Ibounai Ita Tamona be Namo, Iehova Bona Iesu Idia Tamona Hegeregerena

1, 2. (a) Iesu be ena guriguri ginigabena ai dahaka ia noia? (b) Dahaka dainai Iesu be lalotamona karana ia laloa bada?

IESU be ena aposetolo taudia ida nega ginigabena idia aniani hebou neganai, ia be lalotamona karana ia laloa bada. Iena guriguri lalonai ia gwau, ia ura ena aposetolo taudia ibounai be do idia tamona, ia bona ena Tamana idia tamona hegeregerena. (Ioane 17:20, 21 duahia.) Bema aposetolo taudia idia lalotamona, unai ese do ia hamomokania Iehova ese Iesu ia siaia tanobada dekenai Dirava ena ura ia karaia totona. Momokani, Iesu ena hahediba taudia korikoridia huanai lalokau ia noho neganai, lalotamona do ia noho.​—⁠Ioa. 13:34, 35.

² Iesu ese lalotamona karana ia herevalaia ena badina be ita lalopararalaia. Iesu ia itaia aposetolo taudia huanai lalotamona be ia noho lasi. Hegeregere, unai hanuaboi ai, “idia huanai hepapahuahu badana ia vara, daika be bada.” (Luka 22:24-27; Mar. 9:33, 34) Ma nega ta ai, Iamesi bona Ioane be Iesu idia noia, idia ura ena Basileia dekenai dagi badana idia abia, ta be Iesu ena idibana kahanai bona ta be ena laurina kahanai do ia helai.​—⁠Mar. 10:35-40.

3. Dahaka badina haida dainai Keriso ena hahediba taudia idia lalotamona lasi, bona edena henanadai toi do ita haerelaia?

³ To dagi o siahu ura henia karana sibona lasi, to ma gau ta ese Keriso ena hahediba taudia edia lalotamona ia hadikaia danu. Unai negai, taunimanima be idia parara badina idia inai heheni. To, Iesu ena hahediba taudia ese unai bamona lalohadai dikadia idia dadaraia be mai anina bada. Inai stadi ai henanadai toi do ita haerelaia: Edena dala ai Iesu be haida edia inai henia karana ia haheaukalaia? Edena dala ai Iesu ese ena hahediba taudia ia durua taunimanima edia toana idia laloa lasi bona idia lalotamona totona? Bona edena dala ai Iesu ena hadibaia dalana ese ita do ia durua ita lalotamona noho totona?

HAIDA ESE IESU BONA ENA HAHEDIBA TAUDIA IDIA INAI HENIA

4. Iesu idia inai henia kava ena haheitalai haida mani oi gwauraia.

⁴ Haida be Iesu idia inai henia danu. Nega ta ai, Filipo ese Natanaela ia hamaoroa ia be Mesia ia davaria, to Natanaela ia gwau: “Gau namona ta be Nasareta amo ia mai diba, a?” (Ioa. 1:46) Reana, Natanaela be Mika 5:2 ena peroveta herevana​—⁠Mesia be Betelehema ai do ia vara​—⁠ia diba, bona ia laloa Nasareta be hegeregere lasi Mesia ena hanua ai ia lao totona. Danu, ladana bada Iuda taudia be Iesu idia laloa maragi, badina ia be Galilea tauna. (Ioa. 7:52) Iuda taudia momo idia laloa idia be Galilea taudia idia hereaia. Ma danu, Iuda taudia haida idia gwau Iesu be Samaria tauna. (Ioa. 8:48) Samaria taudia edia tano bona edia tomadiho be Iuda taudia edia amo idia parara. Iuda taudia bona Galilea taudia be Samaria taudia idia matauraia lasi.​—⁠Ioa. 4:9.

5. Edena dala ai haida ese Iesu ena hahediba taudia idia inai henia kava?

⁵ Unai hegeregerena, Iuda ena gunalaia taudia ese Iesu ena hahediba taudia idia kirikirilaia. Farisea taudia idia gwau Iesu ena hahediba taudia be “Dirava ena lalonamo do idia abia lasi.” (Ioa. 7:47-49) Oibe, bema tau ta be rabi taudia edia sikuli dekenai ia lao lasi o ena sene karadia ia badinaia lasi, Farisea taudia idia laloa ia be tau dikana o dagi lasi tauna. (Kara 4:13) Taunimanima be edia tomadiho, dagi, bona iduhu idia heagilaia dainai, idia ese Iesu bona ena hahediba taudia idia inai henia. Iesu ena hahediba taudia be haida idia inai henia. Unai dainai, idia lalotamona totona, edia laloa dalana idia haidaua o hamaoromaoroa be namo.

6. Edena dala ai haida inai henia lalohadaina ese ita ia biagua ena haheitalaia haida mani oi gwauraia.

⁶ Hari, taunimanima inai henia karana be ia bada. Reana haida be ita idia inai henia, o ita ese ma haida ita inai henia. Australia ai hari painia gaukara ia karaia taihu ta ia gwau: “Lau ese nao taudia lau inai henia badina idia be Aboriginal taudia idia matauraia lasi​—⁠idaunega ema bona hari. Bona nao taudia lau inai henia badina idia haida be guna lau idia kara namo henia lasi.” Canada ai, tadikaka ta be gado haida ia inai henia karana ia herevalaia. Ia gwau: “Lau laloa French gado idia veria taudia be hereadae. Unai dainai, English gado idia veria taudia lau ura henidia lasi.”

7. Edena dala ai Iesu be ta inai henia karana ia dadaraia vaitani?

⁷ Iesu ena negai bamona, haida inai henia karadia ita manadalaia diba. To Iesu be dahaka ia karaia? Ginigunana be, Iesu be ta inai henia karana ia dadaraia vaitani​—⁠ia be taunimanima edia toana ia laloa lasi. Ia haroro henia taudia be, taga taudia, ogogami taudia, Farisea taudia, Samaria taudia, takisi gogoa taudia, bona kara dika taudia. Iharuana be, Iesu ese ena hereva bona kara amo aposetolo taudia ia hadibaia, namona be ma haida dekenai do idia laloa kerere lasi o inai henia kava lasi.

LALOKAU BONA MANAU KARADIA AMO TA INAI HENIA KAVA KARANA HALUSIA

8. Keristani taudia ia hatamonaia gauna badana be dahaka? Gwauraia hedinarai.

⁸ Iesu ese lalotamona ia havaraia gauna badana be aposetolo taudia dekenai ia gwauraia hedinarai. Ia gwau: “Umui ibounai be tadikaka.” (Mataio 23:8, 9 duahia.) Oibe, ita be “tadikaka” badina ita be Adamu ena bese taudia. (Kara 17:26) To unai sibona lasi. Iesu ia gwau, ena hahediba taudia be tadikaka bona taihu badina idia diba Iehova be edia guba Tamana. (Mat. 12:50) Danu, idia be ruma bese badana ta bamona, lalokau bona abidadama ese ia hatamonadia. Unai dainai aposetolo taudia edia revareva lalodiai, nega momo edia hahediba taudia ma haida idia gwauraia ‘tadikaka bona taihu.’​—⁠Roma 1:13; 1 Pet. 2:17; 1 Ioa. 3:13.a

9, 10. (a) Dahaka dainai Iuda taudia ese edia bese idia heagilaia be anina lasi? (b) Bese heagilaia karana dadaraia totona, Iesu be edena sivarai ia gwauraia? (Laulau ginigunana herevalaia.)

⁹ Iesu ia gwau ita be tadikaka bona taihu sibona lasi, to ita manau danu be gau badana. (Mataio 23:11, 12 duahia) Matamanai ita itaia bamona, nega haida aposetolo taudia edia manau lasi karana ese lalotamona ia hadikaia. Bona bese heagilaia karana ese lalotamona ia hadikaia diba. Iuda taudia be Aberahamo ena bese taudia dainai idia heagi be maoro, a? Iuda taudia momo be unai idia heagilaia. To, Ioane Bapatiso be idia dekenai ia gwau: “Dirava be mai ena siahu inai nadi amo Aberahamo totona natudia do ia havaraia.”​—⁠Luka 3:8.

¹⁰ Iesu ia gwau ta ese ena bese ia abia isi o heagilaia be kerere. Hegeregere, nega ta ai, taravatu hadibaia tauna ta ia henanadai: “Daika be egu dekena tauna?” Iesu be ena haere lalonai, Samaria tauna ta ena sivarai ia gwauraia​—⁠unai Samaria tauna ese ia durua Iuda tauna be ena laolao lalonai henaohenao taudia ese idia dadabaia. Ena be idia raka hanai Iuda taudia be bero Iuda tauna idia durua lasi, to Samaria tauna be bero tauna ia durua. Iesu ese unai sivarai ia gwauraia murinai, taravatu hadibaia tauna ia hamaoroa unai Samaria tauna ia tohotohoa be namo. (Luka 10:25-37) Iesu ia gwau, Samaria tauna ta ese neiba lalokau henia karana korikorina be Iuda taudia dekenai ia hadibaia diba.

11. Dahaka dainai aposetolo taudia ese idau taudia idia inai henia be namo lasi, bona edena dala ai Iesu ese idia ia durua unai idia lalopararalaia totona?

¹¹ Iesu ena aposetolo taudia ese haroro gaukara idia hagugurua totona, namona be bese heagilaia karana bona bese ta inai henia karana idia dadaraia. Iesu be guba dekenai ia do daekau lasi neganai, idia ia hamaoroa “Iudea ibounai, Samaria bona tanobada ena daudau momokani gabudia dekenai” idia haroro be namo. (Kara 1:8) Iesu be idau taudia edia kara namodia ia herevalaia, badina ia ura gabeai aposetolo taudia be edia gaukara badana do idia karaia namonamo. Hegeregere, ia ese idau tano ena ami ofesa ta be ena abidadama dainai ia hanamoa. (Mat. 8:5-10) Nasareta ai, Iesu be Iehova ia herevalaia​—⁠edena dala ai Dirava ese idau taudia ia durua, hegeregere Sarepata ai ia noho Poinikia vabu bona Suria lepera tauna Namana. (Luka 4:25-27) Bona Iesu be Samaria hahinena ia haroro henia sibona lasi to dina rua Samaria ena taoni ai ia noho badina ia harorolaia sivarai be taunimanima ese idia abia dae.​—⁠Ioa. 4:21-24, 40.

APOSETOLO EDIA NEGAI TA INAI HENIA KARANA IDIA DADARAIA

12, 13. (a) Iesu ese Samaria hahinena ia haroro henia neganai, aposetolo taudia be dahaka idia karaia? (Laulau ginigunana herevalaia.) (b) Dahaka ese ia hahedinaraia Iamesi bona Ioane ese Iesu ena hereva idia lalopararalaia lasi?

¹² To, aposetolo taudia ese haida inai henia karana idia dadaraia be auka. To idia hoa badina idia itaia Iesu ese Samaria hahinena ta ia hadibaia. (Ioa. 4:9, 27) Reana badina Iuda ena tomadiho gunalaia taudia ese pablik gabudia ai hahine ida herevahereva be taravatu, bona ladana dikana do idia abia bema Samaria hahine idia hereva henia. Aposetolo taudia ese Iesu idia hamaoroa ia aniani be namo. To Iesu ena haere ese ia hahedinaraia ia ura dikadika taunimanima ia hereva henia dainai, ia hitolo be gau badana lasi. Iesu ia diba taunimanima​—⁠Samaria hahine ta danu​—⁠haroro henia gaukarana be ena Tamana ena ura, bona ia dekenai unai be aniani bamona.​—⁠Ioa. 4:31-34.

¹³ Iamesi bona Ioane ese Iesu ena hereva idia lalopararalaia lasi. Hanuaboi ta ai, Iesu bona ena aposetolo taudia be Samaria dekenai mahuta gabuna idia tahua. To, Samaria taudia ese idia abidia dae lasi dainai, Iamesi bona Ioane be mai badu ida idia gwau idia ura guba amo lahi idia boiria diho, Samaria hanua ibounai ia hadikaia ore totona. To Iesu ese idia ia gwau henia. (Luka 9:51-56) Reana do ita henanadai, Iamesi bona Ioane be unai bamona hereva do idia gwauraia bema edia Galilea tanona ai Samaria hanua ia noho, a? Toana be, Iamesi bona Ioane be Samaria taudia idia inai henia bada. Reana Ioane be ena hereva dekenai ia hemarai badina gabeai ia be Samaria taudia haroro henia gaukarana ia moalelaia.​—⁠Kara 8:14, 25.

14. Aposetolo taudia ese gado dainai ia vara hekwakwanai be edena bamona idia hamaoromaoroa?

¹⁴ Pentekoste 33 C.E. murinai, ma haida laloa maragi karana ia matamaia. Tadikaka ese vabu dekenai aniani idia haria neganai, idia ese Grik gado ai idia hereva vabu idia laloa lasi. (Kara 6:1) Reana tadikaka be idia ura lasi Grik gado ai idia hereva. Karaharaga, aposetolo taudia be lo taudia haida idia abia hidi, aniani idia haria namonamo totona. Idia abia hidi taudia ibounai be mai edia Grik ladadia. Unai dainai, reana unai vabu idia moale.

15. Edena dala ai Petero ese ia hahedinaraia, gabeai ia be taunimanima edia toana ia laloa lasi? (Laulau ginigunana herevalaia.)

¹⁵ Lagani 36 C.E.ai, Iesu ena hahediba taudia be bese idauidau idia haroro henia. Aposetolo Petero be nega momo Iuda taudia sibona ia bamoa. To gabeai, Dirava ese ia hahedinaraia, Keristani taudia ese taunimanima edia toana idia laloa lasi be namo, oibe, unai murinai, Petero be Roma soldia ta ladana, Korenelio ia haroro henia. (Kara 10:28, 34, 35 duahia.) Gabeai, Petero be Idau Bese taudia ida ia aniani hebou bona bamodia momo. To lagani momo murinai, Antioka siti ai Petero be Iuda lasi Keristani taudia ida ia aniani hebou karana ia hadokoa. (Gal. 2:11-14) Unai dainai, Paulo ese Petero ia sisiba henia, bona unai sisiba ia abia dae. Petero ese revareva ginigunana be Asia Minor ai idia noho Iuda taudia bona Idau bese Keristani taudia dekenai ia siaia neganai, ia ese tadikaka oreana ibounai ia hagoadaia.​—⁠1 Pet. 1:1; 2:17.

16. Momo idia diba Keristani ginigunadia be edena bamona taudia?

¹⁶ Momokani, Iesu ena haheitalai dainai, aposetolo taudia be “taunimanima idauidau ibounai” lalokau henia karana idia dibaia. (Ioa. 12:32; 1 Tim. 4:10) Oibe, nega daudau lalonai edia laloa dalana idia haidaua. Momo idia diba Keristani ginigunadia be idia lalokau heheni. Toretore tauna Tertullian (100 C.E.) ese Keristani lasi taudia be inai bamona ia gwauraia: “Idia lalokau heheni . . . Idia hegaegae ma ta totona do idia mase.” Keristani ginigunadia be “mauri matamata” idia atoa dainai, idia itaia taunimanima ibounai be hegeregerena​—⁠idia be Dirava ena laloa dalana idia tohotohoa.​—⁠Kol. 3:10, 11.

17. Edena dala ai iseda kudouna lalonai ma haida inai henia lalohadaina ita kokia diba? Haheitalai gwauraia.

¹⁷ Hari, iseda kudouna lalonai danu haida inai henia lalohadaina ita kokia be mai anina bada. France ai, taihu ta ia gwau: “Iehova ese lalokau, hariharibada karana, bona taunimanima idauidau lalokau henia karana edia anina be lau dekenai ia hadibaia. To lau be ma haida lau inai henia noho, bona unai kara lau hanaia totona be auka. Unai dainai, nega ibounai lau guriguri.” Spain ai, taihu ta danu ia gwau: “Nega haida lau gaukara goada bese ta inai henia karana lau dadaraia totona, bona nega momo lau kwalimu. To unai lalohadai dikana kokia totona lau hekwarahi noho be namo. Iehova lau tanikiu henia, badina ia lalotamona ruma besena lalonai lau noho.” Ita ta ta be eda kara o lalohadai ita sekea diba. Unai taihu rua bamona, ita gaukara goada haida inai henia karana ita dadaraia totona, a?

LALOKAU KARANA IA TUBU​—⁠MA HAIDA INAI HENIA KARANA IA MASE

18, 19. (a) Dahaka badina haida dainai taunimanima idauidau ita abia dae? (b) Taunimanima idauidau ita abia dae daladia haida be dahaka?

¹⁸ Namona be ita laloatao: Nega ta, oi eiava lau be idau taudia o Dirava amo ita daudau. (Efe. 2:12) To Iehova be ‘lalokau varo’ amo ita ia veria mai, ia kahirakahira ita noho totona. (Hos. 11:4 NWT; Ioa. 6:44) Bona Keriso ese ita ia abia dae. Ia ese iduara ia kehoa, unai amo Dirava ena ruma bese lalonai ita vareai diba. (Roma 15:7 duahia.) Ena be ita goevadae lasi to Iesu ese ita ia abia dae​—⁠unai dainai, Iesu hegeregerena, taunimanima ibounai ita abia dae!

¹⁹ Inai tanobada ai bona nega dokona lalonai, parara, inai henia kava karana, bona badu karana be do idia bada. (Gal. 5:19-21; 2 Tim. 3:13) To, Iehova ena Witnes taudia be Dirava ena aonega idia tahua, unai amo taunimanima edia toana do idia laloa lasi bona maino ai do idia noho. (Iam. 3:17, 18) Ita moale bema tano ma haida amo idia mai taudia ita tura henia, edia kastom (culture) idauidau ita abia dae bona edia gado ita dibaia. Unai bamona ita karaia neganai, maino be sinavai ia aru lao hegeregerena, bona kara maoromaoro be davara ena hurehure bamona.​—⁠Isa. 48:17, 18.

20. Lalokau ese eda kudouna bona lalona ia haidaua neganai dahaka ia vara?

²⁰ Matamanai ita herevalaia Australia taihuna ia gwau: “Hereva momokani ena iduara be lau totona ia kehoa.” Taihu be Baibel ia stadilaia bona ena namo be inai bamona ia herevalaia: “Egu kudouna bona lalona ia haidaua. Unai dainai, ma haida inai henia karadia ibounai lau dadaraia vaitani.” Bona Canada tadikaka be hari ia laloparara dainai, ia gwau, “taunimanima ita inai henia badina idia ita diba lasi, bona herevana edeseniai ita vara to eda kara ita haidaua diba.” Ia be English gado ia hereva taihu ta ia adavaia! Unai bamona taudia be edia Keristani lalokau dainai edia kara idia haidaua, bona haida inai henia karana idia dadaraia vaitani. Oibe, lalokau be taunimanima ia hatamonaia gauna hereadaena.​—⁠Kol. 3:14.