Edena Dala ai Abia Hidi Oi Karaia Diba?
“Iunives be sibona ia vara kava diba.”—Stephen Hawking bona Leonard Mlodinow, physicists, 2010.
“Dirava ese guba bona tanobada ia havaraia.”—Baibel, Genese 1:1.
Iunives bona mauri gaudia be Dirava ese ia havaraia eiava ia vara kava, a? Inai atikol ena matamanai ia noho iunives stadilaia taudia rua bona Baibel bukana Genese 1:1 ese unai henanadai totona haere idaudia rua ia henia. Taunimanima haida be unai lalohadai ta ta idia abia dae. To, momo idia do daradara noho. Buka bona TV program ai, momo ese unai lalohadai dekenai idia hepapahuahu.
Reana emu sikuli tisa be mai goada ida ia gwau, iunives bona mauri be idia vara kava bona Havaraia Tauna be ia noho lasi. To, emu tisa ese Havaraia Tauna ia noho lasi ena hamomokania gaudia ia hahedinaraia, a? Danu reana oi kamonai tomadiho gunalaia taudia idia gwau Havaraia Tauna ia noho. To, idia ese hamomokania gaudia idia gwauraia, a? Eiava idia gwau ena be hamomokania gaudia be lasi, to Dirava oi abidadama henia sibona be namo, a?
Reana unai henanadai oi lalohadailaia bona oi mamia ta ese Havaraia Tauna ia noho eiava lasi, ia herevalaia namonamo lasi. Bona reana oi laloa: Haere tahua karana be mai anina bada, a?
Inai Noga! magasin be taunimanima ese Havaraia Tauna idia abidadama henia ena hamomokania gaudia haida ia hahedinaraia. Danu tanobada ai mauri ia matamaia dalana ita diba be mai anina bada ena badina ia herevalaia.