Ma Haida Hebogahisi Henia
Hekwakwanai
Bema hanaihanai ita laloa taunimanima haida be ita amo idia idau, do ita laloa idia be mai edia kerere. Unai ese ma haida inai henia karana ia havaraia diba. Inai lalohadai kererena ita abia matamaia neganai, do ia auka hebogahisi karana ita hahedinaraia totona.
Baibel Ena Hakaua Herevana
“Idia moale taudia ida umui moale, bona idia taitai taudia ida umui taitai.”—ROMA 12:15.
Ena anina be dahaka? Inai Baibel siri ese ita ia hadibaia ma haida ita hebogahisi henia totona. Hebogahisi ita hahedinaraia ena anina be, ma haida edia hemami ita laloa.
Hebogahisi Karana Ena Namo
Ma haida edia hemami ita laloa neganai, do ita diba idia danu be ita bamona. Bona, do ita laloparara edia hemami bona kara be iseda hemami bona kara ida ia hegeregere. Hebogahisi karana ese ita do ia durua taunimanima ibounai be famili tamona bamona do ita laloa, herevana edia mauri dalana be ia idau. Unai bamona ita karaia neganai, idia dekenai lalohadai kereredia do ita abia lasi.
Hebogahisi karana ese ita ia durua diba ma haida ita matauraia totona. Anne-Marie be Senegal amo, guna ena gabu dekenai idia noho taudia haida ia laloa bada lasi. Hebogahisi karana ese Anne-Marie ia durua, ia gwau: “Unai taudia ese idia davaria mauri aukana lau itaia neganai, sibona lau henanadai, ‘Edena bamona do lau mamia bema egu noho dalana be unai bamona?’ Unai amo lau laloparara, lau ese unai taudia lau hereaia lasi.” Oibe, bema ma haida ese idia davaria hekwakwanai ita lalopararalaia, idia dekenai hebogahisi karana do ita hahedinaraia.
Oi Karaia Diba Gauna
Bema ma haida dekenai lalohadai kerere oi abia, reana edia kara bona hemami be oi sibona ida oi hahegeregerea. Hegeregere, oi laloa edia hemami be edena bamona
Ma haida edia namo ita laloa neganai, unai ese ita ia durua diba taunimanima ibounai be famili tamona bamona ita laloa totona
edia famili ida idia aniani hebou neganai
edia gaukara idia hagugurua neganai
turadia ida idia moale hebou neganai
idia ura henia miusiki idia kamonai neganai
Bena, idia ida sibona oi hahegeregerea. Oi henanadai:
‘Dahaka do lau karaia bema ta ena kara o hereva dainai lau mamia lau be anina lasi?’
‘Egu hemami be edena bamona bema lau ia diba lasi tauna ese lau ia hahemaoro henia kava?’
‘Bema unai grup lalonai lau noho, lau ura taunimanima ese lau be edena bamona do idia kara henia?’