamona taudia be guba Basileia dekenai do idia lohia. Keriso Iesu be hegeregere King dagina ia abia totona. Badina lagani momo lalonai, ia be ena Tamana Iehova ena ura ia karaia, bona Baibel ia gwau, ia be gaukara karaia namonamo tauna bamona. (Aonega Herevadia 8:22-31) Iehova ese Iesu ia siaia tanobada dekenai ia mai totona neganai, Iesu be unai ia badinaia. Tanobada ai, Iesu be ma haida dekenai Iehova ena lohia siahuna bona Basileia ia herevalaia. Ia be Iehova ena lohia siahuna ia badinaia dainai, ia be haheitalai namona.—Mataio 4:17; 6:9.
10 Iesu be haida ese idia dagedage henia, bona gabeai idia hamasea. Haroro gaukara lalonai, Iesu ia itaia taunimanima ibounai edia noho dalana be dika momokani. Iesu be taunimanima edia hisihisi ia itaia sibona lasi to ia danu hisihisi ia davaria dainai, unai ese ia idia durua, a? Oibe. Heberu 5:8 ia gwau: “Iesu be Dirava ena Natuna, to ia ese hisihisi ia abia, bona unai hisihisi ese Dirava kamonai henia dalana ia hadibaia.” Tanobada ai, Iesu be taunimanima edia hisihisi ia lalopararalaia bona ia hebogahisi henidia. Ia be taunimanima ida ia noho bona edia noho dalana ia lalopararalaia. Unai dainai, ia diba edena bamona heduru ia henia be namo. Paulo be Baibel bukana Heberu dekenai unai ia herevalaia, ia gwau: “Iesu be kara ibounai dekenai, iena tadina taudia hegeregerena momokani ia lao. Badina unai dala dekena amo Iesu be Hahelagaia Tauna Badana do ia lao, bona Dirava ena hesiai gaukara, mai momokani bona mai bogahisihisi danu do ia karaia. Bona unai dala dekena amo danu, taunimanima edia kara dika be Dirava ese ia gwauatao diba. Iesu ese dibagani bona hisihisi ena mamina ia abia dainai, ia ese taunimanima ia durua diba, edia dibagani neganai.” “Ita be mai iseda Hahelagaia Tauna Badana, bona ia be Dirava ena vairanai, guba dekenai ia noho. Ia be Iesu, Dirava ena Natuna. Unai dainai namona be iseda abidadama ita dogoatao goada noho. Ita gwauraia noho abidadama be unai. Ita be manoka dainai kara dika ese nega momo ita ia hamorua. To iseda Hahelagaia Tauna Badana ese ita ia bogahisihisi henia diba. Badina be ia danu ese dibagani ena mamina ia abia, ita ese ena mamina ita abia hegeregerena. To Iesu ese kara dika ta ia karaia lasi.”—Heberu 2:17, 18; 4:14-16; Mataio 9:36; 11:28-30.
11. Vaira negana ai 144,000 taudia be dahaka do idia karaia?
11 Dirava ese 144,000 be tanobada amo “ia hoia” Keriso Iesu ida guba Basileiana ai idia lohia hebou totona, bona idia be hisihisi idia abia taudia. (Apokalupo 14:4) Edia tama sina be tanobada taudia, bona hisihisi idauidau idia itaia o mamia. Momo be dagedage idia davaria; ma haida be Iehova bona Iesu idia badinaia dainai haida ese idia hamasea. To mai edia hemarai lasi ida Lohiabada ena sivarai idia harorolaia, bona sivarai namona totona idia hisihisi. (2 Timoteo 1:8) Tanobada dekenai idia itaia bona mamia gaudia dainai, idia diba edena dala ai guba amo tanobada taudia idia hahemaoro henia diba. Idia be hebogahisi bona hariharibada karana idia dibaia, bona idia ura taunimanima idia durua.—Apokalupo 5:10; 14:2-5; 20:6.
Tanobada ai Do Idia Noho Taudia Idia Moale
12, 13. Edena dala ai hisihisi be haida ia durua diba?
12 Taunimanima haida idia ura tanobada matamata dekenai idia noho, badina do idia gorere lasi, daradoko lasi, bona mase lasi. To, hari inai negai idia abia hisihisi be idia ia durua, a? Hisihisi be moale gauna lasi. To, hisihisi ita haheaukalaia neganai, kara namodia ita habadaia bona ita moale diba.
13 Baibel be unai ia herevalaia: “Bema kara maoromaoro umui karaia, bona unai dainai hisihisi umui abia neganai, vadaeni do umui moale.” “Umui be Keriso ena taudia dainai, do umui moale bema haida ese umui idia hereva dika henia.” (1 Petero 3:14; 4:14) “Bema egu murinai umui raka dainai idia hadikaia umui, bona idia hisihisi henia umui, bona hereva dika mai koikoi danu idia gwauraia loaloa umui totona lau dainai, umui danu namo. Umui moale bada momokani, badina emui davana guba dekenai ia bada.” (Mataio 5:11, 12) “Hisihisi bona dibagani ia abia neganai ia gini noho, mai haheauka danu tauna be namo. Badina be unai dika dekena amo ia kwalimu neganai, ia ese Dirava ia gwauhamata gauna, mauri hanaihanai, iena kwalimu ahuna, do ia davaria.”—Iamesi 1:12.
14. Iehova idia tomadiho henia taudia be idia hisihisi dainai idia moale, a?
14 Momokani, hisihisi be moale gauna lasi. To, bema Iehova ena ura ita karaia o Iesu ita tohotohoa dainai ita hisihisi, vadaeni ita moale. Hegeregere, aposetolo taudia haida be Iesu ena sivarai idia harorolaia dainai, dibura ruma dekenai idia atoa bona Iuda ena kaunsolo taudia ese idia hamaorodia do idia haroro lasi. Idia botadia bona idia siaia lao. To, aposetolo taudia be dahaka idia karaia? Baibel ia gwau: “Aposetolo taudia ese kaunsolo idia rakatania mai moale bada danu. Edia moale badina be, Dirava ese idia ia abia hidi vadaeni Iesu ena ladana dainai hisihisi do idia abia.” (Kara 5:17-41) Aposetolo taudia be unai botaia karadia o hisihisi dainai idia moale lasi. To, idia moale badina idia laloparara idia be Iehova bona Iesu idia badinaia dainai hahetoho idia davaria.—Kara 16:25; 2 Korinto 12:10; 1 Petero 4:13.
15. Bema hari hisihisi ita haheaukalaia, vaira negana ai dahaka do ita karaia?
15 Bema Iehova bona Iesu ita badinaia dainai dagedage bona hisihisi ita abia, unai ese iseda haheauka karana ia habadaia diba. Unai ese ita do ia durua vaira negana ai hisihisi idauidau ita haheaukalaia totona. Baibel ia gwau: “Lauegu varavara taudia e, bema dibagani idauidau ese umui dekenai ia ginidae neganai, inai bamona do umui laloa be namo: Inai be moale gauna sibona. Badina be umui diba, dibagani o hisihisi ese emui abidadama idia tohoa neganai, goada bona haheauka idia havaraia noho.” (Iamesi 1:2, 3) Roma 5:3-5 ia gwau: “Nega dikadia ita abia neganai danu ita be moale, badina ita diba hisihisi bona nega dika ese iseda haheauka idia hagoadaia diba. Bema ita haheauka noho neganai, ita ese dibagani ita negea diba. Bona bema dibagani ita negea, ita ese Dirava ita abidadama henia diba, bona Dirava ena gwauhamata gaudia dekenai ita naria noho diba. Inai bamona Dirava ita naria noho neganai, ita naria kava lasi.” Unai dainai, bema hari Iehova ita badinaia dainai hisihisi idauidau ita haheaukalaia, unai ese ita do ia durua inai nega dikana lalonai do idia vara hisihisi ma haida ita haheaukalaia totona.
Iehova ese Davana Do Ia Henia
16. Iehova be guba helarona idia abia taudia totona dahaka do ia karaia?
16 Iehova ena dala ita badinaia dainai dagedage ita abia bona eda kohu ita haboioa, to ita moale badina be ita diba Iehova be ita dekenai ahuna namona do ia henia. Hegeregere, Paulo be guba helarona idia abia taudia be inai bamona ia herevalaia, ia gwau: “Emui kohu be haida ese idia dadia neganai, edia kara umui haheaukalaia mai moale danu. Badina be umui diba, umui dekenai ia noho kohu, davana namona, [Dirava ena Basileia ena king dagi unai] be do ia noho hanaihanai gauna.” (Heberu 10:34) Mani oi laloa, Iehova bona Iesu edia hakaua dalana henunai, guba helarona idia abia taudia be tanobada matamata ai do idia noho taudia dekenai gau namodia do idia henia. Paulo ese kamonai Keristani taudia dekenai ia gwauraia herevana be momokani, ia gwau: “Lau laloa hari inai nega ita abia noho hisihisi be bada lasi, to gabeai do ita abia Dirava dekena amo hairaina be bada herea.”—Roma 8:18.
17. Iehova be tanobada helarona idia abia taudia totona dahaka do ia karaia?
17 Danu, tanobada helarona idia abia taudia be Iehova idia hesiai henia totona edia kohu idia haboioa o rakatania, to vaira negana ai Iehova ese edia ahuna do ia henia. Tanobada paradaisona ai, Iehova ese mauri hanaihanai be ibounai dekenai do ia henia. Danu, Iehova ese “matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani.” (Apokalupo 21:4) Gwauhamata hereadaena unai! Ena be Iehova ita badinaia dainai gau haida be mai eda ura ida ita dadaraia o haida ese idia abia, to mauri hanaihanai ese unai gaudia do ia hereaia. Dirava ese inai mauri namona be hisihisi idia haheaukalaia taudia dekenai do ia henia.
18. Iehova be Baibel lalonai dahaka ia gwauhamatalaia?
18 Ena be reana hisihisi do ita davaria, to unai ese Dirava ena tanobada matamata lalonai do ia vara mauri hanaihanai do ia hadikaia diba lasi. Tanobada matamata lalonai hisihisi ibounai do idia ore, badina gau hereadaedia sibona do idia vara. Isaia 65:17, 18 ia gwau: “Kara gunadia be do idia laloa lou lasi, do idia laloaboio momokani. Lau ese lau karaia gauna dainai do umui moale bada ela bona hanaihanai.” Unai dainai, Iamesi ena hereva be ia maoro, ia gwau: “Haheauka taudia ese moale idia davaria vadaeni.” (Iamesi 5:11) Oibe, bema hari idia vara hisihisi idauidau ita haheaukalaia, vadaeni hari bona vaira negana ai ita be namo bada ita abia diba.
Edena Bamona Do Oi Haere?
• Edena dala ai hisihisi idia matamaia?
• Tanobada helarona idia abia taudia bona guba helarona idia abia taudia be hisihisi idia abia dainai, dahaka namo do idia davaria?
• Ena be hisihisi ita davaria, to dahaka dainai hari ita moale diba?
[Picture on page 15]
Adamu bona Heva be mauri namona idia abia
[Picture on page 17]
Iesu be hisihisi ia itaia bona mamia dainai, ia be King bona Hahelaga gaukara do ia karaia namonamo
[Picture on page 18]
Aposetolo taudia “edia moale badina be, Dirava ese idia ia abia hidi vadaeni Iesu ena ladana dainai hisihisi do idia abia”