5. Hisihisi Be Do Idia Ore, A?

Dahaka Dainai Ena Haere Ita Diba be Gau Badana?

Bema mai ena badina dainai ita abia dae hisihisi do ia ore, unai bamona helaro ese iseda mauri ia hanamoa bona Dirava totona lalohadai maorona ita abia diba.

Oi Lalohadailaia Totona

Taunimanima momo idia ura hisihisi idia haorea, to idia hegeregere lasi unai idia karaia totona. Mani inai oi laloa:

Ena be gorere hanamoa dala matamatadia idia davaria, to . . .

• Kudou gorere dainai momo idia mase noho.

• Lagani ta ta ai, kensa gorere ese taunimanima milioni momo ia hamasea.

• Doketa tauna, David Bloom ese ia torea buka ta ladana, Frontiers in Immunology ia gwau, “ena be hari muramura momo idia noho, to doketa taudia be hegeregere lasi gorere idauidau idia hanamoa totona. Danu taunimanima be gorere matamatadia idia davaria noho bona unai gorere haida be guna idia itaia lasi.”

Ena be tano ma haida be mai edia moni momo, to . . .

• Lagani ta ta ai, natudia milioni momo idia mase, bona nega momo ogogami taudia idia noho gabudia ai unai ia vara.

• Taunimanima bilioni momo edia noho gabudia idia hagoevaia lasi bona toileti gabu maorodia be lasi.

• Taunimanima milioni momo be ranu namona abia dalana be lasi.

Ena be hari taunimanima momo be ma haida kara henia dalana idia diba, to . . .

• Tano momo ai taunimanima hoihoilaia karana (Human trafficking) be ia vara noho, bona unai kara idia karaia taudia momo idia do panisidia lasi. United Nations ena ripoti ta ia gwau, “badina gavamani taudia be idia diba lasi unai kara ia vara noho eiava hamomokania gaudia be lasi unai idia hamaoromaoroa totona.”

  DIBA MA HAIDA ABIA

  Inai vidio ladana, Dirava Ena Basileia be Dahaka? be jw.org ai oi itaia.

Baibel Ia Gwau

Dirava be ita ia laloa.

Ia be iseda hisihisi bona lalohisihisi ia laloa bada.

“[Dirava] ese hisihisi ia abia noho tauna, dekena amo ia raka siri lasi, to ia laloa noho, bona ia dekenai ia taitai neganai, durua ia henia noho.”​—SALAMO 22:24.

“Emui lalohekwarahi ibounai be ia dekenai umui negea, badina ia be umui ia laloa bada.”​—1 PETERO 5:7.

Hisihisi be do ia noho hanaihanai lasi.

Baibel ia gwauhamata Dirava ena ura ita dekenai be do ia guguru.

“Dirava . . . ese mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore.”​—APOKALUPO 21:3, 4.

Dirava ese taunimanima dekenai hisihisi idia havaraia gaudia do ia haorea.

Iena Basileia amo unai do ia karaia, Baibel ese unai Basileia ia gwauraia gavamani korikorina ta.

“Guba ena Dirava ese basileia ta do ia haginia, inai basileia be do idia hadikaia diba lasi ela bona hanaihanai. Unai basileia be Dirava ese do ia naria, vadaeni bese ta ese do ia halusia diba lasi. . . . ia sibona do ia noho ela bona hanaihanai.”​—DANIELA 2:44.