Dirava be Ita Ia Hebogahisi Henia, A?

HAVARAIA GAUDIA AMO ITA DIBAIA GAUNA

Hebogahisi karana ena anina be, “ta ena hemami o ia davaria hekwakwanai umui herevalaia hebou karana, badina ia davaria hekwakwanai oi mamia danu.” Mental-health ena Doketa Rick Hanson ia gwau: “Ita vara neganai, hebogahisi karana be iseda lalona ai ia noho.”

MANI OI LALOA: Dirava ese ia havaraia gaudia ibounai amo, dahaka dainai ita taunimanima be hebogahisi karana ita hahedinaraia diba? Baibel ese ia hahedinaraia Dirava ese taunimanima be iena toana hegeregerena ia karaia. (Genese 1:26) Dirava ese iena toana hegeregerena ita ia karaia dainai ia ita tohotohoa, bona iena kara namodia ita hahedinaraia diba. Unai dainai, taunimanima namodia haida be ma haida durua totona unai kara idia hahedinaraia neganai, edia Havaraia Tauna, Iehova Dirava ena hebogahisi karana idia tohotohoa.​—Aonega Herevadia 14:31.

BAIBEL ESE DIRAVA ENA HEBOGAHISI KARANA IA HADIBAIA DALANA

Dirava be ita ia hebogahisi henia, bona ia ura lasi ita hisihisi. Israela taudia edia negai, idia be Aigupito ai igui hesiai maurina idia haheaukalaia bona lagani 40 lalonai tano gagaena ai hekwakwanai momo idia davaria. Baibel ese idia davaria hisihisi be inai bamona ia gwauraia: “Edia lalometau negadia ibounai ai ia lalometau.” (Isaia 63:9, NWT) Laloatao, Dirava be edia hisihisi ia itaia sibona lasi, to idia davaria hisihisi ia mamia danu. Dirava ia gwau: “Edia hisihisi lau diba vadaeni.” (Esodo 3:7) Ma ia gwau: “Umui ia hadikaia tauna be egu matana ia daua toho noho.” (Sekaraia 2:8, NWT) Ma haida ese ita idia hahisia neganai, ia lalohisihisi danu.

Herevana nega haida ita laloa Dirava be ita ia laloa lasi bona ita ia hebogahisi henia lasi, to Baibel ese ita ia hagoadaia, “Dirava be iseda kudouna ia hereaia bona gau ibounai ia diba.” (1 Ioane 3:19, 20) Dirava be ita ia diba namonamo. Ia be iseda noho dalana, lalohadai bona hemami ia diba. Ia ese ita ia hebogahisi henia.

Baibel ese ita ia hadibaia

• “Umui guriguri neganai lau ese umui do lau haere henia. Lau dekenai umui boiboi neganai, lau be do lau kamonai henia.”​—ISAIA 58:9.

• “Lau Lohiabada ese egu palani umui totona lau diba. Lau ese umui do lau durua, vadaeni noho namo do umui davaria, dika ta lasi. Bona natuna momo do umui havaraia, emui bese hagoadaia totona. Bona bema umui ese lau dekenai do umui boiboi, ma lau dekenai do umui guriguri henia neganai, lau ese umui dekenai do lau kamonai henia.”​—IEREMIA 29:11, 12.

• “Egu matana ena ranu be oiemu kavabu dekenai do oi udaia. Oiemu buka lalonai idia torea vadaeni, ani?”​—SALAMO 56:8.

DIRAVA BE ISEDA HISIHISI IA ITAIA, IA LALOPARARALAIA BONA IA MAMIA

Ita diba Dirava be ita ia hebogahisi henia. Unai ita dibaia karana ese ita do ia durua hekwakwanai ita haheaukalaia totona, a? Maria ena ekspiriens mani ita laloa:

Ia gwau, “egu natuna merona, ena mauri lagani 18, be lagani rua lalonai kensa gorerena dainai ia mase. Unai ia vara murinai lau lalohisihisi bada, lau mamia mauri be ia auka bona unai be maoro lasi. Iehova lau badu henia badina egu natuna ena gorere ia hanamoa lasi!

“Lagani siks murinai, kongrigeisen ai tura namona ta dekenai egu hemami lau gwauraia, bona ia kamonai namonamo; Ia lau hamaoroa Iehova be lau ia lalokau henia lasi. Hora momo lalonai egu hereva ia kamonai namonamo murinai, egu kudouna ia hamarerea Baibel sirina ta ia gwauraia. Unai be 1 Ioane 3:19, 20, ia gwau: “Dirava be iseda kudouna ia hereaia bona gau ibounai ia diba.” Unai taihu ese ia hahedinaraia, Iehova be iseda hisihisi ia lalopararalaia.

“Herevana unai ia vara, to ia auka egu badu karana lau rakatania totona! Bena Salamo 94:19 lau duahia, ia gwau: ‘Egu lalona ia hekwarahi momo neganai, oi ese lau oi hagoadaia, bona egu lauma oi hamoalea noho.’ Lau mamia toana be unai siri be lau totona idia torea! Gabeai, goada lau abia bona Iehova dekenai egu lalohisihisi lau herevalaia, badina lau diba ia ese lau ia kamonai henia bona egu hemami ia lalopararalaia.”

Dirava ese ita ia lalopararalaia bona hebogahisi henia karana ese ita ia hagoadaia bada, ani? To, dahaka dainai hisihisi momo ita davaria noho? Iseda kara dika dainai Dirava ese ita ia panisia noho, a? Dirava be hisihisi ibounai ia haorea totona kara ta do ia karaia, a? Unai henanadai edia haere be atikol ma haida ai do ita herevalaia.