Lalokau Karana Hahedinaraia

Hekwakwanai

Ma haida inai henia karana ena hemami be do ia ore haraga lasi. Hegeregere, bema ta be gorere badana ta ia abia, namona be do ia hekwarahi ia namo lou totona. Inai heheni karana danu be unai bamona. Dahaka oi karaia diba inai heheni karana oi dadaraia totona?

Baibel Ena Hakaua Herevana

Laulau: 1. Korema tauna ta be kofi ia dogoatao bona Asia tauna ta ese ena iduara ia kehoa. 2. Unai korema tauna be ena gaukara turadia dekenai kofi ia henia, bona laulau ma ta ai ita herevalaia India hahinena dekenai kofi ia henia danu.

“Lalokau be dabua bamona do umui hahedokilaia danu badina ia be taunimanima ia hatamonaia gauna heredaena.”—KOLOSE 3:14.

Ena anina be dahaka? Ma haida kara namo henia karana ese taunimanima ia hatamonaia. Ma haida dekenai lalokau karana oi hahedinaraia neganai, inai heheni karana ena hemami do ia ore ia lao. Bona bema emu lalokau oi habadaia, unai ese oi do ia durua ma haida oi inai henia lasi totona.

Oi Karaia Diba Gauna

Laulau: 1. India hahinena ta ese hahine buruka ta ia durua step amo idia daekau bona ena aniani baege ia dogoatao. 2. Hahine buruka ta be ena dekena tauna dekenai bisket ia abia lau, unai Asia tauna be laulau ginigunana ai ia hedinarai.

Bema taunimanima haida dekenai lalohadai kererena oi abia, namona be idia dekenai lalokau do oi hahedinaraia daladia haida oi laloa. Inai dala ta ta oi badinaia diba:

Lalokau karana oi hahedinaraia neganai, ma haida inai henia karana do oi dadaraia

Unai grup o bese tauna ta oi itaia neganai, kara namodia oi hahedinaraia, hegeregere pablik gabudia ai ena iduara oi kehoa eiava PMV dekenai emu helai gabuna oi henia diba.
Idia ida oi herevahereva, ena be emu gado idia diba namonamo lasi.
Bema edia kara o hereva ta oi lalopararalaia lasi, namona be idia dekenai oi haheauka.
Edia hekwakwanai idia herevalaia neganai, hebogahisi karana oi hahedinaraia.

Sivarai Momokanina: Nazaré (Guinea-Bissau)

“Guna idau tano taudia lau inai henidia. Haida ese lau idia hamaoroa idau tano amo idia mai taudia momo be moni o heduru idia abia totona gavamani idia koia bona idia momo be raskol karadia lalonai idia vareai. Unai dainai ia auka idia lau abia dae totona. To, lau laloa unai bamona hemami be ma ta inai henia karana lasi, badina taunimanima momo ese idau tano taudia be unai bamona idia laloa.

“Gabeai, lau laloparara lau be idau tano taudia lau inai henia. Baibel ena aonega herevana ese lau ia durua idia lau lalokau henia totona. Hari idia lau dadaraia lasi. To idia dekenai hanamoa hereva lau gwauraia bona idia ida lau herevahereva. Lau ura bada idia ta ta lau dibaia namonamo. Hari idia dekenai lalohadai maorona lau abia, bona idia lau inai henia lasi.”