Iunives amo Ita Dibaia Gaudia

Iunives be orea ta ta ai idia gaukara. Astronomy magasin ena atikol ta ia gwau: “Galaksi be guba ai idia noho kava lasi, to spaida web ena pattern bamona idia noho namonamo.” Edena dala ai unai ia vara? Saiens taudia idia abia dae unai ena badina be ita itaia lasi gauna (dark matter) ese ia durua. Unai dark matter be “ita itaia diba lasi, ena toana be scaffolding bamona. . . . unai ena graviti ese galaksi, galaksi klasta, bona galaksi klasta badadia . . . ia dogoatao dainai gabu korikorina ai idia noho.”

Dahaka dainai hisiu, galaksi, planeti idauidau be orea ta ta ai idia gaukara namonamo? Unai ibounai be idia vara kava, a? Allan Sandage be “lagani 100 gunanai guba ia stadilaia diba bada tauna ta,” bona Dirava ia abidadama henia. Mani ena hereva oi laloa.

Ia gwau, “lau abia dae iunives lalonai idia noho gaudia idia gaukara namonamo karana be ia vara kava lasi. To ta ese ia karaia namonamo.”

Iunives be mauri gaudia ia durua. Dina ia araia noho totona ia abia goada ena bada (weak force) ena hetoana mani ita laloa. Dina do ia hedinarai lasi, bema ia abia goada be maragi. To bema dina ia abia goada be bada momokani, unai ese dina ia gabua ore diba.

Iunives ai idia noho taravatu ese mauri gaudia ia durua noho. Saiens tauna Anil Ananthaswamy ia gwau, bema taravatu ta ia noho lasi, “hisiu, planeti, bona galaksi do idia hedinarai lasi. Bona mauri gaudia ibounai danu do idia noho lasi.”

Tanobada be gabu namona taunimanima totona. Tanobada ai hodahoda namona, ranu momo idia noho, bona hua ena sais maorona ese tanobada ia durua ena gabu ai ia noho totona. National Geographic magasin ia gwau, “geology, ecology, bona biology, idia gaukara hebou dainai, saiens taudia idia davaria inai nadi idauna [tanobada] sibona ai taunimanima idia noho diba.”a

Toretore tauna ta ia gwau, iseda sola sistem o tanobada be iseda galaksi lalonai idia noho “hisiu haida amo ia daudau.” Unai dainai tanobada ai mauri gaudia idia noho diba. Bema hisiu kahirakahira ita noho, ena siahu be bada dainai iseda galaksi eiava mauri gaudia ia hadikaia diba. To, galaksi lalonai tanobada be gabu maorona ai ia noho dainai mauri gaudia idia noho diba.

Iunives bona ena taravatu ia stadilaia saiens tauna Paul Davies be ia dibaia gaudia amo ia gwau: “Lau laloa lasi mauri be ia vara kava eiava gau ta amo sibona ia vara. . . . Iseda mauri be mai ena badina.” Davies ia hadibaia lasi Dirava ese iunives bona taunimanima ia havaraia, to dahaka oi laloa? Iunives bona tanobada ia noho dainai mauri gaudia idia noho diba. Unai ese ia hahedinaraia ta ese idia ia havaraia, a?