Inai Heheni Karana​—Unai Kara Oi Hahedinaraia, A?

Inai heheni karana be gorere dikana ta bamona. Ta ia abia neganai, reana maoromaoro do ia diba lasi ia gorere. Taunimanima idia inai heheni badina edia bese, kopina ena kala, iduhu, gado, tomadiho, tau o hahine, eiava dagi be ma haida amo ia idau. Ma haida be ta ena mauri lagani, edukeisen, ia diseibol, eiava ena toana dainai idia hahemaoro henia. To idia laloa, unai be ma haida inai henia karana lasi.

Oi danu be ma haida oi inai henia, a? Ita momo ese ma haida dekenai inai heheni karana ita itaia. To reana do ia auka ita sibona dekenai unai ita itaia totona. Ita gwau diba ita ibounai be nega haida unai kara ita hahedinaraia. Bema taunimanima ese grup ta idia ura henia lasi bona unai grup tauna ta idia hedavari henia neganai, sociology ena profesa David Williams ia gwau, “unai tauna do idia kara namo henia lasi bona idia diba lasi unai bamona idia karaia noho.”

Hegeregere, Jovica be Balkan dekenai ia noho, unuseniai grup ta be momo ese idia ura henia lasi. Ia gwau: “Lau laloa unai grup taudia be taunimanima namodia lasi. Lau diba lasi lau be ma haida lau inai henia noho. To momo edia lalohadai lau abia dae dainai, unai bamona lau laloa.”

Gavamani momo be taravatu idauidau idia atoa inai heheni karadia idia koua totona. Herevana unai idia karaia, to unai kara be ia bada ia lao noho. Dahaka dainai? Badina unai taravatu be ta ena kara sibona ia herevalaia. To taunimanima edia lalohadai eiava hemami ia biagua lasi. Bona inai heheni karana be ta ena lalona bona kudouna amo ia hamatamaia. Anina be inai heheni karana do ita dadaraia diba lasi, a? Nega ta inai heheni karana do ia ore, a?